Ọghẹnẹ ọ ta kẹ Adamu kpahe ure na nọ: “Evaọ ẹdẹ nọ whọ re riẹ who ti whu hrọ.” (Emuhọ 2:17) O hae jọnọ Ọghẹnẹ ọ ma Adamu re ọ who je whu, ọ hae te kẹe uzi yena ha. Adamu omariẹ ọ riẹ nọ ọ gbẹ re ubi-ure na ha, o ti whu hu.

Adamu avọ Ivi a gbẹ make re ubi-ure yena ha, a rẹ jọ uzuazọ ghele keme ibi-ire efa buobu e jọ ogba na. (Emuhọ 2:9) O hae jọnọ Adamu avọ Ivi a siọ ubi-ure na ba ẹre, a hai dhesẹ nọ a bi yoẹme kẹ Ọghẹnẹ, ọnọ ọ kẹ rai uzuazọ. Ofariẹ, a hai ti dhesẹ nọ a vuhumu inọ Ọghẹnẹ ọvo o wo udu nọ ọ sae rọ vuẹ ae oware nọ a re ru.

Re ma riẹ oware nọ o wha riẹ ze nọ Adamu avọ Ivi a ro whu, o gwọlọ nọ ma rẹ kake riẹ kpahe oware jọ nọ o via evaọ ọgbọ Idẹn nọ u kpomahọ omai kpobi na. Setan ọ rọ araomuomu ta ọrue nọ o wha uye ze. Ebaibol na ọ ta nọ: “Whaọ araomuomu na ọ jọ arao nọ ọ rẹ mai fiẹrohotọ evaọ usu erao ẹwọ kpobi nọ Jihova Ọghẹnẹ ọ ma na. Fikiere ọ tẹ ta kẹ aye na nọ: ‘Kọ Ọghẹnẹ ọ ginẹ ta nọ wha rẹ re ubi-ure kpobi evaọ ọgbọ na ha?’”​—Emuhọ 3:1.

Ivi o te yo kẹe nọ: “Ma rẹ sae re ibi-ire ọgbọ na. Rekọ Ọghẹnẹ ọ ta kpahe ubi orọ ure nọ o rrọ udevie ọgbọ na nọ: ‘Wha rẹ jariẹ re vievie he, ijo, wha rẹ rọ obọ tei vievie he; o gbẹ rrọ ere he wha ti whu.’” Araomuomu na ọ tẹ ta kẹ aye na nọ: “Wha ti whu vievie he. Keme Ọghẹnẹ ọ riẹ nọ evaọ ẹdẹ nọ wha re riẹ, ibiaro rai i ti rovie, yọ wha te jọ wọhọ Ọghẹnẹ, wha vẹ te riẹ ewoma gbe eyoma.” Ẹme nọ Setan ọ be jọ etenẹ ta na họ, Ọghẹnẹ yọ ọtọrue, yọ Ọghẹnẹ ọ be ko oware uwoma jọ dhere Adamu avọ Ivi.​—Emuhọ 3:2-5.

Ivi ọ rọwo ẹme Setan na. O te rri ure na jẹ ruẹ nọ ure na u woma kẹ emuore, o tẹ jẹ rrọ oware nọ u re si urru. Fikiere, ọ tẹ kọrọ ubi-ure na je mu ei họ ẹre. Ebaibol na ọ tẹ ta nọ: “Onana o vrẹ no, ọ tẹ jẹ kẹ ọzae riẹ okenọ ọ jọ kugbei, o te muhọ ẹre.”​—Emuhọ 3:6.

Ma riẹ nọ o da Ọghẹnẹ gaga nọ ọ ruẹ nọ Adamu avọ Ivi nọ o you gaga na, a keke aro fihọ ghẹmeeyo kẹe! Kọ eme Ọghẹnẹ o ru? Ọ ta kẹ Adamu nọ: “Who [ti] zihe kpohọ otọ, keme otọ a rehọ owhẹ no ze. Keme whẹ yọ ẹkpẹ yọ ẹkpẹ who ti zihe kpohọ.” (Emuhọ 3:17-19) Fiki oware nana, “edẹ uzuazọ Adamu nọ ọ rria kpobi i bu te ikpe egba izii gbe ọgba (930), kẹsena o te whu.” (Emuhọ 5:5) Nọ Adamu o whu no, o kpohọ obọ odhiwu hayo akpọ izi jọ nyae rria ha. Taure Ọghẹnẹ ọ tẹ te ma Adamu no otọ na ze, ọ jọ oria ọvo ho. Fikiere evaọ  okenọ o whu, ọ gbẹ jọ oria ọvo ho, ukpoye, o ku uzuazọ riẹ kufiẹ je zihe kpohọ ẹkpẹ nọ a ma riẹ no ze. U yoma kẹhẹ!

Fikinọ Adamu avọ Ivi a keke aro fihọ ghẹmeeyo kẹ Ọghẹnẹ, a ku uzuazọ ọgbagba nọ a hae te rọ rria bẹdẹ bẹdẹ kufiẹ. Nọ a thọ uzi no, ugboma rai u te nwene, a te zihe ruọ ahwo nọ a gba ha gbe erahaizi. Rekọ ae ọvo uzioraha rai u kpomahọ họ. Emọ rai a reuku uzioraha mi ai. Obe Ahwo Rom 5:12 o ta nọ: “Wọhọ epanọ uzioraha o rọ ẹkwoma omọvo ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no.”

Ebaibol na o dhesẹ uzioraha avọ uwhu wọhọ ‘ohọ nọ u ruru ahwo kpobi gbe ohọ nọ a si ruru erẹwho na kpobi.’ (Aizaya 25:7) Ohọ yena u ruru ahwo-akpọ kpobi wọhọ igrigri nọ enua e vọ, nọ ohwo ọvo ọ rẹ sae vabọ no ho. Uzẹme riẹ họ, “ahwo kpobi a bi whu fiki Adamu.” (1 Ahwo Kọrint 15:22) Pọl ukọ na ọ nọ onọ nọ mai kpobi ma rẹ sae nọ inọ: “Ono o ti siwi omẹ no ugboma nọ u bi su omẹ kpohọ uwhu nana?” Kọ ohwo jọ ọ riẹ?​—Ahwo Rom 7:24.