Kọ gheghe gheghe ma rọ gwọlọ nọ ma rẹ rria bẹdẹ bẹdẹ? Ijo! Ebaibol na ọ ta nọ Ọghẹnẹ o fi isiuru uzuazọ ebẹdẹ bẹdẹ họ omai udu. (Ọtausiuwoma Na 3:11) Ebaibol na ọ tẹ jẹ ta nọ “Ọghẹnẹ họ uyoyou.” (1 Jọn 4:8) O hae jọnọ Ọghẹnẹ ọ gwọlọ nọ ma rria bẹdẹ bẹdẹ hẹ, ọ hai ti fi isiuru uzuazọ ebẹdẹ bẹdẹ họ omai udu hu keme Ọghẹnẹ oyoyou ọ rrọ.

Ohwo ọvo ọ gwọlọ whu hu. Ebaibol na o tube dhesẹ uwhu wọhọ “ọwegrẹ.” (1 Ahwo Kọrint 15:26) Ahwo jọ a re whu evaọ udhu rai, rekọ ahwo jọ a rẹ tọ gaga. Oghẹrẹ kpobi nọ o rrọ kẹhẹ, ohwo ọvo ọ rẹ sae va uwhu abọ họ. Ozọ o re mu ahwo buobu nọ a te roro kpahe uwhu. Kọ uwhu u ti no otọ ẹdẹjọ? Kọ ahwo a te seba ewhu ẹdẹjọ?

O jọ ẹjiroro Ọghẹnẹ no otọ ze he re ahwo a whu. Obe Emuhọ Ebaibol na o kẹ omai imuẹro nọ i dhesẹ inọ Ọghẹnẹ ọ ma omai re ma rria otọakpọ na bẹdẹ bẹdẹ. Ọghẹnẹ ọ ma eware nọ ahwo-akpọ a sai ro yeri uzuazọ je wo evawere fihọ otọakpọ na. Kẹsena Ọghẹnẹ ọ tẹ ma ọzae ọsosuọ, Adamu fihọ ọgbọ owowoma nọ a re se Idẹn. Nọ oyena o vrẹ no, “Ọghẹnẹ ọ tẹ ruẹ nọ eware kpobi nọ ọ ma i woma gaga.”​—Emuhọ 1:26, 31.

Ọghẹnẹ ọ ma Adamu gbagba evaọ uwoho riẹ. (Iziewariẹ 32:4) Aye Adamu nọ a re se Ivi ọ jọ ohwo ọgbagba re evaọ ugboma gbe iroro. Jihova ọ ta  kẹ ae nọ: “Wha vihọ re wha jọ buobu, wha vọ otọakpọ na je woi, je su iyei abade na gbe emama nọ e rẹ rra evaọ obọ ehru na gbe omama nọ o rrọ uzuazọ kpobi nọ o rẹ nya evaọ otọakpọ na.”​—Emuhọ 1:28.

Re Adamu avọ Ivi a sae yẹ emọ nọ e rẹ vọ otọakpọ na, o te rehọ oke. O gwọlọ nọ Ivi o re yẹ emọ, emọ riẹ na a ve je yẹ emọ bẹsenọ otọakpọ na kpobi o rẹ vọ avọ ahwo wọhọ epanọ Ọghẹnẹ ọ gwọlọ. (Aizaya 45:18) Orọnikọ Ọghẹnẹ ọ gwọlọ nọ Adamu avọ Ivi a rria kri te epanọ a sae rọ ruẹ emọ rai gbe emọ iruọmọ rai ọvo ho. O hae jọ nọ a rẹ rria omoke kpẹkpẹe a ve whu, a hae te riẹ hẹ sọ emọ rai e ginẹ vọ akpọ na.

Ofariẹ, roro kpahe iruo nọ ọ kẹ rai; ọ ta kẹ ae nọ a su erao na kpobi. Ọghẹnẹ ọ ta kẹ Adamu nọ o mu edẹ kẹ erao na, yọ u muẹro nọ onana o hae te rehọ oke gaga. (Emuhọ 2:19) Re Adamu ọ sae su erao na, o gwọlọ nọ o re wuhrẹ kpahe erao na kpobi, jẹ riẹ oghẹrẹ nọ ọ sae rọ rẹrote ai. Onana o hae te rehọ oke vi iruo nọ ọ kẹ riẹ re o mu edẹ kẹ erao na.

Fikiere, iruo nọ Ọghẹnẹ ọ kẹ Adamu avọ Ivi re a yẹ emọ vọ akpọ na je su erao na u dhesẹ nọ ọ ma ọzae-avọ-aye ọsosuọ na re a rria bẹdẹ bẹdẹ. Uzẹme riẹ họ, Adamu ọ ginẹ rria kri gaga.

Ebaibol na o dhesẹ nọ ahwo a jẹ rria kri gaga evaọ oke nọ u kpemu vi epanọ ma be rria kri te nẹnẹ na. Ebaibol na ọ ta nọ: “Edẹ uzuazọ Adamu nọ ọ rria kpobi i bu te ikpe egba izii gbe ọgba (930).” Kẹsena Ebaibol na ọ tẹ fodẹ imazeza efa nọ e rria kri vrẹ ikpe egba izii (900). Ahwo nana họ, Sẹt, Enọsh, Kinan, Jerẹd, Mẹtusẹla, gbe Noa. Aikpobi na a rria uzuazọ taure Owhe edẹ Noa o te ti ku ze, yọ Noa ọ rria ikpe egba ezeza (600) taure Owhe na o te ti ku ze. (Emuhọ 5:​5-27; 7:6; 9:29) Fikieme ahwo a jẹ sae rọ rria kri tere?

Ezae nana kpobi a rria kẹle oke nọ ahwo-akpọ a gbẹ rọ jọ gbagba. Ẹsejọhọ oware nana u ru nọ a jẹ rọ rria kri tere na. Rekọ eme ẹgbagba avọ uzuazọ uthethei a wo kugbe? Ẹvẹ uwhu u ti ro no otọ? Re ma sae kẹ iyo enọ nana, o gwọlọ nọ ma rẹ riẹ oware nọ o wha riẹ ze nọ ahwo a be rọ who je whu.