DEDE nọ aghẹmeeyo ọsẹgboni ọsosuọ mai, Adamu avọ Ivi, o wha uzioraha gbe uwhu se omai kpobi, ẹjiroro nọ Ọghẹnẹ o wo kẹ ahwo-akpọ o ri nwene he. No emuhọ rite ekuhọ Ebaibol na, Ọghẹnẹ ọ jọ Ẹme riẹ dhesẹ nọ ẹjiroro riẹ o ri nwene he.

• “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.”​—Olezi 37:29.

• “Ọ te lọ uwhu no bẹdẹ bẹdẹ, yọ Jihova Olori nọ Ọ Mai Kpehru na o ti ririe irui-oviẹ no ovao kpobi.”​—Aizaya 25:8.

• “Yọ a ti si uwhu, ọwegrẹ urere na no otọ.”​—1 Ahwo Kọrint 15:26.

• “Uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”​—Eviavia 21:4.

Ẹvẹ Ọghẹnẹ ọ te rọ “lọ uwhu no” re o si uwhu, ọwegrẹ na no otọ? Wọhọ epanọ ma ruẹ na, Ebaibol na ọ ta nọ “ahwo okiẹrẹe na a te . . . [rria] bẹdẹ bẹdẹ.” Rekọ ọ ta re nọ “ohwo okiẹrẹe ọvuọvo ọ rrọ otọakpọ na ha nọ o re ru oware uwoma ẹsikpobi.” (Ọtausiuwoma Na 7:20) Kọ onana u dhesẹ nọ Ọghẹnẹ o ti gbabọkẹ izi ikiẹrẹe riẹ re ọ sai si uwhu no otọ? Dazigbe! Ọghẹnẹ ọ sai ru oware utioye vievie he keme “ọ rẹ sae ta ọrue he.” (Taitọs 1:2) Nọ o rrọ ere na, eme Ọghẹnẹ o ti ru re ọ sai ru ẹjiroro riẹ gba kẹ ahwo-akpọ?

Jihova Ọghẹnẹ o ru ọruẹrẹfihotọ owoma jọ re ọ sai siwi ahwo-akpọ no igbo uwhu​—ọ hwa osa rọ ta omai no igbo. Ẹtanigbo yọ osa nọ u te oware hayo osa nọ a rẹ hwa re a sai siobọno ohwo nọ a mu. Nọ orọnọ ahwo-akpọ kpobi yọ erahaizi nọ a bruoziẹ uwhu kpe no na, Ebaibol na ọ ta vevẹ nọ: “Ọvuọvo rai ọ rẹ sae ta oniọvo vievie he hayo kẹ Ọghẹnẹ ẹtanigbo riẹ hẹ, (osa ẹtanigbo rọkẹ uzuazọ rai o rrọ ghaghae gaga fikiere a rẹ sae hwae vievie he).”​—Olezi 49:7, 8.

Nọ ohwo-akpọ o te whu no, yọ ọ hwa osa izieraha riẹ no; ọ rẹ sae ta omariẹ no igbo ho yọ ọ sae hwa osa izieraha amọfa gbe he. (Ahwo Rom 6:7) Ma gwọlọ ohwo nọ ọ rrọ gbagba jẹ kare uzioraha nọ ọ rẹ rehọ uzuazọ riẹ dheidhe fiki izieraha mai.​—Ahwo Hibru 10:1-4.

Oware utioye Ọghẹnẹ ọ nwani ru kẹ omai. O vi Ọmọ ọvo riẹ, Jesu no obọ odhiwu ze re a yẹe evaọ otọakpọ, fikiere ọ jọ ohwo ọgbagba nọ ọ kare uzioraha. (1 Pita 2:22) Jesu ọ ta nọ ọ ziọ otọakpọ re o “siobọno uzuazọ riẹ rọkẹ ẹtanigbo ahwo buobu.” (Mak 10:45) Jesu ọ rọ uwhu riẹ hwa osa izieraha mai re ma sai wo uzuazọ.​—Jọn 3:16.

Nẹnẹ, wọhọ epanọ a ruẹaro riẹ evaọ Ebaibol na, “oke obẹbẹ nọ o rẹ bẹ ẹria” ma be rria na, yọ onana u dhesẹ nọ “edẹ urere” akpọ omuomu nana ma rrọ na. (2 Timoti 3:1) Edẹ urere na i ti su kpohọ “ẹdẹ ẹdhoguo gbe ẹdẹ nọ a te rọ raha ahwo nọ a riẹ Ọghẹnẹ hẹ.” (2 Pita 3:3, 7) Rekọ ahwo nọ a you Ọghẹnẹ a te zọ evaọ ọraha na je wo “uzuazọ ebẹdẹ bẹdẹ.”​—Matiu 25:46.

Ọghẹnẹ ọ te kpare ima ahwo buobu gbidi gbidi nọ i whu no ze, fikiere a ti wo uvẹ nọ a te rọ rria bẹdẹ bẹdẹ. Nọ Jesu ọ jọ otọakpọ, ọ kpare ohwo jọ no uwhu ze evaọ okenọ o weze kpohọ ẹwho jọ nọ a re se Nein. Evaọ oke yena, a jẹ wọ ọmọ ọvo aye-uku jọ nyai ki. Nọ Jesu ọ ruẹ aye-uku na, “ohrọ riẹ  o tẹ re iẹe,” fikiere ọ tẹ kpare ọmọ na no uwhu ze. (Luk 7:11-15) Ofariẹ, Pọl ukọ na ọ ta nọ: “Me wo ẹruore kpahe Ọghẹnẹ . . . inọ ẹkparomatha enọ i kiẹrẹe gbe enọ i kiẹrẹe he ọ te jọ.” Ẹruore nana o muẹro, yọ u dhesẹ epanọ Ọghẹnẹ o you ahwo-akpọ te.​—Iruẹru Ikọ 24:15.

Ima ahwo buobu gbidi gbidi a te rria bẹbẹ bẹdẹ evaọ obaro. Ebaibol na ọ ta nọ: “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.” (Olezi 37:29) Evaọ oke yena, a te ruẹ orugba eme omosasọ nọ Pọl ukọ na o kere oware wọhọ ikpe idu ivẹ (2,000) nọ i kpemu inọ: “Uwhu, obokparọ ra o rrọ? Uwhu, obi ra ọ rrọ?” (1 Ahwo Kọrint 15:55) Evaọ oke yena yọ Ọghẹnẹ ọ raha uwhu nọ ọ rrọ ọwegrẹ ahwo-akpọ na no!