DAE rehọ iẹe nọ who bi rri ividio ọgba-ile jọ nọ a riẹ ziezi, ẹsejọhọ ọgba-ile na ọ were owhẹ gaga. Ividio na i muhọ evaọ okenọ ọ rọ jọ ọmaha, kẹsena a te dhesẹ okenọ o je ro wuhrẹ epanọ a rẹ so ile. Uwhremu na a te dhesẹ iẹe evaọ okenọ o bi ro no eria ruọ eria nyae so ile, gbe epanọ o ro zihe ruọ ọgba-ile nọ a riẹ evaọ akpọ na soso. Ukuhọ riẹ a te dhesẹ okenọ ọ rọ kpako no je whu​—ere ividio na o ro kuhọ.

Orọnikọ ividio na yọ iku gheghe he rekọ oware nọ o ginẹ via kẹ ohwo jọ dẹẹ. Makọ oghẹrẹ nọ ohwo ọ viodẹ te kẹhẹ evaọ akpọ na, te ohwo na ọ rrọ ọgba-ile, ọgba-eriariẹ, ọgba ohrẹ-odhẹ, hayo oghẹrẹ ohwo jọ kpobi kẹhẹ, oware ọvona o rẹ via kẹ ohwo kpobi. O sae jọnọ ohwo na o ru eware iwoma buobu no, yọ o rrọ owhẹ oma nọ ohwo na ọ hai ti ru eware efa buobu evaọ uzuazọ o gbẹ rrọ owho gbe uwhu hu.

U yoma gaga inọ ohwo ọvo ọ sae va uwhu abọ họ. (Ọtausiuwoma Na 9:5) Oghẹrẹ kpobi nọ ahwo-akpọ a daoma te kẹhẹ, a rẹ who je whu ghele. Ofariẹ, ohwo ọ sai whu idudhe nọ o te wo asidẹnte hayo nọ o te kie okpẹyao. Ebaibol na ọ ta vevẹ nọ mai ahwo-akpọ ma wọhọ igrigri nọ e rẹ “romavia omoke jọ e vẹ rayẹ no.”​—Jemis 4:14.

Fikinọ ohwo-akpọ o bi kri ewhu hu, ahwo jọ a bi yeri uzuazọ epanọ u je rai. A rẹ ta nọ, “joma re jẹ da, keme odẹnotha ma ti whu.” (1 Ahwo Kọrint 15:32) Fikinọ ahwo jọ a roro nọ a sai whu kpregede, o wha riẹ ze nọ a bi ro yeri oghẹrẹ uzuazọ otiọye na keme a roro nọ ẹruore ọ rrọ oria ovo ho. Ẹsejọ evaọ uzuazọ, maero nọ ohwo mai jọ o te whu, ma sae nọ inọ, ‘Kọ enẹ uzuazọ u ro kuhọ?’ Diẹse ma sae jọ ruẹ uyo onọ nana?

Ahwo buobu a re roro nọ egba-eriariẹ a te sae kuyo onọ na. Enẹna ahwo a be rria kri omojọ fiki ẹnyaharo nọ ahwo-akpọ a bi wo evaọ ofẹ imu gbe otokiẹ-eriariẹ. Egba-eriariẹ jọ a gbẹ be daoma re a ru imu nọ i re fiobọhọ kẹ ahwo rria kri vi epanọ a be rria nẹnẹ na. Makọ oware nọ egba-eriariẹ a ru kpobi kẹhẹ, enọ jọ nọ ma rẹ gbẹ nọ ghele họ: Fikieme ahwo-akpọ a be rọ who je whu? Kọ ma wo ẹruore nọ uwhu u ti no otọ ẹdẹjọ? Ma te kuyo enọ yena evaọ izoẹme nọ e rrọ obaro na. Ma te jẹ kuyo onọ nana: Kọ uzuazọ na kpobi ọna?