OTẸRỌNỌ ohwo o whu ku owhẹ no ẹdẹjọ, o sae jọ owhẹ oma epọvo na re. Uweri o rẹ da owhẹ oma fia, whọ rẹ jọ goli, yọ o rẹ jọ owhẹ oma inọ dodokọ whọ sae whaha uwhu na. Ẹsejọ dede, eva e sae dha owhẹ, udu u re brukpe owhẹ, yọ ozọ u re mu owhẹ. Whọ sai tube roro nọ o mai woma re who whu lele ohwo na.

O thọ vievie he re ohwo o weri, o tẹ make rọnọ o rehọ oke. Onana u dhesẹ epanọ who you ohwo na te. Ghele na, kọ whọ sai wo omosasọ nọ ohwo o te whu ku owhẹ?

Dede nọ o sae wọhọ nọ edada na i bi kpotọ họ, eware nana e sae kẹ owhẹ omosasọ:

O THỌ HỌ RE WHO WERI

Ahwo kpobi a re weri epọvo na ha, yọ ahwo jọ a re weri kri vi ahwo jọ. Ghele na, oviẹ o sai ru oma vori ohwo. Aye nọ a re se Vanessa nọ ma fodẹ evaọ obehru na ọ ta nọ: “Nọ oviẹ ọ tẹ gba dhe omẹ udu no, mẹ rẹ viẹ re edada mẹ i kpotọ.” Aye ọfa nọ a re se Sofía nọ oniọvo ọmọtẹ riẹ o whu idudhe ọ ta nọ: “O rẹ da omẹ te onwa ẹsikpobi nọ mẹ tẹ kareghẹhọ uwhu oniọvo mẹ na, o wọhọ ẹsenọ a be biẹ ikpo no ola. Edada riẹ e rẹ ga wo umuo ho, rekọ o rẹ lẹliẹ ola na kpo.”

TA EPANỌ O RRỌ OWHẸ OMA KẸ OMỌFA

Uzẹme riẹ họ, ẹsejọ whọ sae gwọlọ jọ oria nọ ohwo ọ rrọ họ. Rekọ uweri o gbẹdẹ vi owha nọ whẹ  ọvo ọ rẹ wọ. Jared nọ ọ rrọ ikpe ikpegbihrẹ ọ ta kpahe okenọ ọsẹ riẹ o ro whu inọ: “Mẹ jẹ ta epanọ o jọ omẹ oma kẹ amọfa. U mu omẹ ẹro ho sọ mẹ jẹ riẹ ẹme na ta, rekọ u je ru oma vẹ omẹ.” Aye nọ a re se Janice nọ ma fodẹ evaọ uzoẹme emuhọ na ọ ta kpahe erere ọfa inọ: “Ẹme nọ me je lele amọfa ta u ru oma sasa omẹ gaga. O jọ omẹ oma inọ a je wo otoriẹ ẹme mẹ, fikiere oma o gbẹ jọ omẹ goli hi.”

KUVẸ RE AMỌFA A FIOBỌHỌ KẸ OWHẸ

Edọkita jọ ọ ta nọ: “O rẹ mae lọhọ kẹ ahwo nọ a bi weri re a thihakọ nọ oke o be nyaharo na otẹrọnọ a kuvẹ re imoni gbe egbẹnyusu rai a fiobọhọ kẹ ai evaọ okenọ oware na o rọ via obọ na.” Vuẹ egbẹnyusu ra eware nọ a rẹ sai ru ro fiobọhọ kẹ owhẹ; o sae jọnọ a gwọlọ fiobọhọ rekọ a riẹ oware nọ a re ru hu.​—Itẹ 17:17.

SI KẸLE ỌGHẸNẸ VI EPAỌ ANWẸDẸ

Aye jọ nọ a re se Tina ọ ta nọ: “Nọ ọzae mẹ o whu idudhe fiki ẹyao ọta, me gbe wo ohwo nọ mẹ rẹ ta eva kẹ hẹ, fikiere Ọghẹnẹ me je horie eva mẹ kẹ! Oware ọsosuọ nọ me re ru kẹdẹ kẹdẹ họ, mẹ rẹ lẹ sei re o fiobọhọ kẹ omẹ evaọ okpẹdoke na soso. Ọghẹnẹ o fiobọhọ kẹ omẹ evaọ idhere buobu nọ me roro ho.” Aye jọ nọ a re se Tarsha nọ ọ jọ ikpe 22 evaọ okenọ oni riẹ o ro whu ọ ta nọ: “Isase Ebaibol ikẹdẹ kẹdẹ e jẹ kẹ omẹ omosasọ. Nọ me te bi roro kpahe eware nọ me je se na, e rẹ tuduhọ omẹ awọ.”

RORO KPAHE ẸKPAROMATHA NA

Tina ọ ta nọ: “Evaọ oke ọsosuọ, ẹruore ẹkparomatha na ọ jẹ kẹ omẹ omosasọ họ keme mẹ gwọlọ nọ ọzae mẹ ọ rẹ jọ kugbe omẹ okioke yena, yọ ere emezae mai a gwọlọ re. Rekọ enẹna nọ ikpe ene e vrẹ no na, ẹkparomatha na me bi roro kpahe ẹsikpobi. Oye o be kẹ omẹ ẹgba yeri uzuazọ mẹ vrẹ. Mẹ be hai roro kpahe okenọ mẹ te wariẹ ruẹ ọzae mẹ, yọ onana u bi ru eva were omẹ gaga je ru udu kie omẹ vi!”

Eware nọ ma ta kpahe na e sai nwani si uweri no owhẹ oma idudhe he. Rekọ oriruo oware nọ o via kẹ Vanessa o sae kẹ owhẹ uduotahawọ. Ọ ta nọ: “Whọ sai roro nọ uweri na u ti kpotọ vievie he, rekọ nọ oke o be nyaharo na, eware i re woma.”

Dede nọ whọ te gbẹ hai roro kpahe ohwo na, whọ sai yeri uzuazọ ra vrẹ ghele. Jihova o ti fiobọhọ kẹ owhẹ, yọ whọ rẹ sai yeri emamọ uzuazọ je wo emamọ egbẹnyusu. Yọ kẹle na, Ọghẹnẹ ọ te kpare ahwo nọ a whu no ze. Ọ gwọlọ nọ whọ wariẹ ruẹ ohwo ra nọ o whu no na. Evaọ oke yena, who ti gbe weri vievie he!