“IVUẸVU na e rrọ ruaro, rekọ iruiruo na e rrọ kakao. Fikiere, wha lẹ Olori ivuẹvu na re o vi iruiruo ziọ ivuẹvu riẹ.” (Luk 10:2) Eme yena nọ Jesu ọ ta anwọ oware wọhọ ikpe idu ivẹ (2,000) nọ e vrẹ na e nwani dhesẹ oware nọ o be via evaọ obọ Myanmar nẹnẹ. Fikieme? Evaọ obọ Myanmar iwhowho-uvie idu ene gbe egba ivẹ (4,200) ọvo e be ta usiuwoma yọ ahwo nọ a rrọ orẹwho na a bu te ima udhuvẹ gbe ikpegbisoi (55 million).

Rekọ Jihova “Olori ivuẹvu na” o duobọte udu inievo-emezae gbe emetẹ buobu evaọ erẹwho sa-sa no, a tẹ kwa ziọ orẹwho nana nọ o rrọ ẹkpẹlobọ obọze ovatha-ọre Asia na re a fiobọhọ evaọ iruo usiuwoma ota na. Eme ọ lẹliẹ e rai no ẹwho rai? Eme o fiobọhọ kẹ ae kwa kpohọ orẹwho yena? Kọ eghale vẹ i bi te ai? Joma ruẹ.

Ikpe jọ nọ e vrẹ, ọkobaro jọ evaọ obọ Japan nọ a re se Kazuhiro o je kie ewawa, yọ bẹsenọ a rọ wọe te ẹsipito ọ riẹ onahona na. Edọkita ọ tẹ ta kẹe nọ o du dhẹ omoto evaọ ikpe ivẹ hẹ. Onana u gbe Kazuhiro unu gaga. Ọ tẹ nọ omariẹ nọ, ‘Ẹvẹ mẹ te sai gbe ro ru iruo ọkobaro mẹ nọ e be were omẹ oma na?’ Ọ tẹ lẹ Jihova gaga re ọ gbẹ edhere jọ kẹe nọ ọ rẹ rọ ruabọhọ iruo ọkobaro na.

Kazuhiro ọ ta nọ: “Nọ amara ọvo ọ vrẹ no, ogbẹnyusu mẹ jọ nọ ọ rrọ obọ Myanmar ta usiuwoma o te yo oware nọ o via kẹ omẹ. O te se omẹ jẹ vuẹ omẹ nọ: ‘Evaọ obọ Myanmar obonẹ, ebọso ma rẹ mae ro kpohọ oria kpobi. Whọ tẹ nyaze whọ rẹ sae gbẹ ta usiuwoma ababọ omoto nọ whọ rẹ dhẹ!’ Mẹ tẹ nọ edọkita mẹ sọ mẹ sae kwa kpobọ Myanmar avọ oma mẹ nọ o ga tere he na. U gbe omẹ unu nọ ọ ta kẹ omẹ nọ: ‘Edọkita jọ nọ o wuhrẹ kpahe ẹvori nọ o no obọ Myanmar ze ọ rrọ Japan obọnana. Me ti dhesẹ owhẹ kẹe. Otẹrọnọ whọ wariẹ kie ewawa, ọ sai fiobọhọ kẹ owhẹ.’ Mẹ rehọ ẹme edọkita na wọhọ uyo olẹ nọ mẹ lẹ se Jihova na.”

Kazuhiro ọ tẹ nwani kere se uwou ogha obọ Myanmar inọ tei te aye riẹ a gwọlọ nọ a rẹ kwa ze ti ru ọkobaro evaọ obei. Nọ edẹ isoi e nwane vrẹ no, uwou ogha na o tẹ kẹ ae uyo inọ, “Wha nyaze, ma gwọlọ ekobaro efa!” Kazuhiro avọ aye riẹ Mari a tẹ zẹ imoto rai, ru ebe-udu nọ a rẹ rọ rria orẹwho ofa jẹ hwa ugho-ofa arupre. Obọnana, a rrọ kugbe utu ẹvẹrẹ obọ rọ t’ẹme evaọ Mandalay yọ a bi wo evawere evaọ  iruo na. Kazuhiro ọ ta nọ: “Oware nana o lẹliẹ omai fievahọ ẹme Olezi 37:5 na vi epaọ anwẹdẹ, onọ o ta nọ: ‘Rọ oma ra kpobi kẹ ỌNOWO, fievahọ iẹ, o ti ru gba kẹ owhẹ.’”

Evaọ ukpe 2014, Isẹri Jihova a ru okokohọ ubrotọ ọrọ obọdẹ evaọ Myanmar. Inievo buobu a no erẹwho efa ziọ okokohọ na. Ọjọ rai nọ a re se Monique oniọvo-ọmọtẹ nọ ọ kpako te oware wọhọ ikpe 35 nọ o no obọ America nya, ọ ta nọ: “Nọ me no okokohọ na te uwou, mẹ lẹ se Jihova kpahe oware nọ u fo nọ mẹ rẹ rọ uzuazọ mẹ ru enẹna. Mẹ tẹ jẹ vuẹ ọsẹgboni mẹ kpahe eware nọ mẹ gwọlọ jọ egagọ Jihova ru. O jọ omai kpobi oma nọ u fo re me zihe kpobọ Myanmar, rekọ mẹ nya ẹsiẹsiẹ hẹ yọ mẹ lẹ kpahe onana gaga taure mẹ tẹ te gbaemu nọ mẹ rẹ nya.” Monique ọ ta oware nọ o rọ jọ ere.

“Jesu ọ ta kẹ ilele riẹ nọ a hai ‘roro araha’ oware kpobi nọ a gwọlọ ru. Fikiere mẹ tẹ nọ omamẹ nọ: ‘Kọ me wo ugho erẹ nana? Kọ mẹ te sae kuọ omamẹ ababọ oke buobu nọ mẹ te raha fihọ iruo?’” Ọ ta nọ: “Mẹ tẹ nwane ruẹ nọ me wo ugho nọ u re te omẹ kwa kpohọ abọfa akpọ na nyae rria ha.” Kọ eme o fiobọhọ kẹe nọ ọ sae rọ kwa?​—Luk 14:28.

Monique ọ ta nọ: “Ẹdẹjọ ohwo nọ ọ rehọ omẹ iruo o te se omẹ. Ozọ u je mu omẹ inọ o bi ti si omẹ no iruo. Rekọ ukpoye, o te yere omẹ inọ mẹ be riẹ ru ziezi evaọ iruo mẹ. Ọ tẹ ta kẹ omẹ nọ a te rọ ugho jọ ru omẹ ọghọ. Nọ a kẹ omẹ ugho na, o jọ uzedhe unuigho nọ mẹ gwọlọ kẹ erẹ na!”

Monique ọ kwa kpobọ Myanmar anwọ Akpegbivẹ 2014. Ẹvẹ o rrọ iẹe oma? Ọ ta nọ: “Eva e were omẹ gaga inọ mẹ nya. Me bi wuhrẹ Ebaibol kugbe imasa. Ọjọ ọ kpako te ikpe 67 no. Ẹsikpobi nọ mẹ nya ọ rẹ hwẹ jẹ gba omẹ. Nọ o wuhrẹ nọ odẹ Ọghẹnẹ Jihova, irui-oviẹ i su noi aro ze. Aye nọ me bi wuhrẹ na ọ ta nọ: ‘Onana họ orọ ọsosuọ evaọ uzuazọ mẹ nọ me ro yo nọ odẹ Ọghẹnẹ Jihova. Mẹ kpako vi owhẹ thethabọ, rekọ who wuhrẹ omẹ oware nọ o mai wuzou evaọ uzuazọ.’ Makọ mẹ dede, irui-oviẹ i su no omẹ aro ze re. Eware itienana e rẹ lẹliẹ oma were ohwo gaga evaọ uzuazọ nọ ọ tẹ nyae ta usiuwoma evaọ oria nọ a jọ gwọlọ iwhowho-uvie.” Kẹle na, eva e were Monique gaga nọ o kpohọ Isukulu Rọkẹ Etausiuwoma Uvie Na.

Oware nọ u ru ahwo jọ kwa kpobọ Myanmar họ, iku orẹwho nana nọ e rrọ 2013 Yearbook of Jehovah’s Witnesses. Oniọvo-ọmọtẹ jọ nọ a re se Li nọ ọ kpako vrẹ ikpe 30 no obọ ọ rria ẹkpẹlobọ obọze ovatha-ọre Asia no vẹre. O wo iruo oke kpobi nọ o bi ru, rekọ 2013 Yearbook of Jehovah’s Witnesses na o tuduhọ iẹe awọ roro kpahe Myanmar nọ ọ rẹ kwa kpohọ kẹ iruo usiuwoma na. Ọ ta nọ: “Evaọ ukpe 2014, nọ me kpohọ okokohọ ubrotọ ọrọ obọdẹ na evaọ Yangon, mẹ ruẹ ọzae-avọ-aye jọ nọ a kwa ziọ Myanmar te ta usiuwoma evaọ ofẹ nọ ahwo ẹvẹrẹ Chinese a be rria. Nọ o rọnọ mẹ rẹ ta ẹvẹrẹ Chinese na, mẹ tẹ jiroro nọ mẹ rẹ kwa kpobọ Myanmar re me kuomagbe utu Chinese nọ o rrọ obei na. Mẹ avọ Monique ma tẹ ta nọ ma rẹ gbẹ nya, ma tẹ kwa kpobọ Mandalay. Jihova o fiobọhọ kẹ omai wo iruo iticha evaọ isukulu evona nọ ma re ru emedẹ jọ evaọ oka na, ma tẹ haya uwou kẹle etẹe. Dede nọ ọdha ọ jọ gaga, yọ ebẹbẹ efa e jariẹ, usiuwoma ota o were omẹ gaga evaọ oria nana. Ahwo Myanmar a rẹ gwọlọ efe he, yọ a rẹ kẹ ohwo adhẹẹ jẹ gaviezọ kẹ usiuwoma na. O rẹ kẹ evawere kẹhẹ nọ whọ tẹ ruẹ oghẹrẹ nọ Jihova ọ be rọ ghale iruo na. Mẹ riẹ vevẹ nọ Mandalay nọ mẹ rrọ na yọ oreva Jihova.”

Inievo buobu nọ e kwa kpohọ eria nọ a mae jọ gwọlọ iwhowho-uvie a ruẹ no nọ Ọghẹnẹ o re yo elẹ. Ejọ rai họ Jumpei avọ aye riẹ, Nao, nọ a kpako te oware  wọhọ ikpe 35 no. A jọ ukoko obọ rọ t’ẹme evaọ Japan. Fikieme a rọ kwa kpobọ Myanmar? Jumpei ọ ta nọ: “Mẹ avọ aye mẹ ma jiroro nọ ma rẹ kwa kpohọ orẹwho ọfa nọ a mae jọ gwọlọ iwhowho-uvie. Oniọvo-ọmọzae jọ nọ ma gbẹ jọ ukoko obọ rọ t’ẹme evaọ Japan ọ kwa kpobọ Myanmar. Dede nọ ugho nọ ma koko no u tulo ho, mai omamai ma kwa evaọ Asoi 2010. Inievo-emetẹ gbe erọ emezae nọ e rrọ obọ Myanmar a dede omai rehọ gaga.” Ẹvẹ usiuwoma ota obọ rọ t’ẹme evaọ Myanmar o rrọ iẹe oma? Ọ ta nọ: “Ahwo a bi yo usiuwoma gaga. Nọ ma te dhesẹ ividio obọ rọ t’ẹme na kẹ ahwo nọ a diezọ, u re gbe ai unu. Eva e were omai kẹhẹ inọ ma jiroro nọ ma rẹ kwa ziọ obonẹ te gọ Jihova!”

Ẹvẹ Jumpei avọ Nao a jẹ sai ro wo ugho rọ rẹrote omarai? Ọ ta nọ: “Nọ ikpe esa e vrẹ no, ugho nọ o jọ omai obọ o tẹ joma re no yọ ma wo ugho nọ u re te hwa osa uwou ukpe ofa ha. Mẹ avọ aye mẹ ma lẹ se Ọghẹnẹ gaga unuẹse buobu. Ẹsiẹvo na, uwou ogha u te kere ileta se omai ro zizie omai nọ ma ru iruo ọkobaro obọdẹ ubroke. Ma fievahọ Jihova, yọ ma ruẹ nọ ọ nyasiọ omai ba ha. Ọ be rẹrote omai evaọ kabọ kabọ.” Kẹle na, Jumpei avọ Nao a kpohọ Isukulu Rọkẹ Etausiuwoma Uvie Na re.

Eme o ru nọ Simone nọ ọ rrọ ohwo Italy nọ ọ kpako vrẹ ikpe 40 no, avọ aye riẹ Anna, nọ ọ rrọ ohwo New Zealand nọ ọ kpako vrẹ ikpe 30 no a rọ kwa kpobọ Myanmar? Anna ọ ta nọ: “Iku Myanmar nọ e rrọ 2013 Yearbook of Jehovah’s Witnesses na!” Simone ọ ta nọ: “Uvẹ-ọghọ ulogbo o rrọ kẹ omai nọ ma rọ ziọ Myanmar. Ahwo obonẹ a re le eware buobu hu, yọ ma wo uvẹ nọ ma re ro ru iruo Jihova. O be were omai kẹhẹ nọ ma be rọ ruẹ oghẹrẹ nọ Jihova o bi ro fiobọhọ kẹ omai evaọ obonẹ nọ a jọ mae gwọlọ iwhowho-uvie na.” (Ol. 121:5) Anna ọ ta nọ: “Eva e be were omẹ vi epaọ anwẹdẹ. Ma bi le efe he. Mẹ avọ ọzae mẹ ma rẹ jọ kugbe ẹsikpobi, ma kpekpe gaga no. Yọ ma jọ obonẹ wo egbẹnyusu nọ e rrọ ghaghae gaga kẹ omai.” Ahwo a mukpahe Isẹri Jihova ha, yọ a re yo usiuwoma gaga!” Evaọ oghẹrẹ vẹ?

Anna ọ ta nọ: “Ẹdẹjọ, mẹ ta usiuwoma kẹ ọmọ yunivasiti jọ evaọ obọ eki, mẹ tẹ ta kẹe nọ me ti zihe bru ei. Nọ me zihe, mẹ ruẹ e riẹ avọ ogbẹnyusu riẹ nọ o zizie ze. Nọ me zihe oke ofa, o te je zizie amọfa ze. Evaọ oke ofa, o te zizie ahwo nọ a bu vi epaọ anwẹdẹ ze. Enẹna, me bi wuhrẹ Ebaibol kugbe imasoi evaọ usu ahwo nana.” Simone ọ ta nọ: “Ahwo ẹkwotọ na a rrọ wowou yọ a rẹ gaviezọ. A gwọlọ yo usiuwoma na. Ma be tubẹ sai wuhrẹ ahwo nọ a wo isiuru kẹ obe-uwuhrẹ re he.”

Kọ didi owọ inievo na a jẹ taure a tẹ te kwa kpobọ Myanmar? Mizuho nọ ọ rrọ ohwo Japan ọ ta nọ: “U kri no nọ mẹ avọ ọzae mẹ, Sachio ma rọ gwọlọ nọ ma rẹ kwa kpohọ orẹwho nọ a mae jọ gwọlọ iwhowho-uvie. Rekọ ma tẹ nọ omamai nọ, bovẹ ma te kwa nya? Nọ ma se 2013 Yearbook of Jehovah’s Witnesses nọ o ta kpahe Myanmar na no, emamọ iyẹrẹ nọ  ma se i duobọte omai te epanọ ma ro muhọ eroro sọ ma sae kwa kpobọ Myanmar nyae ta usiuwoma.” Sachio o fibae nọ: “Ma tẹ jiroro nọ ma re kpobọ Yangon, okpẹwho jọ evaọ Myanmar re ma rọ oka ovo nyae duwu re ma rri epanọ obei o rrọ. Omoke yena nọ ma rọ nyai rri oria na u ru omai gbaemu nọ ma rẹ kwa.”

Rodney avọ aye riẹ Jane nọ a rrọ ahwo Australia, nọ a joma kpako vrẹ ikpe 50 no, gbe ọmọzae rai Jordan avọ Danica ọmọtẹ rai a kwa kpobọ Myanmar anwọ 2010 nyae ta usiuwoma keme a jọ obei gwọlọ iwhowho-uvie. Rodney ọ ta nọ: “U duobọte omai gaga inọ ahwo buobu a gwọlọ wuhrẹ kpahe Ọghẹnẹ. Mẹ be tuduhọ iviuwou efa awọ inọ a daoma kwa kpohọ oria kerọ Myanmar na.” Fikieme? Ọ ta nọ: “A rẹ ruẹ unu gbiku eghale nọ i te omai no ho evaọ egagọ Ọghẹnẹ fikinọ ma kwa ziọ obonẹ! Oware nọ o mae rrọ izoge buobu oja họ, ifonu rai, imoto rai, iruo rai, gbe eware efa. Emọ mai a be daoma epanọ a re ro wuhrẹ eme ekpokpọ nọ a rẹ rọ ta usiuwoma. A be daoma riẹ epanọ a rẹ rọ ta ẹme kugbe ahwo nọ a riẹ Ebaibol tere he gbe epanọ a rẹ rọ kuyo evaọ obọ ewuhrẹ, yọ a be rọ oke rai kpobi ru eware efa nọ e rẹ kẹ evawere evaọ egagọ Ọghẹnẹ.”

Oniọvo-ọmọzae jọ nọ a re se Oliver nọ ọ rrọ ohwo America, nọ ọ joma kpako te ikpe 40 no ọ fodẹ oware nọ ọ sae rọ ta ududu inọ u fo re ahwo a kwa kpohọ eria itieye na, ọ ta nọ: “Orẹwho ofa nọ mẹ kwa kpohọ nyae gọ Jihova na o wha irere buobu se omẹ no. U fiobọhọ kẹ omẹ rẹroso Jihova evaọ oghẹrẹ kpobi nọ eware e rrọ kẹ omẹ. Ahwo nọ mẹ riẹ vẹre he nọ ma gbẹ be gọ Jihova na u fiobọhọ kẹ omẹ vuhumu no inọ oware ovo o rrọ akpọ nana ha nọ a sae rọ wawo iruo Uvie Ọghẹnẹ.” Enẹna, Oliver avọ aye riẹ, Anna, a gbẹ be rọ ajọwha ta usiuwoma evaọ ẹkwotọ nọ ahwo ẹvẹrẹ Chinese a rrọ.

Oniọvo-ọmọtẹ jọ nọ a re se Trazel nọ ọ rrọ ohwo Australia nọ ọ dina kpako vrẹ ikpe 50 no, ọ kwa kpobọ Myanmar anwọ 2004. Ọ ta nọ: “Rọkẹ ohwo kpobi nọ ọ rẹ sae kwa kpohọ oria nọ a mae jọ gwọlọ iwhowho-uvie, mẹ be rọ eva mẹ kpobi ta nọ jọ ọ kwa nya. Mẹ ruẹ vuhumu no inọ u te no owhẹ eva ze nọ whọ rẹ kwa kpohọ oria utioye, Jihova ọ rẹ ghale owhẹ. Mẹ riẹ vievie he inọ mẹ sae rria uzuazọ utiona. Uzuazọ nọ u woma jẹ were tei o rrọ họ.”

Jọ eme uduotahawọ inievo nana nọ e kwa kpohọ eria nọ a mae jọ gwọlọ iwhowho-uvie evaọ obọ Myanmar na i fiobọhọ kẹ owhẹ jiroro epanọ whọ rẹ rọ nyae ta usiuwoma evaọ ekwotọ nọ iwhowho-uvie e rrọ họ. Ẹhẹ, inievo nọ e kwa kpohọ eria nọ a mae jọ gwọlọ iwhowho-uvie na a bi zizie owhẹ nọ, “Ivie, nyaze obọ Myanmar re who fiobọhọ kẹ omai.”