OKENỌ Jesu o wuhrẹ ilele riẹ kpahe epanọ a rẹ rọ ta usiuwoma na, ọ ta ẹme nọ u dhesẹ nọ orọnikọ ẹsikpobi ahwo a te gaviezọ kẹ ovuẹ Uvie na ha. (Luk 10:3, 5, 6) Nọ ma tẹ rrọ usiuwoma, ma rẹ sae nyaku ahwo jọ nọ a rẹ kpahe ẹme ọgaga kẹ omai hayo la omai eka dede. Uzẹme riẹ họ, nọ ahwo a te ru omai ere, o rẹ sai ru ei jọ bẹbẹ re ma wo ọdawẹ kẹ ahwo nọ ma be ta usiuwoma kẹ.

Ohwo nọ o wo ọdawẹ ọ rẹ ruẹ ẹgwọlọ gbe ebẹbẹ nọ amọfa a wo, ohrọ rai o vẹ re iẹe, ọ vẹ gwọlọ epanọ o re ro fiobọhọ kẹ ae. Rekọ ọdawẹ nọ ma wo kẹ ahwo nọ ma nyaku evaọ usiuwoma o te bi kpotọ no, o rẹ sai ru nọ ajọwha gbe onaa usiuwoma ota mai u re ro kpotọ re. Evaọ abọdẹkọ riẹ, nọ ma tẹ be daoma wo ọdawẹ, o rẹ wọhọ ẹsenọ ma be kwa ire fihọ erae, u re ru ajọwha nọ ma wo kẹ iruo usiuwoma ota na ware wọhọ erae!​—1 Tẹs. 5:19.

Ẹvẹ ma sai ro wo ọdawẹ nọ o tẹ make rrọ bẹbẹ re ma ru ere? Joma ta kpahe oriruo imasa jọ nọ ma rẹ sae rọ aro kele​​—Jihova, Jesu, gbe Pọl ukọ na.

U te ikpe idu buobu no nọ Jihova o bi ro thihakọ ekela nọ a wha se odẹ riẹ. Ghele na, o gbe bi “ru ewoma kẹ enọ e kare uyere-ọghọ jẹ rrọ muomu.” (Luk 6:35) Ọ be rọ odiri nọ o wo ro dhesẹ nọ ọ rrọ wowou. Jihova ọ gwọlọ nọ “oghẹrẹ ahwo kpobi” a zọ. (1 Tim. 2:3, 4) Dede nọ Ọghẹnẹ o mukpahe emuemu, o bi rri ahwo-akpọ ghaghae, yọ ọ gwọlọ nọ uvumọ ohwo o whu hu.​—2 Pita 3:9.

Jihova ọ riẹ epanọ Setan o tu ahwo-akpọ nọ a rọwo ho aro te no. (2 Kọr. 4:3, 4) No emaha ze a ro wuhrẹ ahwo jọ iwuhrẹ gbe iruemu ethọthọ, onọ u bi ru ei jọ bẹbẹ kẹ ae re a jẹ uzẹme na rehọ. O rrọ Jihova oja gaga re o fiobọhọ kẹ ahwo otiọye na. Ẹvẹ ma rọ riẹ?

Roro kpahe epanọ Jihova o rri ahwo Ninẹve oke anwae. Ghele epanọ a duomahọ ozighi te, Jihova ọ ta kẹ Jona nọ: “Kọ me gbe weri kẹ Ninẹve okpẹwho na, e nọ ahwo nọ a buvi idu udhe-ozeza nọ e riẹ obọze avọ ẹkpẹlobọ rai hi . . . e rọ eva?” (Jona 4:11) Jihova o rri ahwo Ninẹve na nọ a riẹ Ọghẹnẹ hẹ, ọ tẹ rọ fiki ohrọ-oriọ vi Jona re ọ vẹvẹ ae unu.

Ma re rri ahwo ghaghae re wọhọ Jihova. Ma rẹ sae rọ aro kele Jihova ẹkwoma oma nọ ma rẹ dawo gaga re ma fiobọhọ kẹ ohwo kpobi nọ ọ sae gaviezọ, o tẹ make wọhọ nọ a gwọlọ gaviezọ họ.

Nọ ahwo a gbẹ rọwo gaviezọ kẹ ovuẹ mai  hi, o gwọlọ nọ ma rẹ riẹ ẹbẹbẹ nọ ahwo na a wo gbe oware nọ o lẹliẹ e rai dhesẹ uruemu utioye. Rọkẹ ejọ, o sae jọ nọ Ebaibol na hayo egagọ Ileleikristi e were rai hi fiki ekpehre uruemu ahwo nọ a se omarai Ileleikristi. O sae jẹ jọ nọ a gu erue kẹ ejọ rai kpahe eware nọ ma rọwo. Rọkẹ efa, ahwo ẹwho rai hayo ahwo uviuwou rai a sai se ai ẹkoko nọ a tẹ gaviezọ kẹ omai.

Ahwo jọ nọ ma rẹ nyaku evaọ usiuwoma a sae siọ ovuẹ mai fiki ekpehre eware nọ e via kẹ ae no nọ e be kẹ ai uye gaga. Imishọnare aye jọ nọ a re se Kim ọ ta nọ: “Ahwo buobu nọ a rrọ ofẹ jọ ẹkwotọ mai yọ enọ ẹmo ọ raha eware rai kpobi no. A wo emamọ ẹruore ọvo nọ eware i ti woma ha. A reghe no yọ a fievahọ ohwo ọvo vievie he. Ma be hae jọ oria nana nyaku ahwo nọ ovuẹ mai o rẹ were vievie he. Evaọ ẹdẹjọ dede, a họrọ omẹ evaọ usiuwoma.”

Eme o bi fiobọhọ kẹ Kim nọ o gbe bi ro wo ọdawẹ ghelọ oghẹrẹ nọ a bi ru ei na? Ọ ta nọ: “Nọ a te ru omẹ yoyoma enẹ, mẹ rẹ daoma roro kpahe ẹme nọ ọ rrọ obe Itẹ 19:11 nọ o ta nọ: ‘Areghẹ owoma o re ru ofu ohwo kpotọ.’ Mẹ tẹ kareghẹhọ eware nọ e via kẹ ahwo ẹkwotọ mai na, u re ru omẹ wo ọdawẹ kẹ ae. Yọ orọnikọ ahwo kpobi a re dhuaro kẹ omai hi. Ma wo emamọ izihebro jọ evaọ oria yena ovona.”

Ma sae nọ omamai nọ, ‘Kọ mẹ hae gaviezọ kẹ ovuẹ Uvie na o hae jọ nọ mẹ rrọ uyero ahwo nọ ma be ta usiuwoma kẹ na?’ Wọhọ oriruo, ẹvẹ ma hai ru o hae jọ nọ a ta erue kpahe Isẹri Jihova kẹ omai unuẹse buobu no? Evaọ uyero utioye na, ẹsejọhọ ma ti dhuaro re, o vẹ te gwọlọ nọ a wo ọdawẹ kẹ omai. Nọ ma tẹ kareghẹhọ ujaje Jesu inọ ma ru amọfa epanọ ma gwọlọ nọ a ru omai, o rẹ wọ omai wo ọdawẹ kẹ ahwo, o tẹ make bẹ.​—Mat. 7:12.

Pọl ukọ na o dhesẹ ọdawẹ kẹ ahwo nọ a jẹ wọso ẹe dede. Fikieme? Keme oghẹrẹ ohwo nọ ọ jọ vẹre o thọrọ e riẹ ẹro ho. Ọ ta nọ: “Evaọ ọsosuọ mẹ jọ ọnọ ọ jẹ ta eme-aghọ, ọnọ o je kpokpo ilele riẹ, jẹ ta emeẹsọ kẹ ae. Rekọ Ọghẹnẹ ọ re ohrọ mẹ, keme ogbori gbe ababọ ẹrọwọ me je ro ru eware nana.” (1 Tim. 1:13) O vuhumu nọ Jihova avọ Jesu a re riẹ ohrọ gaga. Ẹsejọhọ ọ jẹ ruẹ nọ ahwo jọ nọ ọ be ta usiuwoma kẹ na a wo ọkpọ uruemu nọ o wo vẹre na.

Ẹsejọ Pọl ọ jẹ nyaku ahwo nọ a rọwo eware erue nọ e dowọ muotọ gaga no. Eme o ru?  Obe Iruẹru Ikọ 17:16 o ta nọ okenọ ọ jọ obọ Athẹns, “o tẹ jẹ kẹe uye gaga nọ ọ ruẹ nọ emedhọ e vọ ẹwho na.” Ghele na, Pọl ọ rehọ oware nọ o jẹ kẹe uye na se isẹri kẹ ae ziezi. (Iruẹru 17:22, 23) Uyero ahwo sa-sa o je rri rọ ta usiuwoma kẹ ae, re ọ “sae rehọ edhere kpobi nọ o rẹ sae lọhọ siwi ejọ.”​—1 Kọr. 9:20-23.

Wọhọ Pọl ukọ na, ma sae rọ orimuo vuhu ekpehre uruemu hayo orọwọ nọ ahwo a wo, jẹ rọ onaa vuẹ ae “emamọ usi uwoma” na. (Aiz. 52:7) Oniọvo-ọmọtẹ jọ nọ a re se Dorothy ọ ta nọ: “Evaọ ẹkwotọ mai, a wuhrẹ ahwo buobu no inọ Ọghẹnẹ o re dhuaro je mu brukpe ahwo. Me re yere ahwo otiọye na fikinọ a rọwo Ọghẹnẹ, me ve si iroro rai kpohọ oware nọ Ebaibol na e ta kpahe iruemu iwoma Jihova gbe eyaa nọ ọ yaa kpahe obaro na.”

Ma re je roro kpahe epanọ ma rẹ rọ tuduhọ inievo mai awọ. Jessica ọ ta nọ: “Otẹrọnọ a te ru oniọvo jọ yoyoma, mẹ rẹ daoma re mẹ gbẹ ta kpahe oware yena gaga ha. Ukpoye, mẹ rẹ kpọ ẹme na rri abọ owoma, wọhọ ewoma nọ o bi no usiuwoma ota mai ze ghelọ epanọ ahwo jọ a be rọ gaviezọ họ na.”

Jihova ọ riẹ ebẹbẹ nọ ma be nyaku evaọ usiuwoma ota na. Eva e rẹ were iẹe gaga nọ ma tẹ be rọ aro kele ohrọ riẹ. (Luk 6:36) Ghele na, orọnikọ Jihova o ti dhesẹ ọdawẹ riẹ na ribri hi. Jọ u mu omai ẹro nọ ọ riẹ uzedhe oke nọ uyero-akpọ nana u ti ro kuhọ. Ri bọo oke yena, ma rẹ rọ ọwhọ ta usiuwoma na. (2 Tim. 4:2) Joma gbẹ hae rọ ajọwha ta usiuwoma na je wo uvi ọdawẹ kẹ “oghẹrẹ ahwo kpobi.”