EMAMỌ ogbẹnyusu ọ rrọ ghaghae, yọ usu nọ o rẹ tọ o rẹ romavia asohẹrioke he. Nọ imava a te wo ẹbẹbẹ evaọ usu rai, eme a rẹ sai ru re usu na o seba ẹfa? Ma rẹ sai wuhrẹ eware buobu mi ahwo jọ nọ a fodẹ evaọ Ebaibol na, enọ e jọ uvi egbẹnyusu rekọ nọ e rẹriẹ ovao dhe ebẹbẹ nọ e rẹ sae fa usu rai.

Devidi ovie na o wo emamọ egbẹnyusu buobu. Ogbẹnyusu Devidi jọ nọ ọ rẹ sae ziọ omai iroro họ Jonatan. (1 Sam. 18:1) Rekọ Devidi o wo egbẹnyusu efa re, wọhọ Netan ọruẹaro na. Ebaibol na ọ fodẹ oke nọ Devidi avọ Netan a ro mu usu rai họ họ. Ghele na, u wo okejọ nọ Devidi ọ rọ ta eva kẹ Netan wọhọ epanọ ohwo ọ rẹ ta eva kẹ ogbẹnyusu na. Devidi ọ gwọlọ nọ ọ rẹ bọ uwou kẹ Jihova. Re Devidi ọ tẹ sae ta eva kẹ Netan, kiyọ o rri usu riẹ kugbei ghaghae gaga, gbe inọ ẹzi Ọghẹnẹ ọ riẹe oma.—2 Sam. 7:2, 3.

Rekọ oware jọ nọ o rẹ sae fa usu rai o tẹ via. Devidi o lele Batshẹba bruẹnwae je  kpe ọzae riẹ nọ a re se Uraya no. (2 Sam. 11:2-21) Anwọ ikpe buobu ze na, Devidi ọ be rọ eva kpobi gọ Jihova je bi ru oware nọ u kiete. Rekọ obọnana ọ thọ uzi ulogbo no. Eme ọ lẹliẹ emamọ ovie nana ru oware uyoma utioye? Kọ ọ gbẹ riẹ nọ oware nọ o ru na o thọ? Kọ o roro nọ ọ sae kuẹe dhere Ọghẹnẹ?

Eme Netan o ti ru? Kọ ọ te kuvẹ re omọfa ọ nyae ta oware na kẹ Devidi? Ahwo jọ a riẹ kpahe epanọ Devidi o ro kpe Uraya. Kọ fikieme Netan ọ rẹ rọ wọ ẹme na bru Devidi, jẹ raha usu rai aimava nọ a nya kri no na? O sai tube si uwhu kpe Netan dede otẹrọnọ ọ tẹ ta ẹme na kẹe. Keme Devidi o kpe Uraya nọ o ru oware ovo ho no.

Netan yọ ọruẹaro Ọghẹnẹ. Netan ọ riẹ nọ ọ gbẹ nyae ta oware na kẹ Devidi hi, usu riẹ kugbe Devidi o sae raha, yọ udu o te hai brukpei. Devidi ogbẹnyusu riẹ o ru oware nọ o rẹ dha Jihova eva no. Yọ o gwọlọ nọ a re fiobọhọ kẹ ovie na ababọ oke oraha re ọ sae ruẹrẹ usu riẹ họ kugbe Jihova. Emamọ ogbẹnyusu ọ rẹ sai gine fiobọhọ kẹ Devidi. Netan o dhesẹ via nọ ọyomariẹ yọ emamọ ogbẹnyusu kẹ Devidi. Ọ tẹ kẹ emamọ oriruo nọ ọ rẹ sae lẹliẹ ẹme na te Devidi udu, onọ u kiekpahe iruo othuru-igodẹ nọ Devidi o je ru vẹre. Oghẹrẹ nọ Netan ọ rọ ta ẹme na u fiobọhọ kẹ Devidi riẹ epanọ uzioraha riẹ na o gbẹdẹ te, onọ o lẹliẹ e riẹ jowọ nọ u fo.—2 Sam. 12:1-14.

Eme who ti ru otẹrọnọ who wo ogbẹnyusu jọ nọ ọ thọ uzi ulogbo jọ? Whọ sai roro nọ whọ tẹ vuẹ ogbẹnyusu ra na kpahe oware na, o te lẹliẹ usu rai fa. Hayo whọ sai roro nọ whọ tẹ vuẹ ekpako na kpahe oware nọ o ru na, yọ whọ be rọ ere vivie iei dede nọ whọ riẹ nọ ekpako na a rẹ sai fiobọhọ kẹe. Kọ eme who ti ru?

Gianni nọ ma fodẹ evaọ obọ emuhọ na ọ ta nọ: “Me muẹrohọ nọ oware jọ o be thọ, keme Maurizio ọ gbẹ jẹ ta eva kẹ omẹ hẹ. Mẹ tẹ jiroro nọ mẹ rẹ nya bru ei dede nọ o jọ bẹbẹ kẹ omẹ re me ru ere. Me te je roro nọ: ‘Eme mẹ te vuẹe nọ ọ re riẹ hẹ? Yọ mẹ tẹ vuẹe, o rẹ sae lẹliẹ eva dhae.’ Rekọ nọ mẹ kareghẹhọ eware nọ ma wuhrẹ evaọ okenọ o je wuhrẹ omẹ obe, mẹ tẹ gbaudu nya bru ei. Maurizio o ru ere kẹ omẹ no evaọ okejọ nọ mẹ rọ gwọlọ obufihọ. Mẹ gwọlọ nọ usu mai o fa ha, rekọ mẹ gwọlọ fiobọhọ kẹe keme me you i rie gaga.”

Maurizio o fibae nọ: “Gianni ọ j’ame họ agba ta ẹme na ha, uzẹme na ọ ginẹ ta kẹ omẹ. Mẹ riẹ nọ ọye hayo Jihova ọ soriẹ nọ mẹ be rọ ruẹ uye ekpehre owọ nọ mẹ jẹ na ha. Fikiere mẹ jẹ ọwhọkuo na rehọ, yọ nọ oke o be nyaharo na, mẹ tẹ wariẹ wo ememọ usu kugbe Jihova.”

Devidi o wo egbẹnyusu efa nọ i thihi gbae evaọ oke ẹbẹbẹ. Ọjọ rai họ Hushae, ọnọ a jọ Ebaibol na se “ogbẹnyusu Devidi.” (2 Sam. 16:16; 1 Irv. 27:33) O sae jọnọ o je ruiruo evaọ ighẹ ovie na, ọ tẹ jẹ jọ ogbẹnyusu ọkpekpe ovie na, ọnọ ovie na ọ jẹ hae vuẹ eware nọ ọ gwọlọ nọ amọfa a riẹ kpahe he.

Nọ Absalọm ọmọzae Devidi ọ jẹ gwọlọ hrou uvie na mi Devidi, ahwo Izrẹl buobu a jọ abọ Absalọm, rekọ Hushae o ru ere vievie he. Okenọ Devidi ọ jẹ dhẹ, Hushae ọ nya bru ei. O kẹ Devidi uye gaga inọ ọmọ obọriẹ avọ ahwo jọ nọ o tube fievahọ a bi viviei. Rekọ Hushae ọ talamu Devidi, o tube fi uzuazọ riẹ họ ọza nyai ru oware nọ o rẹ raha omaa Absalọm. Orọnikọ Hushae o ru oware nana fikinọ o je ru iruo evaọ uwou ovie na ha. Ọ ginẹ jọ emamọ ogbẹnyusu kẹ Devidi.—2 Sam. 15:13-17, 32-37; 16:15–17:16.

O rẹ kẹ evawere gaga nọ ma tẹ ruẹ epanọ inievo akpọ-soso mai na a rọ rrọ okugbe  ọvo fiki uyoyou nọ a wo kẹ ohwohwo, orọnọ a bi ru ere fikinọ a roro nọ owha-iruo rai o rrọ evaọ ukoko na ha. A be rọ uruemu rai ta nọ, “Orọnikọ o gba omẹ họ mẹ rọ rrọ ogbẹnyusu ra ha, rekọ fikinọ whọ rrọ ghaghae kẹ omẹ.”

Ere o via kẹ oniọvo-ọmọzae jọ nọ a re e Federico. Ogbẹnyusu riẹ nọ a re se Antonio o fiobọhọ kẹe evaọ okejọ nọ ọ rẹriẹ ovao dhe ẹbẹbẹ. Federico ọ ta nọ: “Nọ Antonio ọ ziọ ukoko mai, o raha oke he mai imava ma te zihe ruọ egbẹnyusu. Idibo-iruiruo mai imava ma jọ, yọ o jẹ hae were omai re ma ru iruo kugbe. U kri hi, a tẹ rehọ iẹe mu ọkpako ukoko. U te no ogbẹnyusu mẹ nọ ọ jọ no, ọ jọ emamọ oriruo kẹ omẹ re.” Kẹsena Federico ọ tẹ raha uzi jọ. Ọ tẹ nwane gwọlọ obufihọ ekpako na ababọ oke oraha, rekọ ọ gbẹ jọ ọkobaro hayo odibo-oruiruo ho. Kọ eme Antonio o ti ru?

Federico ọ ta nọ: “Mẹ ruẹ nọ oware nọ o via kẹ omẹ na o da Antonio gaga. Ọ daoma ru re mẹ wariẹ wo evawere. O fiobọhọ kẹ omẹ wariẹ wo emamọ usu kugbe Jihova, ọ nyasiọ omẹ ba vievie he. Ọ tuduhọ omẹ awọ nọ mẹ wariẹ kruga ziezi evaọ egagọ Ọghẹnẹ gbe nọ udu u whrehe omẹ hẹ.” Antonio ọ ta nọ: “Mẹ jẹ hae raha oke kugbe Federico gaga, keme mẹ gwọlọ nọ ọ hae ta eva kẹ omẹ ababọ udu nọ u re bru ei, makọ eware nọ e be kẹe uye dede.” Nọ oke o be nyaharo na, Federico ọ tẹ wariẹ kruga ziezi, a tẹ te wariẹ rehọ iẹe mu odibo-oruiruo, kẹsena ọ tẹ wariẹ mu iruo ọkobaro oke-kpobi họ. Antonio ọ ta nọ: “Dede nọ ma gbẹ rrọ ukoko ovona ha, ma gbẹ rrọ egbẹnyusu ekpekpe ghele.”

Ẹvẹ o rẹ jọ owhẹ oma nọ ogbẹnyusu ra ọ tẹ dhẹ siọ owhẹ ba evaọ okenọ whọ rọ mae gwọlọ iẹe? Okolo oware o rẹ da tei hi! Kọ whọ te sae rọvrẹ riẹ? Kọ usu rai o te gbẹ ga te epanọ o jọ vẹre?

Roro kpahe oware nọ o via kẹ Jesu evaọ  emedẹ jọ taure a te ti kpei. Ọ jọ kugbe ilele na gaga no, yọ a wo okugbe ziezi. Agbẹta nọ Jesu o ro se ai egbẹnyusu riẹ na. (Jọn 15:15) Rekọ eme ọ via evaọ okenọ a mu ei? Ikọ na kpobi a tẹ dhẹ siọ iẹe ba. Pita ọ kake ta nọ ọ te nyasiọ Olori riẹ ba vievie he, rekọ evaọ aso yena, Pita ọ vro Jesu!—Mat. 26:31-33, 56, 69-75.

Jesu ọ riẹ nọ ohwo ọvo o ti lele iei whu hu. Ghele na, o kẹ riẹ uye gaga inọ ilele na a dhẹ siọ iẹe ba. Rekọ ẹme nọ o lele ilele na ta nọ a kpare iẹe ze no, u dhesẹ nọ ọ be dheva kẹ ae hayo o wo ẹgo họ eva kẹ ae he. Jesu o kele eware nọ ilele na a ru thọ kẹ ae he, makọ onọ a ru rie evaọ aso nọ a ro mu ei na.

Ukpoye, Jesu ọ tuduhọ Pita avọ ikọ na kpobi awọ. Ọ kẹ rai ekpọvio kpahe iruo usiuwoma ota na, onọ u dhesẹ nọ o fievahọ ae. Jesu ọ gbẹ rehọ ikọ na wọhọ egbẹnyusu riẹ. Uyoyou nọ o wo kẹ ae o rẹ thọrọ ae ẹro ho. A te daoma kpobi re a gbẹ wariẹ kiukeku Olori rai hi. A ru iruo nọ Jesu ọ kẹ rai na ziezi.—Iruẹru 1:8; Kọl. 1:23.

Oniọvo-ọmọtẹ jọ nọ a re se Elvira ọ kareghẹhọ okejọ nọ avọ ogbẹnyusu riẹ nọ a re se Giuliana a wo ẹme. Elvira ọ ta nọ: “O kẹ omẹ uye gaga nọ Giuliana ọ vuẹ omẹ nọ oware nọ me ru o dha riẹ eva. U gine te epanọ eva e rẹ rọ dhae. Rekọ oware nọ o mai duobọte omẹ họ, ọ jẹ ruawa kpahe enwoma nọ owojẹ mẹ na o te wha se omẹ. O were omẹ gaga inọ orọnikọ oware uyoma nọ me ru rie na ọ tẹrovi hi, rekọ ẹbẹbẹ nọ onana o te wha se omẹ. Me yere Jihova gaga nọ me wo ogbẹnyusu nọ ọ rọ ewoma mẹ karo.”

Nọ o rrọ ere na, eme emamọ ogbẹnyusu o re ru nọ oware jọ o tẹ be gwọlọ lẹliẹ usu rai fa? U fo nọ o re lele ogbẹnyusu riẹ na ta ẹme evaọ edhere owowou. Ogbẹnyusu otiọye ọ te jọ wọhọ Netan avọ Hushae nọ a talamu Devidi makọ evaọ oke obẹbẹ. Ọ vẹ te jẹ jọ wọhọ Jesu nọ ọ rọvrẹ no eva ze. Kọ whẹ yọ ogbẹnyusu otiọye?