1, 2. Ẹvẹ Pọl ukọ na o re dhesẹ nọ o wo edẹro kẹ uwowou ulogbo Ọghẹnẹ?

PỌL ukọ na ọ ta gbagba nọ: “Uwowou ulogbo nọ [Ọghẹnẹ] o dhesẹ kẹ omẹ o rrọ uvrẹvru hu.” (Se 1 Ahwo Kọrint 15:9, 10.) Pọl ọ riẹ nọ o te ohwo nọ Ọghẹnẹ o re dhesẹ ohrọ ulogbo riẹ kẹ hẹ, keme ọ jẹ hai gboja kẹ Ileleikristi.

² Omoke jọ taure Pọl o te ti whu, o kere ileta se Timoti nọ ọ jọ ibe oruiruo riẹ nọ: “Me bi yere Kristi Jesu Olori mai, ọnọ ọ kẹ omẹ ogaga, keme o rri omẹ nọ me wo ẹrọwọ, ọ tẹ kẹ omẹ iruo.” (1 Tim. 1:12-14) Iruo vẹ ye? Pọl ọ vuẹ ekpako ukoko nọ e jọ obọ Ẹfisọs kpahe abọjọ iruo na inọ: “Me rri uzuazọ mẹ fihọ oware oghaghae jọ kẹ omẹ hẹ, thakpinọ mẹ dhẹ ohrẹ mẹ na te urere je ru iruo odibọgba nọ Olori na Jesu ọ kẹ omẹ na gba inọ me se isẹri ziezi kpahe usi uwoma orọ uwowou ulogbo Ọghẹnẹ.”—Iruẹru 20:24.

3. Obọdẹ iruo vẹ a kẹ Pọl ukọ na? (Rri uwoho nọ o rrọ emuhọ uzoẹme na.)

 ³ “Usi uwoma” vẹ Pọl o whowho nọ u dhesẹ uwowou ulogbo Jihova via? Ọ ta kẹ Ileleikristi obọ Ẹfisọs nọ: “Wha . . . yo kpahe owha-iruo nọ Ọghẹnẹ ọ kẹ omẹ nọ me re ro fiobọhọ kẹ owhai wo erere no uwowou ulogbo Ọghẹnẹ ze.” (Ẹf. 3:1, 2) Ọghẹnẹ o vi Pọl ukọ na re o whowho usi uwoma na kẹ ahwo nọ a rrọ ahwo Ju hu re ae omarai a sae jọ usu ahwo nọ a ti kuomagbe Jesu evaọ Uvie Mesaya na. (Se Ahwo Ẹfisọs 3:5-8.) Ajọwha nọ Pọl o wo kẹ usiuwoma ota na o rrọ emamọ oriruo kẹ Ileleikristi ọgbọna, ọ tẹ jẹ rọ ere dhesẹ via nọ uwowou ulogbo nọ Ọghẹnẹ o dhesẹ kẹe o jọ “uvrẹvru hu.”

4, 5. Fikieme ma sae rọ ta nọ “usi uwoma Uvie na” họ “usi uwoma orọ uwowou ulogbo Ọghẹnẹ”?

⁴ Evaọ edẹ urere nana, Jihova ọ kẹ idibo riẹ iruo inọ a whowho “usi uwoma Uvie na evaọ akpọ na soso re o jọ isẹri kẹ erẹwho na kpobi.” (Mat. 24:14) Ovuẹ nọ ma bi whowho na o tẹ jẹ rrọ “usi uwoma orọ uwowou ulogbo Ọghẹnẹ,” keme eghale kpobi nọ ma te jọ Uvie na wo i ti te omai obọ fiki uwowou nọ Jihova ọ rọ ẹkwoma Jesu dhesẹ. (Ẹf. 1:3) Kọ ma be rọ aro kele Pọl rọ ọwhọ ta usi uwoma na, jẹ rọ ere dhesẹ edẹro mai kẹ uwowou ulogbo Jihova?—Se Ahwo Rom 1:14-16.

⁵ Evaọ uzoẹme nọ o vrẹ na, ma wuhrẹ epanọ mai erahizi ma bi ro wo erere no uwowou ulogbo Jihova ze evaọ idhere buobu. Fikiere o rrọ owha-iruo mai re ma daoma kpobi ru amọfa riẹ epanọ Jihova o bi ro dhesẹ uyoyou riẹ, gbe epanọ a sai ro wo erere noi ze. Abọ sa-sa vẹ ọrọ uwowou ulogbo Ọghẹnẹ o gwọlọ nọ ma re fiobọhọ kẹ amọfa dhesẹ edẹro kẹ?

6, 7. Ma tẹ be vuẹ ahwo kpahe ẹtanigbo na, ẹvẹ o rọ rrọ nọ yọ usi uwoma uwowou ulogbo Ọghẹnẹ ma bi whowho na?

⁶ Evaọ akpọ nana nọ emuomu ọ dafia na, uzioraha o gbẹ rrọ oware omovuọ họ. Onana u ru nọ u gbe ro mu ahwo buobu ẹro ho sọ a tubẹ gwọlọ ẹtanigbo. Evaọ oke ovona, ahwo buobu a be ruẹ nọ uzuazọ odode o rẹ kẹ uvi evawere he. Bẹsenọ Isẹri Jihova a rọ ta usiuwoma kẹ ae, ahwo jọ a riẹ oware nọ uzioraha o rrọ họ, te epanọ u re kpomahọ omai gbe epanọ ma sai ro no igbo riẹ. Udu u te ahwo nọ a wo evezi otọ nọ a riẹ nọ uyoyou nọ Jihova o wo kẹ omai gbe uwowou ulogbo riẹ o wọ riẹ vi Ọmọ riẹ ziọ otọakpọ re ọ ta omai no igbo uzioraha gbe uwhu.—1 Jọn 4:9, 10.

⁷ Pọl o kere kpahe Ọmọ oyoyou Jihova inọ: “Fiki uwowou ulogbo riẹ [Jihova], ọ rehọ ẹkwoma azẹ Ọmọ riẹ [Jesu] hwa osa ẹtanigbo ro si omai no igbo, koyehọ erọvrẹ izieraha mai.” (Ẹf. 1:7) Idhe ẹtanigbo Jesu họ edhere nọ ọ mae rro nọ Ọghẹnẹ o ro dhesẹ uyoyou riẹ kẹ omai no, o tẹ jẹ rrọ odhesẹvia uwowou ulogbo Riẹ. Udu u kie omai vi gaga nọ ma riẹ nọ ma te fi ẹrọwọ họ ẹtanigbo na, Ọghẹnẹ ọ rẹ rehọ izieraha mai vrẹ omai. Yọ u re je ru omai wo obruoziẹ-iroro ọfuafo. (Hib. 9:14) Onana o ginẹ rrọ usi uwoma nọ ma rẹ vuẹ amọfa!

8. Fikieme o rọ gwọlọ nọ ahwo-akpọ a ruẹrẹhọ kugbe Ọghẹnẹ?

⁸ Ma wo owha-iruo nọ ma rẹ rọ vuẹ amọfa inọ a rẹ sae jọ egbẹnyusu Ọghẹnẹ nọ ọ ma rai na. Taure ahwo-akpọ a te ti fi ẹrọwọ họ idhe ẹtanigbo Jesu, Ọghẹnẹ o re rri rai wọhọ ewegrẹ riẹ. Jọn ukọ na o kere nọ: “Ọnọ o fi ẹrọwọ họ Ọmọ na o re wo uzuazọ ebẹdẹ bẹdẹ; ọnọ ọ ghẹmeeyo kẹ Ọmọ na o ti wo uzuazọ họ, rekọ ofu Ọghẹnẹ o ti tei.” (Jọn 3:36) Eva e were omai gaga inọ idhe ẹtanigbo Jesu Kristi e ruẹrẹ omai họ kugbe Ọghẹnẹ. Pọl ọ ta nọ: “Whai enọ e hẹrioma no Ọghẹnẹ jẹ jọ ewegrẹ riẹ vẹre fikinọ wha fi iroro rai họ iruo imuomu, ọ ruẹrẹ owhai họ kugbe omariẹ no enẹna ẹkwoma ugboma ohwo ọyena nọ o whu.”—Kọl. 1:21, 22.

9, 10. (a) Owha-iruo vẹ Jesu ọ kẹ Ileleikristi nọ a rọ ẹzi wholo na? (b) Ẹvẹ “igodẹ efa” na a bi ro fiobọhọ kẹ Ileleikristi nọ a rọ ẹzi wholo na?

⁹ Jesu ọ kẹ Ileleikristi nọ a rọ ẹzi wholo na iruo nọ Pọl o se, “iruo nọ ma re ro fiobọhọ kẹ ahwo ruẹrẹhọ” kugbe Ọghẹnẹ. (2 Kọr. 5:18-20) Pọl o ru onana vẹ nọ o kere se Ileleikristi nọ a rọ ẹzi wholo evaọ ikpe-udhusoi ọsosuọ inọ: “Obọ Ọghẹnẹ eware kpobi i no ze, ọnọ ọ rehọ ẹkwoma Kristi ruẹrẹ omai họ kugbe ọyomariẹ, ọ tẹ kẹ omai iruo nọ ma re ro fiobọhọ kẹ ahwo ruẹrẹhọ kugbei, koyehọ, Ọghẹnẹ ọ be rehọ ẹkwoma Kristi ruẹrẹ ahwo akpọ na họ kugbe ọyomariẹ, o bi kele iruthọ rai rọ kẹ ae he, yọ ọ kẹ omai iruo nọ ma re ro whowho ovuẹ nọ ahwo a rẹ rọ ruẹrẹhọ kugbei. Fikiere, mai yọ [unuẹworo] nọ i bi dikihẹ kẹ Kristi, wọhọ ẹsenọ Ọghẹnẹ ọ be rọ ẹkwoma mai lẹ ahwo. Wọhọ enọ i dikihẹ kẹ Kristi ma be lẹ nọ: ‘Wha ruẹrẹhọ kugbe Ọghẹnẹ.’”—2 Kọr. 5:18-20.

¹⁰ “Igodẹ efa” na a rri rie fihọ uvẹ-ọghọ re a fiobọhọ kẹ Ileleikristi nọ a rọ ẹzi wholo na evaọ iruo nana. (Jọn 10:16) Onana u ru nọ a bi ro wuhrẹ ahwo buobu uzẹme Ebaibol na je bi fiobọhọ kẹ ae wo emamọ usu kugbe Jihova. Onana yọ abọ ologbo iruo usi uwoma uwowou ulogbo Ọghẹnẹ nọ ma bi whowho na.

11, 12. Fikieme o rọ rrọ usi uwoma re ahwo a riẹ nọ a rẹ sae lẹ se Jihova?

¹¹ Ahwo buobu a rẹ lẹ fikinọ olẹ u re ru udu kie ai vi, dede na a rọwo ho inọ Ọghẹnẹ o bi gine yo elẹ rai. O gwọlọ nọ a rẹ riẹ nọ Jihova họ “ọnọ o re yo elẹ.” Devidi ọso-ilezi na o kere nọ: “O whẹ họ ọnọ o re yo elẹ! Whẹ họ ọnọ ahwo kpobi a re bru tha fiki izieraha rai. Nọ izieraha mai e gobọ vi omai, whẹ ọvo ọ rehọ e rae vrẹ.”—Ol. 65:2, 3.

¹² Jesu ọ ta kẹ ilele riẹ nọ: “Wha tẹ yare oware jọ evaọ odẹ mẹ, me ti ru ei.” (Jọn 14:14) U muẹro nọ “oware jọ” nọ Jesu ọ fodẹ na, u dhesẹ oware kpobi nọ o rọwokugbe oreva Jihova. Jọn ukọ na ọ ta nọ: “Ma wo imuẹro nana kpahe Ọghẹnẹ inọ, ọ rẹ gaviezọ kẹ omai evaọ oware kpobi nọ ma be yare nọ o rọwokugbe oreva riẹ.” (1 Jọn 5:14) U woma gaga re ma wuhrẹ ahwo inọ orọnikọ olẹ yọ oware nọ u re ru udu kie ohwo vi ọvo ho, rekọ obọdẹ edhere nọ ma rẹ rọ ta ẹme kẹ Jihova “ọnọ o re dhesẹ uwowou ulogbo na.” (Hib. 4:16) Ma te bi wuhrẹ ahwo re a hae lẹ evaọ edhere nọ u fo, se Ohwo nọ u fo, jẹ lẹ kpahe eware nọ i fo, o rẹ sai fiobọhọ kẹ ai si kẹle Jihova  je wo omosasọ evaọ oke uye.—Ol. 4:1; 145:18.

13, 14. (a) Uvẹ-ọghọ vẹ Ileleikristi nọ a rọ ẹzi wholo na a ti wo evaọ obaro? (b) Kọ obọdẹ iruo vẹ a ti ru kẹ ahwo-akpọ?

¹³ Jihova o ti gbe dhesẹ uwowou ulogbo riẹ evaọ okenọ ọ tẹ raha akpọ omuomu nana no. Pọl ọ ta kpahe uvẹ-ọghọ ulogbo nọ Ọghẹnẹ ọ kẹ ahwo idu udhuhrẹ gbe ene (144,000) nọ i ti lele Jesu su evaọ obọ odhiwu na inọ: “Ọghẹnẹ nọ o wo ohrọ-oriọ ulogbo fiki uyoyou ulogbo nọ o wo kẹ omai, o ru omai ziọ uzuazọ kugbe Kristi, makọ evaọ okenọ ma ro whu no evaọ izieraha mai—a siwi owhai no fiki uwowou ulogbo. U te no ere no, ọ kpare omai ze kugbei jẹ rehọ omai keria kugbei evaọ obọ odhiwu fikinọ ma rrọ usu kugbe Kristi Jesu, re ọ ruẹse jọ uyero-akpọ nọ o be tha na dhesẹ uwowou ulogbo riẹ fiki aruoriwo nọ o wo kẹ omai nọ e rrọ usu kugbe Kristi Jesu.”—Ẹf. 2:4-7.

¹⁴ Ma rẹ sae riẹ eware kpobi nọ Jihova o wo họ iroro kẹ Ileleikristi nọ a rọ ẹzi wholo na ha, nọ a te kuomagbe Kristi muhọ esuo no evaọ obọ odhiwu. (Luk 22:28-30; Fil. 3:20, 21; 1 Jọn 3:2) Rọkẹ otu nana, Jihova o ti “dhesẹ uwowou ulogbo riẹ fiki aruoriwo nọ o wo” kẹ ae. Ae a se “Jerusalẹm Ọkpokpọ na,” ọmọtibobo Kristi. (Evia. 3:12; 17:14; 21:2, 9, 10) A ti lele Jesu ru iruo “usiwo erẹwho na,” koyehọ a ti fiobọhọ kẹ ahwo evezi no otọ igbo uzioraha gbe uwhu, a ve ti je fiobọhọ kẹ ae te ẹgbagba.—Se Eviavia 22:1, 2, 17.

15, 16. Ẹvẹ Jihova o ti ro dhesẹ uwowou ulogbo riẹ kẹ “igodẹ efa” na evaọ obaro?

¹⁵ Ahwo Ẹfisọs 2:7 o ta nọ Ọghẹnẹ o ti dhesẹ uwowou ulogbo riẹ evaọ “uyero-akpọ nọ o be tha na.” Ababọ avro, ahwo kpobi nọ a te rria akpọ ọkpokpọ na a te rọ ẹro ruẹ “uwowou ulogbo” Ọghẹnẹ. (Luk 18:29, 30) Obọdẹ edhere jọ nọ Jihova o ti ro dhesẹ uwowou ulogbo riẹ evaọ akpọ ọkpokpọ na họ, ahwo nọ a whu no nọ ọ te kpare ze. (Job 14:13-15; Jọn 5:28, 29) Jihova ọ te kpare idibo oke anwae riẹ kpobi nọ i whu taure Jesu ọ tẹ te ziọ otọakpọ zihe ziọ uzuazọ. Ọ te jẹ kpare “igodẹ efa” na kpobi, enọ i kru ẹrọwọ rai te urere taure a te ti whu evaọ edẹ urere na. Aikpobi a vẹ te ruabọhọ egagọ Jihova bẹdẹ bẹdẹ.

¹⁶ Jihova ọ te jẹ kpare ima ahwo buobu nọ a riẹ Ọghẹnẹ hẹ taure a te ti whu zihe ziọ uzuazọ. A te kẹ ae uvẹ nọ a rẹ rọ romakpotọ kẹ udu-esuo Jihova. Jọn o kere nọ: “Mẹ tẹ ruẹ enọ i whu no, te ilogbo te esese nọ i dikihẹ aro agbara-uvie na, yọ a rovie iko-ebe fihọ. Rekọ a te rovie uko-obe ofa jọ; uko-obe uzuazọ. A tẹ rehọ eware nọ a kere fihọ iko-ebe na ro bruoziẹ enọ i whu no na wọhọ epanọ a ru. Abade o te siobọno enọ i whu nọ e rrọ eva riẹ, uwhu gbe Uki a te siobọno enọ e rrọ eva rai, a te bruoziẹ rai omomọvo wọhọ epanọ a ru.” (Evia. 20:12, 13) Dede na, o te gwọlọ nọ ahwo nọ a te kpare ze na a wuhrẹ epanọ a re ro fi ehri-izi Ebaibol họ iruo. U te no ere no, o te jẹ gwọlọ nọ a ru lele ithubro ekpokpọ nọ e te jọ “iko-ebe” na, kpahe oware nọ Jihova ọ te gwọlọ mi omai evaọ akpọ ọkpokpọ na. Eware nọ e rrọ iko-ebe nana nọ a ti ru vẹ kẹ omai yọ edhere ọfa nọ Jihova o ti ro dhesẹ uwowou ulogbo riẹ kẹ omai.

17. Eme o gwọlọ nọ ma rẹ hae kareghẹhọ nọ ma tẹ be ta usi uwoma na?

¹⁷ Nọ ekuhọ akpọ nana ọ be kẹle na, enẹna o mae rọ gwọlọ nọ ma ta usi uwoma Uvie na. (Mak 13:10) O rrọ vevẹ, usi uwoma nọ ma be ta na u bi dhesẹ uwowou ulogbo Jihova via. O gwọlọ nọ ma rẹ hae kareghẹhọ onana nọ ma be ta usi uwoma na. Ẹjiroro nọ ma be rọ ta usi uwoma na họ re ma rọ orro kẹ Jihova. Ma rẹ sai ru onana nọ ma te bi ru ahwo riẹ inọ eyaa nọ Ọghẹnẹ ọ ya kpahe akpọ ọkpokpọ na kpobi yọ odhesẹvia uwowou ulogbo riẹ.

18, 19. Ẹvẹ ma re ro dhesẹ nọ ma rri uwowou ulogbo Jihova ghaghae?

¹⁸ Nọ ma be ta usi uwoma kẹ amọfa na, ma rẹ sae vuẹ ae nọ evaọ otọ esuo Kristi, ahwo-akpọ a ti wo erere ziezi no idhe ẹtanigbo na ze. A vẹ te rọ ẹmẹrera te ẹgbagba. Ebaibol na ọ ta nọ: “Emama na omarai re a ti no igbo egbogbo je wo ufuoma oruaro ọrọ emọ Ọghẹnẹ.” (Rom 8:21) Uwowou ulogbo nọ u no obọ Jihova ze ọvo o rẹ sai ru onana lọhọ.

¹⁹ Ma wo uvẹ-ọghọ nọ ma rẹ rọ vuẹ ahwo nọ a gwọlọ gaviezọ kpobi kpahe obọdẹ eyaa nọ e rrọ obe Eviavia 21:4, 5 na, e ta nọ: “[Ọghẹnẹ] o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no.” Yọ Jihova, ọnọ ọ keria agbara-uvie na ọ ta nọ: “Rri! Me bi ru eware kpobi họ ekpokpọ.” Ọ tẹ jẹ ta nọ: “Kere, keme eme nana yọ eme nọ a re fievahọ, e tẹ jẹ rrọ uzẹme.” Ma tẹ be rọ ọwhọ vuẹ amọfa usi uwoma nana, kiyọ ma gine rri uwowou ulogbo Jihova ghaghae!