1, 2. Fikieme o rọ rrọ nọ iyogbere a rẹ siọ uyerakpọ nana be ẹjọ họ?

NẸNẸ, eware e ga thesiwa, yọ ohẹriẹ nọ o rrọ ọdafe avọ oyogbere o rro wumuo ho. Izoge a be gwọlọ iruo, rekọ a be ruẹ hẹ. Ahwo buobu a bi fi uzuazọ rai họ ọza re a sae kwa kpohọ erẹwho nọ ugho o mae rrọ. Iyogbere e vọ oria kpobi, makọ erẹwho nọ ugho o rrọ dede. Edafe i bi dhe efefe, yọ eware i bi dhe ẹgẹga kẹ iyogbere. Iyẹrẹ jọ kẹle na i dhesẹ nọ, a tẹ ghale ahwo nọ a rrọ akpọ na kpohọ abọ udhusoi, abọvo ọ mai fe. Yọ ugho nọ abọvo nana o wo u bu te onọ abọ udhone gbe ikpegbizii nọ i kiọkọ kpobi a wo. Dede nọ ma te sae nyai kele ahwo na unọjọ utọjọ re ma riẹ nọ enẹ o ginẹ rrọ họ, ohwo kpobi ọ riẹ nọ ahwo buobu evaọ akpọ na a yogbe vrẹta, yọ amọfa a fe te epanọ igho rai i re ro te ahwo yeri akpọ no ige te ige. Jesu o vuhu onana mu, keme ọ ta nọ: “Iyogbere na e rrọ kugbe owhai ẹsikpobi.” (Mak 14:7) Fikieme ohẹriẹ utiona o rọ rrọ udevie iyogbere avọ edafe?

² Jesu ọ riẹ nọ ẹgaga uyerakpọ na o ti nwene he bẹsenọ Uvie Ọghẹnẹ o rẹ ze. U te no ofẹ isuẹsu gbe orọ egagọ no, ofẹ ekiọthuọ nọ ọ vọ avọ uvou-uthei nọ a jọ obe Eviavia 18:3 se “egba-ihreki” na yọ abọjọ akpọ Setan re. Dede nọ idibo Ọghẹnẹ a siomano ofẹ esuo akpọ na gbe egagọ erue no riẹriẹriẹ, o be jọ bẹbẹ kẹ otu rai jọ re a si omarai kpobi no ofẹ ekiọthuọ akpọ Setan.

3. Enọ vẹ ma te ta kpahe evaọ uzoẹme nana?

³ O gwọlọ nọ mai Ileleikristi ma rẹ kiẹ omamai riwi kpahe  oghẹrẹ nọ ma rri ekiọthuọ akpọ na. Ma rẹ sae nọ omamai nọ: ‘Ẹvẹ mẹ sae rọ rehọ eyero mẹ dhesẹ nọ egagọ Jihova mẹ rọ karo? Ẹvẹ mẹ sai ro dhesẹ nọ mẹ roma kpobi kẹ ekiọthuọ akpọ na ha? Eware vẹ e via no nọ i dhesẹ nọ idibo Ọghẹnẹ a fievahọ iẹe riẹriẹriẹ evaọ etoke nana nọ ẹgaga ọ da oria kpobi fia na?’

4, 5. (a) Ẹbẹbẹ vẹ orieyero na ọ rẹriẹ ovao dhe evaọ ọtadhesẹ Jesu na? (b) Ohrẹ vẹ Jesu ọ kẹ ilele riẹ?

⁴ Se Luk 16:​1-9. U fo nọ ọtadhesẹ Jesu ọrọ orieyero nọ o kiẹrẹe he na u re ru omai dhizu je roro didi. Nọ a ta nọ orieyero na ọ be raha eware olori riẹ kufiẹ, o te ru oware “areghẹ,” rọ ere “mu egbẹnyusu” nọ i ti fiobọhọ kẹe evaọ okenọ a te si ei no iruo orieyero na no. * Dede na, orọnikọ Jesu ọ be rọ ọtadhesẹ nana tuduhọ ilele riẹ awọ nọ a hai ru oware nọ u fo ho re a sai yeri akpọ evaọ etoke obẹbẹ nana ha. Ọ tubẹ ta nọ uruemu yena yọ orọ “emọ uyero-akpọ nana,” rekọ ọ rọ ọtadhesẹ yena wuhrẹ ilele riẹ obọdẹ oware jọ.

⁵ Jesu ọ riẹ nọ wọhọ epanọ orieyero na ọ rẹriẹ ovao dhe uyero obẹbẹ na, ilele riẹ buobu a te dhogbo epanọ a rẹ rọ re eva vọ evaọ akpọ okienyẹ nana nọ ẹgaga ọ jọ robọ duotọ na. Fikiere ọ tẹ tuduhọ ae awọ nọ: “Wha rehọ efe akpọ nana nọ o kiẹrẹe he na ro mu egbẹnyusu kẹ omarai, re nọ itieye i te re no, [Jihova avọ Jesu] a ve ti dede owhai rehọ ruọ oria ẹria ebẹdẹ bẹdẹ.” Eme ma rẹ sai wuhrẹ no ohrẹ Jesu na ze?

6. Ẹvẹ ma rọ riẹ nọ ekiọthuọ akpọ na nọ ọ vọ avọ uvou-uthei na ọ jọ usu ọruẹrẹfihotọ Ọghẹnẹ hẹ?

⁶ Jesu ọ ta nọ efe akpọ nana “o kiẹrẹe he,” rekọ ọ fodẹ ẹjiroro nọ ọ rọ ta ere he. Dede na, Ebaibol na o ru rie vẹ inọ ekiọthuọ akpọ nana nọ ewhariọ e dafia na ọ jọ usu ẹjiroro Ọghẹnẹ hẹ. Jihova ọ kẹ Adamu avọ Ivi oware kpobi nọ a gwọlọ evaọ Idẹn. (Emu. 2:​15, 16) Evaọ oke ofa nọ ẹzi ọfuafo ọ jọ kugbe Ileleikristi nọ a rọ ẹzi wholo evaọ ukoko ikpe-udhusoi ọsosuọ, “ọvuọvo rai . . . ọ jẹ ta nọ eware nọ o wo yọ erọ obọriẹ hẹ, rekọ a jẹ ghale eware kpobi kugbe.” (Iruẹru 4:32) Aizaya ọruaro na ọ ta kpahe oke nọ ahwo kpobi evaọ akpọ na a te rọ reawere ekwakwa aghae nọ e rrọ akpọ na. (Aiz. 25:​6-9; 65:​21, 22) Rekọ bọo oke yena, o te gwọlọ “areghẹ” mi ilele Jesu re a sae kokọ efe akpọ nana nọ “o kiẹrẹe he” na nọ a rẹ rọ rẹrote omarai, jẹ daoma ru oware nọ Ọghẹnẹ ọ jẹrehọ evaọ oke ovona.

7. Ohrẹ vẹ o rrọ Luk 16:​10-13?

⁷ Se Luk 16:​10-13. Orieyero nọ Jesu ọ ta kpahe evaọ ọtadhesẹ riẹ na o mu egbẹnyusu fiki ewoma obọriẹ. Dede na, Jesu ọ tuduhọ ilele riẹ awọ nọ a wo egbẹnyusu kẹ omarai evaọ obọ odhiwu, rekọ orọnọ fiki ewoma obọrai hi. Oria ikere nọ u lele ọtadhesẹ Jesu na u dhesẹ nọ oghẹrẹ nọ ma rehọ “efe akpọ nana nọ o kiẹrẹe he” na ruiruo u wobọ kugbe usu mai kugbe Jihova. Ẹme nọ Jesu ọ jẹ ta na họ, ma rẹ sai ‘dhesẹ nọ a re fievahọ omai’ nọ ma te wo efe akpọ na. Evaọ oghẹrẹ vẹ?

8, 9. Kẹ oriruo epanọ inievo jọ a be rọ rehọ efe rai nọ o kiẹrẹe he ruiruo avọ areghẹ.

⁸ U wo edhere jọ nọ ma sai ro dhesẹ vevẹ nọ a rẹ sai fievahọ omai inọ ma be rehọ efe akpọ nana nọ ma wo ru oware nọ u fo. Oyehọ, ugho nọ ma re ro ru unevaze kẹ iruo usiuwoma ota akpọ soso nọ Jesu ọ  fodẹ na. (Mat. 24:14) Ọmọtẹ ọsese jọ evaọ obọ India, o wo ẹkpẹti jọ nọ ọ jẹ hai fi ibiugho fihọ. Ọ jẹ hai tube fi ugho nọ ọ hae te rọ dẹ eware arozaha riẹ fihọ ẹkpẹti na. Nọ ẹmẹkpẹti na ọ vọ no, ọ tẹ rọ ugho na ru unevaze inọ a rehọ iẹe ru iruo usiuwoma ota na. Oniọvo-ọmọzae jọ evaọ obọ India nọ o wo ọgbọ ibio, ọ rehọ ibio buobu kpohọ ọfisi efafa nọ ọ rrọ Malayalam. Oniọvo na ọ jọ eva riẹ ta nọ, nọ o rọnọ inievo na a be hae dẹ ibio na, o te mai fiobọhọ nọ ọ tẹ be hae rọ ibio ru unevaze viukpọ ugho. Onana yọ oware nọ u dhesẹ areghẹ. Epọvo na re, inievo mai nọ e rrọ obọ Greece a be hae rọ ewhri olivi, ichizi hayo ame ivie nọ o dhẹmu, gbe oghẹrẹ emu efa sa-sa ru unevaze kpohọ uwou-ogha orẹwho na.

⁹ Oniọvo-ọmọzae jọ evaọ obọ Sri Lanka nọ ọ be rria obọ America enẹna ọ kuvẹ re a jọ ighẹ riẹ ru iwuhrẹ gbe ikokohọ, gbe nọ ekobaro oke-kpobi a rẹ sae rria iwou jọ. Onana o rehọ ugho mi oniọvo nana rekọ o rrọ obufihọ ulogbo kẹ inievo nọ i wo ugho tere he nọ e be rria ighẹ na hayo nọ e be jariẹ ru iwuhrẹ gbe ikokohọ. Evaọ ẹkwotọ nọ a jọ fi awhaha họ iruo mai, inievo jọ e be hai siobọno iwou rai re a jarai ru ewuhrẹ. Onọ u bi fiobọhọ nọ ekobaro gbe inievo na a be rọ ruẹ oria jọ ru iwuhrẹ ababọ ugho nọ o be rehọ mi ai.

10. Eghale jọ vẹ ma re wo nọ ma tẹ be hai ru ọghọ?

¹⁰ Iriruo nọ ma kẹ na i dhesẹ nọ idibo Ọghẹnẹ a be “jọ oware osese dhesẹ nọ a re fievahọ” ae, koyehọ oghẹrẹ nọ a be rọ eyero rai nọ ọ ghare te efe egagọ Ọghẹnẹ hẹ ruiruo. (Luk 16:10) Ẹvẹ ọghoruo otiọna ọ be hae jọ egbẹnyusu Jihova nana oma? A riẹ nọ ọghoruo yọ edhere jọ nọ a re ro wo efe nọ o “kiẹrẹe.” (Luk 16:11) Oniọvo-ọmọtẹ jọ nọ o re ru unevaze kẹ iruo Uvie na ẹsikpobi ọ ta kpahe eghale nọ o wo no inọ: “Fikinọ mẹ be rọ ekwakwa eyero mẹ fiobọhọ evaọ iruo Uvie na, anwọ ikpe jọ ze na, me bi muẹrohọ oware jọ nọ o re te via kẹ omẹ ẹdẹvo ho. Mẹ ruẹ nọ epanọ mẹ rọ eware mẹ fiobọhọ te, ere mẹ be riẹ yeri kugbe amọfa te evaọ ukoko na. Enẹna, mẹ be mae rọvrẹ amọfa, wo odiri kẹ amọfa, je thihakọ nọ amọfa a te ru oware jọ nọ o kẹ omẹ uye hayo nọ a tẹ whọku omẹ.” Ahwo buobu a ruẹ no nọ a te bi ru ọghọ, u re fiobọhọ kẹ ai kruga evaọ egagọ Jihova.​—Ol. 112:5; Itẹ 22:9.

11. (a) Ẹvẹ okẹ nọ ma re siobọno ẹsikpobi o rọ rrọ oware “areghẹ”? (b) Oghẹrẹ vẹ eware e be rọ jọ “ẹrẹrẹe” evaọ iruẹru idibo Ọghẹnẹ wariẹ akpọ soso họ nẹnẹ? (Rri uwoho nọ o rrọ emuhọ uzoẹme na.)

¹¹ Ma tẹ be hae rọ eyero mai tha iruo Uvie na uke u re je dhesẹ nọ ma wo “areghẹ” evaọ edhere ọfa. O rẹ kẹ omai uvẹ nọ ma re ro fiobọhọ kẹ amọfa ghelọ uyero nọ ma rrọ kpobi kẹhẹ. U wo inievo jọ nọ a wo eyero akpọ nana rekinọ a sae ruọ iruo ọkobaro oke-kpobi hayo kwa kpohọ orẹwho ofa kẹ iruo Uvie na ha fiki uyero rai. Inievo itienana a re wo evawere nọ a tẹ riẹ nọ ugho unevaze rai u bi fiobọhọ tha iruo usiuwoma ota inievo nọ i bi ru ere uke. (Itẹ 19:17) Igho unevaze i bi fiobọhọ nọ ma be sai ro printi ebe jẹ wọ ae kpohọ eria sa-sa, je fiobọhọ wha iruo usiuwoma ota na haro evaọ ekwotọ nọ ugho o rrọ tere he rekinọ ẹnyaharo ọ be jọ romavia evaọ iruo Uvie na. Wọhọ oriruo, evaọ ikpe buobu, inievo  jọ a jẹ hae siọ emu ba ẹre ẹsibuobu evaọ ekwotọ wọhọ Congo, Madagascar, gbe Rwanda re a sae rọ ugho na dẹ Ebaibol, yọ ẹsejọ Ebaibol na ọ rẹ ghare te osa iruo ẹkpoka hayo amara ahwo jọ. Enẹna, unevaze nọ inievo buobu a bi ru o wha riẹ ze nọ ugho nọ a be rọ rẹrote iruo Uvie na evaọ ekwotọ sa-sa o be rọ jọ “ẹrẹrẹe,” makọ evaọ eria nọ inievo e jọ wo ugho tere he. Ukoko na o be fa Ebaibol na fihọ evẹrẹ sa-sa je bi ru ai te inievo mai kpobi obọ, makọ te ahwo nọ ma bi wuhrẹ Ebaibol na kugbe. (Se 2 Ahwo Kọrint 8:​13-15.) Fikiere, te ahwo nọ a be kẹ okẹ unevaze gbe ahwo nọ a be rọ okẹ na fiobọhọ kẹ a bi mu usu okpekpe kugbe Jihova.

12. Ẹvẹ Abraham o ro dhesẹ nọ o fievahọ Ọghẹnẹ?

¹² Edhere ọfa nọ ma sai ro wo usu okpekpe kugbe Jihova họ, nọ ma gbe bi duomahọ ekiọthuọ akpọ na vrẹta ha, jẹ be jọ uyero nọ ma rrọ kpobi gwọlọ efe nọ o “kiẹrẹe.” Abraham, odibo Ọghẹnẹ oke anwae nọ o wo ẹrọwọ na o yoẹme kẹ Ọghẹnẹ je no okpẹwho Ọr nyae rria iwou-udhu re ọ sae jọ ogbẹnyusu Jihova. (Hib. 11:​8-10) O fievahọ Ọghẹnẹ ẹsikpobi inọ ọye ọ rẹ kẹ efe nọ o kiẹrẹe, ọ dhogbo epanọ o re ro wo ekwakwa eyero-akpọ kẹ omariẹ hẹ. (Emu. 14:​22, 23) Jesu ọ tuduhọ ilele riẹ awọ nọ a daoma wo ẹrọwọ otiọye, ọ ta kẹ ọzae jọ nọ o fe gaga nọ: “Whọ tẹ gwọlọ jọ gbagba, nyae zẹ eware nọ who wo, whọ vẹ rọ igho na kẹ iyogbere, who ti wo efe evaọ obọ odhiwu; whọ vẹ nyaze te jọ olele mẹ.” (Mat. 19:21) Ọzae yena o wo ọkpọ ẹrọwọ Abraham na ha, rekọ u wo amọfa nọ a dhesẹ via no inọ a fi eva rai kpobi họ Ọghẹnẹ.

13. (a) Uthubro vẹ Pọl ọ kẹ Timoti? (b) Ẹvẹ ma sai ro fi uthubro Pọl na hiruo nẹnẹ?

¹³ Timoti ọ jọ ọzae nọ o wo ẹrọwọ gaga. Nọ Pọl ukọ na o sei “emamọ osoja Kristi Jesu” no, ọ tẹ ta kẹe nọ: “Ohwo nọ ọ rrọ osoja o re dhomahọ ekiọthuọ akpọ họ, re ọ ruẹsi wo ọjẹrehọ ọnọ o wuzou riẹ.” (2 Tim. 2:​3, 4) Ilele Jesu nẹnẹ, enọ i kugbe inievo nọ i bu vi ima-ọvo (1,000,000) nọ e rrọ iruo odibọgba oke-kpobi na, a bi ru lele ohrẹ Pọl na ghelọ uyero kpobi nọ a rrọ kẹhẹ. A be daoma whaha uruemu ọ onọ-u-kieze a dẹ gbe urusio eware nọ e wariẹ e rai họ, keme a be kareghẹhọ ehri-uzi Ebaibol nọ o ta nọ: “Ọnọ o re momo ọ rẹ jọ ọrigbo kẹ ọnọ o momo mi na.” (Itẹ 22:7) Setan ọ gwọlọ nọ ma rehọ oke gbe ẹgba mai kpobi gbodibo kẹ ekiọthuọ akpọ riẹ nana. Iroro jọ nọ ma rẹ jẹ e rẹ sae lẹliẹ omai riesa fihọ uzou ikpe buobu. Ahwo jọ a re momo igho buobu rọ dẹ uwou, dẹ omoto, kpohọ isukulu ikpehru, je tube ro ru ehaa-orọo ilogbo dede. U re dhesẹ nọ ma wo areghẹ nọ ma te bi yeri umutho uzuazọ jẹ whaha esa gbe ugho nọ ma re mu raha, onọ u ti ru omai wo uvẹ gbodibo kẹ Ọghẹnẹ viukpọ ekiọthuọ akpọ nana.​—1 Tim. 6:10.

14. Ọtamuo vẹ o gwọlọ nọ ma re wo? Kẹ iriruo.

¹⁴ Edhere jọ nọ ma re ro yeri umutho uzuazọ họ, nọ ma tẹ be rọ eware nọ e mai wuzou karo. U wo ọzae-avọ-aye jọ nọ a wo ekọmpene eware ikuo nọ ugho u je no ze ziezi. Rekọ fikinọ a gwọlọ nọ a rẹ wariẹ mu iruo odibọgba oke-kpobi họ, a tẹ zẹ ekọmpene rai na, te okọ-oyibo rai, gbe eware efa nọ a wo. Kẹsena a tẹ fialoma via nyai fiobọhọ evaọ ebabọ ehri ukoko mai nọ o rrọ Warwick, New York. Obọdẹ oghale jọ nọ ọzae-avọ-aye nana a wo họ, a jọ Ebẹtẹle ruiruo kugbe ọmọtẹ rai avọ ọzae riẹ, a te je ruiruo kugbe ọsẹgboni ọzae ọmọtẹ rai na eka jọ, keme aikpobi a gbẹ jọ iruo ebabọ Warwick na. Oniọvo-ọmọtẹ jọ nọ ọ rrọ ọkobaro evaọ Colorado obọ America ọ ruẹ iruo ubroke nọ o je ru evaọ ebanke jọ. Iruo riẹ e were ahwo ebanke na gaga te epanọ otu nọ o wuzou riẹ a rọ vuẹe nọ ọ sai ru iruo oke-kpobi, yọ osa nọ a te hwae u te  akwasa onọ a jẹ hwae vẹre. Rekọ fikinọ iruo na e te kẹ oniọvo na uvẹ kpohọ usiuwoma te epanọ ọ gwọlọ họ, ọ tẹ siọ iruo na. Enana yọ umutho iriruo idibo Jihova jọ nọ i siobọno eware jọ fiki iruo Uvie na. Ma tẹ gbaemu nọ ma rẹ rọ iruo Uvie na karo oghẹrẹ utiona, u re dhesẹ nọ ma rri usu mai kugbe Jihova gbe efe egagọ Ọghẹnẹ ghare vi erere nọ ma rẹ sai wo no ekiọthuọ akpọ inẹnẹ ze.

15. Efe vẹ ọ rẹ mae kẹ evawere?

¹⁵ Ma te fe, o nwane rọnọ onana yọ oghale nọ u no obọ Ọghẹnẹ ze fikinọ eva mai e be were iẹe he. Otu nọ o re “ru eware ezi” Jihova ọ rẹ ghale. (Se 1 Timoti 6:​17-19.) Wọhọ oriruo, okenọ Lucia * ọ riẹ nọ a be jọ obọ Albania gwọlọ obufihọ iwhowho-uvie, ọ tẹ kwa no obọ Italy nya evaọ 1993. Yọ oke yena o wo iruo nọ ọ te rọ rẹrote omariẹ hẹ. O te wuhrẹ ẹvẹrẹ Albania, yọ enẹna o fiobọhọ kẹ ahwo udhosa roma mudhe kẹ Jihova jẹ họ-ame no. Dede nọ idibo Ọghẹnẹ kpobi a rrọ ẹkwotọ otiọye nọ ẹvi ọ rrọ ta usiuwoma nẹnẹ hẹ, oware kpobi nọ ma ru ro fiobọhọ kẹ amọfa riẹ uzẹme na jẹ daji edhere uzuazọ ebẹdẹ bẹdẹ, o te kẹ omai gbe ahwo nọ ma fiobọhọ kẹ evawere bẹdẹ bẹdẹ.​—Mat. 6:20.

16. (a) Eme ọ te via kẹ ekiọthuọ akpọ na kẹlena? (b) Ẹvẹ u fo nọ ma re rri eyero mai nọ ma te roro kpahe oware nọ o te via kẹ ae evaọ obaro?

¹⁶ Jesu ọ ta nọ: “Nọ itieye [koyehọ, efe nọ o kiẹrẹe he] i te re,” orọnikọ ọ ta nọ ‘otiẹsejọhọ i te re’ he. (Luk 16:9) Evaọ edẹ urere nana, ebanke gbe ekọ buobu i bi kie, yọ ẹbẹbẹ nana o te oware ovo ho nọ a tẹ rehọ iẹe wawo oware nọ o te jọ akpọ soso via evaọ obaro. Uyero-akpọ Setan soso, te isuẹsu, egagọ, gbe ekiọthuọ akpọ na i ti kie wariama kẹlena. Izikiẹl avọ Zefanaya nọ e jọ eruẹaro a ta nọ igoru gbe isiliva nọ a rri ghaghae evaọ ekiọthuọ akpọ na, i ti wiruo ho. (Izik. 7:19; Zef. 1:18) Ẹvẹ o te jọ nọ ma te yeri akpọ te urere jẹ ruẹ nọ ma gbabọkẹ efe egagọ Ọghẹnẹ, jẹ rọ oke mai kpobi le “efe akpọ nana nọ o kiẹrẹe he” na? O rẹ sae da omai gaga wọhọ ohwo nọ ọ rọ uzuazọ riẹ kpobi je koko igho buobu họ, rekọ ukuhọ riẹ ọ tẹ ruẹ nọ igho na kpobi yọ ebe gheghe nọ a ru wọhọ igho nọ a sai ro ru oware ovo ho. (Itẹ 18:11) Oke o be ginẹ tha nọ efe akpọ nana o gbe ti ro wiruo vievie he. Fikiere, ajọ ma rọ eyero mai “mu egbẹnyusu” kẹ omamai evaọ obọ odhiwu enẹna nọ oke o gbẹ riẹ na. Oware kpobi nọ ma ru rọ tha iruo Uvie Ọghẹnẹ uke u re ru omai fe evaọ egagọ Ọghẹnẹ.

17, 18. Eghale vẹ e rrọ obaro hẹrẹ egbẹnyusu Ọghẹnẹ?

¹⁷ Nọ Uvie Ọghẹnẹ o tẹ ze no, ma te gbẹ haya iwou hayo momo igho rọ dẹ iwou hu, emu ọ te jọ oria kpobi ọvọvẹ, yọ ẹyao ọ te gbẹ jariẹ hẹ nọ o te gwọlọ nọ ma raha igho ro siwi. Idibo Jihova nọ e te jọ otọakpọ a te reawere ewoma otọakpọ na vọvọ. Igoru, isiliva, gbe ekwakwa eghaghae efa e te jọ eware nọ a rẹ rọ gẹgọ hayo whẹ erru họ oria, orọnikọ a te rehọ ae thueki hayo si ai no ho. Emamọ ire, itho eghaghae, gbe eyọno gbe eware itieye efa e te da oria kpobi fia nọ ahwo a te rọ bọ iwou ọvọvẹ. Egbẹnyusu i ti fiobọhọ kẹ omai bọ iwou fiki evawere nọ a ti wo, orọnikọ fiki ugho ho. Ohwo kpobi ọ te reawere emamọ eware nọ e te jọ otọakpọ na vọvọ.

¹⁸ Enana yọ eghale jọ nọ ahwo nọ a mu egbẹnyusu evaọ obọ odhiwu a ti wo. Eva e te were idibo Jihova nọ e te jọ otọakpọ gaga nọ a ti yo Jesu nọ ọ te ta nọ: “Wha nyaze, whai enọ Ọsẹ mẹ ọ ghale no, re wha reuku Uvie nọ a ruẹrẹhọ kẹ owhai no emuhọ akpọ na ze.”​—Mat. 25:34.