ILELEIKRISTI ikpe-udhusoi ọsosuọ a daoma gaga re a ruẹ nọ ahwo buobu a yo “usi uwoma Uvie na.” (Mat. 24:14) Otu rai jọ o tube kpohọ orẹwho ofa kẹ iruo na. Wọhọ oriruo, Pọl ukọ na o kpohọ ẹkwotọ nọ a bi se Turkey enẹna jẹ jọ obei ta usiuwoma na ziezi evaọ etoke erẹ imisiọnare riẹ. * Oware wọhọ ikpe idu ivẹ (2,000) nọ i lele i rie, koyehọ evaọ 2014, idibo Ọghẹnẹ jọ a wariẹ jọ Turkey wobọ evaọ usiuwoma ota obọdẹ. Fikieme a ro ru ọruẹrẹfihotọ usiuwoma ota nana? Amono a jariẹ wobọ?

Iwhowho-uvie nọ e rrọ Turkey i bu vi idu ivẹ gbe egba eree (2,800), rekọ ahwo orẹwho na a bu te ima udhosa gbe ikpegbizii (79,000,000). Onana u dhesẹ nọ a tẹ ghale iẹe, owhowho-uvie ọvo ọ rẹ ta usiuwoma kẹ enwenọ ahwo idu udhegberee (28,000) evaọ Turkey. Fiki onana, umutho ahwo jọ ọvo iwhowho-uvie na a sae ta usiuwoma kẹ no. Ẹjiroro nọ a ro ru ọruẹrẹfihotọ usiuwoma ota obọdẹ na họ re a sae ta usiuwoma na kẹ ahwo buobu evaọ umutho oke. Evaọ etoke usiuwoma ota obọdẹ na, inievo egba isoi gbe udhuvẹ gbikpe (550) nọ e rẹ jẹ ẹvẹrẹ Turkish i no erẹwho sa-sa ze ti kuomagbe inievo nọ e rrọ Turkey kẹ iruo obọdẹ nana. Kọ ẹvẹ a ru te?

A wha usiuwoma na te eria buobu. Ukoko jọ evaọ obọ Istanbul u kere nọ: “Nọ ahwo a ruẹ omai, a tẹ jẹ nọ omai nọ, ‘Kọ wha bi ru okokohọ obọdẹ jọ evaọ obonẹ? Ma be jọ oria kpobi ruẹ Isẹri Jihova!’” Ukoko jọ evaọ ẹwho Izmir u kere nọ: “Ọzae jọ nọ o bi ru iruo evaọ egaraje ọ nyabru ọkpako ukoko jọ jẹ nọe nọ, ‘Eme ọ be via? Wha fiba iruẹru rai no?’” O jọ vevẹ nọ ahwo a muẹrohọ usiuwoma ota obọdẹ na.

Inievo nọ i no erẹwho efa ze na a reawere usiuwoma ota na gaga. Steffen, oniọvo-ọmọzae jọ nọ o no obọ Denmark ze, ọ ta nọ: “Kẹdẹ kẹdẹ, mẹ jẹ ta usiuwoma kẹ ahwo jọ nọ a rri yo kpahe Jihova ẹdẹvo ho. Oma o ginẹ jọ omẹ nọ me bi fiobọhọ kẹ ahwo riẹ kpahe odẹ Jihova.” Oniọvo-ọmọzae ọfa nọ a re se Jean-David nọ o no obọ France ze ọ ta nọ: “Ma jọ iyẹrẹ ọvo jọ ta usiuwoma euwa buobu. U gbunu kẹhẹ! Ahwo buobu a riẹ Isẹri Jihova ha. Enwenọ unuẹthẹ kpobi ma jẹ jọ ta usiuwoma, dhesẹ ividio, jẹ rehọ obe kẹ ahwo.”

Inievo egba isoi gbe udhuvẹ gbikpe (550) nọ i wobọ  evaọ usiuwoma ota obọdẹ nana a fi ebe nọ i bu te oware wọhọ idu udhosa (60,000) họ ada evaọ eka ivẹ ọvo! Ọruẹrẹfihotọ nana u ru nọ ahwo buobu a ro yo usiuwoma na.

Ajọwha kẹ iruo usiuwoma na o je dhe ẹgẹga. Ọruẹrẹfihotọ usiuwoma ota obọdẹ na ọ lẹliẹ inievo nọ e rrọ ẹkwotọ na wo ajọwha kẹ iruo Uvie na. U ru nọ ibuobu rai a je ro roro kpahe odibọgba oke-kpobi. Ukpe nọ u lele i rie, inievo udhone gbivẹ efa a te kuomagbe ekobaro oke-kpobi nọ e jọ Turkey.

Inievo nọ i no erẹwho efa ze na a ta kpahe epanọ usiuwoma ota obọdẹ nọ a kpohọ na u ro fiobọhọ kẹ ae nọ a maki zihe kpo no. Şirin, oniọvo-ọmọtẹ jọ nọ o no obọ Germany ze o kere nọ: “O lọhọ kẹ inievo obọ Turkey na gaga re a ta usiuwoma kẹ ahwo evaọ oke gheghe. Oma o rẹ vuọ omẹ gaga re mẹ ta usiuwoma evaọ oke gheghe. Rekọ eva e were omẹ gaga nọ me ro kpohọ usi-uwhowho obọdẹ yena, oriruo inievo obei gbe olẹ u fiobọhọ kẹ omẹ nọ mẹ be sai ro ru oware nọ mẹ jẹ sai ru vẹre he. Mẹ tubẹ jọ oria nọ a rẹ jọ ro itreni nọ u re zurie ta usiuwoma jẹ rọ ebe kẹ ahwo! Enẹna oma o gbẹ be vuọ omẹ tere he.”

Johannes, oniọvo-ọmọzae jọ nọ o no obọ Germany ze, ọ ta nọ: “Me wuhrẹ eware jọ kpahe usiuwoma ota mẹ. Inievo obọ Turkey na a gwọlọ nọ a rẹ ta usiuwoma kẹ ahwo buobu, epanọ o rẹ sae lọhọ te kpobi. A rẹ rọ uvẹ kpobi ta usiuwoma. Mẹ tẹ gbaemu nọ me re ru epọvo na nọ me te zihe kpobọ Germany. Yọ enẹna mẹ be sae ta usiuwoma kẹ ahwo buobu vi epaọ anwẹdẹ.”

Zeynep, oniọvo-ọmọtẹ jọ nọ o no obọ France ze ọ ta nọ: “Usi-uwhowho obọdẹ na u fiobọhọ kẹ omẹ gaga evaọ usiuwoma ota mẹ. U ru nọ me ro wo udu ziezi je ru omẹ fievahọ Jihova vi epaọ anwẹdẹ.”

Inievo na a si kẹle ohwohwo ziezi. Uyoyou gbe okugbe nọ o jọ udevie inievo nọ i no erẹwho sa-sa ze na o jọ gaga. Jean-David nọ ma fodẹ no vẹre na ọ ta nọ: “Inievo na a dede omai rehọ ziezi. A rehọ omai wọhọ egbẹnyusu gbe ahwo uviuwou rai. A rovie iwou rai kẹ omai. Anwẹdẹ, mẹ riẹ nọ mai kpobi ma rrọ uviuwou inievo akpọ soso, me se kpahe onana ẹsibuobu no evaọ ebe mai. Rekọ obọnana, mẹ rọ ẹro ruẹ onana no. Enẹna, eva e be mae were omẹ inọ mẹ yọ Osẹri Jihova, yọ me bi yeri Jihova kẹ uvẹ ulogbo nana nọ u no obọ riẹ ze na.”

 Claire, oniọvo-ọmọtẹ jọ nọ o no obọ France ze ọ ta nọ: “O tẹ make rọnọ Denmark, France, Germany, hayo Turkey ma no ze, mai kpobi na yọ uviuwou ovo. O jọ wọhọ ẹsenọ Ọghẹnẹ ọ rehọ uvoro ulogbo voro iwhru erẹwho na kpobi no.”

Stéphanie, oniọvo-ọmọtẹ jọ nọ o no obọ France ze ọ ta re nọ: “Usi-uwhowho obọdẹ na u wuhrẹ omai nọ orọnikọ uruemu ẹwho hayo ẹvẹrẹ mai u ku omai gbe he, rekọ uyoyou nọ ma wo kẹ Jihova.”

Inievo buobu nọ i no erẹwho efa ziọ Turkey kẹ usiuwoma ota na, a te je roro epanọ a rẹ rọ kwa kpohọ obei nyai fiobọhọ evaọ iruo nọ e vọ otọ evaọ obei. Ejọ rai e kwa nya no. Iruo nọ inievo nana a bi ru e da omai ẹro fia.

Wọhọ oriruo, utu jọ o jariẹ nọ u wo iwhowho-uvie udhegbisoi ọvo evaọ ẹkwotọ Turkey jọ. Evaọ ikpe buobu, ọkpako ukoko ọvuọvo ọ jọ utu na. Dai roro epanọ eva e were iwhowho-uvie na te evaọ 2015 nọ inievo ezeza soso a kwa no Germany avọ Netherlands nyai fiobọhọ kẹ ae!

Eme inievo nọ e nyae rria Turkey omoke jọ fiki iruo Uvie na a ta kpahe epanọ uzuazọ o jọ kẹ ae evaọ obei? Uzẹme, o rẹ dina jọ bẹbẹ ẹsejọ, rekọ ohwo o re wo eghale buobu nọ o te kpohọ ẹkwotọ nọ a jọ mae gwọlọ iwhowho-uvie. Roro kpahe ẹme nọ inievo jọ e ta:

Oniọvo-ọmọzae jọ nọ ọ rọo no nọ a re se Federico nọ ọ vrẹ ikpe udhuvẹ obọ, ọ kwa no obọ Spain ze. Ọ ta nọ: “Fikinọ me wo ekwakwa eyero akpọ buobu nọ e be rehọ iroro mẹ hẹ, u ru nọ me ro wo ufuoma. Onana o kẹ omẹ uvẹ nọ mẹ be rọ tẹrovi oware nọ o mai wuzou na.” Kọ ọ rẹ sae ta kẹ amọfa nọ a jọ iruo nana wobọ? Ọ ta nọ: “Ee, me re ru ere dẹẹ! Whọ tẹ kwa kpohọ ẹkwotọ ọfa nyai fiobọhọ kẹ ahwo riẹ Jihova, yọ who bi fi uzuazọ ra họ Ọghẹnẹ obọ. Whọ rẹ rọ ẹro ruẹ ẹruọsa Jihova vi epaọ anwẹdẹ kpobi.”

Oniọvo-ọmọzae ọfa nọ ọ rọo no nọ a re se Rudy nọ ọ joma te ikpe udhosa no, ọ kwa no obọ Netherlands ze. Ọ ta nọ: “O rẹ kẹ evawere gaga nọ ohwo ọ tẹ rrọ aro evaọ iruo usiuwoma ota na, je bi ru ahwo buobu  nọ a ri ti yo ovuẹ na ẹdẹvo ho riẹ kpahe uzẹme na. Whọ tẹ be ruẹ ahwo na nọ a jẹ uzẹme na rehọ, nọ eva e be were o rẹ kẹ evawere gaga.”

Oniọvo-ọmọzae ọfa jọ nọ ọ rọo no nọ a re se Sascha nọ ọ vrẹ ikpe udhuvẹ obọ, ọ kwa no obọ Germany ze. Ọ ta nọ: “Oke kpobi nọ mẹ tẹ rrọ usiuwoma ota, mẹ rẹ nyaku ahwo nọ a ri ti yo kpahe uzẹme na ẹdẹvo ho. Me te bi fiobọhọ kẹ ahwo otiọye na wo uvẹ nọ a rẹ rọ riẹ Jihova, o rẹ kẹ omẹ evawere gaga.”

Oniọvo-ọmọtẹ nọ ọ rọo no nọ a re se Atsuko nọ ọ rrọ ikpe ọgbagbisoi, ọ kwa no obọ Japan ze. Ọ ta nọ: “Evaọ okenọ u kpemu, mẹ jẹ hae gwọlọ nọ Amagẹdọn o fi vẹrẹ. Rekọ nọ mẹ kwa kpobọ Turkey, me te bi yere Jihova inọ o gbe bi thihakọ. Ẹsikpobi nọ mẹ ruẹ oghẹrẹ nọ Jihova ọ be rọ kpọ eware, u re ru omẹ si kẹle iẹe vi epaọ anwẹdẹ.”

Alisa, oniọvo-ọmọtẹ jọ nọ ọ rọ omojọ vrẹ ikpe ọgba no, ọ kwa no obọ Russia ze. Ọ ta nọ: “Edhere otiọna nọ mẹ be rọ gọ Jihova na u fiobọhọ kẹ omẹ jawo no jẹ ruẹ nọ Jihova ọ ginẹ rrọ wowoma evaọ idhere kpobi.” (Ol. 34:8) Ọ ta re nọ: “Orọnikọ Ọsẹ mẹ ọvo Jihova ọ rrọ họ rekọ Ogbẹnyusu ọkpekpe, ọnọ mẹ be riẹ ziezi evaọ etoke uyero sa-sa. Me bi wo evawere gbe eghale buobu evaọ uzuazọ!”

Usiuwoma ota obọdẹ nana nọ a kpohọ evaọ obọ Turkey na, u ru nọ amọfa buobu a ro yo ovuẹ Uvie na. Dede na, u wo ẹkwotọ ọfa ruaro nọ ovuẹ na u ri te he. Kẹdẹ kẹdẹ, inievo nọ e kwa kpohọ ekwotọ nọ a jọ mae gwọlọ iwhowho-uvie evaọ Turkey a rẹ nyaku ahwo nọ a ri yo kpahe Jihova vẹre he. Kọ o te were owhẹ re who kpohọ ẹkwotọ otiọye kẹ usiuwoma ota? O tẹ rrọ ere, ma be tuduhọ owhai awọ nọ: “Wha kpare aro rai re wha rri idhu na, inọ e who no kẹ ivuẹvu.” (Jọn 4:35) Kọ whọ sai fiobọhọ evaọ ẹkwotọ nọ idhu na e jọ “who no kẹ ivuẹvu”? O tẹ rrọ ere, ru eware jọ enẹna nọ e rẹ sai fiobọhọ kẹ owhẹ le utee yena te obọ. Whọ rẹ sai wo imuẹro nọ: Whọ tẹ be daoma fihọ iruo usiuwoma ota nọ idibo Ọghẹnẹ a bi ru nẹnẹ na, re a ta usiuwoma na “rite oria nọ o mai thabọ evaọ otọakpọ na,” who ti wo eghale nọ a rẹ ruẹ obọ rai hi!​—Iruẹru 1:8.