MA TE se Ebaibol na, ma rẹ jariẹ ruẹ eme buobu nọ ahwo “wọhọ omai na” a ta, eme nọ i gine no ai udu ze. (Jem. 5:17) Wọhọ oriruo, ma rẹ sai wo otoriẹ oghẹrẹ nọ o jọ Pọl oma nọ o kere ẹme nọ ọ rrọ Ahwo Rom 7:21-24, inọ: “Mẹ tẹ gwọlọ ru oware nọ u kiehọ, oware uyoma o vẹ romavia. . . . Me fioka ohwo ho!” Eme itienana e rẹ kẹ omai uduotahawọ nọ oware o tẹ thọ omai obọ.

Pọl ọ ta eware efa nọ e jariẹ iroro re. Ọ jọ obe Ahwo Galesha 2:20 ta nọ Jesu “o you omẹ, o te siobọno omariẹ fiki mẹ.” Kọ ere o rrọ owhẹ oma re? Ẹsejọhọ o be hae jọ owhẹ oma ere ẹsikpobi hi.

Otẹrọnọ ma be hai rri omamai nọ ma fioka ha fiki izieraha mai erọ okenọ u kpemu, o sae jọ bẹbẹ kẹ omai ẹsejọ re ma rọwo nọ Jihova o you omai gbe nọ ọ rọvrẹ omai no. Yọ o te tubẹ mae jọ bẹbẹ kẹ omai re ma rọwo nọ ẹtanigbo na yọ okẹ nọ Ọghẹnẹ ọ kẹ omai omomọvo. Kọ ere Jesu ọ ginẹ gwọlọ nọ ma rri ẹtanigbo na? O tẹ rrọ ere, eme o rẹ sai fiobọhọ kẹ omai rri rie ere? Joma ta kpahe iyo enọ ivẹ yena.

Avro ọ riẹ hẹ, Jesu ọ gwọlọ nọ ma rri idhe ẹtanigbo riẹ na wọhọ okẹ nọ Ọghẹnẹ ọ rọ kẹ omai omomọvo. Ẹvẹ ma rọ riẹ? Roro kpahe oware nọ o rrọ obe Luk 23:39-43. A kare ọzae jọ fihọ ure-oja kẹle Jesu. Ọzae na ọ rọwo nọ ọyomariẹ o ru oware uyoma. Onana o te jọ uzioraha ulogbo keme ahwo nọ a thọ uzi utioye a rẹ kẹ oghẹrẹ uye nọ a kẹ riẹ na. Ọzae nana ọ jẹ ruawa kpahe ẹbẹbẹ nọ ọ rrọ na, kẹsena ọ tẹ lẹ Jesu nọ: “Kareghẹhọ omẹ okenọ whọ tẹ ruọ Uvie ra no.”

Eme Jesu o ru? Dae rehọ iẹe nọ whọ be ruẹ Jesu nọ ọ be daoma jẹlẹ ovao rri ọzae na avọ edada. Dede nọ ọ be reakọ, ọ dawo ẹgba riẹ kpobi re ọ ruẹ nọ ọ sasa ovao, kẹsena ọ tẹ ta ẹme nọ ọ kẹ ọzae na omosasọ, inọ: “Uzẹme mẹ be ta kẹ owhẹ nẹnẹ na, who ti lele omẹ jọ Aparadase.” Jesu ọ hae sae ta kẹ ọzae na ọvo nọ “Ọmọ ohwo ọ nyaze [re o] siobọno uzuazọ riẹ rọkẹ ẹtanigbo ahwo buobu.” (Mat. 20:28) Rekọ Jesu o ru ere he, ukpoye o dhesẹ via nọ ọzae na omariẹ o ti wo erere no idhe ẹtanigbo riẹ na ze. Eme wọhọ “owhẹ” gbe “omẹ” nọ o fiba ẹme riẹ na u dhesẹ epanọ ọ whẹtiẹ ọzae na họ oma te. Ọ tẹ jẹ vuẹ ọzae na dẹẹ nọ ọ te rria aparadase otọakpọ.

Jesu ọ gwọlọ nọ ọzae na o rri idhe nọ ọ be te rọ uzuazọ riẹ dhe na wọhọ okẹ nọ Ọghẹnẹ ọ kẹ ọyomariẹ dẹẹ. Otẹrọnọ Jesu ọ rọ uvẹ utiona kẹ ogbulegbu nọ ọ re tubẹ riẹ Ọghẹnẹ hẹ, kọ ogbẹrọnọ Oleleikristi nọ ọ họ-ame no uvẹ utiona o mae rrọ kẹ? Nọ o rrọ ere na, eme o rẹ sai fiobọhọ kẹ omai rọwo nọ idhe ẹtanigbo Jesu e rrọ kẹ omai omomọvo, o tẹ make rọnọ ma raha izi jọ evaọ okenọ u kpemu?

Pọl ọ riẹ nọ Jesu o gine whu kẹe keme ọ kẹ riẹ uvẹ iruo odibọgba na. Evaọ oghẹrẹ vẹ?  Pọl ọ ta nọ: “Me bi yere Kristi Jesu Olori mai, ọnọ ọ kẹ omẹ ogaga, keme o rri omẹ nọ me wo ẹrọwọ, ọ tẹ kẹ omẹ iruo odibọgba, dede nọ evaọ oke ọsosuọ mẹ jọ ọnọ ọ jẹ ta eme-aghọ, ọnọ o je kpokpo ilele riẹ, jẹ ta emiẹsọ kẹ ae.” (1 Tim. 1:​12-14) Iruo odibọgba nọ Jesu ọ kẹ Pọl na o kẹ riẹ imuẹro nọ Jesu o gine wo ohrọ kẹe, o you rie, je fievahọ iẹe. Jesu ọ kẹ omai omomọvo iruo re, inọ ma ta usi uwoma na. (Mat. 28:​19, 20) Kọ iruo nana e sae kẹ omai imuẹro nọ Jesu o gine whu kẹ omai re?

Albert nọ a si no ukoko enwenọ ikpe 34 rekinọ o zihe bru Jihova ze no kẹle na ọ ta nọ: “Ẹsikpobi mẹ rẹ kareghẹhọ eware iyoma nọ me ru evaọ okenọ u kpemu. Rekọ nọ mẹ tẹ rrọ usi uwoma ota, o rẹ jọ omẹ oma wọhọ epanọ o jọ Pọl oma na, inọ Jesu họ ọnọ ọ kẹ omẹ iruo nana. O be lẹliẹ eva were omẹ, me bi rri omamẹ nọ mẹ rrọ ghaghae, me bi yeri emamọ uzuazọ, me te je wo ẹruore.”​—Ol. 51:3.

Allan nọ ọ jẹ hae họre uthu je ru ozighi taure o te ti wuhrẹ uzẹme na, ọ ta nọ: “Me re gbe roro kpahe eware iyoma nọ me ru ahwo. Ẹsejọ, o rẹ wha ọkora họ omẹ oma. Rekọ me yere Jihova gaga inọ ọ kuvẹ re ọrahauzi kerọ omẹ ọ ta usi uwoma na kẹ amọfa. Mẹ tẹ ruẹ oghẹrẹ nọ ahwo a be rọ gaviezọ kẹ usi uwoma na, mẹ rẹ kareghẹhọ epanọ Jihova o you omai jẹ rrọ wowou te. O rrọ omẹ oma nọ ọ be rehọ omẹ fiobọhọ kẹ ahwo nọ a bi yeri uzuazọ nọ me yeri vẹre no na.”

Usi uwoma nọ mai omomọvo ma be ta na u re fiobọhọ kẹ omai ru oware uwoma je wo emamọ iroro ẹsikpobi. O be kẹ omai imuẹro inọ Jesu o wo ohrọ gbe uyoyou kẹ omai, yọ o fievahọ omai.

Bẹsenọ a te raha akpọ omuomu Setan nana no, udu o sai gbe brukpe omai fiki eware iyoma nọ ma ru vrẹ no. Eme o ti fiobọhọ kẹ omai si iroro obrukpe no udu?

Udu o be hai brukpe Jean fikinọ ọ jẹ hae lẹlẹ ru eware iyoma jọ evaọ okenọ ọ gbẹ maha, dede nọ ọ jọ ukoko na. Rekọ ọ ta nọ: “Eva e were omẹ gaga inọ ‘Ọghẹnẹ ọ rro vi udu mai.’” (1 Jọn 3:​19, 20) Mai omamai ma rẹ sai wo omosasọ re nọ ma tẹ kareghẹhọ nọ Jihova avọ Jesu a riẹ nọ ma gba ha. Orọnikọ fiki ahwo-akpọ nọ a rrọ gbagba a rọ kẹ okẹ ẹtanigbo na ha, rekọ fiki erahaizi nọ i kurẹriẹ.​—1 Tim. 1:15.

Ma tẹ be hae lẹ ẹsikpobi je roro didi kpahe oghẹrẹ nọ Jesu o ro yerikugbe ahwo-akpọ nọ a gba ha, jẹ dawo ẹgba mai kpobi evaọ iruo odibọgba nọ a kẹ omai na, u re ru omai wo imuẹro inọ ẹtanigbo na ginọ okẹ nọ Ọghẹnẹ ọ kẹ omai omomọvo. Ma te bi ru ere, ma te sae ta wọhọ Pọl inọ: Jesu “o you omẹ, o te siobọno omariẹ fiki mẹ.”