Jihova ọ rọ Jesu mu Ozerẹ Okpehru oke nọ ọ họ-ame evaọ ukpe 29 C.E. Ẹvẹ ma rọ riẹ? Ame-ọhọ Jesu u dhesẹ nọ ọ gwọlọ ru “oreva” Ọghẹnẹ. Onana u dhesẹ nọ u no rie eva ze re ọ rọ uzuazọ riẹ dhe idhe ẹtanigbo na. (Gal. 1:4; Hib. 10:5-10) Oreva Jihova nọ ọ gwọlọ ru na u dikihẹ kẹ agbada-idhe. Nọ Jesu o whu, o tẹ wọhọ nọ ọ rọ omariẹ dhe idhe evaọ ehru agbada-idhe na. Agbada-idhe na ọ romavia evaọ oke nọ Jesu ọ họ-ame. Oghẹrẹ nọ Jihova ọ gwọlọ nọ ma rọ gọe ẹkwoma ẹrọwọ nọ ma re fihọ idhe ẹtanigbo na u dikihẹ kẹ etẹmpol Ọghẹnẹ. Ma sae ta nọ oke ovona agbada-idhe na avọ etẹmpol na e rọ romavia, koyehọ oke nọ Jesu ọ rọ họ-ame. O rrọ ere, keme etẹmpol o re wo agbada-idhe.​—Mat. 3:16, 17; Hib. 5:4-6.

Nọ egagọ efuafo nọ i dikihẹ kẹ etẹmpol na i muhọ no, o tẹ gwọlọ nọ ozerẹ okpehru ọ rẹ jariẹ. Fikiere, Jihova ọ tẹ “rehọ ẹzi ọfuafo wholo [Jesu] jẹ kẹe ogaga,” re ọ jọ ozerẹ okpehru. (Iruẹru 10:37, 38; Mak 1:9-11) Kọ ẹvẹ u ro mu omai ẹro nọ a rọ Jesu mu Ozerẹ Okpehru no taure o te ti whu jẹ kparoma ze? Onana o rẹ sai mu omai ẹro nọ ma te roro kpahe Erọn avọ amọfa nọ e jọ izerẹ ikpehru.

Uzi Mosis o ta nọ u te no ozerẹ okpehru no, omọfa ọ rẹ ruọ oria Ọrẹri Erẹri nọ o jọ uwou-udhu na ha gbe onọ o jọ etẹmpol nọ a bọ uwhremu na. Ekọtini a rọ hẹriẹ oria Ọrẹri na avọ Ọrẹri Erẹri na. Ẹdẹ Omavoro na ọvo ozerẹ okpehru na o re rovie ekọtini na ruọ Ọrẹri Erẹri na. (Hib. 9:1-3, 6, 7) A jẹ hae rehọ ozerẹ okpehru mu no taure ọ tẹ te ‘nya ekọtini na vrẹ’ ruọ oria Ọrẹri Erẹri na. Fikiere, u mu omai ẹro nọ a rọ Jesu mu Ozerẹ Okpehru ọrọ etẹmpol Jihova no taure o te ti whu. Nọ Jesu o whu no, ẹsiẹe ọ rọ ‘nya ekọtini na vrẹ’ kpobọ odhiwu. Ekọtini nọ ọ nyavrẹ na họ “uwo riẹ” nọ o ro dhe idhe na. (Hib. 10:20) Oyejabọ nọ Pọl ukọ na ọ rọ ta nọ Jesu “ọ nyaze wọhọ ozerẹ okpehru,” kẹsena ọ tẹ “ruọ eva uwou-udhu nọ o mae rro jẹ mae rrọ gbagba na, onọ a rọ abọ bọ họ,” jẹ ruọ “odhiwu dẹẹ.”​—Hib. 9:11, 24.

Oke nọ a rọ whobọhọ ọvọ ọkpokpọ na u wo ohẹriẹ no oke nọ u ro mu iruo họ họ. Ẹvẹ ma rọ ta ere? Taure a tẹ te whobọhọ ọvọ ọkpokpọ na, Jesu o zihe kpobọ odhiwu bru Ọsẹ riẹ re Jihova ọ sae rehọ azẹ riẹ nọ o ro dhe idhe na ta ahwo-akpọ no igbo. Onana họ orọ ọsosuọ evaọ usu eware esa nọ i ru rie lọhọ re a whobọhọ ọvọ na. Yọ eware evona i ru rie lọhọ nọ ọvọ ọkpokpọ na o ro mu iruo họ. Eware esa vẹ eye?

Orọ ọsosuọ, Jesu o zihe kpobọ odhiwu bru Jihova; orọ avọ ivẹ, Jesu o dhesẹ kẹ Jihova inọ ọ rọ azẹ riẹ dhe idhe ẹtanigbo na no; orọ avọ esa, Jihova ọ tẹ jẹ idhe ẹtanigbo Jesu na rehọ. A ru eware esa nana no taure ọvọ ọkpokpọ na o te ti mu iruo họ.

Ebaibol na ọ vuẹ omai oke nọ Jihova ọ rọ jẹ idhe ẹtanigbo Jesu na rehọ dẹẹ hẹ. Fikiere ma sae nwane fodẹ uzedhe oke nọ a rọ whobọhọ ọvọ ọkpokpọ na ha, nọ o ro mu iruo họ. Rekọ ma riẹ nọ Jesu o zihe kpobọ odhiwu edẹ ikpe taure ẹdẹ Pẹntikọst o te ti te. (Iruẹru 1:3) Ẹdẹ jọ evaọ usu edẹ ikpe yena o ro dhesẹ kẹ Jihova inọ ọ rọ azẹ riẹ dhe idhe ẹtanigbo na no, kẹsena Jihova ọ tẹ jẹ idhe na rehọ. (Hib. 9:12) A ruẹ oka oware nana nọ o via na vevẹ evaọ ẹdẹ Pẹntikọst na. (Iruẹru 2:1-4, 32, 33) Oware nọ o via ẹdẹ yena u dhesẹ nọ a whobọhọ ọvọ ọkpokpọ na no, u te je mu iruo họ no.

Otọ ẹme na kpobi họ, nọ Jihova ọ jẹ idhe ẹtanigbo Jesu rehọ no, ẹsiẹe a rọ whobọhọ ọvọ ọkpokpọ na, u te mu iruo họ. Jesu họ Ozerẹ Okpehru gbe obruthe ọvọ na.​—Hib. 7:25; 8:1-3, 6; 9:13-15.