Ukpe 1954 a yẹ omẹ evaọ St. Paul, Minnesota, evaọ obọ America. Egagọ Katọlik ahwo uwou mai kpobi a jọ. Ma fe he yọ orọnikọ ma jọ iyogbe he. Mai emọ isoi e jọ uwou na, yọ mẹ a yẹ tu ọmọ ọkpako. Nọ mẹ jọ ọmaha, me kpohọ isukulu Katọlik yọ mẹ jẹ hai fiobọhọ kẹ ozerẹ ichọche mai. Ghele na, mẹ riẹ kpahe Ebaibol tere he. Dede nọ mẹ rọwo nọ Ọghẹnẹ ọ rrọ yọ ọye ọ ma eware kpobi, u je mu omẹ ẹro ho inọ eware nọ a be jọ ichọche na wuhrẹ kpahe Ọghẹnẹ na uzẹme.

Ukpe ọsosuọ nọ mẹ rọ ruọ isukulu eriẹ-izi nọ a re se William Mitchell College of Law, Isẹri Jihova a tẹ nyaze te ta usi uwoma evaọ ighẹ mai. Ẹdẹ yena mẹ jẹ fọrọ eware. Nọ a ruẹ nọ obọ mẹ o rrọ oware, a tẹ ta nọ a ti zihe ze oke ofa. Nọ a zihe ze, mẹ tẹ nọ ae enọ ivẹ. Orọ ọsosuọ họ, “Fikieme akpọ o bi ro woma kẹ ikpehre ahwo vi emamọ ahwo?” Orọ avọ ivẹ kọ, “Ẹvẹ ohwo ọ sai ro wo evawere?” A tẹ kẹ omẹ obe na, Uzẹme nọ U re Suohwo kpo Uzuazọ Ebẹdẹbẹdẹ, gbe Efafa Akpọ Ọkpokpọ ọrọ Ikereakere Efuafo Na nọ u wo  uke igrini nọ u bi lo. Mẹ tẹ jẹ rọwo nọ a wuhrẹ omẹ Ebaibol. Uwuhrẹ na u rovie omẹ aro. Eva e were omẹ gaga nọ me ro wuhrẹ nọ Uvie Ọghẹnẹ u ti su otọakpọ na kpobi je ku ebẹbẹ akpọ na họ. Mẹ ruẹ nọ esuo ohwo-akpọ o wo otọ họ, edada, uye-oruẹ, okienyẹ, gbe okpẹtu ọvo o wha ze no.

Mẹ roma mudhe kẹ Jihova evaọ obọ emuhọ ukpe 1982, mẹ tẹ họ-ame evaọ ubrobọ urere ukpe yena evaọ okokohọ ubrotọ nọ uzoẹme riẹ o jọ “Kingdom Truth” (Uzẹme Uvie Na), onọ a jọ ọgwa jọ ru evaọ ẹwho nọ a re se St. Paul. Oka nọ u lele i rie, me te zihe kpohọ ọgwa na nyai kere ẹdawọ isukulu nọ ohwo ọ rẹ rọ jọ elọya. Evaọ obọ emuhọ amara Akpe, mẹ tẹ ruẹ nọ mẹ pase ẹdawọ na, me te wo obe-udu nọ mẹ rẹ rọ jọ elọya.

Mẹ jọ okokohọ Uzẹme Uvie Na ruẹ oniọvo-ọmọzae jọ nọ a re se Mike Richardson nọ ọ rrọ Ebẹtẹle Brooklyn ru iruo. Ọ ta kẹ omẹ nọ a jọ obọ ehri ukoko wo ẹko-iruo eriẹ-izi no. Mẹ tẹ kareghẹhọ ẹme ọwharọ Ẹtiopia nọ ọ rrọ Iruẹru Ikọ 8:36, kẹsena mẹ tẹ nọ omamẹ nọ, ‘Eme ọ rẹ whaha omẹ nọ me gbe ro fi obe họ re mẹ jọ ẹko-iruo eriẹ-izi na ru iruo ho?’ Fikiere me te fi obe họ kẹ iruo Ebẹtẹle.

O were ọsẹgboni mẹ hẹ inọ me zihe ruọ Osẹri Jihova no. Ọsẹ mẹ ọ tẹ nọ omẹ sọ Isẹri Jihova nọ me bi lele ru iruo na u ti fi obọ jọ họ kẹ omẹ evaọ iruo elọya mẹ na. Mẹ tẹ ta kẹe nọ Ọghẹnẹ me bi ru iruo na kẹ. Mẹ vuẹ riẹ nọ a te hae kẹ omẹ umugho jọ kamara kamara nọ mẹ rẹ rọ rẹrote omamẹ wọhọ epanọ a be kẹ inievo nọ e rrọ uwou ogha ru iruo.

Mẹ avọ ahwo jọ ma ta ẹme iruo jọ mu no vẹre. Fikiere nọ ma ku iruo yena họ no, me te mu iruo Ebẹtẹle họ evaọ Brooklyn, New York, evaọ 1984. A te fi omẹ họ ẹko-iruo eriẹ-izi. Okenọ mẹ rọ nyaze na u kiehọ kẹ iruo na gaga.

Ukoko o dẹ uwou arozaha nọ a re se Stanley Theater nọ o rrọ Jersey City, New Jersey, evaọ amara Akpegbọvo 1983. Inievo na a tẹ nyai mi egọmeti uvẹ re a ruẹrẹ ikpẹ uwou na, te ekpọ ame gbe eware efa. Nọ a ta kẹ ahwo egọmeti inọ a gwọlọ zihe oria na ruọ Ọgwa Okokohọ Isẹri Jihova, a rọwo ho. A ta nọ uzi egọmeti ẹkwotọ na o ta nọ obonọ ahwo a be rria evaọ ẹwho na ọvo a rẹ bọ iwou egagọ fihọ. Whaọ uwou arozaha  Stanley Theater na o rrọ ofẹ ekiọthuọ, koyehọ ofẹ nọ ahwo ẹwho na a rẹ jọ kọ okọ. Oye u ru nọ a gbẹ rọ rọwo ho, inọ ma zihe uwou na ruọ Ọgwa Okokohọ. Inievo na a tẹ wọ ẹme na kpohọ okọto, ghele na a bru kẹ ae he.

Oka ọsosuọ nọ me ro kpohọ Ebẹtẹle oye ukoko u ro fi ẹme na họ okọto ukpehru ubrotọ na, inọ o thọ họ re a zihe uwou na ruọ Ọgwa Okokohọ. Fikinọ mẹ jọ okọto nọ a wọ ẹme na kpohọ na ru iruo ikpe ivẹ taure mẹ tẹ te ziọ Ebẹtẹle, mẹ riẹ kpahe edhọ itieye na. Oniọvo nọ o je dikihẹ kẹ ukoko evaọ ẹdhọ na oke yena, ọ jọ okọto ta nọ a jẹ hae jọ Stanley Theater dhesẹ isinima je kporo ile kẹ ogbotu. Kọ fikieme a gbẹ sae jariẹ ru oware egagọ họ? Nọ okọto na u rri ẹme na u te bruoziẹ nọ ẹwho na o kienyẹ omai. Okọto na o tẹ ta nọ jọ a kẹ omai obe-udu nọ ma re ro ru oware nọ ma gwọlọ jọ etẹe ru na. Onana o lẹliẹ omẹ ruẹ nọ Jihova o bi fiobọhọ kẹ inievo nọ i bi dikihẹ kẹ ukoko na re iruo Ọghẹnẹ e ruẹse nyaharo. Eva e were omẹ gaga inọ mẹ rrọ usu inievo nana.

Inievo na a jọ uwou na ru iruo gaga. U te ukpe he re a te ti zihe uwou na ruọ Ọgwa Okokohọ Jersey City. Kẹsena a te kokohọ etẹe evaọ Azie 8, 1985, nọ inievo nọ e jọ eklase avọ 79 ọrọ isukulu Giliad i nwrotọ. Eva e were omẹ gaga inọ mẹ rrọ usu elọya nọ i dikihẹ kẹ ukoko. Okenọ mẹ jọ obọ otafe je ru iruo elọya, me wo evawere kaka enẹ hẹ. Kpakọ iruo nọ Jihova ọ gwọlọ nọ me ru evaọ ofẹ edhọ ekọto i muhọ obọ.

Evaọ 1980 gbe ikpe nọ i lele i rie, nọ Osẹri Jihova, maero kọ oniọvo nọ o dihọ ọ gbẹ rọwo nọ a se azẹ họ iẹe oma ha, edọkita gbe isipito buobu e rẹ rọwo ho. Iguẹdhọ e jẹ hae kẹ isipito udu nọ a re ro se azẹ fihọ aye nọ o dihọ oma keme a roro nọ o wo udu nọ ọ rẹ rọ siọ azẹ hẹ. Iguẹdhọ a rẹ ta nọ a gbe se azẹ fihọ iẹe oma ha, oni na ọ sai whu, ọmọ na ọ vẹ te jọ ababọ oni.

Evaọ ẹdẹ avọ 29 ọrọ amara Akpegbivẹ, 1988, oniọvo-ọmọtẹ jọ nọ a re se Denise Nicoleau o je hwẹ gaga nọ o yẹ no. Fikinọ azẹ riẹ o re gaga no, edọkita riẹ ọ tẹ ta nọ jọ a se azẹ fihọ iẹe oma. Sista Nicoleau ọ rọwo ho. Ohiohiẹ okiokiọ riẹ, edọkita ẹsipito na o te kpobọ okọto nyae rehọ obe-udu nọ a re ro se azẹ fihọ oniọvo na oma. Oguẹdhọ na ọ tẹ kẹ ẹsipito na udu na. Ọ nọ oniọvo-ọmọtẹ na hayo ọzae riẹ hẹ, yọ ọ tubẹ vuẹ ae inọ ọ kẹ ẹsipito na udu utioye dede he.

Edisoi-Oka nọ o jọ ẹdẹ avọ 30 amara Akpegbivẹ, a te se azẹ fihọ Sista Nicoleau oma dede nọ ọzae riẹ avọ ahwo uviuwou riẹ efa nọ a jọ etẹe a rọwo ho. Owọwọ ẹdẹ yena, iporisi i te mu ahwo uviuwou na sa-sa gbe ọkpako  ukoko ọvo hayo ivẹ jọ. A ta nọ ahwo nana a dikihẹ wariẹ oniọvo-ọmọtẹ na họ re a gbe se azẹ fihọ iẹe oma ha. Ohiohiẹ Ẹdẹ-Ọmaha nọ ọ jọ ẹdẹ avọ 31 amara Akpegbivẹ, a tẹ jọ ebe-usi, iredio, gbe etẹlẹvisiọno ta kpahe ahwo nọ a mu na.

Ohiohiẹ Ẹdọvo-Oka, me te lele Milton Mollen ta ẹme, ọnọ ọ jọ obruoziẹ evaọ okọto ukpehru. Mẹ vuẹ riẹ oghẹrẹ nọ ẹme na ọ nya kpobi, jẹ ta kẹe nọ obruoziẹ nọ ọ kẹ udu nọ a se azẹ fihọ oniọvo na oma na ọ nọ oniọvo na taure ọ tẹ te kẹ udu na ha. Milton Mollen ọ tẹ ta nọ me zihe ziọ ọfisi riẹ uvo ẹsiẹfa re ma ta kpahe oghẹrẹ nọ ẹme na ọ nya gbe izi nọ i kiekpahe iẹe. Mẹ avọ Philip Brumley nọ ọ jọ ọsẹro ẹko-iruo mai ma tẹ nyabru ei. Obruoziẹ na o zizie elọya ẹsipito na ziọ ọfisi riẹ re. Ma rehọ ẹme na si ikẹ gaga. Nọ u te oria jọ, Brọda Brumley o te kere ẹme kẹ omẹ inọ, “rọ udu kpotọ omojọ.” Mẹ ginẹ ruẹ nọ emamọ ohrẹ ọ kẹ omẹ na keme uvou nọ me je ro lele elọya ọdekọ na ta ẹme u kpehru hrọ.

Nọ ma ta ẹme na te oware wọhọ auwa ọvo no, obruoziẹ na Milton Mollen ọ tẹ ta nọ odẹnotha, ẹdhọ nana ma te kaki gu evaọ okọto na. Nọ ma jẹ ruọ otafe, obruoziẹ na ọ tẹ ta nọ elọya ẹsipito na ọ rẹ daoma “mu eku riẹ ga odẹnotha.” Otọ ẹme riẹ na họ, o te jọ bẹbẹ re elọya na o dhesẹ vevẹ nọ a riẹ ru nọ a ro se azẹ fihọ oniọvo na oma. Onana o lẹliẹ omẹ riẹ nọ obọ Jihova o rrọ ẹme na. Eva e were omẹ kẹhẹ nọ mẹ ruẹ oghẹrẹ nọ Jihova ọ be rọ rehọ omai ru oreva riẹ.

Ma ru iruo te ubrobọ udevie aso be ruẹrẹ oma kpahe kẹ ẹdhọ nọ ma ti gu okiokiọ riẹ. Okọto na u thabọ no uwou ogha mai nọ o rrọ Brooklyn hi, fikiere inievo buobu nọ e jọ ẹko-iruo eriẹ-izi na a rọ owotọ nya. Nọ ibruoziẹ ene e gaviezọ kẹ ẹdhọ na no, a tẹ ta nọ obruoziẹ nọ ọ kẹ udu nọ a se azẹ fihọ oniọvo na oma o ru thọ. Okọto ukpehru na u bruoziẹ kẹ Sista Nicoleau jẹ ta nọ oware nana nọ ekọto e be hai ru na o thọ, inọ izi egọmeti i dhesẹ nọ u fo ho re ekọto e kẹ udu nọ a rẹ rọ gba ohwo họ oware nọ ọ gwọlọ họ hayo jọ emu riẹ bruoziẹ oghẹrẹ nọ a re ro siwi ei.

U gbe kri hi, okọto nọ o mai kpehru evaọ New York o tẹ ta nọ Sista Nicoleau o wo udu nọ ọ rẹ rọ siọ azẹ osefihọ-oma. Onana họ orọ ọsosuọ evaọ edhọ ene nọ mẹ  jọ dikihẹ kẹ inievo na evaọ ekọto ikpehru kpahe azẹ osefihọ-oma. (Rri ẹkpẹti na, “ Edhọ Ekọto Ikpehru America jọ nọ Ma Jọ Rease.”) Me lele eriẹ-izi uwou ogha kpohọ edhọ efa nọ i kiekpahe udu ọmọ-ọyọrọ, orọo-ofa, edhọ iwou gbe etọ.

Okenọ mẹ rọ riẹ Sista Dawn, o wo emọ esa yọ avọ ọzae nọ a gbe yẹ emọ na a fa no. O wo okọ nọ ọ jẹ rọ kuọ uviuwou na, yọ ọ jọ ọkobaro. Ebẹbẹ buobu i te rie no evaọ uzuazọ, ghele na ọ gbẹ be gọ Jihova. Onana o were omẹ gaga. Evaọ 1992 nọ ma kpohọ okokohọ ubrotọ evaọ obọ New York City nọ uzoẹme riẹ o jọ “Ewhowha Elo,” mẹ tẹ ta ẹme orọo kẹe. Nọ ẹgbukpe ọ vrẹ no, ma tẹ rọo. Jihova ọ rehọ aye na ghale omẹ, o kruga ziezi evaọ ukoko na, yọ ọ rẹ ta emiehwẹ gaga re. O ru eware iwoma buobu kẹ omẹ no anwẹnọ ma rọ rrọ orọo na.​—Itẹ 31:12.

Nọ ma rọo yọ emọ esa na a rrọ ikpe ikpegbọvo, ikpegbesa, gbe ikpegbezeza. Mẹ gwọlọ rẹrote ai ziezi, fikiere mẹ jẹ hai se oware kpobi nọ ukoko na u kere kpahe epanọ a rẹ rọ rẹrote emọ nọ a rọ yọrọ obọ ziọ orọo, yọ me je ru eware nọ me se na. Ebẹbẹ e dina jariẹ evaọ oke ọsosuọ, rekọ eva e were omẹ gaga inọ enẹna usu mẹ avọ emọ na o kpekpe ziezi no yọ a rehọ omẹ fihọ emamọ ọsẹ rai. Ma jẹ hae kẹ emọ mai uvẹ re a rọ egbẹnyusu rai ziọ uwou na, yọ a jẹ hai ru uwou na sasa.

Ukpe 2013, ma tẹ kwa kpobọ Wisconsin re ma rẹrote esẹgbini mai nọ e kpako no. U gbe omẹ unu gaga nọ ukoko o ta kẹ omẹ nọ mẹ ruabọhọ iruo Ebẹtẹle mẹ. A ta nọ mẹ hai no obọ otafe ze ti fiobọhọ.

Amara Azie ọrọ 2018, me te muẹrohọ nọ mẹ be hae kare uvou gaga. Mẹ nyabru edọkita jọ evaọ ẹwho na, rekọ ọ ruẹ oware nọ o be whae ze he. Nọ mẹ nyabru edọkita ọfa, ọ tẹ ta nọ mẹ nyae ruẹ edọkita nọ o wuhrẹ kpahe iriẹ sa-sa nọ e lafi ẹvori gbe obeva ugbonwa uke na. Evaọ amara Ọvo, 2019 nọ mẹ nyabru edọkita yena, ọ tẹ ta nọ o wọhọ nọ me wo ẹyao ẹvori jọ nọ o rẹ whae ze nọ ohwo ọ gbẹ rọ ruẹ ude tere he hayo nya geli geli, nọ a re se supranuclear palsy (PSP).

Nọ edẹ esa e vrẹ no, nọ mẹ jẹ zaha arozaha jọ nọ a rẹ zaha evaọ ehru ekpalekpa-ame, me te kie wiri emamọ obọ. Mẹ zaha arozaha nana no emaha ze, ọ rẹ were omẹ gaga, yọ mẹ riẹ kpahe iẹe ziezi. Ukie na u te ru omẹ riẹ nọ iriẹ oma mẹ na i gbe bi ru iruo ziezi hi. U kri hi, ẹyao na ọ tẹ ga, mẹ gbẹ jẹ sae ta ẹme ziezi hayo nya onya ziezi hi, yọ ẹgbẹgba mẹ jẹ sai ro si oware lọ.

Eva e were omẹ gaga inọ mẹ rọ eriariẹ elọya nọ me wo ro ru iruo Uvie na. Me kere izoẹme buobu nọ a fihọ emagazini sa-sa nọ elọya, iguẹdhọ gbe edọkita i re se. Me te je kpohọ egwae sa-sa nọ elọya avọ edọkita a rẹ nya evaọ erẹwho sa-sa nọ mẹ jọ dhesẹ kẹ ae nọ Isẹri Jihova a wo udu nọ a rẹ rọ siọ azẹ osefihọ-oma makọ evaọ oke obẹrọ. Ghelọ enana kpobi, mẹ rẹ sae ta nọ ‘mẹ yọ ọrigbo nọ o fioka ha. Onọ u fo nọ me re ru oye me ru na,’ wọhọ epanọ o rrọ Luk 17:10.