1. Fikieme u ro fo nọ Jihova ma rẹ romakẹ riẹriẹriẹ?

JIHOVA ọvo u fo nọ ma rẹ romakẹ riẹriẹriẹ keme ọye họ Ọnọ ọ ma omai. (Evia. 4:11) Ghele na, u wo uruemu jọ nọ u fo nọ ma rẹ yọroma kpahe. O tẹ make rọnọ ma you Jihova jẹ be rọ adhẹẹ kẹe, eware jọ e sae whae ze nọ ma gbẹ rọ roma kẹe riẹriẹriẹ hẹ wọhọ epanọ u fo. Ma te ta kpahe oghẹrẹ nọ oyena o sae rọ via. Rekọ joma kake ta kpahe oware nọ u dhesẹ re ma romakẹ Jihova riẹriẹriẹ.

2. Wọhọ epanọ o rrọ Ọnyano 34:14, eme ma re ru nọ ma tẹ romakẹ Jihova riẹriẹriẹ?

² Evaọ Ebaibol na, re a romakẹ Jihova u dhesẹ nọ ma rẹ rọ eva mai kpobi you rie. Ma tẹ romakẹ Jihova riẹriẹriẹ, ọye ọvo ma rẹ gọ. Ma rẹ kuvẹ hẹ re ohwo jọ hayo oware jọ u wuzou kẹ omai vi egagọ Jihova.​—Se Ọnyano 34:14.

3. Ẹvẹ ma sae rọ ta nọ oma ogbori ma be rọ romakẹ Jihova ha?

³ Orọnikọ oma ogbori ma be rọ romakẹ Jihova ha. Ẹvẹ ma rọ ta ere? Keme eware nọ ma riẹ kpahe Jihova oye u ru nọ ma be rọ roma kẹe. Iruemu riẹ e were omai. Ma riẹ eware nọ e rẹ were iẹe gbe enọ e rẹ dhae eva, yọ ere ma rri eware na re. Ma wo otoriẹ ẹjiroro nọ o wo kẹ ahwo-akpọ, yọ ma bi ru ẹkabọ mai re ẹjiroro na o rugba. O rrọ omai oma nọ uvẹ-ọghọ ulogbo ma wo nọ Jihova o ro ru re ma sae jọ egbẹnyusu riẹ. (Ol. 25:14) Omoware kpobi  nọ ma wuhrẹ kpahe Ọnọ ọ ma omai na u bi ru omai si kẹle iẹe.​—Jem. 4:8.

4. (a) Eme Ẹdhọ ọ be daoma ru, re ma gbẹ romakẹ Jihova riẹriẹriẹ hẹ? (b) Eme ma te ta kpahe evaọ uzoẹme nana?

⁴ Ẹdhọ họ ọnọ ọ be kpọ uyero-akpọ nana, yọ o bi ru eware akpọ na fihọ oghẹrẹ nọ ma re ro wo isiuru kẹ ae vrẹta. (Ẹf. 2:1-3; 1 Jọn 5:19) Ẹdhọ ọ gwọlọ nọ ma hai kie lele eware efa re ma gbẹ romakẹ Jihova riẹriẹriẹ hẹ. Joma ta kpahe idhere ivẹ jọ nọ Ẹdhọ ọ be rọ daoma ru onana. Orọ ọsosuọ, ọ rẹ gwọlọ ru omai le ugho. Orọ avọ ivẹ, ọ rẹ gwọlọ nọ ma dhomahọ eware ẹkeriotọ nọ i fo ho.

5. Fikieme ma rẹ rọ yọroma kpahe uyoyou ugho?

⁵ Ohwo kpobi ọ gwọlọ nọ ọ rẹ re eva vọ, ku emamọ iwu họ, jẹ rria emamọ oria. Rekọ, ma rẹ yọroma re ma gbe wo uyoyou ugho ho. Ahwo buobu evaọ akpọ Setan nana a “you ugho” gbe eware nọ a rẹ rọ ugho dẹ. (2 Tim. 3:2) Jesu ọ riẹ nọ ilele riẹ a gbẹ yọroma ha, a sai wo uyoyou ugho. Ọ ta nọ: “Ohwo ọvo ọ rẹ sae gbodibo kẹ ilori ivẹ hẹ; o re mukpahe ọjọ o ve you ọdekọ, hayo ọ rẹ talamu ọjọ ọ vẹ se ọdekọ. Wha sae gbodibo kẹ Ọghẹnẹ gbe Efe he.” (Mat. 6:24) Ohwo nọ ọ be gọ Jihova yọ ọ be raha oke buobu ro le ugho hayo efe akpọ nana, yọ ilori ivẹ ọ be gọ na. Ohwo otiọye ọ sae romakẹ Jihova riẹriẹriẹ hẹ.

6. Eme ma rẹ sai wuhrẹ no ẹme nọ Jesu ọ ta kẹ ukoko obọ Laodisia na ze?

⁶ Ubrobọ ekuhọ ikpe-udhusoi ọsosuọ, Ileleikristi nọ e jọ ukoko nọ o rrọ Laodisia a jẹ ya-oma nọ: “Me fe je wo ekwakwa buobu yọ oware ovo o kare omẹ hẹ.” Rekọ evaọ aro Jihova avọ Jesu, ahwo nana a rrọ “iyiyẹ, kare evawere, yogbe, tuaro jẹ rrọ ẹbẹba.” Orọnikọ fikinọ a fe  Jesu ọ rọ kẹ ae ohrẹ yena ha, rekọ fikinọ uyoyou nọ a wo kẹ ugho o be raha usu rai kugbe Jihova. (Evia. 3:14-17) Ma te muẹrohọ nọ ma bi wo uyoyou kẹ ugho evaọ udu mai, ma rẹ daoma whaha isiuru yena kpata kpata. (1 Tim. 6:7, 8) Ma gbe ru ere he, ma te sae rọ udu mai kpobi you Jihova ha, yọ Jihova ọ te gbẹ jẹ egagọ mai rehọ họ. Ọ “gwọlọ omarọkẹ riẹriẹriẹ.” (Izie. 4:24) Oghẹrẹ vẹ uyoyou ugho o sae rọ jọ ẹta kẹ omai?

7-9. Eme who wuhrẹ no oriruo ọkpako ukoko nọ a re se David ze?

⁷ Joma ta kpahe David, ọkpako ukoko nọ o se iruo riẹ gboja nọ ọ be rria obọ America. Ọ ta nọ ọ jẹ daoma ziezi evaọ iruo ekọmpene nọ ọ jọ. A fi rie họ ọkwa ologbo evaọ ekọmpene na, a tẹ jẹ kẹe obe-udu nọ u dhesẹ nọ ọ rrọ usu ahwo nọ a mae riẹ iruo na evaọ orẹwho yena. David ọ ta nọ: “Evaọ oke yena, me je roro nọ Jihova ọ be ghale omẹ na.” Kọ ere o ginẹ rrọ?

⁸ David o te bi muẹrohọ nọ iruo riẹ e be rọ ẹmẹrera raha usu riẹ kugbe Jihova. Ọ ta nọ: “Mẹ tẹ rrọ ewuhrẹ hayo usi uwoma ota dede, yọ me bi roro kpahe iruo na. A jẹ hwa omẹ igho buobu, rekọ ẹsikpobi iruo na i je dhe omẹ uzou, mẹ avọ aye mẹ ma te ti mu ebẹbẹ họ ewo evaọ orọo mai.”

⁹ David ọ tẹ ruẹ nọ ọ rẹ romatotọ roro kpahe oware nọ o mai wuzou evaọ uzuazọ. Ọ ta nọ: “Mẹ gba riẹ mu nọ me re nwene oghẹrẹ uzuazọ nọ me bi yeri na.” David ọ gwọlọ nọ o re si no oke nọ o bi ro ru iruo, kẹsena ọ tẹ ta ẹme na kẹ ọga iruo riẹ. Eme o no rie ze? A si David no iruo. Kọ eme o ru? Ọ ta nọ: “Okiokiọ riẹ, me te fi obe họ inọ me re ru ọkobaro  obufihọ no umuo amara yena vrẹ.” David avọ aye riẹ a te mu iruo orufuọ họ re a sae ruẹ ugho nọ a rẹ rọ kuọ omarai. Nọ oke jọ o vrẹ no, o te mu ọkobaro oke-kpobi họ, uwhremu na aye riẹ o te mu ọkobaro oke-kpobi họ re. Ọzae-avọ-aye nana a te bi ru iruo nọ ahwo buobu a rri nọ i fioka ha, rekọ oghẹrẹ iruo nọ a bi ru na oye o mai wuzou kẹ ae he. Dede nọ ugho nọ a jẹ hwa ae vẹre o rehọ akuakpe bu vi onọ a be hwa ae evaọ iruo orufuọ na, ugho nọ a be hwa ae evaọ iruo nana u bi te ai rẹrote omarai kamara kamara. Egagọ Jihova a gwọlọ nọ a rẹ rọ karo, yọ eghale nọ i te rai i ru rai vuhumu nọ Jihova ọ rẹ rẹrote ohwo kpobi nọ ọ rọ Uvie riẹ karo.​—Mat. 6:31-33.

10. Ẹvẹ ma sae rọ sẹro udu mai?

¹⁰ Te ma fe hayo ma fe he, o gwọlọ nọ ma rẹ sẹro udu mai. Evaọ oghẹrẹ vẹ? Daoma whaha uyoyou ugho. Whọ kuvẹ hẹ re iruo ra i wuzou kẹ owhẹ vi egagọ Jihova. Ẹvẹ whọ rẹ rọ riẹ sọ onana o be via kẹ owhẹ? Enọ jọ nọ whọ rẹ sae nọ omara họ: ‘Kọ mẹ be hai roro kpahe iruo mẹ ẹsibuobu nọ mẹ tẹ rrọ ewuhrẹ hayo usi uwoma ota? Kọ mẹ be hae ruawa kpahe epanọ mẹ te rọ ruẹ ugho ru oware nọ mẹ gwọlọ evaọ obaro? Kọ ugho gbe ekwakwa eyero e be wha ẹbẹbẹ ze evaọ orọo mẹ? Kọ mẹ te rọwo ru iruo nọ amọfa a rri nọ i fioka ha re mẹ sai wo oke ziezi kẹ egagọ Jihova?’ (1 Tim. 6:9-12) Nọ ma bi roro kpahe enọ yena, joma kareghẹhọ nọ Jihova o you omai, ọ tẹ jẹ ya eyaa kẹ ahwo nọ a roma kẹe inọ: “Mẹ te nyasiọ owhẹ ba vievie he, yọ me ti gbabọkẹ owhẹ vievie he.” Oyejabọ nọ Pọl ukọ na o ro kere nọ: “Jọ edhere uzuazọ rai o kare uyoyou ugho.”​—Hib. 13:5, 6.

11. Eme eware ẹkeriotọ e rẹ sae lẹliẹ ohwo ru?

¹¹ Jihova ọ gwọlọ nọ ma reawere uzuazọ, yọ eware ẹkeriotọ e rẹ sai fiobọhọ kẹ omai ru onana. Ebaibol na ọ tubẹ ta nọ “oware ovo o rrọ họ nọ u woma kẹ ohwo-akpọ vi emu nọ ọ rẹ re, ọ vẹ jẹ da jẹ reakpọ kuoma evaọ iruo egaga riẹ.” (Ọtausi. 2:24) Ghele na, eware ẹkeriotọ buobu evaọ akpọ na e rẹ sae raha usu mai kugbe Ọghẹnẹ. E rẹ raha emamọ uruemu ohwo. I re ru ahwo rri eware nọ Ebaibol na o mukpahe inọ e thọ họ, hayo tube ru nọ a re ro ru eware itieye dede.

12. Wọhọ epanọ o rrọ 1 Ahwo Kọrint 10:21, 22, fikieme ma rẹ rọ romatotọ salọ eware ẹkeriotọ mai?

 ¹² Ma gwọlọ nọ ma rẹ romakẹ Jihova riẹriẹriẹ, fikiere ma rẹ sae jọ “emẹjẹ Jihova” avọ “emẹjẹ idhivẹri” re emu hu. (Se 1 Ahwo Kọrint 10:21, 22.) Nọ ohwo ọ tẹ be hai lele omọfa re emu, u re dhesẹ nọ aimava na egbẹnyusu. Ma tẹ be salọ eware ẹkeriotọ nọ a be jọ dhesẹ ozighi, iruẹru imizi, ọfariẹ-ogbe, hayo eware iyoma efa, o wọhọ ẹsenọ ma bi lele ewegrẹ Ọghẹnẹ re emu nọ ae omarai a there. Onana o rẹ wha enwoma se omai, jẹ raha usu mai kugbe Jihova.

13-14. Wọhọ epanọ o rrọ Jemis 1:14, 15, fikieme ma rẹ rọ yọroma kpahe oghẹrẹ eware ẹkeriotọ nọ ma rẹ romakẹ? Kẹ oriruo.

¹³ Joma ta kpahe idhere jọ dẹẹ nọ eware ẹkeriotọ e rọ wọhọ emuore. Ma tẹ be re emu, ma rẹ sae salọ oware nọ ma re fihọ unu. Rekọ nọ ma te si rie lọ no, u gbe wo oware ovo nọ ma re ru kpahe oghẹrẹ nọ emu na ọ te jọ evaọ omamai hi. Emamọ emu ọ rẹ lẹliẹ ugboma mai jọ ziezi, rekọ ekpehre emu ọ rẹ sae lẹliẹ omai mọ. Ẹsejọhọ ma ti muẹrohọ onana asohẹrioke he, rekọ nọ oke o be nyaharo na, onana u ve ti dhesẹ oma via.

¹⁴ Epọvo na re, nọ ma tẹ be salọ eware ẹkeriotọ, ma wo uvẹ nọ ma rẹ rọ salọ oghẹrẹ eware nọ e rẹ ruọ iroro mai. Rekọ nọ ma tẹ salọ eware nana no, i ve kpomahọ iroro gbe uruemu mai. Eware ẹkeriotọ nọ Ọghẹnẹ ọ jẹrehọ e rẹ sasa omai oma, rekọ enọ i fo ho e rẹ wha enwoma se omai. (Se Jemis 1:14, 15.) Ẹsejọhọ enwoma nọ u ti no eware ẹkeriotọ iyoma ze o te nwani dhesẹ oma via ẹsiẹsiẹ hẹ, rekọ nọ oke o be nyaharo na, u ve ti dhesẹ oma via. Oyejabọ nọ Ebaibol na ọ rọ vẹvẹ omai unu nọ: “Jọ a su owhai thọ họ: Ọghẹnẹ ọ rrọ ọnọ a rẹ viẹhọ họ. Keme oware kpobi nọ ohwo ọ be kọ, oye o ti vu re; keme ohwo nọ ọ be rọ iroro uwo riẹ kọ, o ti vu egbogbo no uwo riẹ na ze.” (Gal. 6:7, 8) O roja gaga re ma whaha eware ẹkeriotọ kpobi nọ a rẹ jọ dhesẹ eware nọ Jihova o mukpahe.​—Ol. 97:10.

15. Okẹ vẹ Jihova ọ kẹ omai nọ u bi fiobọhọ kẹ omai?

¹⁵ O rẹ were Isẹri Jihova buobu re a rri JW Broadcasting^®, oria etẹlẹvisiọno itanẹte mai nọ a rẹ jọ dhesẹ emamọ eware ẹsikpobi. Oniọvo-ọmọtẹ jọ nọ a re se Marilyn ọ ta nọ: “JW Broadcasting o bi fiobọhọ kẹ omẹ wo evawere, yọ mẹ rẹ sai rri eware kpobi nọ e rrọ etẹe keme oware uyoma ovo o rrọ eva riẹ hẹ. Nọ mẹ tẹ rrọ ọkora hayo nọ udu u te whrehe omẹ, mẹ rẹ ruẹ evuẹ nọ a kẹ gbe Ese Okpẹdẹ nọ e rẹ kẹ omẹ uduotahawọ. Onana u re si omẹ kẹle Jihova gbe ukoko riẹ. JW Broadcasting na o nwene uzuazọ mẹ no riẹriẹriẹ.” Kọ who bi wo erere no okẹ nọ Jihova ọ kẹ omai na ze? U te no ividio kamara kamara na no, ma rẹ jọ JW Broadcasting ruẹ ividio efa, eware nọ a rẹ gaviezọ kẹ, gbe ile nọ e rẹ bọ ohwo ga.

16-17. Fikieme ma rẹ rọ raha umutho oke fihọ eware ẹkeriotọ, kọ ẹvẹ ma sai ro ru ei?

¹⁶ Orọnikọ oghẹrẹ eware ẹkeriotọ nọ ma be romakẹ ọvo ma rẹ yọroma kpahe he rekọ te oke nọ eware nana e be rehọ mi omai. Ma gbẹ yọroma ha, oke nọ ma be raha fihọ eware ẹkeriotọ u ve ti bu vi onọ ma be rọ gọ Jihova. O rẹ jọ bẹbẹ kẹ ahwo buobu re a riẹ umuo oke nọ a rẹ raha fihọ eware ẹkeriotọ. Oniọvo-ọmọtẹ jọ nọ a re se Abigail nọ ọ rrọ ikpe ikpegberee ọ ta nọ: “Etẹlẹvisiọno  nọ me re rri o re fiobọhọ kẹ omẹ serihọ nọ me te ru eware buobu evaọ okpẹdoke no. Rekọ mẹ gbẹ yọroma ha, mẹ sae raha euwa buobu evaọ aro etẹlẹvisiọno.” Samuel, oniọvo-ọmọzae jọ nọ ọ rrọ uzoge ọ ta nọ: “Mẹ ruẹ nọ mẹ be hae raha oke buobu ro rri ividio ekpẹkpẹe evaọ itanẹte. Me te rri ọvo no, mẹ vẹ ruọ ọfa, me je rri hi na euwa esa hayo ene e vrẹ no.”

¹⁷ Ẹvẹ whọ sae rọ riẹ umuo oke nọ whọ rẹ raha fihọ eware ẹkeriotọ? Oware ọsosuọ nọ who re ru họ, whọ rẹ daoma riẹ oke nọ whọ be raha fihọ eware nana dẹẹ. Whọ sai kere oke nọ whọ raha fihọ eware nana evaọ oka ovo. Kele unu euwa nọ who ro rri etẹlẹvisiọno, rovie kpohọ itanẹte, gbe oke nọ whọ rọ fa igemu ekọmputa, re who kere iei fihọ ekalẹnda. Whọ tẹ ruẹ nọ oke nọ whọ be raha fihọ eware nana u bu hrọ, daoma wo omaa. Fi oke họ ziezi rọkẹ eware nọ e mai wuzou, kẹsena who ve fi umutho oke họ kẹ eware ẹkeriotọ. U te no ere no, lẹ se Jihova re o fiobọhọ kẹ owhẹ ru lele omaa ra. Who te ru ere, who ti wo oke ziezi gbe ẹgba nọ who re ro ru uwuhrẹ Ebaibol omobọ ra, egagọ uviuwou, iwuhrẹ ukoko, gbe usi uwoma ota. Onana u ti je ru nọ udu u gbe ro brukpe owhẹ hẹ inọ whọ be raha oke kufiẹ rọkẹ eware ẹkeriotọ.

18-19. Ẹvẹ ma sai ro dhesẹ nọ ma romakẹ Jihova riẹriẹriẹ?

¹⁸ Nọ Pita ukọ na o kere kpahe uyero-akpọ Setan nọ u ti toba gbe akpọ ọkpokpọ nọ ọ be tha na no, ọ ta nọ: “Iyoyou, nọ wha be hẹrẹ eware nana na, wha dawo ẹgba rai kpobi re ọ ruẹ owhai evaọ ukuhọ riẹ inọ wha kare epe jẹ kare afuẹwẹ je wo udhedhẹ.” (2 Pita 3:14) Ma tẹ be daoma jọ fuafo evaọ uruemu jẹ gọ Jihova evaọ oghẹrẹ nọ u fo wọhọ epanọ oria ikere yena o ta na, yọ ma bi dhesẹ nọ ma romakẹ Jihova riẹriẹriẹ.

¹⁹ Setan avọ akpọ nana nọ o bi su na a te gbẹ daoma ru omai rọ eware efa karo viukpọ egagọ Jihova. (Luk 4:13) Rekọ oghẹrẹ kpobi kẹhẹ, ma te kuvẹ hẹ re ohwo hayo oware jọ u wuzou kẹ omai vi egagọ Jihova. Ma gba riẹ mu nọ Jihova ọvo ma rẹ romakẹ riẹriẹriẹ.