1. Eme iroro mai e rẹ sai kpohọ nọ a tẹ ta nọ ohwo o wo ohrọ?

A TẸ fodẹ ohwo nọ o wo ohrọ, iroro mai e rẹ sai kpohọ ohwo nọ ọ rrọ wowou, nọ ọ rrọ sasasa, yọ o re ru emamọ eware kẹ amọfa. Ma rẹ sae jẹ kareghẹhọ ọtadhesẹ Jesu ọrọ ohwo Sameria na. Ọzae nọ Jesu ọ fodẹ evaọ ọtadhesẹ na yọ ohwo orẹwho ofa, ohwo Sameria. Rekọ “o dhesẹ ohrọ-oriọ” kẹ ohwo Ju nọ iji i kpe mi eware na. Ọ re “ohrọ riẹ,” o te ru epanọ a rọ rẹrotei. (Luk 10:29-37) Ọtadhesẹ nana o dhesẹ uruemu ezi jọ nọ Ọghẹnẹ o wo, oye họ ohrọ. Ọghẹnẹ o you omai jabọ nọ ọ be rọ re omai ohrọ, yọ o bi ru ere kẹdẹ kẹdẹ.

2. Oware ofa vẹ ohwo nọ ọ rẹ re ohrọ ohwo o re ru?

² U wo oware ofa nọ ohwo nọ ọ rẹ re ohrọ ohwo o re ru. Ọ rẹ rọvrẹ ohwo nọ o ruthọ nọ ọ tẹ ruẹ oware nọ a sae rọ fiki riẹ rọvrẹ riẹ. Ere Jihova o re ru kẹ omai ẹsibuobu. Ọso-ilezi na ọ ta nọ: “Ọ kẹ omai uye wọhọ epaọ izieraha mai hi.” (Ol. 103:10) Rekọ u re wo ẹsejọ nọ Jihova ọ rẹ whọku ohwo gaga nọ o te ruthọ.

3. Enọ vẹ ma te kuyo rai evaọ uzoẹme nana?

³ Ma te jọ uzoẹme nana kuyo enọ nana: Eme o rẹ lẹliẹ Jihova re ohrọ ohwo? Kọ Jihova ọ tẹ whọku ohwo gaga, yọ ohrọ-oriọ? Eme o rẹ sai fiobọhọ kẹ omai re ohrọ amọfa? Joma ruẹ uyo nọ Ebaibol ọ kẹ kpahe enọ nana.

4. Eme ọ rẹ lẹliẹ Jihova re omai ohrọ?

⁴ Ohrọ ohwo nọ a rẹ re na o rẹ were Jihova gaga. Ọ rọ ẹzi riẹ kẹ Pọl ukọ na kere nọ Ọghẹnẹ “ọ vọ avọ ohrọ.” Ohrọ-oriọ Ọghẹnẹ nọ o ro ru re ahwo-akpọ erahaizi a wo ẹruore obọ odhiwu o lẹliẹ Pọl ta ẹme yena. (Ẹf. 2:4-7) Rekọ orọnọ Ileleikristi nọ i ti kpobọ odhiwu ọvo Jihova ọ re ohrọ  họ. Devidi ọso-ilezi na o kere nọ: “Jihova o re ru ewoma kẹ ohwo kpobi, yọ a rẹ jọ evaọ iruo riẹ kpobi ruẹ ohrọ riẹ.” (Ol. 145:9) Fikinọ Jhova o you omai gaga, ọ rẹ re omai ohrọ nọ ọ tẹ ruẹ oware nọ u ro fo re o ru ere.

5. Ẹvẹ Jesu ọ rọ riẹ nọ Jihova ọ rẹ re ohrọ ohwo gaga?

⁵ Jesu họ ohwo nọ ọ mae riẹ Jihova, ọ riẹ nọ Jihova ọ rẹ re ohrọ gaga. Jesu ọ jọ kugbe Jihova ikpe idu buobu no taure ọ tẹ ziọ otọakpọ. (Itẹ 8:30, 31) Fikiere, ọ jẹ ruẹ Ọsẹ riẹ ẹsibuobu nọ ọ jẹ hae re ohrọ ahwo-akpọ nọ a be raha izi riẹ fikinọ a gba ha. (Ol. 78:37-42) Ẹsibuobu Jesu ọ jẹ hai wuhrẹ ahwo kpahe uruemu uwoma nana nọ Ọsẹ riẹ o wo na.

6. Oriruo vẹ Jesu ọ kẹ ro dhesẹ nọ Ọsẹ riẹ ọ rẹ re ohrọ ohwo gaga?

⁶ Wọhọ epanọ ma ruẹ evaọ uzoẹme nọ u kpemu na, Jesu ọ rọ ọtadhesẹ ọmọ-ogbọfariẹ na wuhrẹ omai nọ o rẹ were Jihova gaga re ọ re ohrọ ohwo. Ọmọ-ogbọfariẹ na ọ kwa no uwou, ọ tẹ “raha eyero riẹ kufiẹ fiki uzuazọ ofafariẹ nọ o je yeri.” (Luk 15:13) Uwhremu na o te kurẹriẹ, o siobọno ekpehre uzuazọ nọ o je yeri na, ọ rọ omariẹ kpotọ, o te zihe kpobọ uwou. Kọ eme ọsẹ riẹ o ru? U du gwọlọ nọ ọ rẹ hẹrẹ oke lelehie re ọ tẹ riẹ oware nọ ọsẹ na o ti ru hu. Jesu ọ ta nọ: “Nọ [ọmọ na] ọ gbẹ jọ ugbothabọ, ọsẹ riẹ ọ tẹ kparo ruẹ e riẹ, ohrọ riẹ o tẹ re iẹe, ọ tẹ dhẹ nya, ọ tẹ gbalọ iẹe, ọ tẹ nabe viọlọ iẹe.” Ọsẹ na o ru oma vuọ ọmọ riẹ hẹ. Ukpoye ọ re ohrọ riẹ, ọ tẹ rọvrẹ riẹ je dede iei rehọ ziọ uwou na. Oware nọ ọmọ na o ru na u yoma gaga, rekọ fikinọ o kurẹriẹ na ọsẹ na ọ rọvrẹ riẹ. Ọsẹ nọ Jesu ọ fodẹ evaọ ọtadhesẹ na o wo ohrọ gaga, yọ o dikihẹ kẹ Jihova. Jesu ọ rọ iku nana nọ i re duobọte ohwo gaga na wuhrẹ omai nọ o rẹ were Ọsẹ riẹ re ọ rọvrẹ ọrahauzi kpobi nọ o kurẹriẹ no eva ze.​—Luk 15:17-24.

7. Ẹvẹ Jihova ọ rẹ re ohrọ nọ u dhesẹ nọ o wo areghẹ gaga?

⁷ Fikinọ Jihova o wo areghẹ thesiwa, ọ rẹ re ohrọ gaga. Areghẹ nọ Jihova o wo orọnikọ orọ eriariẹ nọ a wo fihọ uzou ọvo ho. Ukpoye Ebaibol na ọ ta nọ “areghẹ nọ o no obọ ehru ze” ọ rẹ “vọ avọ ohrọ-oriọ gbe ewoma oruo.” (Jem. 3:17) Ọsẹ nọ o you emọ riẹ ọ riẹ nọ ọ tẹ be hae re ohrọ emọ riẹ yọ oware uwoma o bi ru kẹ ae na. Ere Jihova ọ rrọ re. (Ol. 103:13; Aiz. 49:15) Fikinọ Jihova ọ be re ohrọ  mai, ma wo ẹruore inọ eware i ti woma evaọ obaro dede nọ ma gba ha. Fikiere nọ ohwo jọ o te ruthọ, Jihova ọ rẹ re ohrọ riẹ nọ ọ tẹ ruẹ oware nọ u ro fo re o ru ere. Rekọ u re wo ẹsejọ nọ Jihova ọ rẹ ruẹ nọ u fo ho re ọ re ohrọ ohwo nọ o ruthọ. Fikinọ o wo areghẹ gaga, ọ rẹ re ohrọ ohwo te epanọ o rẹ rọ wọhọ ẹsenọ ọ be kẹ ohwo omuomu uvẹ re o ru epanọ u je rie he.

8. Evaọ ẹsejọ, eme u fo nọ a re ru ohwo nọ ọ be raha uzi, kọ fikieme?

⁸ Ma rehọ iẹe nọ odibo Jihova jọ o kekaro fihọ bi ru oware nọ Jihova o mukpahe. Eme ma re ru? Jihova ọ rọ ẹzi riẹ kẹ Pọl ukọ na kere nọ ma rẹ “siọ usu ba ẹnya kugbe ohwo” otiọye na. (1 Kọr. 5:11) Ọrahauzi nọ ọ rọwo kurẹriẹ hẹ, a re si ei no ukoko na. A re ru onana re ekpehre uruemu riẹ na u gbe wholo inievo ukoko na nọ i kiọkọ họ, nọ e be daoma koko izi Jihova. U re je dhesẹ nọ Jihova ọ rrọ fuafo. Rekọ ahwo jọ a re roro nọ a te si ohwo no ukoko, kiyọ Ọghẹnẹ ọ re ohrọ riẹ hẹ. Kọ ginọ uzẹme? Joma ruẹ.

9-10. Wọhọ epanọ o rrọ Ahwo Hibru 12:5, 6, fikieme ma sae rọ ta nọ ukoko nọ a re si ohwo no na yọ oware ohrọ? Kẹ oriruo.

⁹ Nọ a tẹ jọ obọ ewuhrẹ ru owhowhovia inọ oniọvo jọ nọ ma riẹ ziezi “ọ gbẹ rrọ omọvo Isẹri Jihova ha,” o rẹ da omai gaga. Ẹsejọ ma sai roro nọ o nwani te epanọ a re ro si ei no ukoko ho. Kọ a te si ohwo no ukoko, yọ ohrọ-oriọ? Uyo na họ, Ee. Ohwo nọ ọ thuzi ulogbo nọ u fo nọ a re si no ukoko, a gbe si ei no ukoko ho, yọ oware areghẹ hẹ, u dhesẹ uyoyou ho, yọ u dhesẹ nọ oware ohrọ ekpako na a ru gbe he. (Itẹ 13:24) Kọ a te si ọrahauzi nọ ọ rọwo kurẹriẹ hẹ no ukoko, o sai fiobọhọ kẹe kurẹriẹ? Ee, ọ sai kurẹriẹ. Ahwo buobu nọ a thuzi ulogbo nọ a si no ukoko a ruẹ nọ ukoko nọ a si rai no na u fiobọhọ kẹ ae nọ a ro bruoma kpiroro, siobọno ekpehre uruemu rai je kurẹriẹ bru Jihova ze.​—Se Ahwo Hibru 12:5, 6.

¹⁰ Ma rehọ iẹe nọ othuru-igodẹ jọ ọ ruẹ nọ ogodẹ riẹ jọ ọ be mọ oghẹrẹ ẹyao jọ. Othuru-igodẹ na ọ ruẹ nọ re ọ sai siwi ẹyao nana, o re fi ogodẹ na họ oria riẹ sa. Whaọ igodẹ a rẹ gwọlọ jọ orọ obọrai hi. A rẹ gwọlọ jọ kugbe igodẹ nọ i kiọkọ, yọ o rẹ kẹ ai uye gaga nọ a te fi ai họ oria rai sa. Kọ othuru-igodẹ na o te fi ogodẹ na họ oria riẹ sa re oma riẹ ọ sae jọ etẹe kpo yọ u dhesẹ nọ ọ rrọ eva gaga? Ijo. Ọ riẹ nọ ọ tẹ nyasiọ ogodẹ na ba re o kuomagbe enọ i kiọkọ, ẹyao na o ti vo ruọ ae. Ogodẹ nọ ọ be mọ nọ o fihọ oria riẹ sa na, u re fiobọhọ thọ uthuru na soso.​—Rri Iruo-Izerẹ 13:3, 4.

11. (a) Ẹvẹ ohwo nọ a si no ukoko ọ rọ wọhọ ogodẹ nọ ọ be mọ oghẹrẹ ẹyao jọ? (b) Eme ọ rẹ sai fiobọhọ kẹ ohwo nọ a si no ukoko nọ ẹrọwọ riẹ ọ rẹ rọ wariẹ ga?

¹¹ Ohwo kpobi nọ a si no ukoko ọ wọhọ ogodẹ nọ ọ be mọ, keme yọ usu riẹ avọ Jihova o raha no. (Jem. 5:14) Ohwo ọ tẹ be mọ oghẹrẹ ẹyao jọ, ẹyao na ọ sai vo ruọ amọfa. Ere ọvona re, ohwo nọ usu riẹ avọ Jihova o raha no, ọ sae whẹ ekpehre uruemu riẹ họ amọfa. Fikiere, ẹsejọ u re woma re a si ohwo otiọna no ukoko. Jihova ọ be rọ ọruẹrẹfihotọ nana dhesẹ nọ o you idibo riẹ nọ i kiọkọ nọ e be daoma koko izi riẹ na. O sai je ru nọ ohwo nọ a si no ukoko na o re ro bruoma kpiroro o ve kurẹriẹ. Ohwo nọ a si no ukoko ọ sai kpohọ ewuhrẹ ọ vẹ hai yo eme nọ e rẹ wariẹ ru ẹrọwọ riẹ ga. Ọ sae jẹ rehọ ebe ukoko na nọ o re se kẹ omariẹ, je rri JW Broadcasting^®.  Ekpako ukoko na a te muẹrohọ nọ ọ be daoma nwene a sae kẹe ohrẹ noke toke re usu riẹ avọ Jihova ọ sae wariẹ jọ ziezi, a ve zihe iei ze ukoko na. *

12. Eme ekpako na a re ru ọrahauzi nọ o kurẹriẹ hẹ ro dhesẹ nọ a rrọ yoyou je wo ohrọ?

¹² O roja gaga re ma kareghẹhọ nọ ọrahauzi nọ ọ rọwo kurẹriẹ hẹ ọvo a re si no ukoko. Ekpako ukoko a riẹ nọ ohwo nọ a re si no ukoko yọ okpoware, fikiere a re roro te ziezi. A riẹ nọ Jihova ọ rẹ whọku ohwo “te epanọ u fo,” yọ ọ gwọlọ nọ ere ae omarai a re ru re. (Jeri. 30:11) A you inievo ukoko na, fikiere a re ru oware ovo nọ o rẹ raha usu nọ inievo na a wo kugbe Jihova ha. Rekọ ẹsejọ, edhere nọ a sai ro dhesẹ nọ a rrọ yoyou a te je wo ohrọ họ, nọ a te si ọrahauzi nọ ọ rọwo kurẹriẹ hẹ no ukoko evaọ etoke jọ.

13. Eme Oleleikristi jọ o ru evaọ obọ Kọrint nọ u te epanọ a re ro si ei no ukoko?

¹³ Joma ta kpahe oware nọ Pọl ukọ na ọ ta nọ a ru ọrahauzi jọ nọ ọ rọwo kurẹriẹ hẹ evaọ ikpe-udhusoi ọsosuọ. Oleleikristi jọ ọ jariẹ evaọ ikpe-udhusoi ọsosuọ nọ ọ rehọ aye ọsẹ riẹ fihọ uwou bi lele iei gbe-ọfariẹ. Oware na u gbo kẹhẹ! Pọl ọ riẹ nọ Jihova o juzi kẹ emọ Izrẹl kpahe oghẹrẹ oware utioye na inọ: “Ọzae nọ o lele aye ọsẹ riẹ wezẹ, o kpomovuọ họ ọsẹ riẹ oma. A re kpe aimava na no hrọ.” (Izerẹ 20:11) Pọl ọ sae nwane ta nọ jọ a kpe ọzae na no ho. Rekọ ọ ta kẹ Ileleikristi obọ Kọrint na nọ jọ a si ọzae na no ukoko. Ekpehre uruemu riẹ na o jẹ raha inievo efa evaọ ukoko na. Ejọ dede a je tube roro nọ oware nọ o ru na o nwani yoma tere he.​—1 Kọr. 5:1, 2, 13.

14. Ẹvẹ Pọl ọ rọ re ohrọ ọzae nọ a si no ukoko evaọ obọ Kọrint na, kọ fikieme? (2 Ahwo Kọrint 2:5-8, 11)

¹⁴ Nọ oke jọ o vrẹ no, Pọl o te yo nọ ọzae na o nwene gaga no. O kurẹriẹ no. Dede nọ oware nọ o ru na o wha omovuọ se ukoko na, ẹme nọ Pọl ọ ta kẹ ekpako na u dhesẹ nọ ọ gwọlọ rehọ ẹme na “ga hrọ họ.” Ọ ta kẹ ae nọ: “Wha rọvrẹ riẹ jẹ sasa iẹe oma.” Muẹrohọ oware nọ o lẹliẹ Pọl ta ere. Ọ ta nọ: “Re ọkora ọgaga ọ gbẹ dae oma fia ha.” Pọl ọ re ohrọ ọzae na. Ọ gwọlọ nọ omovuọ o ruọ ọzae na akpalobọ họ koyehọ re oma o vuọ ẹe te epanọ ọ gbẹ sae rọ lẹ nọ jọ a rọvrẹ riẹ hẹ.​—Se 2 Ahwo Kọrint 2:5-8, 11.

15. Oke vẹ ekpako na a rẹ rọ whọku ohwo gaga, kọ oke vẹ a sae rọ re iẹe ohrọ?

 ¹⁵ Ekpako ukoko a rẹ daoma re ohrọ ohwo wọhọ epanọ Jihova o re ru na. Nọ ohwo o te ruthọ, a rẹ whọku ei gaga nọ o tẹ gwọlọ ere yọ a rẹ jẹ re iẹe ohrọ nọ a tẹ ruẹ oware nọ u ro fo re a ru ere. A gbe ru enẹ hẹ kiyọ ohrọ họ, ukpoye kiyọ a be kẹ ohwo omuomu uvẹ re o ru epanọ u je rie. Dede na, orọnọ ekpako ukoko ọvo họ ahwo nọ a rẹ re amọfa ohrọ họ.

16. Wọhọ epanọ o rrọ Itẹ 21:13, eme Jihova o re ru ohwo nọ ọ rẹ rọwo re ohrọ amọfa ha?

¹⁶ Oleleikristi kpobi ọ rẹ daoma rọ aro kele Jihova re ohrọ amọfa. Fikieme? Oware jọ họ, ohwo kpobi nọ ọ rẹ re ohrọ amọfa ha, Jihova o re yo olẹ riẹ hẹ. (Se Itẹ 21:13.) Ohwo ọvo ọ riẹ hẹ nọ ọ gwọlọ nọ Jihova o yo olẹ riẹ hẹ, fikiere ma rẹ jọ ahwo ọgeva ha nọ a rẹ re ohrọ amọfa ha. Ma tẹ ruẹ oniọvo nọ uye o be bẹ, ma rẹ tehe ezọ di kẹe he, ukpoye ma rẹ daoma gaviezọ kẹ “oviẹ oruori na.” Ma rẹ daoma ru lele ohrẹ Ebaibol nana nọ o ta nọ: “Ohwo nọ ọ rẹ re ohrọ họ a te re ohrọ riẹ gbe he okenọ a te rehọ iẹe guẹdhọ.” (Jem. 2:13) Ma te wo omaurokpotọ, ma te kareghẹhọ nọ ẹsibuobu ma rẹ gwọlọ nọ a re omai ohrọ, ma vẹ te hae re amọfa ohrọ re. Oke jọ nọ o jọ mae gwọlọ nọ ma rẹ re omọfa ohrọ họ, nọ a te zihe ohwo nọ a si no ukoko ze.

17. Ẹvẹ Devidi ovie na o ro dhesẹ nọ ọ jẹ hae re ohrọ amọfa?

¹⁷ Iku ahwo nọ e rrọ Ebaibol na e sai fiobọhọ kẹ omai re ohrọ amọfa ukpenọ ma re dhesẹ evega. Wọhọ oriruo, joma ta kpahe Devidi ovie na. Devidi ọ re ohrọ ahwo unuẹse buobu. Wọhọ oriruo, dede nọ Sọl ọ jẹ gwọlọ kpei no, Devidi ọ re ohrọ ovie nana nọ Ọghẹnẹ o ro mu na, ọ rọ oghẹrẹ ovo ru ei kele he.​—1 Sam. 24:9-12, 18, 19.

18-19. Isiava vẹ Devidi ọ re ohrọ amọfa ha?

¹⁸ Dede na, u wo ẹsejọ nọ Devidi ọ re ohrọ amọfa ha. U wo oke jọ nọ Nebale nọ ọ jọ eva gaga ọ rọ ta ikpehre eme kẹ ahwo nọ Devidi o vi bru ei, yọ ọ rọwo kẹ ae emu hu. Eva e dha Devidi gaga, ọ tẹ wọ nọ ọ rẹ nyai kpe Nebale avọ ezae nọ e rrọ uwou riẹ kpobi no. Aye Nebale nọ a re se Abigẹle ọ jọ wowou gaga, o te je wo odiri. Ogbẹrọnọ ọ rọ emu se Devidi avọ ahwo riẹ ovovẹrẹ hẹ, Devidi ọ hai ti kpe Nebale avọ ezae nọ e rrọ uwou riẹ kpobi no.​—1 Sam. 25:9-22, 32-35.

¹⁹ U wo oke ofa jọ nọ Netan ọruẹaro na ọ rọ vuẹ Devidi kpahe ọdafe nọ o mi oyogbe jọ omogodẹ ọvo riẹ nọ ọ were riẹ gaga. Eva e dha Devidi gaga, ọ tẹ ta nọ: “Nọ Jihova ọ rrọ uzuazọ na, ọzae nọ o ru oware nana o fo uwhu!” (2 Sam. 12:1-6) Devidi ọ riẹ oware nọ Uzi Mosis o ta, inọ ohwo o te tho ogodẹ omọfa ọ rẹ rọ igodẹ ene hwa ogodẹ na zihe. (Ọny. 22:1) Rekọ ekpe no Devidi ọ ta nọ a re kpe ohwo na no. Ọ re ohrọ ohwo na vievie he. Kpakọ iku na yọ ọtadhesẹ gheghe nọ Netan ọ jẹ  rọ vuẹ Devidi kpahe eware iyoma nọ o ru. Yọ enọ o ru i tube yoma vi ọrọ ohwo nọ Netan ọ rọ kẹ ọtadhesẹ na. Jihova ọ re ohrọ Devidi dede nọ eware nọ o ru i yoma gaga. Rekọ Devidi ọ re ohrọ ohwo nọ Netan ọ rọ kẹ ọtadhesẹ na ha nọ ọ rehọ ogodẹ ọrivẹ riẹ na. Jihova ọ rẹ ginẹ re ohrọ ohwo kẹhẹ!​—2 Sam. 12:7-13.

20. Eme ma rẹ sae jọ iku Devidi na wuhrẹ?

²⁰ Kareghẹhọ nọ oke nọ Devidi ọ rọ ta nọ o re kpe Nebale avọ ezae nọ e rrọ uwou riẹ soso no na, eva e jẹ dhae. Uwhremu na, Devidi ọ tẹ ta nọ a re kpe ọzae nọ Netan ọ rọ kẹ oriruo na no. Ọrọ uwhremu na o sai gbe omai unu inọ, epanọ Devidi o wou te na, eme ọ gbẹ rọ nwane re ohrọ ohwo na ha nọ ọ rọ ta nọ a re kpei no? Ma rẹ kareghẹhọ nọ oke yena, Devidi o ru eware jọ nọ e jẹ lẹliẹ udu brukpei. Fikiere nọ ohwo ọ tẹ be hai dhesẹ eva egaga, nọ ọ gbẹ be re ohrọ amọfa ha, kiyọ oware jọ o thọ kugbe usu riẹ avọ Jihova. Jesu ọ vẹvẹ ilele riẹ unu nọ: “Wha siọ ahwo ẹdhọ ba egu, re a gbẹ rọ owhai guẹdhọ gbe he; keme oghẹrẹ nọ wha bi ro gu ahwo ẹdhọ, a ti ro gu owhai ẹdhọ re.” (Mat. 7:1, 2) Fikiere joma hae daoma ẹsikpobi re ma gbe dhesẹ eva egaga ha, ukpoye joma hae rọ aro kele Ọghẹnẹ mai nọ “ọ vọ avọ ohrọ” na.

21-22. Eware vẹ ma rẹ sai ru ro dhesẹ nọ ma be re ohrọ amọfa?

²¹ Ohwo nọ o wo ohrọ-oriọ, orọnọ udu riẹ ọvo ọ rẹ jọ re ohrọ ohwo ho, yọ unu ọvo ọ rẹ rọ tae he. Ukpoye o re fiobọhọ kẹ amọfa ro dhesẹ iẹe via. Fikiere mai kpobi ma rẹ daoma re ma ruẹ epanọ ma sai ro fiobọhọ kẹ amọfa evaọ uviuwou mai, ukoko mai, gbe evaọ oria nọ ma be rria. Eware buobu e riẹ nọ ma rẹ sai ru ro fiobọhọ kẹ amọfa ro dhesẹ nọ ma be re ohrọ rai. Ma te muẹrohọ nọ ohwo jọ ọ rrọ ọkọkora, ma sai there ememu sei hayo ru oware ofa kẹe nọ o rẹ sasa iẹe oma. Nọ a tẹ rehọ oniọvo nọ a si no ukoko zihe ze, ma sai bigbae je ru oma sasa iẹe. Ma sae jẹ rọ eria Ebaibol nọ e rẹ sasa ahwo oma ta usi uwoma kẹ ae. Onana yọ emamọ edhere jọ nọ ma re ro dhesẹ nọ ma be re ohrọ ahwo kpobi nọ ma nyaku.​—Job 29:12, 13; Rom 10:14, 15; Jem. 1:27.

²² Ma te muẹrohotọ ziezi, ma te ruẹ eware buobu nọ ma rẹ sai ru ro dhesẹ nọ ma be re ohrọ amọfa. Ma tẹ be hae re ohrọ amọfa, eva mai e te were Jihova Ọsẹ obọ odhiwu mai na gaga, ọnọ “ọ vọ avọ ohrọ” na.