KUKPE kukpe a bi zihe idibo Jihova buobu nọ a si no ukoko ze. Ma riẹ nọ a be “jọ obọ odhiwu ghọghọ” gaga nọ a bi zihe ae ze na. (Luk 15:7, 10) Otẹrọnọ a zihe owhẹ ziọ ukoko na obọ, riẹ nọ eva ra e be were Jihova, Jesu, gbe ikọ-odhiwu gaga inọ whọ wariẹ zihe ziọ ukoko Ọghẹnẹ no. O make rrọ ere na, o sae jọ bẹbẹ kẹ owhẹ re usu ra avọ Jihova o sae wariẹ jọ ziezi. Eware vẹ e rẹ sae whae ze nọ o rẹ rọ jọ bẹbẹ, kọ eme ọ rẹ sai fiobọhọ kẹ owhẹ?

Nọ ahwo buobu a tẹ maki zihe ziọ ukoko na no, udu u re gbe brukpe ai ghele. Oware utiona o via kẹ Devidi re. Nọ Ọghẹnẹ ọ make rọ izieraha riẹ rọvrẹ riẹ no ọ ta nọ: “Iruthọ mẹ e rrọ buobu gaga.” (Ol. 40:12; 65:3) Nọ a tẹ maki zihe ohwo ziọ ukoko no, udu o sai gbe brukpei, yọ oma o rẹ gbẹ sae vuẹe te ikpe buobu. Nọ a si oniọvo-ọmọtẹ jọ nọ a re se Isabelle no ukoko, o vrẹ ikpe udhe taure o te ti zihe ze. * Ọ ta nọ: “U je mu omẹ ẹro ho inọ Jihova ọ te sae rọvrẹ omẹ.” Udu u te gbe bi brukpe owhẹ ere o sai ru nọ whọ gbẹ rọ wariẹ kruga ziezi hi evaọ ukoko na. (Itẹ 24:10) Whọ kuvẹ re oware utioye o via kẹ owhẹ hẹ.

Amọfa jọ a re roro nọ eware nọ a ti ru re usu rai avọ Jihova o wariẹ jọ ziezi, i bu hrọ. Oniọvo-ọmọzae nọ a re se Antoine nọ a zihe ziọ ukoko no ọ ta nọ, “Eware kpobi nọ mẹ riẹ gbe enọ mẹ jẹ hai ru evaọ ukoko na ikpe buobu nọ i kpemu e thọrọ omẹ ẹro kpobi no.” Iroro itiena e sai ru nọ inievo jọ nọ a zihe ziọ ukoko no a gbẹ rọ kaki ru eware jọ buobu hu, eware nọ e sae lẹliẹ usu rai avọ Jihova ga ziezi.

Wọhọ oriruo, okpofou ọ tẹ raha uwou ohwo gaga, re ọ te wariẹ bọe, iruo na e sai fu ei enu, maero nọ o te roro te uye, eware nọ ọ te rọ wariẹ bọe gbe oke nọ ọ te raha fihọ iẹe. Epọvo na re, nọ usu ra avọ Jihova o tẹ raha fikinọ whọ raha uzi  ulogbo jọ, whọ sai roro nọ okolo iruo ho re whọ sai ru epanọ usu na o rẹ rọ wariẹ jọ ziezi. Whọ ruawa ha, Jihova o ti fiobọhọ kẹ owhẹ.

Jihova ọ ta kẹ omai nọ: “Wha nyaze enẹna, re ma kpọ eware vi evaọ udevie mai.” (Aiz. 1:18) Whọ daoma gaga no re whọ “kpọ eware vi.” Jihova o you owhẹ gaga fiki oware yena nọ who ru na. Eme eva e gbẹ were iẹe he? Oware yena nọ who ru na u ti ru nọ ọ te rọ ruẹ ẹme kpahe kẹ Setan nọ ọ be poviẹe na!​—Itẹ 27:11.

Jihova nọ who zihe bru ze na, u ru nọ who ro si kẹle iẹe gaga, yọ ọ ta nọ ọyomariẹ o ti si kẹle owhẹ re. (Jem. 4:8) Dede na, orọnọ ahwo a tẹ riẹ nọ who zihe ziọ ukoko na no ọvo yọ u re no ho. Who re gbe ru eware nọ usu ra avọ Jihova, Ọsẹ oyoyou ra gbe Ogbẹnyusu ra na o rẹ rọ kpekpe ziezi. Ẹvẹ whọ sai ro ru ere?

Nọ whọ be te wariẹ ruẹrẹ usu ra họ kugbe Jihova na, daoma fi itee nọ whọ rẹ sai le tobọ họ. Hae kareghẹhọ nọ ẹsejọhọ eware nọ who wuhrẹ kpahe Jihova gbe eyaa riẹ e re thọrọ owhẹ ẹro ho. Rekọ whọ rẹ wariẹ mu uzuazọ Oleleikristi họ eyeri. Wọhọ oriruo o te gwọlọ nọ whọ hai kpohọ usi uwoma je kuomagbe inievo na evaọ obọ ewuhrẹ wọhọ epanọ whọ jẹ hai ru vẹre. Joma ta kpahe eware jọ nọ whọ rẹ sae ma omaa rai.

Hae lẹ se Jihova ẹsikpobi. Jihova yọ Ọsẹ ra, yọ ọ riẹ nọ udu u te bi brukpe owhẹ ẹsikpobi, o te jọ bẹbẹ re whọ lẹ sei ẹsikpobi. (Rom 8:26) O make rrọ ere na, “ruabọhọ olẹ,” hae vuẹe nọ whọ gwọlọ nọ oware ovo o raha usu ra whẹ avọ iẹe he. (Rom. 12:12) Andrej ọ ta nọ: “Nọ mẹ maki zihe ziọ ukoko na no, udu o jẹ hai brukpe omẹ yọ oma o jẹ hae vuọ omẹ. Rekọ ẹsikpobi nọ mẹ tẹ lẹ no, eware yena e rẹ gbẹ kẹ omẹ uye tere he. Udu o jẹ hai te omẹ otọ.” Whọ gbẹ riẹ ẹme nọ whọ rẹ ta evaọ olẹ hẹ, rri eme Devidi nọ e rrọ obe Olezi 51 gbe 65, enọ ọ ta okenọ o kurẹriẹ no. Whọ te jariẹ ruẹ oware nọ whọ rẹ lẹ se Jihova kpahe.

Hai se Ebaibol na ẹsikpobi. Who te bi ru ere, who ti dikihẹ ga ziezi evaọ ukoko na, yọ who ti you Jihova viere. (Ol. 19:7-11) Oniọvo-ọmọzae jọ nọ a re se Felipe ọ ta nọ: “Fikinọ me wo omaa nọ mẹ jẹ hai ro se Ebaibol ẹsikpobi hi, u ru nọ ẹrọwọ mẹ o ro whrehe, me te ru oware nọ Jihova o mukpahe. Mẹ gwọlọ nọ oware utioye na o wariẹ via kẹ omẹ hẹ. Fikiere mẹ tẹ ta nọ mẹ rẹ romatotọ wuhrẹ Ebaibol na kẹ omamẹ kẹse kẹse.” Whọ sai ru epanọ oniọvo na o ru na. Whọ tẹ gwọlọ nọ a fiobọhọ kẹ owhẹ gwọlọ emamọ izoẹme nọ who re ro ru ewuhrẹ omobọ ra, whọ sae ta kẹ oniọvo jọ nọ o kruga ziezi re o fiobọhọ kẹ owhẹ.

Wariẹ mu usu kugbe inievo ukoko na. Inievo jọ nọ a zihe ziọ ukoko a re roro nọ inievo na a te rọ ekpehre ubiẹro rri rai. Oniọvo-ọmọtẹ jọ nọ a re se Larissa ọ ta nọ: “Oma o jẹ vuọ omẹ gaga. Yọ me rri nọ o be da inievo na gaga inọ eva nọ a fihọ omẹ uvrẹvru. O jọ ere kẹ omẹ oke lelehie.” Otẹrọnọ ere o rrọ kẹ owhẹ, riẹ nọ ekpako ukoko na gbe inievo efa nọ i kruga ziezi evaọ ukoko na a gwọlọ nọ a re fiobọhọ kẹ owhẹ re usu ra avọ Jihova o wariẹ jọ ziezi. (Rri ẹkpẹti na “ Eme Ekpako Ukoko A rẹ Sai Ru ro Fiobọhọ?”) Eva e be were ae nọ who zihe ziọ ukoko na no, yọ a gwọlọ nọ who re kruga ziezi.​—Itẹ 17:17.

Eme ọ rẹ sai fiobọhọ kẹ owhẹ wariẹ mu usu kugbe inievo na? Hai kpohọ ewuhrẹ ẹsikpobi re whọ hai je kpohọ usi uwoma ẹsikpobi, whọ vẹ be rọ ere kuomagbe inievo na. Who te ru ere, eme o ti noi ze? Oniọvo jọ nọ a re se Felix ọ ta nọ: “Inievo ukoko na a je rẹro nọ me ti zihe ze, u te ru nọ mẹ rọ riẹ nọ a gine you omẹ. Inievo na a dede omẹ rehọ sasasa. U ru nọ mẹ rọ riẹ nọ a ginẹ rọvrẹ omẹ no, u te je ru nọ mẹ rọ ruabọhọ egagọ Jihova.”​—Rri ẹkpẹti na “ Eme Whọ rẹ Sai Ru?”

Nọ whọ be daoma ru epanọ usu ra avọ Jihova o rẹ rọ wariẹ jọ ziezi na, Setan ọ te hai ru eware nọ udu u re ro whrehe owhẹ. (Luk 4:13) Fikiere hai ru eware nọ usu ra avọ Jihova o rẹ rọ kpekpe ziezi enẹna.

Jihova ọ ta kpahe idibo riẹ nọ: “Mẹ te gwọlọ ọnọ o vru na, mẹ te rehọ ọnọ o ghoro vrẹ na zihe ze, mẹ te rehọ omohọ gba ọnọ ọ nwoma na, yọ me ti ru ọnọ oma o lọhọ no na ga.” (Izik. 34:16) Jihova o fiobọhọ kẹ idibo riẹ buobu nọ i no ukoko no nọ a rọ wariẹ zihe ze. Yọ ọ gwọlọ fiobọhọ kẹ owhẹ re usu ra avọ iẹe o hae kpekpe ẹsikpobi.