1. Fikieme o rọ rrọ bẹbẹ kẹ ahwo buobu re a riẹ egagọ uzẹme na?

EGAGỌ buobu e riẹ nọ i bi se omarai Ileleikristi, nọ a rẹ ta nọ a bi ru oreva Ọghẹnẹ. O wha riẹ ze nọ ahwo buobu a ro reghe no. A be nọ inọ, “Kọ egagọ uzẹme jọ e ginẹ riẹ, manikọ egagọ na kpobi Ọghẹnẹ ọ jẹrehọ?” Kọ mai omamai, u gine mu omai ẹro ziezi nọ uzẹme na ma bi wuhrẹ na, gbe inọ egagọ uzẹme nọ Ọghẹnẹ ọ jẹrehọ ma rrọ na? Kọ o sai gine mu ohwo ẹro inọ egagọ uzẹme na ọ rrọ? Joma ruẹ.

2. Wọhọ epanọ o rrọ 1 Ahwo Tẹsalonika 1:5, fikieme eware nọ Pọl ọ rọwo i ro mu ei ẹro ziezi?

² U mu Pọl ukọ na ẹro gaga inọ iwuhrẹ Ọghẹnẹ nọ ọ rọwo na họ uzẹme na. (Se 1 Ahwo Tẹsalonika 1:5.) Orọnikọ fikinọ eware nọ ọ rọwo na e were riẹ u ro mu ei ẹro nọ uzẹme na ye he. Pọl ukọ na ọ jẹ hae romatotọ wuhrẹ Ẹme Ọghẹnẹ. Ọ rọwo nọ “ẹkwoma ẹzi Ọghẹnẹ a ro kere Ikereakere na kpobi.” (2 Tim. 3:16) Eme ọ ruẹ vuhumu evaọ eware nọ o je wuhrẹ na? Pọl ukọ na ọ jọ Ikereakere na ruẹ eware nọ u ro mu ei ẹro inọ Jesu họ Mesaya nọ a ya eyaa riẹ na. Isu egagọ ahwo Ju a ruẹ eware nana evaọ Ikereakere na, rekọ a rọwo ghele he. Isu egagọ yena nọ e jẹ viẹ ahwo họ na a se omarai ilorida nọ i bi wuhrẹ ahwo kpahe Ọghẹnẹ, rekọ a je ru eware nọ Ọghẹnẹ o mukpahe. (Tait. 1:16) Eware nọ e jọ Ẹme Ọghẹnẹ were isu egagọ yena ọvo a jẹ hae rọwo, rekọ Pọl ukọ na ọ jọ ere he. Ọ jẹ hai ru lele “ehrẹ Ọghẹnẹ kpobi,” yọ eye ọ jẹ hai wuhrẹ ahwo re.​—Iruẹru 20:27.

3. Kọ ma rẹ riẹ iyo enọ kpobi re u te mu omai ẹro nọ egagọ uzẹme na ma rrọ na? (Rri ẹkpẹti na “ Iruo Jihova gbe Eware nọ O Wo họ Iroro ‘I bu Vi Ekele.’”)

³ Otujọ o re roro nọ ahwo nọ a rrọ egagọ uzẹme na a rẹ  sae kuyo onọ kpobi, makọ enọ nọ whọ rẹ sae jọ Ebaibol ruẹ uyo rai dede he. Kọ oware utioye na o sae lọhọ? Joma ta kpahe Pọl ukọ na. Ọ ta kẹ ibe Ileleikristi riẹ inọ jọ a “vuhu eware kpobi mu.” Rekọ ọ ta re nọ eware buobu e riẹ nọ ọ riẹ otọ rai hi. (1 Tẹs. 5:21) Pọl o kere nọ “eriariẹ mai e gbunu hu,” ọ tẹ jẹ ta nọ “enẹna ma be rọ ughẹgbe ayọno ruẹ eware bizi bizi.” (1 Kọr. 13:9, 12) Orọnọ eware kpobi Pọl ọ riẹ otọ rai hi, yọ ere omai re. Dede na, ọ riẹ eware nọ i wuzou kpahe ẹjiroro Jihova. Utho eware nọ ọ riẹ na i te epanọ u ro mu ei ẹro nọ eware nọ ọ rọwo na họ uzẹme na.

4. Eme ma re ru re u mu omai ẹro ziezi nọ egagọ uzẹme na ma rrọ, kọ eme ma te ta kpahe ro vuhu Ileleikristi uzẹme?

⁴ Oware jọ nọ ma re ru re o sai mu omai ẹro viere inọ egagọ uzẹme na ma rrọ họ, ma rẹ rọ oriruo nọ Jesu o fihotọ rri oghẹrẹ nọ Isẹri Jihova a be rọ gọ nẹnẹ. Ma te jọ uzoẹme nana ruẹ nọ Ileleikristi uzẹme (1) a rẹ kẹnoma kẹ ẹdhọgọ, (2) a rẹ rọ adhẹẹ kẹ odẹ Jihova, (3) uzẹme na o rẹ were ae, yọ (4) a re you ohwohwo gaga.

5. Eme ma wuhrẹ mi Jesu kpahe oghẹrẹ nọ u fo nọ ma rẹ rọ gọ Ọghẹnẹ, kọ ẹvẹ ma sai ro ru lele oware nọ o wuhrẹ?

⁵ Fikinọ Jesu o you Jihova Ọghẹnẹ gaga, ọye ọvo ọ be gọ, makọ oke nọ ọ gbẹ jọ obọ odhiwu gbe oke nọ ọ ziọ obọ otọakpọ obonẹ. (Luk 4:8) O wuhrẹ ilele riẹ nọ jọ a ru epọvo na. Jesu hayo ikọ riẹ a rọ oghẹrẹ iwoho hayo emema jọ gọ Ọghẹnẹ hẹ. Ọghẹnẹ yọ Ẹzi, fikiere ohwo-akpọ ọ rẹ sai ru oware nọ u re tho Ọghẹnẹ hẹ. (Aiz. 46:5) Kọ o thọ re a ru iwoho hayo emema ahwo nọ a se erezi na re a hae lẹ se ae? Evaọ Izi Ikpe nọ Jihova ọ kẹ  orẹwho Izrẹl, orọ avọ ivẹ o ta nọ: “Who re wo ẹmema nọ a kare kẹ omara vievie he hayo uwoho jọ nọ o wọhọ oware jọ evaọ obọ idhiwu na, hayo evaọ otọakpọ na . . . Who re guzou kpotọ kẹ ae vievie he.” (Ọny. 20:4, 5) Uzi nana o rrọ vevẹ kẹ ohwo kpobi nọ ọ ginẹ gwọlọ gọ Ọghẹnẹ.

6. Amono mai Isẹri Jihova ma be rọ aro kele evaọ egagọ mai?

⁶ Ahwo nọ a re kere kpahe eware nọ e via evaọ oke anwae a ta nọ Ọghẹnẹ ọvo Ileleikristi ọsosuọ na a jẹ gọ. Wọhọ oriruo, obe na History of the Christian Church o ta nọ ẹme iwoho hayo emema nọ a re fihọ oria egagọ “o hae te tọtọ” Ileleikristi ọsosuọ na oma. Oghẹrẹ nọ Ileleikristi ọsosuọ na a jẹ rọ gọ Ọghẹnẹ ere mai Isẹri Jihova ma be rọ gọ nẹnẹ re. Ma rẹ lẹ se iwoho hayo emema ahwo nọ a re se erezi hayo ikọ-odhiwu hu. Ma rẹ tubẹ lẹ se Jesu dede he. Ma re yere obiala ha, yọ ma re ru oware ovo nọ o rẹ rọ wọhọ nọ ma be gọ egọmeti hayo orẹwho jọ họ. Ghelọ oware kpobi nọ o rẹ via kẹhẹ, ma gba riẹ mu nọ ma re ru lele ẹme Jesu nọ ọ ta nọ: “Jihova Ọghẹnẹ ra o gba owhẹ họ nọ whọ rẹ gọ.”​—Mat. 4:10.

7. Ohẹriẹ vẹ o rrọ Isẹri Jihova avọ egagọ nọ i kiọkọ?

⁷ Nẹnẹ, ahwo buobu a be dhẹ lele ilorida egagọ nọ odẹ rai o bi do nẹnẹ. Who te tube rri oghẹrẹ nọ a re ru isu egagọ nana ẹsejọ, o rẹ wọhọ ẹsenọ a be gọ ae. Ichọche rai e rẹ vọ kpọhọhwẹ, ahwo a rẹ dẹ ebe rai, yọ a rẹ wọ igho buobu kẹ ae. Ahwo jọ a rẹ rọwo ẹme kpobi nọ isu egagọ nana a ta. Who te rri oghẹrẹ nọ a re ru isu egagọ nana, u re gbe owhẹ unu nọ ‘kọ Jesu ọ tẹ tubẹ romavia kẹ ae, a sai ru ere kẹe?’ Ahwo nọ a rrọ egagọ uzẹme a wo ohẹriẹ keme a re wo osu hu evaọ udevie rai. Dede nọ ma rẹ rọ adhẹẹ kẹ ahwo nọ a be kobaro evaọ udevie mai, ma bi ru lele ẹme Jesu nọ ọ ta nọ: “Whai kpobi inievo.” (Mat. 23:8-10) Ma rẹ rọ adhẹẹ kẹ ahwo-akpọ wọhọ ẹsenọ ma be gọ ae he, te a make rrọ isu egagọ, hayo isu egọmeti. Ma re wobọ ọvo evaọ eware nọ a bi ru hu. Eware nana i dhesẹ nọ ma wo ohẹriẹ gaga no egagọ nọ i kiọkọ kpobi nọ i bi se omarai Ileleikristi.​—Jọn 18:36.

8. Ẹvẹ ma rọ riẹ nọ Jihova ọ gwọlọ nọ a kẹ odẹ riẹ oruaro jẹ vuẹ amọfa kpahe odẹ na?

⁸ Oke jọ o jariẹ nọ Jesu ọ rọ lẹ nọ: “Ọsẹ, kẹ odẹ ra oruaro.” Jihova ọ tẹ kẹ uyo olẹ yena no obọ odhiwu ze. Ọ ta avọ urru oruarua nọ ọ te kẹ odẹ riẹ oruaro. (Jọn 12:28) Nọ Jesu ọ jọ otọakpọ, ọ wha oruaro se odẹ Ọsẹ riẹ. (Jọn 17:26) Fikiere, Ileleikristi uzẹme a rẹ rehọ iẹe nọ ọghọ o rrọ kẹ ae nọ a bi ro se odẹ Ọghẹnẹ jẹ vuẹ ahwo kpahe odẹ na.

9. Eme Ileleikristi ọsosuọ na a ru nọ u dhesẹ nọ a jẹ rọ adhẹẹ kẹ odẹ Ọghẹnẹ?

⁹ Nọ a nwane to ukoko Ileleikristi na họ obọ evaọ ikpe-udhusoi ọsosuọ, Jihova ọ tẹ “rẹriẹ ovao rri erẹwho na re ọ jọ udevie rai rehọ ahwo kẹ odẹ riẹ.” (Iruẹru 15:14) Eva e jẹ were Ileleikristi ọsosuọ na gaga nọ a je se odẹ Ọghẹnẹ jẹ vuẹ ahwo kpahe odẹ na. A jẹ hae fodẹ odẹ na ẹsikpobi nọ a tẹ be ta usi uwoma kẹ ahwo, yọ a jẹ hai kere odẹ na fihọ ebe nọ Ọghẹnẹ ọ rọ ẹzi riẹ kẹ ae kere evaọ Ebaibol na. * Eware nọ a ru i dhesẹ nọ ae ọvo họ ahwo nọ a je ru re ahwo a riẹ odẹ Ọghẹnẹ.​—Iruẹru 2:14, 21.

10. Eme u dhesẹ nọ Isẹri Jihova họ ahwo nọ a be rọ adhẹẹ kẹ odẹ Ọghẹnẹ?

 ¹⁰ Kọ Isẹri Jihova a wo adhẹẹ kẹ odẹ Ọghẹnẹ? Joma ta kpahe eware nọ i dhesẹ nọ a wo adhẹẹ kẹ odẹ na. Isu egagọ buobu nẹnẹ a bi ru oghẹrẹ kpobi re ahwo a roro nọ Ọghẹnẹ o wo odẹ hẹ. A si odẹ na no efafa Ebaibol rai. Yọ evaọ ẹsejọ dede, a re se odẹ na ha, yọ a rẹ kuvẹ hẹ re amọfa a sei evaọ egagọ rai. * A re du vuẹ owhẹ re whọ tẹ riẹ hẹ inọ Isẹri Jihova ọvo họ ahwo nọ a be rọ adhẹẹ kẹ odẹ Ọghẹnẹ wọhọ epanọ u gine fo. Mai họ ahwo nọ a be mai fiobọhọ kẹ amọfa riẹ odẹ Ọghẹnẹ. Uzẹme riẹ họ, ma be daoma mai kpobi re ma ru eware nọ i re dhesẹ nọ odẹ mai na Isẹri Jihova u gine mu omai oma. (Aiz. 43:10-12) A jọ Ebaibol Efafa Akpọ Ọkpokpọ ọrọ Ikereakere Efuafo Na zihe odẹ Ọghẹnẹ fihọ eria kpobi nọ Ebaibol efa e jọ si odẹ na no. Yọ ma printi Ebaibol nana bu vrẹ ima egba ivẹ gbe udhuvẹ (240,000,000) soso no. U te no ere no, ma bi kere ebe nọ a rehọ iwuhrẹ rai no Ebaibol ze, yọ ma be jarae fodẹ odẹ Ọghẹnẹ. Ma tẹ be jẹ fa ebe nana fihọ evẹrẹ nọ i bu vrẹ odu ọvo (1,000).

11. Eme Ileleikristi ọsosuọ na a ru nọ u dhesẹ nọ uzẹme na o jẹ were ae gaga?

¹¹ Uzẹme na kpahe Ọghẹnẹ gbe eware nọ o ti ru o were Jesu gaga. O yeri  uzuazọ riẹ lele uzẹme na, o te je fiobọhọ kẹ ahwo riẹ uzẹme na. (Jọn 18:37) Ileleikristi uzẹme a re dhesẹ nọ uzẹme na o be were ae gaga re. (Jọn 4:23, 24) Pita ukọ na omariẹ o tube se ukoko Ileleikristi na “edhere uzẹme na.” (2 Pita 2:2) Fikinọ uzẹme na o jẹ were Ileleikristi ọsosuọ na gaga, a siọ iwuhrẹ egagọ, iruemu ẹwho, gbe iwuhrẹ ahwo nọ e rọwokugbe uzẹme na ha. (Kọl. 2:8) Epọvo na re, Ileleikristi uzẹme a rẹ daoma re a ruẹ nọ eware nọ a bi wuhrẹ i no Ebaibol ze, yọ a re je ru lele eware nọ a bi wuhrẹ na. A vẹ rọ ere dhesẹ nọ a be “nya evaọ uzẹme na.”​—3 Jọn 3, 4.

12. Nọ inievo nọ e be rẹrote iruẹru Isẹri Jihova a tẹ ruẹ nọ u fo re ma nwene uwuhrẹ jọ eme a re ru, kọ ẹjiroro vẹ a bi ro ru ei?

¹² Isẹri Jihova a rẹ ta nọ a wo otoriẹ oware kpobi nọ Ebaibol na ọ ta totọ họ. U wo oke jọ nọ a fotọ iwuhrẹ Ebaibol jọ thọ no, yọ oghẹrẹ nọ a rọ ruẹrẹ eware họ evaọ ukoko na o thọ no re evaọ oke jọ. Rekọ oyena u re gbomai unu vievie he. Ebaibol na ọ ta nọ eriariẹ Ọghẹnẹ i re dhe evevẹ nọ oke o be nyaharo na. (Kọl. 1:9, 10) Ẹmẹrera Jihova o re ro ru uzẹme na vẹ, fikiere ma rẹ hẹrẹ bẹsenọ elo uzẹme na o re ro vẹ gahọ. (Itẹ 4:18) Inievo nọ e be rẹrote iruẹru ukoko Ọghẹnẹ a tẹ ruẹ nọ u fo re ma nwene iwuhrẹ mai jọ, a rẹ raha oke re a te ru ere he. Ahwo ichọche buobu a re nwene eware hayo iwuhrẹ rai re eva e ruẹse were ahwo egagọ rai hayo re akpọ na ọ ruẹse riẹ ae odẹ. Rekọ oware nọ o rẹ lẹliẹ ukoko Isẹri Jihova nwene eware hayo iwuhrẹ rai họ, re a sai si kẹle Ọghẹnẹ vi epaọ anwẹdẹ hayo re o rọwokugbe oghẹrẹ nọ Jesu gbe ikọ na a rọ gọ Ọghẹnẹ ziezi. (Jem. 4:4) Nọ uwuhrẹ Ebaibol jọ u te vẹ kẹ omai vi epaọ anwẹdẹ oye o rẹ lẹliẹ omai nwene uwuhrẹ mai, orọnikọ re ma ru eva were ahwo jọ hayo re ahwo-akpọ a riẹ omai odẹ hẹ. Uzẹme na o be were omai gaga!​—1 Tẹs. 2:3, 4.

13. Uruemu vẹ a mae rọ riẹ Ileleikristi uzẹme, kọ eme o dhesẹ nọ Isẹri Jihova a gine wo uruemu yena?

¹³ Ileleikristi ọsosuọ na a wo emamọ iruemu buobu, rekọ onọ a mae rọ riẹ ae họ, uyoyou. Jesu ọ ta nọ: “Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.” (Jọn 13:34, 35) Nẹnẹ, mai Isẹri Jihova ma you ohwohwo gaga evaọ akpọ na soso, yọ mai kpobi na ọvo. Ma wo ohẹriẹ no ahwo egagọ efa kpobi keme ma wọhọ ahwo uviuwou ovo, te ma rrọ ahwo orẹwho ofa, ẹvẹrẹ ọfa hayo ovioma ofa. Who te kpohọ ewuhrẹ, okokohọ ọsese hayo ologbo, whọ rẹ ruẹ nọ ma gine you ohwohwo gaga. Oware nana o lẹliẹ e riẹ mu omai ẹro ziezi inọ mai Isẹri Jihova họ egagọ nọ Jihova ọ jẹrehọ.

14. Wọhọ epanọ o rrọ Ahwo Kọlọsi 3:12-14, eme ma rẹ sai ru ro dhesẹ nọ ma gine you ohwohwo gaga?

¹⁴ Ebaibol ọ ta nọ joma “wo uyoyou ogaga kẹ ohwohwo.” (1 Pita 4:8) Oghẹrẹ jọ nọ ma re ro dhesẹ nọ ma you ohwohwo gaga họ, ma rẹ rọvrẹ nọ ma te ru ohwohwo thọ, ma re je thihakọ kẹ oniọvo nọ o wo uruemu jọ nọ o nwane were omai tere he. Ma rẹ jẹ daoma ru inievo ukoko na ọghọ, je se ai gboma, te enọ e maki ru omai thọ dede. (Se Ahwo Kọlọsi 3:12-14.) Uyoyou utioye na a mai ro vuhu Ileleikristi uzẹme.

15. Oghẹrẹ ofa vẹ ma bi ro lele oriruo Ileleikristi ọsosuọ na?

¹⁵ U wo abọ ọfa jọ nọ ma bi jo ru lele oriruo  ukoko Ileleikristi ọsosuọ na re. Ma ruẹrẹ ukoko na họ lele oghẹrẹ nọ a ruẹrẹ ukoko Ileleikristi ọsosuọ họ. Ma wo esẹro ọnyawariẹ, ekpako ukoko, gbe idibo iruiruo nwane wọhọ epanọ o jọ evaọ oke ikọ na. (Fil. 1:1; Tait. 1:5) Yọ wọhọ epanọ o jọ evaọ oke ikọ na, ma bi koko izi Ọghẹnẹ nọ e ta kpahe owezẹ ọzae-avọ-aye, orọo, azẹ, yọ ma re je si erahaizi nọ e rọwo kurẹriẹ hẹ no ukoko na re ma rọ ere thọ inievo na.​—Iruẹru 15:28, 29; 1 Kọr. 5:11-13; 6:9, 10; Hib. 13:4.

16. Eme ẹme nọ ọ rrọ obe Ahwo Ẹfisọs 4:4-6 u fiobọhọ kẹ omai riẹ?

¹⁶ Jesu ọ ta nọ ahwo buobu a ti se omarai ilele riẹ, rekọ aikpobi na a te jọ Ileleikristi uzẹme he. (Mat. 7:21-23) Ebaibol na ọ vuẹ omai re nọ evaọ edẹ urere na, ahwo buobu “a ti ru wọhọ ẹsenọ a be gọ Ọghẹnẹ.” (2 Tim. 3:1, 5) Rekọ Ebaibol na ọ ta vevẹ nọ “ẹrọwọ ọvo” ọ riẹ, yọ ọye Ọghẹnẹ ọ jẹrehọ.​—Se Ahwo Ẹfisọs 4:4-6.

17. Amono a be rọ aro kele Jesu nẹnẹ, nọ a wo ẹrọwọ ọvuọvo?

¹⁷ Amono a rrọ egagọ uzẹme na nẹnẹ? Ma ta kpahe eware sa-sa nọ e kuyo na no. Eye họ, oghẹrẹ egagọ nọ Jesu ọ tohọ gbe epanọ Ileleikristi ọsosuọ na a rọ rehọ aro kele iei. Isẹri Jihova ọvo họ egagọ nọ e be romatotọ lele oriruo rai. Ae họ egagọ uzẹme na. Ọghọ nọ ma wo ọ rro kẹhẹ nọ ma rọ rrọ Isẹri Jihova, nọ ma rọ riẹ uzẹme na kpahe Jihova gbe ẹjiroro riẹ. Ajọ u mu omai ẹro ziezi nọ egagọ uzẹme na ma rrọ na.