Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Eme ọ rrọ Ebaibol na nọ u dhesẹ nọ Ọghẹnẹ o wo ọdawẹ kẹ omai?

Okenọ emọ Izrẹl a jọ igbo Ijipti, Ọghẹnẹ o je muẹrohọ oja nọ a jẹ re yọ o jẹ kẹe uye. (Ọny. 3:7; Aiz. 63:9) Ọghẹnẹ ọ ma omai evaọ uwoho riẹ, fikiere ma sai dhesẹ ọdawẹ kẹ amọfa. Ọghẹnẹ o wo ọdawẹ kẹ omai o tẹ make rọnọ ma roro nọ ma te ahwo nọ o re dhesẹ uyoyou kẹ hẹ.—wp18.3, ẹwẹ. 8-9.

Ẹvẹ iwuhrẹ Jesu i ro fiobọhọ kẹ ahwo fi ẹzi omohẹriẹ kparobọ?

Ahwo Ju buobu evaọ oke Jesu a wo ẹzi omohẹriẹ. Jesu o wuhrẹ ilele riẹ inọ jọ a wo omaurokpotọ, jẹ whaha omorro. Ọ tuduhọ ae awọ inọ jọ a lele ohwohwo yeri wọhọ inievo.—w18.06, ẹwẹ. 9-10.

Ọghẹnẹ ọ kẹ Mosis uvẹ re ọ ruọ Ẹkwotọ Eyaa na ha, eme ma wuhrẹ no onana ze?

Mosis o wo usu okpekpe kugbe Jihova. (Izie. 34:10) Evaọ ubrobọ urere ikpe udhuvẹ nọ ahwo Izrẹl a rọ jọ obọ udhude na, ahwo na a wariẹ muhọ ẹgo fiki ame nọ ọ jariẹ hẹ. Ọghẹnẹ ọ tẹ vuẹ Mosis nọ jọ ọ ta ẹme kẹ utho na. Rekọ Mosis o ru ere he, ukpoye ọ tẹ fa utho na. O sae jọnọ eva e dha Jihova inọ Mosis o ru oware nọ ọ ta kẹe he hayo inọ Mosis ọ rọ oruaro kẹ Jihova ha evaọ iruo igbunu nana nọ i no obọ riẹ ze na. (Ik. 20:6-12) Onana u re ru omai riẹ nọ u wuzou gaga re ma yoẹme kẹ Jihova jẹ rọ orro kẹe.—w18.07, ẹwẹ. 13-14.

Ẹvẹ o sae rọ jọ bẹbẹ re ma bruoziẹ ọgbagba nọ ma te bi rri okafe ro bruoziẹ?

Eware esa jọ e riẹ nọ e rẹ mae lẹliẹ ohwo bruoziẹ okafe. Eye họ: oria nọ ohwo o no ze, epanọ ohwo o fe hayo yogbe te, gbe ikpe nọ ohwo ọ rrọ. U wuzou gaga re ma hae daoma rri amọfa epanọ Ọghẹnẹ o bi rri rai! (Iruẹru 10:34, 35)—w18.08, ẹwẹ. 8-12.

Idhere jọ vẹ Ileleikristi nọ e kpako no a sai ro fiobọhọ kẹ amọfa?

Oleleikristi nọ ọ kpako no nọ a nwene owha-iruo riẹ ọ gbẹ rrọ ghaghae evaọ obọ Ọghẹnẹ, yọ ọ rẹ gbẹ sai ru eware buobu ro fiobọhọ kẹ amọfa. Ọ rẹ sai fiobọhọ kẹ ọzae hayo aye oniọvo nọ ọ rrọ ukoko ho, te enọ e siọ iruo Uvie na ba no. Ọ rẹ sai wuhrẹ Ebaibol kugbe amọfa, je ru iruo odibọgba riẹ kẹre.—w18.09, ẹwẹ. 8-11.

Eme Ileleikristi a wo evaọ Ẹkpẹti Ekwakwa Ewuhrẹ rai?

Ekade jw.org gbe omobe uzizie. Emebe-evẹvẹ eree nọ a ruẹrẹhọ ziezi gbe emagazini Uwou-Eroro Na avọ Awake! Umutho ibroshọ jọ, ugogo ebe ivẹ nọ ma re ro wuhrẹ ahwo Ebaibol gbe ividio ene, yọ Fikieme Who re ro Wuhrẹ Ebaibol Na? o rrọ usu ividio nana.—w18.10, ẹwẹ. 16.

Wọhọ epanọ o rrọ Itẹ 23:23, ẹvẹ Oleleikristi ọ sae rọ “dẹ uzẹme”?

Ma rẹ rọ ugho dẹ uzẹme he. Rekọ o gwọlọ nọ ma re siobọno oke mai jẹ daoma kpobi re ma ruẹ nọ ma wo rie.—w18.11, ẹwẹ. 4.

Eme ma rẹ sai wuhrẹ no oghẹrẹ nọ Hosia o yerikugbe aye riẹ Goma ze?

Goma o bruẹnwae ẹsibuobu jẹ tubẹ nyasiọ Hosia ba, rekọ Hosia ọ dẹ riẹ zihe ze, rọvrẹ riẹ jẹ jọ kugbei. Nọ ọrivẹ-orọo Oleleikristi o te bruẹnwae, ọnọ abọ riẹ ọ fo na ọ sae rọvrẹ riẹ. Nọ ọ tẹ wariẹ lele ọnọ o bruẹnwae na wezẹ, Ikereakere na e gbẹ kẹe udu nọ ọ rẹ rọ fa orọo na ha.—w18.12, ẹwẹ. 13.