KỌ WHẸ yọ ohwo nọ o wo edẹro, nọ o re yere amọfa kẹ eware nọ a ru kẹ owhẹ? Onana yọ onọ nọ u fo nọ ohwo kpobi ọ rẹ nọ omariẹ. Ebaibol na ọ ta nọ evaọ oke mai na, ahwo buobu a te “kare uyere-ọghọ.” (2 Tim. 3:2) Ẹsejọhọ whọ riẹ ahwo jọ nọ a riẹ ọghọ họ, nọ a rẹ rehọ ọghọ nọ who ru kẹ ae wọhọ osa nọ whọ re rai nọ whọ be hwa zihe. O wọhọ nọ o rrọ ae oma nọ u du gwọlọ nọ a re yere ohwo kẹ oware nọ a ru kẹ ae he. Kọ who gbe muẹrohọ nọ o rẹ were ahwo ho re a mu usu kugbe oghẹrẹ ahwo otiọye na?

Rekọ Jihova ọ ta kẹ idibo riẹ nọ: “Wha hai dhesẹ nọ wha wo edẹro.” U fo nọ ma rẹ “kẹ uyere evaọ oware kpobi.” (Kọl. 3:15; 1 Tẹs. 5:18) Evaọ uzẹme, re ma wo ẹzi edẹro u re fiobọhọ kẹ omai gaga. U wo ẹjiroro sa-sa nọ o rọ rrọ ere.

Obọdẹ ẹjiroro jọ nọ ma rẹ rọ daoma yere ahwo nọ a ru oware kẹ omai họ, u re ru eva were omai. Eva e rẹ were ohwo nọ o dhesẹ edẹro gbe ọnọ o yere kẹ oware nọ o ru kẹe na. Ẹvẹ o rọ rrọ ere? Roro kpahe onana: Nọ ahwo a te ru ọghọ kẹ owhẹ, koyehọ a rri nọ whọ rrọ ghaghae. A bi roro kpahe owhẹ. Whọ tẹ kareghẹhọ onana, u re ru owhẹ rri omara nọ whọ ginẹ rrọ ghaghae. Ma sae ta nọ ere o jọ kẹ Rut. Boaz o ru ọghọ kẹ Rut. Avro ọ riẹ hẹ, o were Rut eva gaga inọ ohwo jọ ọ be daezọ riẹ.​—Rut 2:10-13.

O tubẹ mai wuzou re ma hai yere Ọghẹnẹ kẹ eware nọ o ru kẹ omai no. Ababọ avro, whọ be hai roro kpahe eware buobu nọ Jihova o bi ru, te eware nọ o bi wuhrẹ owhẹ evaọ Ebaibol na gbe eware nọ whọ be rọ ko omara. (Izie. 8:17, 18; Iruẹru 14:17) Ukpenọ whọ rẹ rọ omoke jọ ọvo roro kpahe eware iwoma nana, u ti woma re whọ hae rehọ oke ziezi roro didi kpahe eware buobu nọ Ọghẹnẹ ọ rọ ghale owhẹ avọ uviuwou ra no. Whọ tẹ be hai roro didi kpahe eware nọ Ọghẹnẹ o ru kẹ owhẹ no, onana u ti ru owhẹ dhesẹ edẹro kẹe ziezi je ru owhẹ vuhumu nọ o gine rri owhẹ ghaghae je you owhẹ ziezi.​—1 Jọn 4:9.

Orọnikọ eroro ọvo who re roro kpahe eware nọ Ọghẹnẹ o ru kẹ owhẹ no ho; hai yere Jihova. (Ol. 100:4, 5) Ahwo a rẹ ta nọ “oware jọ nọ u re ru ahwo-akpọ wereva họ, nọ a tẹ be hai dhesẹ edẹro evaọ uzuazọ.”

Oware ofa nọ edẹro u ro woma kẹ omai họ, u re ru usu mai kugbe amọfa kpekpe. Mai kpobi ma gwọlọ nọ ahwo a re yere omai kẹ oware ezi nọ ma ru. Whọ tẹ ginẹ rọ eva ra kpobi yere ohwo kẹ eware nọ o ru kẹ owhẹ, usu ra avọ ohwo na o rẹ kpekpe vi epaọ ọsosuọ. (Rom 16:3, 4) U te no ere no, ahwo nọ a re dhesẹ edẹro ae a rẹ mae gwọlọ fiobọhọ kẹ amọfa. A re muẹrohọ ewoma nọ a ru kẹ ae, a vẹ gwọlọ ru epọvo na kẹ amọfa re. Ẹhẹ, ma tẹ be hai fiobọhọ kẹ amọfa, ma re wo evawere. O nwane wọhọ epanọ Jesu ọ ta, inọ: “Ẹkẹ evawere e mae rrọ vi emio.”​—Iruẹru 20:35.

Ọzae jọ nọ a re se Robert Emmons evaọ University of California, nọ ọ rrọ usu ahwo nọ a ru ekiakiẹ jọ kpahe edẹro ọ ta nọ: “Re ma sai wo edẹro, o gwọlọ nọ ma rẹ kareghẹhọ nọ obọ-wozẹ-obọ oye obọ o rẹ rọ fo.” Uzẹme riẹ họ, re ma sae jọ uzuazọ, u wo eware sa-sa nọ o gwọlọ nọ amọfa a re ru kẹ omai. Wọhọ oriruo, ma rẹ dẹ eware  nọ a re ro there emu mi amọfa. Yọ ma tẹ be mọ, omọfa o re siwi omai evaọ obọ ẹsipito. (1 Kọr. 12:21) Ohwo nọ o wo edẹro o re yere amọfa ziezi kẹ eware nọ a ru kẹe. Nọ o rrọ ere na, kọ whọ be hai yere amọfa kẹ eware nọ a ru kẹ owhẹ?

Oware ofa nọ u re ru omai daoma dhesẹ edẹro họ, u re fiobọhọ kẹ omai tẹrovi abọ owoma uzuazọ viukpọ abọ oyoma. Ma sae ta nọ iroro mai na e wọhọ uvoro-igari. E sae kuvẹ eware jọ nọ e rẹ ruọ omai ẹvori, jẹ za eware efa dhe. Who te wo edẹro, ẹsiẹ whọ rẹ mai muẹrohọ emamọ eware nọ e rrọ akpọ na, onana u ve ru nọ whọ gbẹ rọ tẹrovi ebẹbẹ tere he. Epanọ who dhesẹ edẹro te, ere whọ te ruẹ abọ owoma uzuazọ te, onana u ve je ru owhẹ wo edẹro vi epaọ ọsosuọ. Whọ tẹ rrọ ohwo nọ o wo edẹro, onana u ti fiobọhọ kẹ owhẹ ru oware nọ Pọl ukọ na ọ ta inọ: “Hae ghọghọ ẹsikpobi evaọ Olori na.”​—Fil. 4:4.

Whọ te ruẹ nọ edẹro u ti fiobọhọ kẹ owhẹ nọ whọ gbẹ rọ tẹrovi abọ oyoma uzuazọ họ. Uzẹme riẹ họ, o rrọ bẹbẹ re ohwo nọ o bi dhesẹ edẹro ọ re ihri, jọ ọkora, hayo dha eva evaọ oke ovona. U te no ere no, o nwani lọhọ tere he re ohwo nọ o wo edẹro o kie lele ugho. Oware nọ o wo o rẹ dae ẹro, ọ rẹ dhogbo epanọ o re ro wo ekwakwa eyero-akpọ buobu hu.​—Fil. 4:12.

Whọ tẹ rrọ Oleleikristi, kareghẹhọ nọ Setan ọ te gwọlọ nọ whọ jọ ọkora ẹsikpobi fiki ẹgaga oke urere nana. Eva e te were iẹe gaga nọ whọ tẹ rrọ ohwo nọ ọ rẹ go je bruenu ẹsikpobi. Ohwo nọ o wo uruemu utioye na o re wo ẹnyaharo ho evaọ usi uwoma ota na. Uzẹme riẹ họ, uruemu edẹro avọ ẹzi Ọghẹnẹ e rẹ nya kugbe. Wọhọ oriruo, ma re wo oghọghọ fikinọ ma bi muẹrohọ emamọ eware nọ Ọghẹnẹ ọ kẹ omai no, ma ve je fi ẹrọwọ họ eware nọ ọ ya eyaa rai.​—Gal. 5:22, 23.

Whọ tẹ rrọ odibo Jihova, whọ te rọwo fihọ oware nọ ma ta kpahe edẹro evaọ uzoẹme nana. Ghele na, o rẹ sae jọ bẹbẹ re ma hai dhesẹ edẹro je yere ahwo nọ a ru oware ezi kẹ omai. Whọ jọ oyena u fi oyẹlẹ họ owhẹ oma ha. Whọ sai wo edẹro je dhesẹ iẹe ẹsikpobi. Ẹvẹ whọ sai ro ru onana? Fi oke họ kẹdẹ kẹdẹ nọ who re ro roro kpahe eware iwoma jọ nọ who wo evaọ uzuazọ. Whọ tẹ be hai ru ere, who ti wo edẹro. Who ti wo evawere vi ahwo nọ a rẹ tẹrovi ebẹbẹ akpọ. Roro kpahe eware iwoma nọ Ọghẹnẹ gbe amọfa a ru kẹ owhẹ nọ e be kẹ owhẹ evawere. Whọ sae tubẹ hai kere ai fihotọ dede. Kẹdẹ kẹdẹ, whọ sai kere eware ivẹ hayo esa nọ e kẹ owhẹ evawere.

Ahwo jọ nọ a wuhrẹ kpahe ẹme nana no a ta nọ “ma tẹ be hai dhesẹ edẹro ẹsikpobi, u re nwene oghẹrẹ nọ ẹvori mai o re ruiruo, u ve ru omai riẹ nọ ma rrọ ghaghae.” Ohwo nọ o re dhesẹ edẹro o re wo evawere ẹsikpobi. Fikiere, hai roro kpahe eware iwoma kpobi nọ who wo, tẹrovi abọ owoma uzuazọ ra, re whọ jẹ hai yere ahwo kẹ eware nọ a ru kẹ owhẹ. Ukpenọ who re rri emamọ eware nọ who wo vo, hai “yere Jihova, keme ọ rrọ wowoma.” Ẹhẹ, hae “kẹ uyere evaọ oware kpobi.”​—1 Irv. 16:34; 1 Tẹs. 5:18.