Ẹdhọ ọ ta kẹ Ivi hi inọ ọ tẹ re ubi-ure nọ Ọghẹnẹ ọ ta kẹe nọ ọ re he na, o te wọhọ ẹsenọ o whu no rekọ abọjọ oma riẹ (onọ ahwo jọ a re se ẹwẹ nọ o re whu hu) ọ te gbẹ jọ uzuazọ evaọ obojọ. Setan ọ rọ araomuomu ta kẹ Ivi nọ, ọ tẹ re ubi-ure na, ‘o ti whu vievie he.’ Ẹme nọ Setan ọ be ta na họ, Ivi ọ te rria ribri, uzuazọ rai u ve je woma ziezi ababọ Ọghẹnẹ nọ o re jie izi kẹ ae.​—Emu. 2:17; 3:3-5.

Nọ ma ruẹ nọ orọnikọ ọgbọ Idẹn ewuhrẹ ọthọthọ ọrọ ẹwẹ nọ o re whu hu o no ze he na, kọ oke vẹ a ro mu ei họ ewuhrẹ? Ma sae ta gbiae he. Ma riẹ nọ egagọ erue kpobi i notọ okenọ Owhe oke Noa o ku vrẹ no. Iwuhrẹ ethọthọ evuevo e gbẹ jariẹ hẹ keme Noa avọ uviuwou riẹ ọvo a zọ, yọ aikpobi a jọ egagọ uzẹme.

Fikiere, ewuhrẹ ẹwẹ nọ o re whu hu nọ ahwo a rọwo enẹna o muhọ nọ Owhe na o ku vrẹ no. Okenọ Ọghẹnẹ o fi ozighi họ evẹrẹ evaọ Bebẹl, ahwo a tẹ vaha “ruọ otọakpọ na soso,” yọ u muẹro nọ enẹ ewuhrẹ ẹwẹ nọ o re whu hu ọ rọ vaha ruọ eria sa-sa. (Emu. 11:8, 9) Oke kpobi nọ ewuhrẹ ọrue nana o ro muhọ kẹhẹ, o rẹ sai mu omai ẹro nọ Setan Ẹdhọ nọ ọ rrọ “ọsẹ ọrue” na ọye ọ wha ewuhrẹ na ze, yọ eva e be were iẹe inọ o vaha ruọ oria kpobi no.​—Jọn 8:44.