Kọ whọ sae kẹ iyo enọ nana nọ a rehọ no Uwou-Eroro 2019 ze na?

Eme eyaa Ọghẹnẹ nana i dhesẹ, inọ: “Ekuakua ẹmo ọvo nọ a gali vi owhai nọ i re wo iruo e [rrọ] họ”? (Aiz. 54:17)

O rẹ sai mu omai ẹro nọ Ọghẹnẹ ọ te thọ omai no eware ọraha wọhọ “ofou otu nọ ọ kare ohrọ na.” (Aiz. 25:4, 5) Ewegrẹ mai a te sai ru oware ovo nọ o te wha ọraha ebẹdẹ se omai hi.​—w19.01, ẹwẹ. 6-7.

Ẹvẹ oghẹrẹ nọ Ọghẹnẹ o ro yerikugbe ahwo Kenan gbe ahwo Izrẹl nọ a ghẹmeeyo u ro dhesẹ uvioziẹ?

Ọghẹnẹ o bruoziẹ ahwo nọ a je dhomahọ ọfariẹ-ogbe ọtọtọ gbe enọ i je kienyẹ eyae gbe emọ. Ọ ghale ahwo nọ a yoẹme kẹe, nọ i je yerikugbe amọfa ababọ okienyẹ.​—w19.02, ẹwẹ. 22-23.

Eme ma re ru otẹrọnọ ma rrọ oria nọ ohwo nọ ọ rrọ Osẹri Jihova ha ọ jọ gwọlọ su ahwo evaọ olẹ?

Ma sai fibo avọ adhẹẹ, rekọ ma re kuomagbe ai bo “ami” hi, yọ ma re kru amọfa obọ evaọ etoke olẹ na ha. Ma sae lẹ olẹ mai fihọ eva.​—w19.03, ẹwẹ. 31.

Fikieme emaha nọ a re lele wezẹ o rọ rrọ uzioraha ulogbo?

Ọmaha nọ a re lele wezẹ yọ uzioraha wọso ọmọ na, ukoko na, egọmeti, gbe Ọghẹnẹ. Nọ uzi egọmeti o tẹ ta nọ ohwo o te lele ọmaha wezẹ a rẹ niyẹrẹ kẹ egọmeti, ekpako ukoko a rẹ jowọ lele onana.​—w19.05, ẹwẹ. 9-10.

Ẹvẹ whọ sai ro nwene ẹzi nọ ọ be kpọ iroro ra?

Eware nọ i wuzou họ: Ta eva ra kẹ Jihova evaọ olẹ. Roro didi re whọ sae kiẹ omara riwi. Mu emamọ egbẹnyusu.​—w19.06, ẹwẹ. 11.

Eme ma re ru enẹna rọ ruẹrẹ oma kpahe kẹ ukpokpoma?

Ma re wo usu okpekpe kugbe Jihova. Jọ u mu owhẹ ẹro nọ o you omai, yọ ọ te siọ omai ba vievie he. Hai se Ebaibol na kẹdẹ kẹdẹ. Jọ u mu owhẹ ẹro nọ eghale Uvie na e te ginẹ ze. Daoma riẹ eria ikere jọ nọ e rẹ were owhẹ fihọ uzou, re who je wuhrẹ ile nọ who re ro jiri Jihova fihọ uzou.​—w19.07, ẹwẹ. 2-4.

Eme ma rẹ sai ru ro fiobọhọ kẹ imoni mai re a sae zọ?

O roja nọ ma re dhesẹ ọdawẹ, dhesẹ emamọ uruemu, wo odiri, jẹ ta eme nọ e rrọ wowou.​—w19.08, ẹwẹ. 15-17.

Ẹvẹ ma sai ro wo omosasọ wọhọ epanọ Jesu ọ ya eyaa riẹ evaọ Matiu 11:28?

Ma wo ekpako ukoko nọ i you omai, egbẹnyusu nọ e mai woma, gbe iruo nọ e mai woma.​—w19.09, ẹwẹ. 23.

Ẹvẹ Ọghẹnẹ ọ sai ro ru omai wo isiuru gbe ẹgba nọ ma re ro ru oreva riẹ? (Fil. 2:13)

Ma te bi se Ebaibol na je roro didi kpahe eware nọ ma se, Ọghẹnẹ ọ sai ru omai wo isiuru gbe ẹgba nọ ma re ro ru oreva riẹ. Ẹzi riẹ ọ sai fiobọhọ kẹ omai tua eriariẹ gbe onaa nọ ma wo.​—w19.10, ẹwẹ. 21.

Re whọ tẹ te jẹ iroro nọ i wuzou, oware areghẹ vẹ u fo nọ who re ru?

Eware isoi nọ who re ru họ: Romatotọ ru ekiakiẹ. Lẹ re Ọghẹnẹ ọ kẹ owhẹ areghẹ. Daoma riẹ oware nọ o be wọ owhẹ jiroro na. Tẹrovi ugogo edhere nọ who ti ro ru ẹjiroro ra gba. Riẹ nọ u wo umuo nọ ẹgba ra o te.​—w19.11, ẹwẹ. 27-29.

Kọ obọ ọgbọ Idẹn uwuhrẹ ẹwẹ nọ o re whu hu na u no ze, okenọ Setan ọ ta ẹme kẹ Ivi?

Ijo. Setan ọ ta kẹ Ivi nọ o ti whu hu, orọnikọ ọ ta kẹe nọ o te wọhọ ẹsenọ o whu no rekọ abọjọ oma riẹ ọ te gbẹ jọ uzuazọ evaọ obojọ họ. Ma riẹ nọ iwuhrẹ erue kpobi i notọ okenọ Owhe oke Noa o ku vrẹ no. U muẹro nọ ewuhrẹ ẹwẹ nọ o re whu hu na o muhọ no taure Ọghẹnẹ ọ tẹ te vaha ahwo nọ a jẹ bọ Bebẹl ruọ eria sa-sa.​—w19.12, ẹwẹ. 15.