Orọnikọ a be rọ ẹme nọ ọ rrọ Iziewariẹ 22:25-27 na bruoziẹ ọzae na ha, sọ ọ thuzi hayo ọ thọ họ. Keme o rrọ vevẹ nọ ọzae na ọ thuzi no. Oria Ebaibol nana o be ta kpahe oware nọ a gbẹ sai ro brukpe ọmọtẹ na ha, inọ ọ thuzi. Muẹrohọ eme nọ e wariẹ oria Ebaibol nana họ.

A jọ owọ avọ 23 gbe 24 ta kpahe ọzae nọ o lele ọmọtẹ nọ a sahotọ wezẹ “evaọ okpẹwho na.” Ọzae na ọ thuzi ẹnwae-obro keme a rri ọmọtẹ nọ a sahotọ wọhọ aye nọ o wo ọzae no. Kọ ọmọtẹ na omariẹ? “O bo ho evaọ okpẹwho na.” O hae jọnọ o bo, ahwo a hai ti yo, kẹsena a vẹ dhẹ ze te thọe. Rekọ o bo ho. Fikiere ọ thuzi ẹnwae-obro re, aimava a thuzi.​—Izie. 22:23, 24.

Kẹsena Uzi na o tẹ ta kpahe oware ofa nọ o rẹ sae via, inọ: “Rekọ otẹrọnọ obọ ẹwọ ọzae na ọ jọ nyaku ọmọtẹ nọ a sahotọ na nọ ọ jẹ ga obọ vi ei je lele iei wezẹ, ọzae nọ o lele i rie wezẹ na ọvo o re whu, wha re ru ọmọtẹ na oware ovo vievie he. Ọmọtẹ na ọ raha uzi ovo nọ a re ro kpei hi. Oware nana o wọhọ epanọ ohwo ọ rẹ họrọ mu ọrivẹ riẹ ọ vẹ fae kpe. Keme obọ ẹwọ ọ jọ nyaku ei, yọ ọmọtẹ nọ a sahotọ na o bo, rekọ ohwo ọvo ọ jariẹ nọ ọ rẹ thọe he.”​—Izie. 22:25-27.

Evaọ onana, ibruoziẹ na a rọwo oware nọ ọmọtẹ na ọ ta nọ o via na. Ẹvẹ o rọ rrọ ere? A rehọ e riẹ nọ ọmọtẹ na “o bo, rekọ ohwo ọvo ọ jariẹ nọ ọ rẹ thọe he.” Fikiere, ọ thuzi ẹnwae-obro ho. Rekọ ọzae na ọ thuzi ọgbaduo gbe ẹnwae-obro fikinọ ọ “ga obọ vi ei je lele” ọmọtẹ nọ a sahotọ na wezẹ.

Fikiere, dede nọ uzi nana o be ta kpahe oware nọ ọmọtẹ na ọ gbẹ rọ thuzi hi, oria Ebaibol nana o ta vevẹ re inọ ọzae na ọ thuzi ọgbaduo gbe ẹnwae-obro. O rẹ sai mu omai ẹro nọ ibruoziẹ na a te “romatotọ kiẹ otọ ẹme na,” a ve bru oziẹ nọ o rọwokugbe oreva Ọghẹnẹ, onọ ọ jọ Ikereakere na dhesẹ vevẹ unuẹse buobu.​—Izie. 13:14; 17:4; Ọny. 20:14.