Ijo. Oria ovuovo evaọ Ebaibol hayo ebe nọ a jọ gbiku anwae o ta ere vievie he.

Oghẹrẹ nọ efafa Ebaibol buobu a fa ẹme nana o be lẹliẹ ahwo jọ roro nọ evaọ oke Pọl, ahwo jọ a jẹ hae họ-ame rọkẹ ahwo nọ a whu no. Wọhọ oriruo Ebaibol Ẹri Na ọ fa oria yena nọ: “Ogbẹrọ erehe fiki eme a jẹ be họ ahwo ame fiki iwhuowhu?”

Rekọ, muẹrohọ ẹme nọ imava jọ nọ e rẹ kiẹ eme Ebaibol kokodo a ta. Dr. Gregory Lockwood ọ ta nọ re ahwo a roro nọ a jẹ hae họ ahwo nọ a rrọ uzuazọ ame “rọkẹ ahwo nọ a whu no,” yọ “oghẹrẹ ame-ọhọ nọ a rẹ sae ruẹ evaọ Ebaibol hayo ebe nọ i gbiku anwae vievie he.” Epọvo na re, Profẹsọ nọ a re se Gordon D. Fee o kere nọ: “Whọ rẹ jọ Ebaibol se ku ohwo ọvo nọ ọ họ-ame kẹ ohwo nọ o whu no ho, yọ whọ rẹ jọ ebe nọ i gbiku anwae se ku oware utioye gbe he. Whọ rẹ jọ abọ Ọvọ Ọkpokpọ Ebaibol na ruẹ oghẹrẹ ame-ọhọ otiọye na vievie he. Yọ, whọ rẹ jọ oria ovo ruẹ se he inọ Ileleikristi ọsosuọ na hayo ichọche nọ e jariẹ oke nọ ikọ na i whu no a jẹ hai ru oware utioye.”

Ebaibol ọ ta nọ ilele Jesu a re ‘wuhrẹ ahwo erẹwho kpobi, họ ae ame, je wuhrẹ ai re a ru eware kpobi nọ Jesu ọ vuẹ rai.’ (Mat. 28:19, 20) Re ohwo ọ tẹ te họ-ame je zihe ruọ olele Jesu, o re wuhrẹ kpahe Jihova avọ Ọmọ riẹ. Ọ rẹ rọwo eware nọ o wuhrẹ na, o ve je yoẹme kẹ Jihova avọ Jesu. Ohwo nọ o whu no nọ ọ rrọ uki ọ rẹ sai ru eware yena ha; yọ Oleleikristi nọ ọ rrọ uzuazọ ọ rẹ sai ru ai kẹ ohwo nọ o whu no gbe he.​—Ọtausi. 9:5, 10; Jọn 4:1; 1 Kọr. 1:14-16.

Kọ eme họ otọ ẹme Pọl nọ o kere se Ileleikristi obọ Kọrint na?

Evaọ oke yena, Ileleikristi jọ a jẹ ta nọ ẹkparomatha ọ rrọ họ. (1 Kọr. 15:12) Pọl ọ ta nọ iroro rai na e thọ gaga. Ọ ta nọ: “Kẹdẹ kẹdẹ mẹ be rẹriẹ ovao dhe uwhu.” Rekọ, dede nọ ọ jẹ rẹriẹ ovao dhe eware buobu nọ e rẹ sai si uwhu kpei, ọ riẹ nọ o te whu a te kpare iẹe kpobọ odhiwu. Ọ vẹ te jọ omama ẹzi nọ o wo ẹgba gaga, wọhọ epanọ o jọ kẹ Jesu.​—1 Kọr. 15:30-32, 42-44.

O gwọlọ nọ Ileleikristi obọ Kọrint a rẹ riẹ nọ Oleleikristi kpobi nọ a rọ ẹzi wholo ọ rẹ nyaku ebẹbẹ no ẹdẹ te ẹdẹ, kẹsena o ve ti whu taure a tẹ te kpare iẹe kpobọ odhiwu. Ohwo nọ ọ “họ-ame fihọ Kristi” yọ ọ “họ-ame fihọ uwhu riẹ” re. (Rom 6:3) Oyena u dhesẹ nọ a ti wo ebẹbẹ, a ve whu taure a tẹ te kpare ae kpobọ odhiwu wọhọ epanọ o jọ kẹ Jesu.

Nọ Jesu ọ họ-ame vrẹ ikpe ivẹ no, ọ ta kẹ ikọ ivẹ riẹ jọ nọ: “A te rehọ oghẹrẹ ame-ọhọ nọ a be rọ họ omẹ rọ họ owhai ame.” (Mak 10:38, 39) Orọnikọ oke nọ Jesu ọ jẹ ta ẹme nana yọ a be họe ame evaọ Ethẹ Jọdan he. Ẹme nọ ọ be ta na họ, fikinọ ọ gba riẹ mu nọ o re yoẹme kẹ Ọghẹnẹ a ti kpei. Pọl o kere nọ Ileleikristi nọ a rọ ẹzi wholo na a ti ‘lele Jesu ruẹ uye re a sai lele iei wo oruaro re.’ (Rom 8:16, 17; 2 Kọr. 4:17) Fikiere Ileleikristi nana a re whu taure a tẹ te kpare ae kpobọ odhiwu.

A fa ẹme Pọl na gbagba evaọ Efafa Akpọ Ọkpokpọ na, inọ: “O gbẹ rrọ ere he, didi erere o rrọ kẹ enọ e be họ-ame avọ ẹjiroro nọ a ti whu? Otẹrọnọ a te kpare enọ i whu no vievie he, emejabọ nọ a be rọ họ-ame fiki ẹjiroro yena?”