Kọ whọ romatotọ se Uwou-Eroro nọ a siobọno enukpe nana? Dai rri sọ whọ sae kẹ iyo enọ nọ e rrọ obotọ na:

Ẹvẹ u fo nọ ma re rri enọ a rọ ẹzi wholo na?

Ẹrọwọ nọ a wo ọ rẹ were omai, rekọ ma re rri rai kpehru ga hrọ họ. Ma rẹ yọroma re “iruemu” rai e gbẹ were omai vrẹta ha. (Jud 16, ẹme-obotọ) Yọ ma rẹ nọ ae enọ nọ e rẹ sae kẹ ae uye he kpahe ẹruore rai.​—w20.01, ẹwẹ. 29.

Ẹvẹ whọ rọ riẹ nọ Jihova o bi muẹrohọ owhẹ?

Ebaibol ọ ta nọ taure a te ti yẹ owhẹ, yọ Jihova ọ riẹ owhẹ no. Ọ be gaviezọ kẹ elẹ ra. Ọ riẹ oware nọ o rrọ owhẹ udu, yọ uruemu ra o rẹ sai ru eva were iẹe hayo ru eva dhae. (1 Irv. 28:9; Itẹ 27:11) Ọye o si owhẹ kẹle omariẹ.​—w20.02, ẹwẹ. 12.

Oke vẹ ma rẹ rọ ta ẹme, kọ oke vẹ ma re ro fibo?

Ma rẹ vuẹ amọfa kpahe Jihova. Ma rẹ ta ẹme nọ ma tẹ ruẹ nọ ohwo jọ o bi ti ru oware nọ o rẹ wha uye sei. Ekpako ukoko a rẹ kẹ ibe Ileleikristi rai ohrẹ, nọ o tẹ gwọlọ ere. Ma rẹ nọ inievo nọ e be rria ẹkwotọ nọ a jọ fi awhaha họ iruo Uvie na oghẹrẹ nọ a bi ru iruo rai hi. Yọ a tẹ nọ omai, ma rẹ ta gbe he. Ma rẹ ta ẹme nọ u fo nọ a rẹ kodhere he.​—w20.03, ẹwẹ. 20-21.

Ohẹriẹ vẹ o rrọ ebaka-ẹkpẹ nọ a fodẹ evaọ Joẹl uzou avọ 2 gbe enọ a fodẹ evaọ Eviavia uzou avọ 9?

Joẹl 2:20-29 o ta nọ Ọghẹnẹ o ti le ebaka-ẹkpẹ na vrẹ jẹ hwa osa eware nọ e raha. Nọ oyena o tẹ vrẹ no, Ọghẹnẹ o ve ti ku ẹzi riẹ ku ahwo riẹ. Egbaẹmo Babilọn nọ e vẹruọ Izrẹl, gbe eware nọ e via uwhremu na eye i ru eruẹaruẹ nana gba. Ebaka-ẹkpẹ nọ a fodẹ evaọ Eviavia 9:1-11 na i dikihẹ kẹ Ileleikristi nọ a rọ ẹzi wholo na, nọ e be rọ ajọwha whowho ẹdhoguo Ọghẹnẹ kpahe akpọ omuomu nana. Onana o be kẹ ahwo omuomu uye.​—w20.04, ẹwẹ. 3-6.

Ono họ ovie ẹkpẹlobọ ovatha-ọre nẹnẹ?

Russia avọ egọmeti nọ e be thae uke. A wọso idibo Ọghẹnẹ, a fi awhaha họ usi uwoma ota na, je bi mukpahe Isẹri Jihova. Ovie ẹkpẹlobọ ovatha-ọre na o bi lele ovie obọze ovatha-ọre muabọ anwọ ikpe jọ ze na.​—w20.05, ẹwẹ. 13.

Kọ eware izii nọ a jọ Ahwo Galesha 5:22, 23 fodẹ na ọvo họ “ubi ẹzi na”?

Ijo. Ẹzi ọfuafo na o re fiobọhọ kẹ omai wo emamọ iruemu efa wọhọ ẹrẹreokie. (Ẹf. 5:8, 9)​—w20.06, ẹwẹ. 17.

Ma te bi mu fi ifoto mai gbe evuẹ efa kpahe omamai họ itanẹte, ẹbẹbẹ vẹ ọ rẹ sai noi ze?

Eware nọ ma fihọ itanẹte e rẹ sae lẹliẹ amọfa rri omai inọ ma wo omaurokpotọ họ, rekinọ ma be ya-oma.​—w20.07, ẹwẹ. 6-7.

Eme Ileleikristi a rẹ sai wuhrẹ mi ikuori nọ e riẹ iruo rai?

A riẹ oke nọ a re ro kpohọ iyei-ikpe gbe oria nọ a rẹ jọ ruẹ kpe. A riẹ eware nọ a re ro kpe iyei gbe oghẹrẹ nọ a rẹ rọ rehọ ai kpe iyei. Yọ a re fi udu dhe iruo na nọ ovao ehru o tẹ maki nwene. Ma rẹ sae rọ aro kele ai evaọ usi uwoma ota mai.​—w20.09, ẹwẹ. 5.

Eware jọ vẹ ma rẹ sai ru ro fiobọhọ kẹ ohwo nọ ma bi wuhrẹ Ebaibol re o you Jihova ziezi?

Ma rẹ sae tuduhọ iẹe awọ re ọ hai se Ebaibol na kẹdẹ kẹdẹ je roro didi kpahe eware nọ o se. Ma rẹ sai je wuhrẹ iẹe epanọ ọ rẹ lẹ.​—w20.11, ẹwẹ. 4.

Nọ Pọl ọ ta nọ “ahwo kpobi a ti wo uzuazọ fiki Kristi,” amono a rrọ usu ahwo yena?​—1 Kọr. 15:22.

Orọnikọ Pọl ọ be ta nọ ohwo kpobi nọ o whu no a te kpare ze he. Ọ jẹ ta kpahe Ileleikristi nọ a rọ ẹzi wholo na, enọ “a ru fo no evaọ usu kugbe Kristi Jesu.” (1 Kọr. 1:2; 15:18)​—w20.12, ẹwẹ. 5-6.

Iruo vẹ Ileleikristi nọ ‘a ti nwene evaọ emaharo, okenọ ọgba urere na o ti do’ na a ti ru?​—1 Kọr. 15:51-53.

A ti kuomagbe Jesu rọ ọkpọ ayọno su erẹwho na. (Evia. 2:26, 27)​—w20.12, ẹwẹ. 12-13.