“AYE.” Ere Jesu ọ jẹ hai se eyae ẹsejọ nọ ọ tẹ gwọlọ ta ẹme kẹ ae. Wọhọ oriruo, okenọ ọ jẹ gwọlọ siwi aye jọ nọ ẹyao o ru zulẹ te ikpe 18 no, ọ ta nọ: “Aye, jọ ẹyao ra na o kpo.” (Luk 13:10-13) Jesu o tube se oni riẹ enẹ evaọ okenọ o je lele iei ta ẹme, yọ onana o jọ edhere owowou nọ a re ro se aye evaọ oke Ebaibol. (Jọn 2:4; 20:13) Dede na, u wo ẹme ọfa jọ nọ ọ tubẹ mae rrọ wowou vi ọnana.

Ahwo a rehọ ẹme jọ nọ ọ rrọ wowou gaga se eyae jọ nọ a lele ta ẹme nọ a gbiku rai fihọ Ebaibol na. Jesu o se aye jọ nọ o hwẹ azẹ te ikpe 12 no enẹ evaọ okenọ o je lele iei ta ẹme. Aye na o ru lele Uzi Ọghẹnẹ hẹ nọ ọ rọ nyabru Jesu, keme Uzi na o ta nọ ohwo nọ ọ rrọ uyero riẹ na ọ rrọ gbegbe. Ma rẹ sae ta nọ u fo nọ aye na ọ rẹ kẹnoma kẹ amọfa lelele fiki uyero riẹ na. (Izerẹ 15:19-27) Rekọ ọ gwọlọ nọ oma riẹ na u re kpo evaọ oghẹrẹ kpobi. Evaọ uzẹme, “ọ ruẹ uye gaga no evaọ obọ edọkita buobu, ọ tẹ jẹ raha igho riẹ kpobi no, yọ ẹyao na o je kpo ho, ukpoye, ẹsiẹe o jẹ ga.” —Mak 5:25, 26.

Aye na ọ tẹ lẹlẹ vivie udevie ogbotu na bẹsenọ o ro te emu Jesu, kẹsena o te dhobọte efọlefọ ewu ehru riẹ. Azẹ nọ o je hwẹ na ọ tẹ nwani serihọ! Aye na o je roro nọ o ti no etẹe ababọ ohwo ọvo nọ ọ te riẹ, rekọ Jesu ọ tẹ nọ inọ: “Ono ọ rọ obọ te omẹ?” (Luk 8:45-47) Aye na o te je nuhu gaga fiki ozọ, rekọ o te dhesẹ oma via je kigwẹ fihọ aro Jesu, kẹsena “ọ tẹ ta uzẹme na kpobi kẹe.”—Mak 5:33.

Re Jesu o ru udu te aye na otọ, ọ tẹ ta kẹe nọ: “Kru udu ga, ọmọtẹ!” (Mat. 9:22) Egba-uwuhrẹ Ebaibol jọ e ta nọ eme Hibru gbe Griki nọ a fa “ọmọtẹ” na yọ oghẹrẹ eme nọ e rẹ sai dhesẹ “ẹwo gbe ọdawẹ.” Jesu o te gbe ru udu kie aye na vi nọ ọ vuẹe nọ: “Ẹrọwọ ra o siwi owhẹ no. Nya kpo tou, jọ ẹyao na ọ gbẹ lahiẹ owhẹ ofa ha.”—Mak 5:34.

“Ọmọtẹ.” Enẹ ọvona Boaz, ohwo Izrẹl nọ ọ jọ ọdafe na o se Rut, aye Moab na. Aye nana o wo ẹjiroro nọ ọ rẹ rọ ruawa re, keme udhu ọzae jọ nọ ọ riẹ hẹ ọ jẹ jọ si-isogẹ. Boaz ọ ta kẹe nọ: “Gaviezọ kẹ omẹ, ọmọtẹ mẹ.” Kẹsena ọ tẹ ta kẹ Rut nọ jọ ọ hae nyaze udhu riẹ na ti si-isogẹ. Rut o te kigwẹ vovao tuotọ evaọ aro Boaz jẹ nọe oware nọ o ro dhesẹ aruoriwo otiọye kẹ ọyomariẹ nọ ọ rrọ ọrara. Boaz ọ rọ eme uduotahawọ efa kẹ Rut uyo inọ: “Epanọ who ru kẹ oniọrọ ra [Naomi aye-uku na] . . . a ta rae kẹ omẹ, [ajọ] ỌNOWO na ọ hwosa kẹ owhẹ fiki iruo no who ru na!”—Rut 2:8-12.

Emamọ oriruo Jesu avọ Boaz a fihotọ kẹ ekpako ukoko na! Ẹsejọ, ekpako ivẹ a rẹ sai weze bru oniọvo-ọmọtẹ nọ ọ gwọlọ obufihọ gbe ọbọga no Ẹme Ọghẹnẹ ze. Nọ ekpako na a tẹ yare Jihova kẹ ọkpọvio, jẹ romatotọ gaviezọ kẹ oniọvo-ọmọtẹ na no, a te sae kẹ oniọvo-ọmọtẹ na uduotahawọ gbe ọbọga nọ o re no Ẹme Ọghẹnẹ ze.—Rom 15:4.