EVAỌ oke ahwo nọ a gbiku rai fihọ Ebaibol na, orieyero yọ ohwo nọ ọ rẹ rẹrote uviuwou hayo eyero olori riẹ. Ẹsejọ, a rẹ rehọ ẹme Hibru gbe Griki nọ a fa “orieyero” na dhesẹ ọsẹro hayo ọnọ ọ rẹ rẹrote uviuwou omọfa.

Okenọ Josẹf ọmọzae Jekọp ọ jọ ọrigbo evaọ obọ Ijipti, o zihe ruọ orieyero ọrọ uwou olori riẹ. Olori riẹ o tube “fi eware kpobi nọ o wo họ obọ Josẹf.” (Emu. 39:2-6) Uwhremu na, nọ Josẹf o zihe ruọ osu evaọ Ijipti no, ọ rọ orieyero mu nọ ọ rẹ rẹrote uwou riẹ.​—Emu. 44:4.

Evaọ okenọ Jesu ọ jọ otọakpọ, ẹsibuobu ahwo nọ a wo etọ a rẹ rria ikpewho nọ i thabọ no oria nọ etọ ekakọ rai e rrọ. Fikiere a rẹ rehọ irieyero mu nọ e rẹ rẹrote iruiruo evaọ ekwotọ nọ ekakọ rai e rrọ na.

Ono a re ro mu orieyero? Ohwo Rom ikpe-udhusoi ọsosuọ jọ nọ o re kere ebe nọ a re se Columella ọ ta nọ ọrigbo nọ a re ro mu ọsẹro hayo orieyero ọ rẹ jọ “ohwo nọ a vuhumu nọ o re ru iruo ziezi.” Ọ rẹ jọ ohwo nọ o wo emamọ uruemu, “nọ ọ rẹ ruẹ nọ iruiruo olori riẹ a ru iruo nọ a kẹ rai gba, yọ o re dhuaro kẹ ae he.” Ọ ta re nọ: “Uruemu nọ o mai wuzou nọ orieyero o re wo họ, o re dhesẹ nọ ọ riẹ vi omariẹ hẹ yọ ọ rẹ jọ ohwo nọ ọ rẹ gwọlọ wuhrẹ eware ekpokpọ.”

A jọ Ebaibol na rọ iruo orieyero hayo odibo dhesẹ eware jọ nọ o gwọlọ nọ Ileleikristi a re ru evaọ ukoko na. Wọhọ oriruo, Pita ukọ na ọ tuduhọ Ileleikristi awọ inọ jọ a rọ onaa nọ Ọghẹnẹ ọ kẹ rai “gbodibo kẹ ohwohwo wọhọ emamọ idibo nọ Ọghẹnẹ o dhesẹ uwowou ulogbo riẹ kẹ.”​—1 Pita 4:10.

Jesu omariẹ ọ rọ orieyero kẹ oriruo evaọ ọtadhesẹ riẹ nọ ọ rrọ obe Luk 16:1-8. Ofariẹ, evaọ eruẹaruẹ nọ Jesu ọ jọ ta kpahe oka nọ u ti dhesẹ nọ o muhọ esuo no, ọ kẹ ilele riẹ imuẹro kpahe “ọrigbo nọ a re fievahọ nọ o wo areghẹ,” hayo “orieyero nọ a re fievahọ” nọ o ti ro mu. Ugogo iruo orieyero nana họ, ọ te rọ ẹme Ọghẹnẹ kuọ ilele Jesu evaọ edẹ urere na ẹruoke. (Mat. 24:45-47; Luk 12:42) Eva e be were omai gaga nọ ma rọ rrọ usu ahwo nọ a bi wo erere no eware nana nọ orieyero nọ a re fievahọ na ọ be rọ kuọ omai ze evaọ akpọ na soso.