Ma rẹ zẹ ebe hayo ividio sa-sa nọ ma re ro wuhrẹ ahwo Ebaibol na ha, fikiere ahwo buobu a re roro nọ o thọ họ re a rehọ eware nana fihọ oria evuẹ itanẹte ofa jọ kpobi. Rekọ ere oruo o wọso Uzi Kpahe Eroruiruo Evuẹ Na, * yọ o rẹ sae wha ebẹbẹ ilogbo ze. Uzi na o ta nọ: “Who fi iwoho, ebe, eka (Trademarks), ile, ividio, gbe eware efa nọ e rrọ oria itanẹte nana họ eria itanẹte efa ha (oria itanẹte ọfa kpobi, onọ a rẹ jọ vi evuẹ, ividio, hayo eria itanẹte nọ a rẹ jọ vi uwou se ohwohwo).” Fikieme awhaha nana o ro wuzou?

Eware nọ e rrọ oria evuẹ mai na kpobi i wo udu-ekere hayo uzi nọ o gba rai. Ahwo nọ a kie no ukoko na no gbe amọfa nọ a rẹ wọso omai, a rẹ gwọlọ fi eware mai họ oria evuẹ itanẹte rai re a sae bẹbẹ Isẹri Jihova gbe amọfa tobọ. Yọ eware nọ e rrọ oria evuẹ rai na, a ru rai evaọ oghẹrẹ nọ e rẹ kọ ubi avro fihọ udu amọfa. (Ol. 26:4; Itẹ 22:5) Otujọ ọ rehọ eware no ebe mai ze no hayo rehọ oka jw.org mai whowho eware nọ a be zẹ no, hayo ru eware efa evaọ ekwakwa itanẹte rai no. Nọ o rọnọ ebe gbe eware mai i wo udu-ekere gbe uzi nọ o gba rai na, ma wo udu nọ ma rẹ rọ whaha ahwo nọ a tẹ be rehọ ai ruiruo thọthọ. (Itẹ 27:12) Ma re keke aro fihọ kẹ amọfa, makọ ibe Ileleikristi mai uvẹ hẹ re a fi eware mai họ oria evuẹ itanẹte efa hayo rọ oka jw.org zẹ eware rai. Keme ma te ru ere, okọto o te gbẹ thọ omai hi nọ ma tẹ be whaha ahwo nọ a be wọso omai hayo otu nọ ọ be rọ eware mai thueki.

 Ma tẹ be hae jọ oria evuẹ efa danlodu eware ukoko na viukpọ jw.org mai, o rẹ wha okpẹtu ze. “Ọrigbo nọ a re fievahọ nọ o wo areghẹ na” ọvo Jihova ọ kẹ owha-iruo nọ ọ rẹ rọ rehọ emu iwuhrẹ riẹ ko omai. (Mat. 24:45) Yọ oria evuẹ esa ọvo “ọrigbo” nana ọ be rọ ko omai, eye họ www.pr418.com, tv.pr418.com, gbe wol.pr418.com. Ofariẹ JW Language^®, JW Library^®, gbe JW Library Sign Language^® ọvo ọrigbo na o ru nọ ma rẹ sae rehọ fihọ ifonu hayo etablẹte mai. Ma rẹ sai fievahọ oria evuẹ nana kpobi inọ i wo oware ovo kugbe ekiọthuọ hayo iruẹru akpọ Setan he. Ma tẹ be hai kpohọ oria evuẹ efa nyae rehọ emu iwuhrẹ Ọghẹnẹ, ma rẹ sai wo imuẹro ho inọ eware na e gbẹ rrọ ọkọkọ wọhọ epanọ ọrigbo na ọ ruẹrẹ e rai fihọ.​—Ol. 18:26; 19:8.

U te no ere no, ma te fi eware mai họ oria evuẹ nọ amọfa a rẹ sae jọ kpahe ẹme, o rẹ kẹ ahwo nọ a kie no ukoko na no gbe amọfa nọ a mukpahe omai uvẹ nọ a rẹ rọ ta eme iyoma kpahe ukoko Jihova. Oware utiona u ru nọ inievo jọ a ro lele ahwo otiọna ta ẹme no evaọ itanẹte, jẹ wha ekela se odẹ Jihova no. Orọnikọ itanẹte họ oria nọ u fo nọ ohwo ọ rẹ jọ “rọ ẹwolẹ wuhrẹ enọ e be rọwo iwuhrẹ na ha” ha. (2 Tim. 2:​23-25; 1 Tim. 6:​3-5) Ma muẹrohọ no re inọ u wo oria evuẹ itanẹte gbe oria ẹmeọta itanẹte nọ a rọ odẹ ukoko na, Utu Ẹruorote Na, gbe inievo nọ e rrọ Utu Ẹruorote Na se. Rekọ ma gwọlọ jọ ohwo kpobi riẹ nọ oniọvo ọvuọvo evaọ Utu Ẹruorote Na o wo oria evuẹ obọriẹ evaọ itanẹte he, yọ o re kpohọ oria ẹmeọta-kugbe itanẹte gbe he.

Ma tẹ be hai dhesẹ jw.org mai na kẹ ahwo, u re fiobọhọ whowho “usi uwoma” na. (Mat. 24:14) Ekwakwa itanẹte nọ ukoko Jihova o ruẹrẹhọ nọ ma be rọ ta usiuwoma na, a bi dhe ai eruoruo epanọ i re ro woma vi ere. Ma gwọlọ nọ ohwo kpobi o wo erere no ai ze. Fikiere, wọhọ epanọ Izi Eroruiruo Oria Evuẹ Na o ta, whọ rẹ sae rọ ekọmputa hayo e-mail vi obe, ividio, hayo adrẹse nọ o rẹ wọ ohwo kpohọ jw.org se omọfa. Ma tẹ be hae vuẹ ahwo re a kpohọ oria evuẹ jw.org mai na, yọ ma be kpọ ae bru “ọrigbo nọ a re fievahọ nọ o wo areghẹ na,” ọnọ Ọghẹnẹ ọ be rọ kẹ omai emu iwuhrẹ riẹ nẹnẹ.