A rẹ sae fa ẹme Hibru nọ a ro mu oria ikere nana họ evaọ oghẹrẹ nọ u re ro kiekpahe itu ahwo ivẹ na. Fikiere u wo ẹjiroro esa nọ ma rọ fa oria nana evaọ Ebaibol 2013 na oghẹrẹ nọ ọ rrọ na.

1. Ma fa riẹ rọwokugbe oghẹrẹ nọ eme Hibru e rrọ gbe epanọ a rẹ rọ whẹ ae gbe. Otofa ẹme Hibru nọ a re se asher nọ ọ jọ ẹme ọsosuọ evaọ owọ avọ 12 na, u re dhesẹ oghẹrẹ nọ eme nọ e rrọ Olezi 144:12-15 e rọ jẹhọ eme nọ a kere i rai lele. Asher o wo otofa sa-sa. Wọhọ oriruo, a rẹ sae fae “ọnọ” hayo “enọ.” Evaọ Ebaibol anwae na, ma fa riẹ “enọ.” Onana u ru nọ eware iwoma nọ a fodẹ evaọ owọ avọ 12 rite 14 i ro kiekpahe irumuomu nọ a kake ta kpahe evaọ awọ ikere nọ oria nana u lele. Rekọ asher ọ rẹ sai je wo otofa ọ oware hayo iyẹrẹ nọ i re no oware ofa ze, fikiere ma sae jẹ fae “oyena,” “fiki oye,” hayo “kẹsena.” Evaọ Ebaibol 2013 na, ma fa ẹme na “kẹsena.” Yọ epọvo na a fa ẹme na re evaọ Ebaibol efa.

2. Oghẹrẹ nọ ma fa ẹme oria ikere yena evaọ Ebaibol 2013 na, o rọwokugbe eme olezi yena nọ i kiọkọ. “Kẹsena” nọ ma fa ẹme na evaọ owọ avọ 12 na, u dhesẹ nọ ahwo okiẹrẹe ae a ti wo eghale nọ a fodẹ evaọ owọ avọ 12 rite 14 na, enọ e be lẹ nọ jọ Ọghẹnẹ o “siwi” ai no obọ ahwo omuomu (owọ avọ 11). Enwene nana ọ rọwokugbe eme nọ e rrọ owọ avọ 15 wowoma, oria nọ a jọ ta isiava soso inọ, “jọ eva e were” ahwo okiẹrẹe. Fikiere, ahwo ọvona a ti wo evawere na, koyehọ “ahwo nọ Jihova ọ rrọ Ọghẹnẹ rai!” Ofariẹ, oria ikere nana u wo uvumọ oka ha nọ u dhesẹ nọ omọfa jọ ọ be ta ẹme. Nọ o rrọ ere na, o gwọlọ nọ efefafa a re roro kpahe oghẹrẹ nọ eme ole Hibru e rẹ jọ, eme nọ e wariẹ oria ikere nana họ, gbe eria ikere efa nọ e ta ọkpọ ẹme ọvona, re a sae fa oria nana gbagba.

3. Eme nọ a rọ fa oria nana evaọ Ebaibol 2013 na, e rọwokugbe oria ikere efa nọ e ta kpahe eghale nọ Ọghẹnẹ ọ ruẹrẹhọ kẹ idibo riẹ. Oghẹrẹ nọ ma fa asher obọnana, u dhesẹ obọdẹ ẹruore nọ Devidi o wo via, inọ okenọ Ọghẹnẹ o te siwi ahwo Izrẹl no obọ ewegrẹ rai no, o ti ru ai wo evawere gbe ẹvi. (Izerẹ 26:9, 10; Izie. 7:13; Ol. 128:​1-6) Wọhọ oriruo, Iziewariẹ 28:4 o ta nọ: “Ibi oma rai i re ti wo oghale gbe ibi otọ rai, gbe ibi erao rai, ẹvi ithuru rai, gbe emọ owa erao rai.” Evaọ okenọ Solomọn ọmọ Devidi ọ jọ ovie Juda, ahwo na a gine wo udhedhẹ gbe ẹvi. Ofariẹ, abọjọ esuo Solomọn na o riobọ kpohọ esuo Mesaya na.​—1 Iv. 4:20, 21; Ol. 72:1-20.

Ẹme na họ, enwene nọ ma ru evaọ eme Olezi 144 na u nwene otoriẹ nọ ma wo kpahe Ebaibol na ha. Ukpoye, u ru nọ oma olezi na soso o rọ rọwokugbe obọdẹ ẹruore nọ idibo Ọghẹnẹ a wo notọ avọ otọ ze, inọ okenọ Ọghẹnẹ ọ tẹ raha irumuomu no, o ti ru ikiẹrẹe na wo udhedhẹ gbe ẹvi bẹdẹ bẹdẹ.​—Ol. 37:​10, 11.