IKUIGBE UZUAZỌ
“Enẹna Usi Uwoma Ota na O be Were Omẹ Oma!”
ẸWHO nọ a re se Balclutha ma rria notọ ze, onọ o rrọ South Island obọ New Zealand. Nọ mẹ jọ ọmaha, mẹ kẹle Jihova gaga, yọ ukoko riẹ o jẹ were omẹ. Iwuhrẹ e jẹ hae were omẹ ẹnya gaga, yọ ẹsikpobi nọ mẹ rrọ kugbe inievo na, eva ọvo e rẹ were omẹ. Dede nọ oma o rẹ dina vuọ omẹ, usi uwoma ota o jẹ hae were omẹ yọ mẹ jẹ hae nya koka koka. Makọ obọ isukulu dede, mẹ rẹ ta usi uwoma kẹ emọ isukulu mai gbe amọfa. Eva e jẹ were omẹ gaga inọ mẹ yọ Osẹri Jihova, kẹsena nọ mẹ jọ ikpe ikpegbọvo, mẹ tẹ roma mudhe kẹ Ọghẹnẹ.
EGAGỌ JIHOVA E GBẸ JẸ WERE OMẸ HẸ
Nọ mẹ jọ oware wọhọ ikpe ikpegbesa, usu nọ me wo kugbe Jihova vẹre na o gbẹ ga tere he. U yoma kẹhẹ! Oke yena, o jọ omẹ oma nọ emọ isukulu mai a be reakpọ kuoma, bi yeri uzuazọ rai epanọ u je rai gbe nọ emamọ eware buobu e be vrẹ omẹ. O tẹ wọhọ nọ izi Ọghẹnẹ gbe izi nọ ọsẹgboni mẹ a bi fihọ i keke hrọ. Re a gọ Jihova o tẹ jọ omẹ oma wọhọ uye nọ mẹ be rọ bẹ omamẹ. Mẹ riẹ nọ Jihova ọ rrọ, rekọ usu mẹ avọ iẹe o gbẹ kpekpe te epaọ ọsosuọ họ.
Mẹ siọ usi uwoma ba amara ọvuọvo ho, rekọ ẹmẹsejọ ọvo mẹ rẹ nya. Mẹ jẹ hae ruẹrẹ oma kpahe he, fikiere o jẹ bẹ omẹ gaga re mẹ ta usi uwoma ruọ ahwo oma. O tẹ whae ze nọ me gbe ro wo izihebro hayo emọ-uwuhrẹ Ebaibol ho. Onana o tẹ jẹ lẹliẹ usi uwoma na vẹso omẹ vi epaọ ọsosuọ. Ẹsejọ mẹ rẹ nọ omamẹ nọ, ‘Ẹvẹ ohwo o re ru iruo itiena koka koka, kamara kamara?’
Nọ mẹ jọ ikpe ikpegbihrẹ, mẹ tẹ gwọlọ nọ mẹ rẹ gbẹ jọ otọ ọsẹgboni mẹ hẹ. Fikiere, mẹ tẹ kwa no uwou, me te kpobọ Australia. O kẹ ọsẹgboni mẹ uye gaga inọ mẹ kwa no
uwou. Dede nọ o were rai hi, a je roro nọ me ti gbe kpohọ ewuhrẹ avọ usi uwoma evaọ obonọ mẹ be nya na.Nọ me te obọ Australia, eware i te je yoma ga. Me gbe je kpohọ ewuhrẹ tere he. Me te mu usu kugbe izoge efa nọ e wọhọ omẹ evaọ ukoko na. Ma re kpohọ ewuhrẹ ẹmẹsejọ, ma vẹ jẹ hai kpohọ epati evaọ aso, nọ ma rẹ jọ da idi je gbe ile. Me te roro kpahe oghẹrẹ uzuazọ nọ me je yeri evaọ oke yena, mẹ rẹ ruẹ nọ owọ mẹ jọ o jọ ukoko na, owọ odekọ o tẹ jọ obọ akpọ. Me fi oma họ ofẹ ovuovo ho.
ME WUHRẸ OBỌDẸ OWARE JỌ NỌ ME RẸRO RIẸ HẸ
Nọ oware wọhọ ikpe ivẹ e vrẹ no, oniọvo-ọmọtẹ jọ o ru nọ mẹ rọ ruẹ nọ oghẹrẹ uzuazọ nọ me bi yeri na u woma ha. Mẹ avọ inievo-emetẹ isoi nọ e re rọo ho ma jẹ rria uwou ovo. Nọ ma yo nọ ọsẹro okogho mai avọ aye riẹ a be te nyaze ukoko mai, ma tẹ ta nọ jọ a wohọ uwou mai evaọ oka yena. Nọ ọsẹro okogho na o te bi ru eware ukoko na yọ aye riẹ Tamara ọ rrọ kugbe omai inievo-emetẹ nọ e rrọ uwou na. O re lele omai gbiku yọ ma be hwẹ ọvo. Onana o were omẹ gaga. O wo omaurokpotọ kẹhẹ, ọ rrọ ohwo nọ ma rẹ sae ta eva kẹ. U gbe omẹ unu gaga inọ ohwo nọ o kruga te enẹ evaọ ukoko na ọ rẹ sae sasa oma enẹ.
Tamara o wo ajọwha gaga. Oghẹrẹ nọ usi uwoma ota na avọ ukoko na o be rọ were iẹe oma, a re gbiku riẹ hẹ. Ọ be daoma riẹ kpobi evaọ egagọ Jihova, yọ eva e be were iẹe. Rekọ eva e be were omẹ hẹ fikinọ mẹ be gọ Jihova eheho. Oghẹrẹ uzuazọ nọ o bi yeri gbe evawere nọ ọ be rọ gọ Ọghẹnẹ u duobọte omẹ gaga. Uruemu riẹ o lẹliẹ omẹ kareghẹhọ obọdẹ ẹme jọ nọ ọ rrọ Ebaibol, inọ Jihova ọ gwọlọ nọ mai kpobi ma gọe avọ “evawere” gbe “ubo oghọghọ.”—Ol. 100:2.
USI UWOMA O WARIẸ MU OMẸ HỌ ẸWERE
Mẹ gwọlọ nọ me re wo evawere evaọ egagọ Jihova wọhọ Tamara. Re o sae via ere, me re nwene oghẹrẹ nọ me bi yeri uzuazọ mẹ. Onana o via asohẹrioke he, rekọ ẹmẹrera na eware i te muhọ enwene. Mẹ rẹ ruẹrẹ oma kpahe kẹ usi uwoma, je ru ọkobaro obufihọ no oke te oke. Onana u si ozọ usi uwoma ota no
omẹ ẹro. Fikinọ me bi rovie Ebaibol na hai se kẹ ahwo vi epaọ anwẹdẹ, usi uwoma ota na u te mu omẹ họ ẹwere. Nọ omoke jọ o vrẹ no, me te mu ọkobaro obufihọ họ eru kamara kamara.Me mu usu kugbe inievo ukoko na te emaha te ekpako nọ i kruga ziezi, nọ e be wereva evaọ egagọ Jihova. Oghẹrẹ uzuazọ nọ a bi yeri u fiobọhọ kẹ omẹ ruẹ nọ egagọ Jihova mẹ rẹ rọ karo. Me te mu Ebaibol họ ese kẹdẹ kẹdẹ. Me te ti wo ọwhọ usi uwoma ota ziezi te epanọ me ro mu ọkobaro oke-kpobi họ. Eva i te mu omẹ họ ẹwere gaga evaọ egagọ Jihova. U kri no nọ mẹ wereva enẹ.
MẸ RUẸ ỌRIVẸ NỌ MA RE GBE KPOHỌ USI UWOMA ẸSIKPOBI
Nọ ẹgbukpe ọ vrẹ no, mẹ tẹ ruẹ oniọvo jọ nọ a re se Alex nọ ọ rrọ wowou gaga. O you Jihova, yọ o wo ajọwha usi uwoma ota re. Ọ jọ odibo oruiruo, ọ tẹ jẹ rrọ ọkobaro oke-kpobi te ikpe ezeza no. U te no ere no, Alex ọ kwa kpobọ Malawi oke jọ nyae ta usi uwoma evaọ oria nọ iwhowho-uvie e rrọ tere he. Oke nọ ọ jọ obei, ọ jẹ kọ họ inievo nọ e jọ imishọnare gaga. Yọ oghẹrẹ uzuazọ nọ inievo yena a je yeri o lẹliẹ e riẹ gbaemu nọ iruo Uvie na ọ rẹ rọ karo.
Evaọ 2003, mẹ avọ Alex ma tẹ ruọ orọo. Ma tẹ ruabọhọ iruo odibọgba oke-kpobi na anwọ oke yena ze. Ma wuhrẹ obọdẹ eware buobu no evaọ iruo na, yọ Jihova ọ be ghale omai evaọ kabọ kabọ.
EGHALE EFA NỌ MA WO
Ma rrọ usi uwoma evaọ ẹwho nọ a re se Gleno, obọ Timor-Leste
Evaọ 2009, a te vi omai kpohọ iruo imishọnare evaọ obọ Timor-Leste, orẹwho jọ nọ o kẹle Indonesia nọ ikoliko e vọ. Ma rẹro riẹ vievie he. Eva e jẹ were omai rekọ ozọ o dina jọ omai ẹro. Nọ emerae isoi e vrẹ no, ma te te Dili nọ o rrọ okpẹwho-esuo orẹwho na.
Obonẹ nọ ma nyaze na u wo ohẹriẹ gaga no obonọ ma no ze. Oghẹrẹ nọ a bi yeri uzuazọ u wo ohẹriẹ, te ẹvẹrẹ rai, emu rai gbe eware efa. Ma tẹ rrọ usi uwoma, ma rẹ ruẹ ahwo buobu nọ ọbẹwẹ ọ rrọ oma, enọ i kpohọ isukulu tere *
he, gbe enọ e be reoja. Ma jẹ ruẹ ahwo buobu nọ ẹmo gbe ozighi nọ a rọ ẹro ruẹ o raha uzuazọ rai kuotọ.Usi uwoma na o were wo umuo ho! Ẹdẹ jọ mẹ nyaku ọmọtẹ jọ nọ ọ rrọ ikpe ikpegbesa, nọ a re se Maria. * Maria ọ jẹ wereva vievie he. Oni riẹ o whu imikpe jọ nọ e vrẹ, yọ ọ rẹ kake ruẹ ọsẹ riẹ hẹ. Maria o rri omariẹ nọ ọ riẹ oware nọ ọ ziọ akpọ ti ru hu, yọ ere o rrọ kẹ ehwa riẹ buobu. Mẹ kareghẹhọ ẹdẹ jọ nọ ọ jẹ vuẹ omẹ epanọ eware e rrọ kẹe, yọ ọ be viẹ. Rekọ mẹ riẹ ẹme nọ ọ jẹ ta kẹ omẹ na ha keme oke yena me ri yo ẹwho rai ziezi hi. Mẹ tẹ lẹ se Jihova re o fiobọhọ kẹ omẹ riẹ oghẹrẹ nọ mẹ sae rọ tuduhọ iẹe awọ. Kẹsena me te mu eria Ebaibol nọ e rẹ sasa iẹe oma họ ese kẹe. Ẹmẹrera na, oware nọ Maria ọ be jọ Ebaibol wuhrẹ o tẹ lẹliẹe mu eva họ ẹwere. Uzuazọ riẹ kpobi u te ti nwene. Uwhremu na ọ tẹ họ-ame. Yọ enẹna o bi wuhrẹ Ebaibol kugbe amọfa re. Obọnana, inievo ukoko na kpobi a zihe ruọ ahwo uviuwou riẹ no. O gbe bi rri omariẹ inọ o wo ohwo ho ho.
Iruo usi uwoma ota na e be nyaharo ziezi evaọ Timor-Leste. Jihova ọ be ginẹ ghale inievo na. Dede nọ o re vrẹ ikpe ikpe nọ ibuobu rai i ro kurẹriẹ ziọ ukoko na ha, inievo buobu e rrọ ekobaro, idibo iruiruo, hayo ekpako ukoko. Efa i bi ru iruo evaọ eria nọ a be jọ fa ebe ukoko na fihọ evẹrẹ rai. Eva e rẹ were omẹ gaga nọ me te bi yo urru inievo nana nọ e be so ile evaọ ewuhrẹ, nọ mẹ tẹ ruẹ eva nọ e be were ae, gbe epanọ usu rai avọ Ọghẹnẹ u bi dhe ẹgẹga.
Mẹ avọ Alex ọzae mẹ gbe inievo efa ma bi kpohọ oria nọ ukoko o rrọ họ re ma nyae ghale ebe-uzizie Ekareghẹhọ
UZUAZỌ O RẸ WERE VI ENẸ HẸ
Akpọ ọ lọhọ tere he evaọ Timor-Leste. Ọ wọhọ obọ Australia nọ ma no ze he. Ghele na, uzuazọ o rẹ were vi enẹ hẹ. Ẹsejọ ma rẹ ruọ ebọso ọsese nọ ahwo a vọ, te ahwo nọ a wọ imiyei eyaya, ẹbe gbe ibi-ire buobu nọ a jọ obọ eki dẹ. U wo ahwo jọ nọ ma re wuhrẹ Ebaibol kugbe evaọ uwou nọ ọ rrọ kekeke yọ ọdha ọ be dha omai. A ralọ otọ uwou na ha yọ erifẹ e be jariẹ nya kpenẹ avọ enẹ. Ghelọ ebẹbẹ nana kpobi, mẹ rẹ jọ udu mẹ ta ẹsikpobi nọ, ‘Eme ọ were te enẹ!’
Ma bi kpohọ usi uwoma
Nọ me te roro te oke nọ mẹ gbẹ maha, eva e rẹ were omẹ inọ ọsẹgboni mẹ a wuhrẹ omẹ izi Jihova. A nyasiọ omẹ ba ha makọ oke nọ mẹ jọ uzoge nọ me je se egagọ Jihova gboja ha. Ẹme nọ ọ rrọ Itẹ 22:6 u rugba evaọ oma mẹ. Eva e be were ọsẹgboni mẹ gaga inọ mẹ avọ ọzae mẹ ma be rọ egagọ Jihova karo. Anwọ 2016 ze, ma rrọ iruo ọsẹro okogho evaọ ẹkwotọ nọ uwou ogha Australasia o be rẹrote.
Me bi dhesẹ ividio Caleb avọ Julia kẹ emọ obọ Timor-Leste yọ eva e be were ae
U re gbe omẹ unu gaga inọ oke jọ nọ u kpemu, me je rri usi uwoma ota wọhọ uye. Enẹna usi uwoma ota na o be were omẹ oma! Obọnana mẹ ruẹ nọ oghẹrẹ kpobi nọ uzuazọ o rrọ kẹhẹ, eva e rẹ were omai ziezi nọ ma tẹ be rọ eva mai kpobi gọ Ọghẹnẹ. Re a ta uzẹme, anwọ ikpe ikpegberee nọ mẹ avọ Alex ọzae mẹ ma rọ rrọ orọo na, eva e be were omẹ gaga vi epaọ anwẹdẹ kpobi keme ma be rọ eva mai kpobi ru iruo Jihova. Me vuhumu no nọ ẹme nọ Devidi ọso-ilezi na ọ ta kẹ Jihova na ginọ uzẹme, inọ: “Ahwo kpobi nọ a dhẹ bru owhẹ ze wọhọ oria adhẹzọ a te ghọghọ; a ti bo ubo oghọghọ ẹsikpobi. . . . Yọ ahwo nọ a you odẹ ra a te ghọghọ fiki ra.”—Ol. 5:11.
Eva e rẹ were omai kẹhẹ nọ ma te bi wuhrẹ Ebaibol kugbe oghẹrẹ ahwo otiọna!
^ edhe-ẹme 21 No ukpe 1975 vrẹ, ahwo Timor-Leste a fi ẹmo ikpe udhe soso re a sai wo isuẹsu obọrai.
^ edhe-ẹme 22 Ma nwene odẹ na.