EMỌ-UWUHRẸ Ebaibol a wọhọ ahwo nọ a be gwọlọ igoru. O gwọlọ nọ emọ-uwuhrẹ itieye a rẹ daoma gaga jẹ ruabọhọ kiẹ Ikereakere na re a sai duku areghẹ. Nọ o rrọ ere na, eme ma rẹ sai wuhrẹ nọ ma be te ta kpahe idhere esa jọ nọ a rẹ rọ gwọlọ igoru na?

Ma rehọ iẹe nọ whọ rrọ akotọ ethẹ jọ be nya evaọ oke uvo, whọ tẹ ruẹ oware jọ wọhọ ubiutho nọ u bi lo. Nọ who ruwẹ je rri rie, eva e tẹ were owhẹ gaga nọ whọ ruẹ nọ kpakọ igoru! O kawo te ubi eziẹ, yọ o ghare vi edaemọno ọghaghae. Ababọ avro, who re rri wariẹ sọ whọ te ruẹ efa.

Epọvo na re, o sae jọnọ okejọ nọ u kpemu Osẹri Jihova o kporo ẹthẹ ra jẹ ta usiuwoma kẹ owhẹ kpahe ẹruore nọ ọ rrọ Ebaibol na, yọ ẹdẹ yena ọ re thọrọ owhẹ ẹro ho. Ẹsejọhọ whọ kareghẹhọ okenọ whọ rọ kake riẹ obọdẹ oware jọ evaọ Ebaibol na, onọ o jọ wọhọ ubi igoru kẹ owhẹ. O sae jọ okenọ whọ rọ kake ruẹ Jihova, odẹ Ọghẹnẹ evaọ Ebaibol na. (Ol. 83:18, NW) O sae jẹ jọ okenọ who wuhrẹ nọ whọ rẹ sae jọ ogbẹnyusu Ọghẹnẹ. (Jem. 2:23) Okioke yena whọ tẹ riẹ nọ who duku oware nọ u woma vi igoru no. Yọ ẹsejọhọ oma o tẹ jẹ kpakpa owhẹ re who gbe wuhrẹ kpahe eware eghaghae efa nọ e rrọ Ebaibol na.

Ẹsejọ ame ọ rẹ kpọ siọ ehẹhẹ igoru ba eria jọ evaọ iko gbe ithẹ sa-sa. Evaọ ezi jọ ọvo, egba igoru egwọlọ a sae jọ eria itienana ruẹ igoru buobu, enọ unuigho rai u re bu te enaera ima-odu buobu.

O sae jọnọ oke ọsosuọ nọ who ro mu Ebaibol na họ ewuhrẹ kugbe Isẹri Jihova, o jọ owhẹ oma wọhọ ohwo nọ o duku igoru buobu. Ẹsejọhọ owọ ikere sa-sa nọ whọ jẹ hai roro didi kpahe u je fiba eriariẹ ra, yọ onana u te ru nọ who ro mu ẹrọwọ họ ewo. Nọ who je roro didi kpahe obọdẹ iwuhrẹ Ebaibol yena, whọ tẹ te riẹ epanọ whọ sai ro si kẹle Jihova. Kẹsena whọ tẹ ruabọhọ bi ru eware nọ e rẹ were Ọghẹnẹ, je wo ẹruore uzuazọ ebẹdẹ bẹdẹ.—Jem. 4:8; Jud 20, 21.

Wọhọ epanọ ohwo ọ rẹ romatotọ kiẹ gwọlọ igoru na, o sae jọnọ epọvo na whọ be romatotọ kiẹ iwuhrẹ eghaghae nọ e rrọ Ebaibol na. Nọ who wuhrẹ  igogo iwuhrẹ nọ e rrọ Ebaibol na no, ẹsejọhọ oma o tẹ wọ owhẹ jowọ nọ whọ rọ roma mudhe jẹ họ-ame.—Mat. 28:19, 20.

Ohwo nọ ọ rẹ gwọlọ igoru ọ sae jọ oghẹrẹ itho jọ ruẹ ehẹhẹ igoru. Igoru nọ e rẹ jọ itho itieye jọ u re ru nọ a re ro kporo itho na fihotọ jẹ whọlọ ae re igoru na e sai tobọ. Rekọ whọ tẹ kaki rri itho itieye, whọ rẹ nwane ruẹ igoru na ha. Fikieme? Keme ẹsejọ enọ e rẹ jọ utho nọ e rẹ mai wo igoru dede, i re tulo ho. O make rrọ ere na, rọkẹ ohwo nọ ọ rẹ gwọlọ igoru, imigoru itieye i te oware nọ a rẹ rọ fiki rai kporo utho na soso fihotọ.

Epọvo na re, nọ ohwo ọ tẹ riẹ kpahe “iwuhrẹ esese Kristi no,” o rẹ gbẹ gwọlọ nọ ọ daoma wuhrẹ haro. (Hib. 6:1, 2) Oke kpobi nọ who te bi ru uwuhrẹ omobọ ra, o gwọlọ nọ whọ daoma wuhrẹ igogo eware kpokpọ nọ whọ rẹ sai fihọ iruo evaọ uzuazọ. Eme whọ rẹ sai ru re whọ gbẹ hai wo erere no uwuhrẹ Ebaibol omobọ ra ze, o tẹ make rọnọ anwọ ikpe buobu ze who bi ro wuhrẹ Ebaibol na?

Gbẹ hai wo ajọwha kẹ uwuhrẹ. Muẹrohọ otọ kẹ eware nọ e nwani dhesẹ oma via ha evaọ oria Ebaibol nọ who bi se. Gbẹ hae daoma fihọ uwuhrẹ ra, who ti duku iwuhrẹ eghaghae nọ e rrọ Ebaibol na, enọ i dhesẹ ithubro gbe areghẹ Ọghẹnẹ via. (Rom 11:33) Hae rọ ebe ẹvẹrẹ ra ru ekiakiẹ, u ti ru owhẹ wo eriariẹ Ebaibol ziezi. Romatotọ kiẹ gwọlọ ekpakpọ Jihova gbe iyo rọkẹ enọ Ebaibol nọ who wo. Nọ amọfa kpahe oria ikere gbe izoẹme nọ a ruẹ nọ i re fiobọhọ jẹ kẹ ọbọga. Hae ta kẹ amọfa kpahe emamọ eware nọ who duku evaọ etoke uwuhrẹ omobọ ra.

Uzẹme o rrọ, orọnikọ who bi ru onana re who fiba eriariẹ nọ who wo no ọvo ho. Pọl ukọ na ọ vẹvẹ omai unu nọ “eriariẹ i re ru ohwo fu uke.” (1 Kọr. 8:1) Fikiere, hae daoma dhesẹ omaurokpotọ je kruga ziezi evaọ orọwọ na. Egagọ uviuwou gbe uwuhrẹ omobọ ra nọ who re ru ẹsikpobi u ti fiobọhọ kẹ owhẹ ru lele izi ikiẹrẹe Jihova, je ru nọ whọ te hai ro fiobọhọ kẹ amọfa. Maero na, who ti wo evawere keme who duku oware nọ u woma vi igoru.—Itẹ 3:13, 14.