1. Eme mai kpobi ma gwọlọ kẹ imoni mai?

ONIỌVO-ỌMỌTẸ jọ nọ a re se Pauline * ọ ta nọ: “Nọ mẹ nwani kurẹriẹ no, mẹ tẹ gwọlọ nọ mẹ avọ ahwo uviuwou mẹ kpobi ma rẹ gbẹ jọ Aparadase. O jọ omẹ oja gaga inọ ọzae mẹ Wayne gbe ọmọzae mai a rẹ jọ idibo Jihova.” Kọ u wo imoni hayo ahwo uviuwou ra jọ nọ e be gọ Jihova ha? Ẹsejọhọ epanọ o jọ Pauline oma na ere o rrọ owhẹ oma re.

2. Enọ vẹ ma te ta kpahe evaọ uzoẹme nana?

² Ma rẹ sae gba imoni mai họ họ re a jẹ uzẹme na rehọ, rekọ ma sae tuduhọ ae awọ re a gaviezọ kẹ ovuẹ Ebaibol na. (2 Tim. 3:14, 15) Fikieme ma rẹ rọ ta usi uwoma kẹ imoni mai? Fikieme ma re ro dhesẹ ororokẹ? Eme ma rẹ sai ru ro fiobọhọ kẹ imoni mai re a kuomagbe omai gọ Jihova? Kọ ẹvẹ inievo ukoko na soso a sai ro fiobọhọ?

3. Wọhọ epanọ o rrọ 2 Pita 3:9, fikieme ma rẹ rọ ta usi uwoma kẹ imoni mai?

³ Kẹle na, Jihova ọ te rọ uyero-akpọ nana te oba. Ahwo nọ “a wo emamọ eva” ọvo a te zọ. (Iruẹru 13:48) Ma be rehọ oke gbe ẹgba mai ta usi uwoma kẹ ahwo nọ ma riẹ hẹ, fikiere ma rẹ jẹ daoma ta usi uwoma na kẹ imoni mai, re ae omarai a kuomagbe omai gọ Jihova. Jihova, Ọsẹ oyoyou mai na “ọ gwọlọ nọ a raha ohwo ọvo ho rekọ ọ gwọlọ nọ  ahwo kpobi a wo uvẹ nọ a re ro kurẹriẹ.”​—Se 2 Pita 3:9.

4. Nọ ma tẹ be ta usi uwoma kẹ imoni mai, eme ma re ru ẹsejọ nọ u fo ho?

⁴ U fo nọ ma rẹ kareghẹhọ inọ u wo emamọ edhere nọ a rẹ rọ ta usi uwoma nọ o rẹ kẹ uzuazọ na, u te je wo edhere ọfa nọ a sae rọ tae nọ u fo ho. Dede nọ ma rẹ ma ẹme mai te ziezi nọ ma tẹ be ta usi uwoma kẹ ohwo nọ ma riẹ hẹ, ẹsejọhọ ma ti duwu eme họ nọ ma te bi lele imoni mai ta ẹme.

5. Eme ma rẹ kareghẹhọ taure ma tẹ te ta usi uwoma kẹ imoni mai?

⁵ Mai otujọ ma tẹ kareghẹhọ oghẹrẹ nọ ma rọ ta usi uwoma kẹ imoni mai evaọ okenọ u kpemu, ẹsejọhọ ma te ta nọ dodokọ ma ta ẹme na oghẹrẹ ofa. Pọl ukọ na ọ kẹ Ileleikristi ohrẹ, inọ: “Jọ eme rai e hae jọ wowou ẹsikpobi, wọhọ ẹsenọ a fi uwhei họ ae, re wha riẹ epanọ wha rẹ rọ kẹ ohwo kpobi uyo.” (Kọl. 4:5, 6) U fo nọ ma rẹ kareghẹhọ ohrẹ nana nọ ma te bi lele imoni mai ta ẹme. O gbẹ rrọ ere he, eva e vẹ te dha ae ukpenọ a rẹ gaviezọ kẹ omai.

6-7. Kẹ oriruo nọ u dhesẹ nọ u wuzou re ma dhesẹ ọdawẹ kẹ ọzae hayo aye mai nọ ọ rrọ ukoko ho.

⁶ Dhesẹ ọdawẹ. Pauline nọ ma ta ẹme kpahe ẹsiẹ na ọ ta nọ: “Evaọ oke ọsosuọ, eware nọ i kiekpahe Ebaibol ọvo mẹ jẹ hae gwọlọ lele ọzae mẹ ta kpahe. Ma jẹ hae ta kpahe eware efa ha.” Whaọ Wayne ọzae Pauline ọ riẹ kpahe Ebaibol tere he yọ o je wo otoriẹ oware nọ aye riẹ ọ jẹ ta ha. O jariẹ oma nọ egagọ riẹ ọvo aye riẹ o je roro kpahe. Ọ jẹ ruawa inọ aye riẹ o kuomagbe ekpehre utu jọ nọ u bi su ei thọ.

 ⁷ Pauline ọ ginẹ rọwo nọ inievo na ọ jẹ hae mae jọ kugbe evaọ owọwọ buobu gbe urere oka na, koyehọ nọ o te kpohọ ewuhrẹ, usi uwoma, gbe eware ẹkeriotọ sa-sa. Ọ ta nọ: “Ẹsejọ nọ ọzae mẹ o te te uwou, uwou na o rẹ jariẹ oma goli keme ohwo ọvo ọ riẹ hẹ.” O jẹ kẹ Wayne uye inọ ọ be ruẹ aye avọ ọmọzae riẹ tere he, yọ ere o rẹ ginẹ jọ ohwo oma. Ọ riẹ ahwo nọ aye avọ ọmọ riẹ a be hae jọ kugbe na ha, yọ o jariẹ oma nọ egbẹnyusu ekpokpọ aye riẹ na e were riẹ vi ọyomariẹ. O kẹ Wayne uye te epanọ ọ rọ ta nọ ọ gwọlọ fa orọo na. Kọ whọ gbẹ jọ iku nana ruẹ eware sa-sa nọ Pauline ọ hai ru ro dhesẹ ọdawẹ?

8. Wọhọ epanọ o rrọ 1 Pita 3:1, 2, eme ọ rẹ mai duobọte imoni mai ẹsibuobu?

⁸ Dhesẹ emamọ uruemu. Ẹsibuobu, oware nọ ma ru o rẹ mai duobọte imoni mai vi ẹme nọ ma ta. (Se 1 Pita 3:1, 2.) Sista Pauline o vuhu oyena mu uwhremu na. Ọ ta nọ: “Mẹ riẹ nọ Wayne o you omai yọ ọ gwọlọ ginẹ fa orọo na ha. Rekọ ẹme nọ ọ ta na u ru omẹ vuhumu nọ u fo re me mu oware nọ Jihova ọ gwọlọ mi aye uwou-orọo họ eru. Ukpenọ mẹ rẹ ta eme buobu, o gwọlọ nọ me re dhesẹ emamọ uruemu.” Pauline ọ gbẹ jẹ gba ọzae riẹ họ ta ẹme kpahe Ebaibol ho, o te mu ẹme họ ẹta kẹe kpahe eware efa. Wayne ọ tẹ te ruẹ nọ aye riẹ o gbe bi ru eva dhae tere he, ọmọzae rai o te je bi yoẹme kẹe ziezi. (Itẹ 31:18, 27, 28) Nọ Wayne ọ ruẹ oghẹrẹ nọ ehrẹ Ebaibol i bi ro fiobọhọ kẹ aye avọ ọmọzae riẹ, ọ tẹ gwọlọ nọ o re wuhrẹ Ebaibol na.​—1 Kọr. 7:12-14, 16.

9. Fikieme ma rẹ rọ ruabọhọ obọ nọ ma re fihọ kẹ imoni mai?

 ⁹ Jọ obọ nọ who re fihọ kẹ imoni ra o bẹ owhẹ no ho. Jihova o fi oriruo hotọ kẹ omai. Ọ “ruabọhọ” be kẹ ahwo uvẹ nọ a rẹ rọ gaviezọ kẹ usi uwoma na re a wo uzuazọ. (Jeri. 44:4) Pọl ukọ na ọ tẹ jẹ ta kẹ Timoti nọ ọ ruabọhọ obọ nọ o bi fihọ kẹ ahwo. Fikieme? Keme o te ru ere, o ti siwi omariẹ gbe enọ e gaviezọ kẹe. (1 Tim. 4:16) Ma you imoni mai, fikiere ma gwọlọ nọ a rẹ riẹ uzẹme nọ o rrọ Ebaibol na. Nọ oke jọ o vrẹ no, uruemu Pauline gbe ẹme riẹ o te ru nọ ọzae riẹ ọ rọ jẹ uzẹme na rehọ. Enẹna ọzae riẹ o kuomagbei be gọ Jihova yọ onana o kẹ riẹ evawere gaga. Aimava ekobaro, Wayne ọ tẹ jẹ rrọ ọkpako ukoko.

10. Fikieme ma re ro wo odiri?

¹⁰ Wo odiri. Ma te nwene uruemu mai je bi lele ithubro nọ Ọghẹnẹ ọ be kẹ omai, o rẹ sae jọ bẹbẹ kẹ imoni mai re a wo otoriẹ oware nọ ma bi ro ru inwene nana. Ẹsibuobu, oware ọsosuọ nọ a re muẹrohọ họ, ma gbe bi kuomagbe ai ru ehaa egagọ rai hayo dhomahọ eware isuẹsu hu. Evaọ oke ọsosuọ, eva mai e rẹ sae dha imoni mai jọ. (Mat. 10:35, 36) Rekọ, jọ obọ nọ ma re fihọ kẹ ae o bẹ omai no ho. Otẹrọnọ ma gbẹ be ta eware nọ ma rọwo kẹ ae he, kiyọ ma guẹdhọ rai no inọ a fo kẹ uzuazọ ebẹdẹ bẹdẹ hẹ. Jihova ọ kẹ omai udu nọ ma re ro guẹdhọ ohwo ọvo ho, Jesu ọ kẹ iruo yena. (Jọn 5:22) Ma te wo odiri, ẹsejọhọ imoni mai a te gaviezọ kẹ ovuẹ mai.​—Rri ẹkpẹti na, “Rọ Oria Itanẹte Mai Wuhrẹ Imoni Ra.”

11-13. Eme who wuhrẹ mi Alice evaọ oghẹrẹ nọ o ro yerikugbe ọsẹgboni riẹ?

¹¹ Jọ wowou, rekọ who siobọno eware nọ whọ rọwo ho. (Itẹ 15:2) Joma ta kpahe oriruo Alice. Okenọ o ro wuhrẹ kpahe Jihova yọ ọ be rria oria nọ u thabọ no obonọ ọsẹgboni riẹ a rrọ. Ọsẹgboni riẹ a rọwo nọ Ọghẹnẹ ọ rrọ họ, yọ a duomahọ esuo-ohrowo gaga. Alice ọ tẹ ruẹ nọ ọ rẹ vuẹ ae kpahe emamọ eware nọ o bi wuhrẹ ababọ oke oraha. Ọ ta nọ: “Whọ tẹ raha oke hrọ taure whọ tẹ te vuẹ ahwo uviuwou ra kpahe eware ekpokpọ nọ whọ rọwo, ẹsiẹe o te mae kẹ ae uye.” Ọ tẹ jẹ hai kere ileta se ọsẹgboni riẹ, be nọ ae oghẹrẹ nọ a rri eware jọ nọ Ebaibol o wuhrẹ. Ọ jẹ hae nọ ae kpahe eware nọ ọ riẹ nọ e te sae were ae, wọhọ uyoyou. (1 Kọr. 13:1-13) Ọ jẹ hai yere ọsẹgboni riẹ kẹ oghẹrẹ nọ a rọ yọrọ iẹe jẹ rẹrotei, yọ ọ jẹ hae dẹ eware vi se ai. O te kpohọ obonọ ọsẹgboni riẹ a rrọ, ọ jẹ hai fiobọhọ kẹ oni riẹ gaga evaọ iruo uwou. Evaọ oke ọsosuọ, eva e were ọsẹgboni riẹ hẹ nọ ọ ta kẹ ae kpahe eware nọ ọ rọwo enẹna.

¹² Nọ Alice ọ tẹ rrọ kugbe ọsẹgboni riẹ, ọ rẹ kuvẹ hẹ re oware jọ o whaha iẹe isase Ebaibol ikẹdẹ kẹdẹ riẹ. Alice ọ ta nọ: “Onana u ru nọ oni mẹ ọ rọ riẹ oghẹrẹ nọ isase Ebaibol o rrọ omẹ oja te.” Kẹsena ọsẹ Alice ọ tẹ jiroro nọ o re se Ebaibol na re ọ riẹ oware nọ u nwene ọmọtẹ riẹ na, re ọ sae vuẹe oware nọ o rẹ sai ru ei kpairoro vrẹ Ebaibol na. Alice ọ ta nọ: “Mẹ kẹ riẹ Ebaibol, avọ eme nọ me kere fihọ eva riẹ kẹe.” Eme o no rie ze? Ọsẹ Alice ọ ruẹ oware ovo nọ o thọ evaọ Ebaibol na ha, ukpoye oware nọ o se u duobọtei.

¹³ U fo nọ ma rẹ ta eme nọ e rrọ wowou rekọ ma re siobọno eware nọ ma rọwo ho, a tẹ make kẹ omai uye. (1 Kọr. 4:12b) Wọhọ oriruo, oni Alice o kpokpo i rie gaga. Ọ ta nọ: “Okenọ mẹ họ-ame, oni mẹ o se omẹ ‘ekpehre ọmọ.’” Eme Alice  o ru? Ọ ta nọ: “Ukpenọ me fibo, mẹ rọ unu kpotọ ta kẹe nọ mẹ gba riẹ mu no inọ mẹ rẹ jọ Osẹri Jihova, yọ me ti nwene iroro ho. Mẹ daoma ru ei vẹ kẹ oni mẹ inọ me you rie gaga. Mai imava ma tẹ jẹ viẹ, uwhremu na me te there emamọ emu jọ kẹe. No umuo oke yena vrẹ, oni mẹ o te bi muẹrohọ nọ Ebaibol na o bi fiobọhọ kẹ omẹ jọ emamọ ohwo.”

14. Fikieme ma gbẹ rọ kuvẹ re imoni mai a ru omai nwene iroro ho?

¹⁴ O sae rehọ oke taure imoni mai a te ti wo otoriẹ epanọ o rrọ omai oja te re ma gọ Jihova. Wọhọ oriruo, nọ Alice ọ jiroro nọ ọ rẹ jọ ọkobaro viukpọ isukulu ikpehru nọ ọsẹgboni riẹ a gwọlọ nọ ọ rẹ nya, oni riẹ o te je muhọ ẹviẹ. Rekọ Alice o nwene iroro ho. Ọ ta nọ: “Who te nwene iroro evaọ abọ jọ, ẹsejọhọ ahwo uviuwou ra a te jẹ gwọlọ epanọ a re ro ru owhẹ nwene iroro evaọ eware efa. Rekọ ẹme ra ọ tẹ rọ wowou rekiyọ who bi siobọno eware nọ whọ rọwo ho, ejọ evaọ usu rai a sae gaviezọ kẹ owhẹ.” Ere o jọ kẹ Alice. Ọsẹgboni riẹ a rrọ ekobaro enẹna, ọsẹ riẹ ọ tẹ jẹ rrọ ọkpako ukoko.

15. Wọhọ epanọ o rrọ Matiu 5:14-16 gbe 1 Pita 2:12, ẹvẹ “iruo iwoma” amọfa e sai ro fiobọhọ kẹ imoni mai?

¹⁵ Jihova ọ be rọ “iruo iwoma” idibo riẹ si ahwo ziọ ukoko na re a nyaze te gọe. (Se Matiu 5:14-16; 1 Pita 2:12.) Otẹrọnọ ọzae hayo aye ra ọ rrọ Osẹri Jihova ha, kọ ọ riẹ inievo jọ evaọ ukoko ra? Pauline nọ ma ta ẹme kpahe ẹsiẹ na, o zizie inievo ukoko na ziọ uwou riẹ re ọzae  riẹ Wayne ọ sae riẹ ae. Wayne ọ kareghẹhọ oniọvo-ọmọzae jọ nọ o fiobọhọ kẹe rọ emamọ ubiẹro rri Isẹri Jihova. Ọ ta nọ: “O mi uvẹ evaọ obọ iruo re ọ sai kuomagbe omẹ rri arozaha ebọro-efa. Mẹ tẹ ta kẹ omamẹ nọ, ‘Oware ovo o thọ kugbe ohwo nana ha!’”

16. Fikieme ma re ro zizie imoni mai ziọ iwuhrẹ?

¹⁶ Obọdẹ edhere jọ nọ ma sai ro fiobọhọ kẹ imoni mai họ, ma re zizie ai ziọ iwuhrẹ ukoko mai. (1 Kọr. 14:24, 25) Ewuhrẹ ọsosuọ nọ Wayne ọ nya họ Ekareghẹhọ uwhu Jesu, keme owọwọ nọ iruo i kuhọ no a ru rie yọ o raha oke tere he. Ọ ta nọ: “Mẹ nwani wo otoriẹ ẹme nọ a ta ha, rekọ mẹ kareghẹhọ uruemu ahwo nọ a jọ etẹe. A nyabru omẹ ze, dede omẹ rehọ jẹ suọ omẹ obọ avọ evawere. Mẹ ruẹ vevẹ nọ ahwo na emamọ ahwo.” U wo ọzae-avọ-aye jọ evaọ ukoko na nọ a be hai fiobọhọ kẹ Pauline gaga, a re lele iei rẹrote ọmọ riẹ nọ a tẹ rrọ ewuhrẹ gbe usi uwoma. Fikiere nọ Wayne ọ jiroro uwhremu na nọ ọ gwọlọ gbẹ riẹ kpahe egagọ Pauline, ọ tẹ ta kẹ oniọvo-ọmọzae nọ avọ aye riẹ a re fiobọhọ kẹ Pauline na re o wuhrẹ Ebaibol kugbei.

17. Eme ma rẹ fuọ omamai kẹ hẹ, kọ fikieme obọ nọ ma bi fihọ kẹ imoni mai o gbẹ rọ bẹ omai no ho?

¹⁷ Ma bi rẹro nọ imoni mai kpobi a ti kuomagbe omai gọ Jihova. Rekọ, ẹsejọhọ imoni mai jọ a te rọwo gọ Jihova ha ghelọ omodawọ mai kpobi kẹhẹ. O tẹ via ere, ma re du fuọ omamai hi. Ma rẹ sae gba ohwo họ họ re ọ rọwo eware nọ ma rọwo. O make rrọ ere na, whọ tẹ be rọ evawere gọ Jihova, onana o sai duobọte imoni ra. Hae lẹ roro ai. Hae ma ẹme ra te nọ who te bi lele ai ta ẹme. Whọ jọ o bẹ owhẹ vievie he! (Iruẹru 20:20) Jọ u mu owhẹ ero nọ Jihova ọ te ghale owhẹ, whọ te ruẹ erere omodawọ ra. Yọ imoni ra a tẹ rọwo gaviezọ kẹ owhẹ, a ti wo esiwo!