1. Ọghọ ologbo vẹ ma wo?

ỌGHỌ riẹ ọ rro kẹhẹ nọ ma rọ rrọ ukoko Jihova! Ma wo udhedhẹ gbe evawere evaọ ukoko na. Kọ iruo vẹ who wo evaọ ukoko na?

2. Didi oriruo Pọl ọ kẹ evaọ ileta sa-sa nọ ẹzi Ọghẹnẹ ọ wọ riẹ kere?

² Evaọ ileta sa-sa nọ ẹzi Ọghẹnẹ ọ wọ Pọl kere, ọ kẹ oriruo jọ nọ ma rẹ sai wuhrẹ eware buobu no ze kpahe iruo nọ ma wo evaọ ukoko na. Pọl ọ jọ ileta nana ta nọ ukoko na o wọhọ ugboma ohwo-akpọ. Ọ tẹ jẹ ta nọ ahwo nọ a rrọ ukoko na a wọhọ ekwakwa sa-sa nọ e rrọ ugboma na.​—Rom 12:4-8; 1 Kọr. 12:12-27; Ẹf. 4:16.

3. Eware esa vẹ ma te jọ uzoẹme nana ta kpahe?

³ Ma te jọ uzoẹme nana ta kpahe eware esa jọ nọ i wuzou gaga nọ ma rẹ sai wuhrẹ no oriruo nọ Pọl ọ kẹ na ze. Orọ ọsosuọ, ma te ruẹ nọ ohwo kpobi o wo iruo * evaọ ukoko Jihova. Orọ avọ ivẹ, ma te ta kpahe oware nọ ma rẹ sai ru nọ ma te bi rri omamai nọ ma wo iruo evaọ ukoko na ha. Orọ avọ esa, ma te ta kpahe oware nọ u ro fo re ma rọ ajọwha ru iruo nọ i te omai evaọ ukoko na.

4. Eme obe Ahwo Rom 12:4, 5 u wuhrẹ omai?

⁴ Oware ọsosuọ nọ ma rẹ sai wuhrẹ no oriruo Pọl na ze họ, ohwo kpobi nọ ọ rrọ uviuwou Jihova ọ rrọ ghaghae kẹe. Enẹ Pọl o ro mu oriruo na họ: “Wọhọ epanọ ma wo ekwakwa sa-sa evaọ ugboma ovona, rekọ aikpobi a wo iruo evona ha na, ere ọvona, dede nọ ma rrọ buobu, mai yọ ugboma ọvo evaọ usu kugbe Kristi, rekọ mai omomọvo yọ ekwakwa nọ e jẹhọ ohwohwo.” (Rom 12:4, 5) Eme họ otọ ẹme Pọl na? Ma wo ọvuọ iruo riẹ nọ ma bi ru evaọ ukoko na, rekọ onana u dhesẹ nọ ahwo jọ a wuzou vi amọfa ha.

5. “Ekẹ” vẹ Jihova ọ kẹ omai evaọ ukoko na?

⁵ A tẹ be ta ẹme kpahe ahwo nọ a wo iruo evaọ ukoko na, ẹsejọhọ iroro ra e te nwani kpohọ ekpako hayo idibo iruiruo. (1 Tẹs. 5:12; Hib. 13:17) Ma riẹ nọ Jihova ọ rọ ẹkwoma Kristi “rehọ ezae” jọ mu evaọ ukoko na. Ezae nana yọ “ekẹ” nọ ọ rọ kẹ omai. (Ẹf. 4:8) Ejọ rai họ, inievo nọ e rrọ Utu Ẹruorote Na, enọ a ro mu inọ a fiobọhọ kẹ ae, inievo nọ e rrọ Ogbẹgwae Uwou-Ogha, esẹro okogho, inievo nọ i re wuhrẹ evaọ isukulu ukoko na, te ekpako ukoko gbe idibo iruiruo. Ẹzi Ọghẹnẹ a rọ rehọ inievo nana mu re a sẹro mai igodẹ Jihova nọ e rrọ ghaghae je fiobọhọ kẹ omai kpobi dikihẹ ga ziezi evaọ ukoko na.​—1 Pita 5:2, 3.

6. Wọhọ epanọ o rrọ obe 1 Ahwo Tẹsalonika 2:6-8, eme inievo-emezae nọ a ro mu evaọ ukoko na a be daoma ru?

⁶ A rehọ inievo-emezae jọ mu evaọ ukoko na re a ru iruo sa-sa. Wọhọ epanọ abọ gbe awọ gbe ekwakwa oma na efa i re ru iruo sa-sa nọ i re fiobọhọ kẹ ugboma na soso na, ere inievo nana nọ a ro mu na a bi ru iruo sa-sa nọ i bi fiobọhọ kẹ ukoko na soso. Orọnikọ a bi ru onana re a ruẹsi jiri ai hi. Ukpoye, a gwọlọ fiobọhọ kẹ inievo rai kpobi dikihẹ ga. (Se 1 Ahwo Tẹsalonika 2:6-8.) Ma yere Jihova nọ ọ rọ rehọ ezae nọ i wo ẹzi otiọna mu kẹ omai!

7. Eghale vẹ inievo nọ i bi ru iruo usi uwoma ota oke-kpobi na a bi wo?

⁷ A rehọ inievo jọ mu imishọnare, ekobaro obọdẹ hayo ekobaro oke-kpobi. Inievo buobu evaọ akpọ na a jiroro nọ iruo usi uwoma ota oke-kpobi na a re ru. Onana u ru nọ a ro fiobọhọ kẹ ahwo buobu zihe ruọ ilele Jesu no. Dede nọ umutho ekwakwa eyero-akpọ inievo nana a wo, Jihova ọ ghale rai no evaọ idhere buobu. (Mak 10:29, 30) Eva e were omai gaga nọ ma ro wo inievo eghaghae itiena evaọ ukoko na!

8. Fikieme ohwo kpobi nọ ọ be ta usi uwoma ọ rọ rrọ ghaghae kẹ Jihova?

⁸ Kọ inievo-emezae nọ a ro mu evaọ ukoko na gbe enọ e rrọ iruo usi uwoma ota oke-kpobi na ọvo họ enọ e rrọ ghaghae evaọ ukoko Ọghẹnẹ? Ijo! Owhowho-uvie kpobi ọ rrọ ghaghae kẹ Ọghẹnẹ gbe ukoko na. (Rom 10:15; 1 Kọr. 3:6-9) O rrọ ere keme re a fiobọhọ kẹ amọfa zihe ruọ ilele Jesu yọ obọdẹ iruo jọ nọ mai kpobi ma wo evaọ ukoko na. (Mat. 28:19, 20; 1 Tim. 2:4) Ohwo kpobi nọ ọ rrọ ukoko na, te enọ e họ-ame no te enọ e re họ-ame he, a be daoma rọ iruo nana karo.​—Mat. 24:14.

9. Fikieme inievo-emetẹ nọ e rrọ ukoko na a rọ rrọ ghaghae kẹ omai?

⁹ Jihova o rri inievo-emetẹ nọ e rrọ ukoko na ghaghae gaga, keme a bi ru emamọ iruo evaọ ukoko na. Eyae  uwou-orọo, iniemọ, eyae-uku gbe inievo-emetẹ nọ e re rọo ho a be gọ Jihova ziezi evaọ ukoko na, yọ a rrọ ghaghae kẹe. A jọ Ebaibol fodẹ eyae buobu nọ i ru eva were Ọghẹnẹ. A ta ẹme ezi rai fiki areghẹ, ẹrọwọ, ọwhọ, udu, ọghoruo, gbe iruo iwoma rai. (Luk 8:2, 3; Iruẹru 16:14, 15; Rom 16:3, 6; Fil. 4:3; Hib. 11:11, 31, 35) Ma yere Ọghẹnẹ nọ ma rọ jọ ukoko na wo eyae nọ i wo iruemu ezi itiena!

10. Fikieme inievo nọ e kpako no a rọ rrọ ghaghae kẹ omai?

¹⁰ Ma wo inievo buobu nọ e kpako no evaọ ukoko na re. Who te kpohọ ikoko jọ whọ rẹ ruẹ inievo nọ e kpako gaga no nọ e gọ Jihova no emaha ze. Inievo jọ nọ e kpako no nọ i kurẹriẹ obọ e riẹ re. O sae jọ nọ oghẹrẹ eyao sa-sa nọ owho u re si lele oma o be lahiẹ inievo nana jọ, te enọ i kri ukoko na no te enọ i kurẹriẹ obọ. Ebẹbẹ itiena o sai ru nọ a gbẹ sai ro kpohọ usi uwoma ota hayo ru iruo ukoko na efa tere he. Ghele na, a be dawo utho oma rai evaọ usi uwoma ota na, jẹ be daoma wuhrẹ amọfa jẹ tuduhọ ae awọ. Ma bi gine wuhrẹ eware buobu mi ai. Evaọ uzẹme, a rrọ ghaghae kẹ omai gbe Jihova.​—Itẹ 16:31.

11-12. Eme izoge nọ e rrọ ukoko ra a bi ru nọ o be bọ owhẹ ga?

¹¹ Roro kpahe izoge nọ e rrọ ukoko na re. Nọ a be rro ze na, a be nyaku ebẹbẹ buobu evaọ akpọ nana nọ Setan ọ be kpọ jẹ be rọ iroro iyoma riẹ raha na. (1 Jọn 5:19) O make rrọ ere na, izoge nana a rẹ kuyo ziezi evaọ ewuhrẹ, ta usi uwoma ziezi, jẹ gbaudu ta oware nọ a riẹ nọ u kiehọ, yọ onana o be hai ru ẹrọwọ mai ga. Ẹhẹ, whai izoge na wha rrọ ghaghae kẹ Jihova!​—Ol. 8:2.

¹² Inievo mai jọ a re roro nọ a wo iruo ho evaọ ukoko na. Eme o rẹ sai fiobọhọ kẹ ohwo kpobi riẹ nọ o wo iruo hayo ọ rrọ ghaghae evaọ ukoko na? Joma ta kpahe iẹe.

13-14. Eme ọ rẹ sae lẹliẹ inievo jọ roro nọ a wo iruo evaọ ukoko na ha?

¹³ Joma ta kpahe oware avọ ivẹ nọ ma rẹ sai wuhrẹ no oriruo nọ Pọl ọ kẹ na ze. Ọ ta kpahe ẹbẹbẹ jọ nọ ahwo buobu a wo nẹnẹ; a re rri omarai nọ a wo iruo ho evaọ ukoko na. Pọl o kere nọ: “Otẹrọnọ owọ o ta nọ, ‘Fikinọ mẹ yọ obọ họ, mẹ rrọ abọjọ ugboma na ha,’ oyena u re ru ei nọ ọ gbẹ rọ jọ abọjọ ugboma na ha ha. Yọ ozọ o tẹ ta nọ, ‘Fikinọ mẹ yọ ubiẹro ho, mẹ rrọ abọjọ ugboma na ha,’ oyena u re ru ei nọ ọ gbẹ rọ jọ abọjọ ugboma na ha ha.” (1 Kọr. 12:15, 16) Eme họ otọ ẹme Pọl na?

¹⁴ Whọ tẹ rọ omara kele amọfa evaọ ukoko na, whọ sai roro nọ who fioka ha. O sae jọ nọ inievo jọ a riẹ epanọ a rẹ jọ eplatfọmo wuhrẹ ziezi, koko eware họ ziezi, hayo rẹrote amọfa ziezi. Ẹsejọhọ o te jọ owhẹ oma nọ whọ riẹ eware yena eru tere he. Who te wo iroro itiena, u dhesẹ nọ who wo omaurokpotọ. (Fil. 2:3) Rekọ yọroma kpahe iroro itieye na. Whọ tẹ tẹrovi oria nọ amọfa a be jọ riẹ ru vi owhẹ ọvo, o rẹ sae lẹliẹ owhẹ roro nọ who fioka ha. O rẹ sae lẹliẹ owhẹ roro nọ who wo iruo evaọ ukoko na ha. Eme ọ rẹ sai fiobọhọ kẹ owhẹ whaha iroro itieye?

15. Wọhọ epanọ o rrọ obe 1 Ahwo Kọrint 12:4-11, eme u fo nọ ma rẹ riẹ?

¹⁵ Muẹrohọ onana: Jihova ọ kẹ Ileleikristi jọ evaọ ikpe-udhusoi ọsosuọ okẹ iruo igbunu, rekọ oghẹrẹ iruo igbunu evona ẹzi ọfuafo na ọ jẹ wọ ai ru hu. (Se 1 Ahwo Kọrint 12:4-11.) Dede nọ okẹ nọ Jihova ọ kẹ ọjọ u wo ohẹriẹ no orọ ọdekọ, Oleleikristi kpobi ọ jọ ghaghae kẹe. Ma wo okẹ iruo igbunu nẹnẹ hẹ. Ghele na Ọghẹnẹ ọ gbẹ be rọ ẹzi ọfuafo na kẹ omai ekẹ sa-sa. Ma gbẹ maki wo okẹ jọ nọ inievo jọ a wo ho, mai kpobi ma rrọ ghaghae kẹ Jihova.

16. Didi ohrẹ Pọl ukọ na ọ kẹ omai nọ u fo nọ ma re lele?

 ¹⁶ Ukpenọ ma rọ omamai wawo amọfa evaọ ukoko na, joma lele ohrẹ nọ ẹzi Ọghẹnẹ ọ wọ Pọl kere na inọ: “Jọ omomọvo ọ kiẹ iruẹru obọriẹ riwi, kẹsena o ve ti wo oghọghọ no iruẹru obọriẹ ọvo ze, orọnikọ ọ rẹ rehọ omariẹ wawo omọfa ha.”​—Gal. 6:4.

17. Erere vẹ ma re wo nọ ma te lele ohrẹ Pọl ukọ na?

¹⁷ Ma tẹ kiẹ iruẹru mai riwi wọhọ epanọ Pọl ọ ta na, ẹsejọhọ ma te ruẹ nọ ma wo oghẹrẹ okẹ jọ nọ amọfa a wo ho. Wọhọ oriruo, o sae jọ nọ ọkpako ukoko jọ ọ rẹ nwane riẹ ẹme ru tere he evaọ eplatfọmo, rekọ ẹsejọhọ o re fiobọhọ kẹ ahwo kurẹriẹ ziọ ukoko na ziezi. Hayo o sae jọ nọ ọ riẹ epanọ a rẹ ruẹrẹ eware họ kpatiẹ ziezi hi wọhọ ekpako efa, rekọ ọ sae jọ ọkpako nọ ọ rrọ yoyou, nọ inievo ukoko na a rẹ dhẹ bru nọ a tẹ gwọlọ emamọ ohrẹ nọ u no Ikereakere na ze. O sae jẹ jọ nọ o re dede erara rehọ gaga. (Hib. 13:2, 16) Ma te muẹrohọ eware nọ ma be riẹ ru, eva e rẹ were omai inọ ma wo iruo evaọ ukoko na. Onana u ti je ru nọ ma gbẹ te rọ re ibe Ileleikristi mai nọ i bi ru iruo efa ihri hi.

18. Ẹvẹ ma sai ro ru iruo nọ i te omai ziezi?

¹⁸ Oware kpobi nọ ma be jọ ukoko na ru kẹhẹ, joma daoma ru ei ziezi je dhesẹ emamọ uruemu. Jihova ọ be rọ ukoko na wuhrẹ omai re ma sai ru iruo nọ i te omai ziezi. Wọhọ oriruo, a be hae jọ ewuhrẹ udevie oka wuhrẹ omai oghẹrẹ nọ ma sae rọ ta usi uwoma ziezi. Kọ who bi ru eware nọ a be hae ta kẹ omai na?

19. Ẹvẹ whọ sai ro kpohọ Isukulu Rọkẹ Etausiuwoma Uvie Na?

¹⁹ Isukulu Rọkẹ Etausiuwoma Uvie Na yọ obọdẹ edhere ọfa nọ ukoko na u bi ro wuhrẹ inievo kẹ iruo usi uwoma ota na ziezi. Ekobaro oke-kpobi nọ e rrọ umuo ikpe udhegbesa rite udhosa-gbisoi a rẹ sai kpohọ isukulu nana. Ẹsejọhọ who ti roro nọ whọ sai kpohọ isukulu nana vievie he. Rekọ ukpenọ who re roro kpahe eware nọ e te whaha owhẹ isukulu nana, roro kpahe oware nọ u ro fo nọ whọ nya. Kẹsena who ve ru eware nọ e rẹ lẹliẹ owhẹ te kẹ isukulu na. Whọ tẹ daoma fihọ iẹe jẹ lẹ se Jihova, oware nọ who roro nọ o lọhọ họ na, o sae lọhọ.

20. Eme ma wuhrẹ no obe Ahwo Rom 12:6-8 ze?

²⁰ Ma rẹ ruẹ oware avọ esa nọ ma rẹ sai wuhrẹ no oriruo nọ Pọl ọ kẹ na ze evaọ obe Ahwo Rom 12:6-8. (Sei.) Onana yọ oria ofa nọ Pọl ọ jọ dhesẹ nọ ohwo kpobi o wo ọvuọ okẹ riẹ evaọ ukoko na. Rekọ u no ere kuhọ họ, ọ ta nọ joma rọ okẹ kpobi nọ ma wo fiobọhọ kẹ ohwohwo evaọ ukoko Jihova.

21-22. Eme ma wuhrẹ no oriruo Robert avọ Felice ze?

²¹ Roro kpahe oriruo oniọvo jọ nọ ma te faki se Robert nọ ukoko na u vi kpohọ usi uwoma ota evaọ orẹwho ọfa. Uwhremu na, a tẹ ta kẹe nọ jọ o zihe kpobọ orẹwho riẹ re ọ jọ Ebẹtẹle ru iruo. Dede nọ a vuẹ riẹ nọ orọnọ fikinọ ọ be riẹ ru hu jabọ a ro nwene iruo riẹ hẹ, ọ ta nọ: “Me je roro nọ me ru oware jọ thọ, yọ iroro nana i kpokpo omẹ emerae buobu. Okejọ mẹ tubẹ jọ udu mẹ ta nọ me re no Ebẹtẹle.” Ẹvẹ ọ sae rọ wariẹ mu evawere họ ewo? Ọkpako ọfa jọ ọ kareghẹhọ iẹe nọ Jihova ọ jọ  iruo kpobi nọ ma ru vrẹ no wuhrẹ omai eware nọ i re fiobọhọ kẹ omai ru iruo nọ a kẹ omai enẹna ziezi. Robert o te vuhumu nọ ukpenọ o re roro kpahe eware nọ e vrẹ no, ọ rẹ tẹrovi oware nọ ọ rẹ sai ru enẹna.

²² Oniọvo ọfa nọ a re se Felice Episcopo o wo ọkpọ ẹbẹbẹ ọvona. Nọ avọ aye riẹ a nwrotọ no isukulu Giliad no evaọ 1956 a te dhei kpohọ iruo ọsẹro okogho evaọ obọ Bolivia. Evaọ 1964 aye riẹ o te dihọ. Felice ọ ta nọ: “O kẹ omai uye gaga inọ ma bi no iruo nana nọ e were omai gaga na. O da omẹ te oware wọhọ ẹgbukpe soso. Rekọ Jihova o fiobọhọ kẹ omẹ kru udu ga, je ru nọ me ro dede iruo ọsọmọ nọ i te omẹ no na rehọ.” Kọ ọkpọ eware nọ e via kẹ Robert hayo Felice na e via kẹ owhẹ no? Kọ o be kẹ owhẹ uye inọ who gbe bi ru iruo jọ nọ who je ru vẹre he? O tẹ rrọ ere, eva e te were owhẹ nọ whọ tẹ tẹrovi oware nọ whọ rẹ sai ru enẹna evaọ egagọ Jihova, gbe epanọ whọ sae rọ gbodibo kẹ inievo ra. Rehọ okẹ kpobi nọ who wo fiobọhọ kẹ amọfa avọ ọwhọ, who ti wo evawere.

23. Eme u fo nọ ma rẹ rehọ oke mai ru, kọ eme ma te ta kpahe evaọ uzoẹme nọ o rrọ aro na?

²³ Mai kpobi ma rrọ ghaghae kẹ Jihova. Ọ gwọlọ nọ whọ riẹ nọ whẹ yọ omọvo ahwo uviuwou riẹ. Ma te roro kpahe eware nọ ma rẹ sai ru ro fiobọhọ kẹ inievo ukoko na jẹ daoma ru ai, o te jọ bẹbẹ re ma roro nọ ma wo iruo ho. Kọ ẹvẹ kpahe oghẹrẹ nọ ma bi rri amọfa evaọ ukoko na? Ẹvẹ ma sai ro dhesẹ nọ a rrọ ghaghae kẹ omai? Ma te ta kpahe eware nana nọ i wuzou gaga na evaọ uzoẹme nọ o rrọ aro na.