1-2. Amono a rẹ sai fiobọhọ kẹ ohwo nọ a bi wuhrẹ Ebaibol kugbe te epanọ ọ rẹ rọ họ-ame?

ỌMỌTẸ jọ nọ a re se Amy evaọ obọ Fiji ọ ta nọ: “Oke nọ a je ro wuhrẹ Ebaibol kugbe omẹ, eware nọ me je wuhrẹ na e jẹ were omẹ gaga, mẹ tẹ jẹ ruẹ nọ egagọ uzẹme na ena. Rekọ nọ me mu oma họ ekugbe inievo na no, ẹsiẹ me ro muhọ enwene jẹ nyaharo te epanọ mẹ rọ họ-ame.” Onana u wuhrẹ omai oware jọ nọ u wuzou gaga. Oye họ, nọ inievo ukoko na a te bi fiobọhọ kẹ ọmọ-uwuhrẹ Ebaibol oniọvo jọ, ẹsiẹ ọ mae rọ nyaharo ziezi te epanọ ọ rẹ rọ họ-ame.

² Re ukoko o sai vihọ, owhowho-uvie kpobi o wo ẹkabọ riẹ nọ o re ru. (Ẹf. 4:16) Ọkobaro jọ nọ a re se Leilani nọ ọ be rria obọ Vanuatu ọ ta nọ: “U wo ẹme jọ nọ ahwo a rẹ ta gaga inọ, omọvo ọ rẹ yọrọ ọmọ họ. Epọvo na o rrọ re nọ ohwo o te bi zihe ruọ Oleleikristi. Inievo ukoko na kpobi a re fiobọhọ kẹ ohwo na.” Re ọmọ ọ sai te ohwo nọ a rẹ rọ suẹro, orọnikọ ọsẹgboni riẹ ọvo o re fiobọhọ kẹe he. Rekọ te imoni ọsẹgboni na, egbẹrioma rai, gbe iticha ọmọ na. Aikpobi a re kuobọgbe tuduhọ ọmọ na awọ je wuhrẹ iẹe eware nọ i wuzou evaọ uzuazọ. Epọvo na re, inievo ukoko na kpobi a rẹ tuduhọ ọmọ-uwuhrẹ Ebaibol awọ, kẹe ohrẹ je fi emamọ oriruo hotọ kẹe. Enana kpobi i re fiobọhọ kẹ ohwo na nyaharo te epanọ ọ rẹ rọ họ-ame, orọnikọ oniọvo nọ o bi wuhrẹ iẹe na ọvo ho.​—Itẹ 15:22.

3. Eme who wuhrẹ no ẹme Ana, Dorin, gbe Leilani na ze?

³ Fikieme u ro fo nọ eva e were oniọvo nọ o bi wuhrẹ Ebaibol kugbe ohwo, nọ inievo efa i te bi fiobọhọ kẹ ohwo na? Oniọvo-ọmọtẹ nọ a re se Ana nọ ọ rrọ ọkobaro obọdẹ evaọ obọ Moldova ọ ta nọ: “Nọ ọmọ-uwuhrẹ Ebaibol o te mu ẹnyaharo họ ewo no, u re wo eware buobu nọ o rẹ jọ gwọlọ nọ a  fiobọhọ kẹe. Oniọvo nọ o bi wuhrẹ kugbei na ọ sai ru eware nana kpobi hi.” Dorin nọ ọ rrọ ọkobaro obọdẹ re evaọ orẹwho yena ọ ta nọ: “Ẹsibuobu nọ mẹ avọ oniọvo ma tẹ nyai wuhrẹ obe kugbe ohwo, ọ rẹ ta ẹme jọ nọ o re duobọte ohwo na udu gaga, ẹme nọ me re tube roro ku hu.” Leilani ọ fodẹ oware ofa jọ re inọ, “Nọ inievo ukoko na a te bi dhesẹ uyoyou kẹ ọmọ-uwuhrẹ Ebaibol jẹ whẹtiẹe homa, u re fiobọhọ kẹe ruẹ vevẹ nọ mai ginọ idibo Ọghẹnẹ.”​—Jọn 13:35.

4. Eme ma te ta kpahe evaọ uzoẹme nana?

⁴ Whaọ whọ sai roro nọ, ‘Ẹvẹ mẹ sai ro fiobọhọ kẹ ọmọ-uwuhrẹ Ebaibol nyaharo yọ orọnikọ mẹ họ ohwo nọ o bi wuhrẹ Ebaibol kugbei hi?’ Whọ sai fiobọhọ! Joma ta kpahe eware jọ nọ ma rẹ sai ru nọ oniọvo o te zizie omai nọ ma gbẹ nyai wuhrẹ Ebaibol kugbe ohwo. Ma te jẹ ta kpahe eware nọ ma rẹ sai ru nọ ohwo na o te mu ewuhrẹ họ ẹnyaze no. Ma vẹ te jẹ ta kpahe epanọ ekpako ukoko a sai ro fiobọhọ kẹe te kẹ ame-ọhọ.

5. Eme whọ rẹ kareghẹhọ nọ who te kuomagbe oniọvo nyai wuhrẹ Ebaibol kugbe ohwo?

⁵ Oniọvo o te zizie owhẹ nọ wha nyai wuhrẹ Ebaibol kugbe ohwo jọ, kareghẹhọ nọ ọye họ ohwo nọ o re fiobọhọ kẹ ohwo na wo otoriẹ eware nọ o bi wuhrẹ no Ebaibol ze na. Ofiobọhọ whọ rrọ kẹ oniọvo nọ wha gbẹ nya na. (Ọtausi. 4:9, 10) Rekọ eme whọ rẹ sai ru ro fiobọhọ ziezi evaọ uwuhrẹ na?

6. Oniọvo jọ ọ tẹ vuẹ owhẹ nọ who ti kuomagbei nyai wuhrẹ Ebaibol kugbe ohwo, ẹvẹ whọ sai ro lele ohrẹ nọ o rrọ Itẹ 20:18?

⁶ Ruẹrẹ oma kpahe kẹ uwuhrẹ na. Kake nọ oniọvo na re ọ vuẹ owhẹ eware jọ kpahe ohwo nọ o bi wuhrẹ Ebaibol kugbe na. (Se Itẹ 20:18.) Whọ sae nọe nọ: “Eware jọ vẹ whọ riẹ kpahe ohwo na? Ma be te nya na, eme who ti wuhrẹ kugbei? Eme whọ gwọlọ nọ ọ riẹ evaọ uwuhrẹ na? Kọ u wo eware jọ nọ whọ gwọlọ nọ me ru hayo whaha evaọ etoke uwuhrẹ na? Kọ u wo ẹme jọ nọ whọ gwọlọ nọ mẹ ta hayo ta ha? Oghẹrẹ eme vẹ who roro nọ mẹ rẹ ta nọ o rẹ sae tuduhọ ohwo na awọ ruabọhọ uwuhrẹ na?” Uzẹme riẹ họ, oniọvo na ọ te vuẹ owhẹ eware nọ ọ riẹ kpahe ohwo na nọ u fo nọ a rẹ ko dhere he. Rekọ, eware nọ ọ te vuẹ owhẹ e sai fiobọhọ. Imishọnare jọ nọ a re se Joy ọ rẹ vuẹ oniọvo kpobi nọ o bi lele iei nyai wuhrẹ ohwo eware jọ kpahe ohwo na. Joy ọ ta nọ: “Eme itieye na nọ mẹ rẹ vuẹ ohwo nọ o bi lele omẹ na i re fiobọhọ kẹe. Keme u ti ru nọ ọ rẹ rọ gwọlọ ruẹ ohwo na jẹ gwọlọ edhere nọ o ti ro fiobọhọ kẹe evaọ etoke uwuhrẹ na.”

7. Fikieme u ro wuzou re whọ ruẹrẹ oma kpahe nọ who te bi lele oniọvo jọ nyai wuhrẹ ohwo?

⁷ Oniọvo o te zizie owhẹ kpahotọ inọ wha gbẹ nyai wuhrẹ ohwo, u re woma re whọ ruẹrẹ oria nọ a ti wuhrẹ na kpahe. (Ẹzra 7:10) Dorin nọ ma ta ẹme riẹ ẹsejọ na ọ ta  nọ: “O rẹ were omẹ nọ oniọvo nọ ma gbẹ be nyai wuhrẹ Ebaibol kugbe ohwo ọ tẹ ruẹrẹ oma kpahe, keme ere ọ te rọ zọhọ fihọ uwuhrẹ na ziezi.” U te no ere no, ohwo na ọ te ruẹ nọ wha ruẹrẹ oma kpahe ziezi, ọ vẹ te hae daoma ruẹrẹ oma kpahe re. Whọ gbẹ make sae romatotọ ruẹrẹ oma kpahe he, daoma riẹ igogo eware nọ uwuhrẹ na o ta kpahe.

8. Eme who re ru re olẹ ra o sae jọ ziezi nọ wha te bi wuhrẹ obe kugbe ohwo?

⁸ Olẹ nọ a rẹ lẹ nọ a te bi wuhrẹ Ebaibol kugbe ohwo u wuzou gaga. Fikiere nọ oniọvo na ọ tẹ vuẹ owhẹ nọ whọ te lẹ, romatotọ roro kpahe eme nọ whọ te ta evaọ olẹ na. Ere olẹ ra u ti ro muame. (Ol. 141:2) Hanae nọ ọ be rria obọ Japan ọ rẹ gbẹ kareghẹhọ olẹ nọ oniọvo-ọmọtẹ nọ o lele ọnọ o je wuhrẹ Ebaibol kugbei ọ lẹ evaọ oke nọ a nyai wuhrẹ kugbei. Hanae ọ ta nọ: “Mẹ ruẹ nọ oniọvo na o wo usu okpekpe kugbe Jihova, mẹ tẹ gwọlọ nọ ere mẹ rẹ jọ re. Yọ eva e were omẹ gaga inọ ọ fodẹ odẹ mẹ evaọ olẹ na.”

9. Wọhọ epanọ o rrọ Jemis 1:19, ẹvẹ whọ sai ro fiobọhọ kẹ oniọvo nọ wha gbẹ nyai wuhrẹ ohwo?

⁹ Hae kpahe ẹme fihọ ewuhrẹ na. Ọkobaro obọdẹ nọ a re se Omamuyovbi evaọ Nigeria ọ ta nọ: “Ohwo nọ wha gbẹ nyai wuhrẹ ohwo o re rri lele owhẹ jẹ kpahe fihọ uwuhrẹ na. Dede na, ọ rẹ ta eme bu hrọ họ keme ọ riẹ nọ u fo re ọ rehọ ẹta ọnọ o bi wuhrẹ obe kugbe ohwo na ha.” Who te lele oniọvo nyai wuhrẹ Ebaibol kugbe ohwo, ẹvẹ whọ sae rọ riẹ oke nọ u fo nọ whọ rẹ rọ kpahe ẹme gbe ẹme nọ whọ rẹ kpahe? (Itẹ 25:11) Hae gaviezọ ziezi kẹ ẹme oniọvo na gbe ọrọ ohwo nọ o bi wuhrẹ kugbe na. (Se Jemis 1:19.) Ere whọ te sae rọ riẹ oke nọ u fo nọ whọ rọ kpahe ẹme. Dede na, u fo re who rorote ziezi re whọ tẹ te kpahe ẹme. Wọhọ oriruo, who re bru ẹme dhe oniọvo na unu hu nọ o te bi ru oware jọ vẹ, yọ whọ rẹ ta ẹme ọfa ze he nọ u wobọ kugbe oware nọ wha bi wuhrẹ na ha. Whọ rẹ ta eme bu hrọ gbe he. Ukpoye, jọ ẹme ra ọ jọ kpẹkpẹe. Whọ sae kẹ ọtadhesẹ jọ, hayo nọ onọ jọ nọ u re ru oware nọ wha bi wuhrẹ na vẹ. Ẹsejọ whọ sae rri nọ whọ nwani wo ẹme ọvo nọ whọ gwọlọ ta ha. O tẹ make rrọ ere dede, u ti fiobọhọ gaga nọ who te jiri ohwo na ziezi, je dhesẹ nọ who gine you rie.

10. Ẹvẹ iku ra e sai ro fiobọhọ kẹ ohwo nọ oniọvo jọ o bi wuhrẹ Ebaibol kugbe?

¹⁰ Gbiku eware jọ nọ e via kẹ owhẹ no. Whọ sai gbiku kpẹkpẹe kpahe epanọ who ro wuhrẹ uzẹme na, oghẹrẹ nọ who ro fi ẹbẹbẹ jọ kparobọ, hayo oghẹrẹ jọ nọ Jihova o ro fiobọhọ kẹ owhẹ no, nọ whọ tẹ ruẹ nọ iku itiena e sai fiobọhọ kẹ ohwo na. (Ol. 78:4, 7) O sae jọnọ iku itieye nọ who ti gbe kẹe na họ oware nọ u ti gine fiobọhọ kẹe. O sae bọ ẹrọwọ riẹ ga hayo fiobọhọ kẹe nyaharo te epanọ ọ rẹ rọ họ-ame. Yọ o sai je fiobọhọ kẹe riẹ epanọ o re ro fi ẹbẹbẹ jọ kparobọ.  (1 Pita 5:9) Ọkobaro jọ nọ a re se Gabriel evaọ obọ Brazil ọ gbẹ be kareghẹhọ oware nọ u fiobọhọ kẹe evaọ okenọ a je wuhrẹ Ebaibol kugbei. Ọ ta nọ: “Iku inievo na nọ me yo u fiobọhọ kẹ omẹ ruẹ nọ Jihova ọ ginẹ riẹ ebẹbẹ nọ i bi te omai. Yọ otẹrọnọ a sai fi ebẹbẹ rai kparobọ, kiyọ mẹ sai fi ebẹbẹ nọ i bi te omẹ kparobọ re.”

11-12. Fikieme ma re ro dede ohwo nọ o bi wuhrẹ Ebaibol rehọ sasasa nọ ọ tẹ ziọ ewuhrẹ?

¹¹ Re ohwo nọ a bi wuhrẹ Ebaibol kugbe ọ sae ginẹ nyaharo te epanọ ọ rẹ rọ họ-ame, o re kpohọ ewuhrẹ ẹsikpobi, o ve je wo erere no iwuhrẹ na ze. (Hib. 10:24, 25) Avro ọ riẹ hẹ, ohwo nọ o bi wuhrẹ kugbei na họ ọnọ o ti zizie iei ziọ ewuhrẹ ọsosuọ riẹ. Rekọ nọ ọ tẹ ziọ Ọgwa Uvie, inievo ukoko na kpobi a te tuduhọ iẹe awọ inọ ọ hae nyaze ewuhrẹ ẹsikpobi. Ẹvẹ ma sai ro ru ere?

¹² Dede iei rehọ sasasa. (Rom 15:7) Ma te dede ohwo nọ a bi wuhrẹ Ebaibol kugbe rehọ ziezi evaọ oke nọ ọ ziọ ewuhrẹ, ẹsiẹe ọ te hae rọ gwọlọ nyaze. Ọ tẹ nyaze, dede iei rehọ sasasa re who je dhesẹ iẹe kẹ inievo efa. Dede na, ma re ru onana vrẹta ha, re u gbe ru oma vuẹe he. Ma du roro ho inọ oniọvo nọ o bi wuhrẹ Ebaibol kugbei ọ rrọ kugbei, keme o sae jọnọ oniọvo na ọ re te nyaze he hayo obọ riẹ o rrọ oware ofa. Gaviezọ ziezi kẹ ẹme nọ ohwo na ọ be ta, re who je dhesẹ nọ who you rie. Eme ọ rẹ sai noi ze nọ who te dede ohwo otiọna rehọ enẹ? U wo oniọvo jọ nọ a re se Dmitrii nọ ọ họ-ame imikpe jọ nọ i kpemu, yọ ọ rrọ odibo oruiruo enẹna. Ọ ta kpahe ẹdẹ ọsosuọ nọ ọ rọ ziọ ewuhrẹ inọ: “Ẹdẹ yena otafe Ọgwa Uvie na me dikihẹ yọ ozọ u je mu omẹ. Oniọvo-ọmọzae jọ ọ tẹ nyaze ti su omẹ rueva. Inievo na buobu a nyaze ti yere omẹ. Akpọ o gbe omẹ unu, mẹ re ruẹ oware utioye ẹdẹvo ho. Oghẹrẹ nọ a ro dede omẹ rehọ o were omẹ gaga te epanọ mẹ rọ gwọlọ nọ kẹdẹ kẹdẹ me re kpohọ ewuhrẹ.”

13. Ẹvẹ emamọ uruemu ra o sai ro fiobọhọ kẹ ohwo nọ a bi wuhrẹ Ebaibol kugbe?

¹³ Wo emamọ uruemu nọ a sae rọ aro kele. Emamọ uruemu ra o sai fiobọhọ kẹ ohwo nọ a bi wuhrẹ Ebaibol kugbe ruẹ nọ mai ginọ Ileleikristi uzẹme. (Mat. 5:16) Vitalii nọ ọ rrọ ọkobaro enẹna evaọ obọ Moldova ọ ta kpahe oke nọ a je ro wuhrẹ Ebaibol kugbei inọ: “Nọ me muẹrohọ oghẹrẹ nọ inievo na a bi yeri uzuazọ rai, oghẹrẹ nọ a re rri eware, gbe uruemu rai, u te mu omẹ ẹro inọ Isẹri Jihova họ ahwo nọ a rrọ egagọ uzẹme na.”

14. Oghẹrẹ vẹ emamọ oriruo ra o sai ro fiobọhọ kẹ ohwo nọ a bi wuhrẹ Ebaibol nyaharo?

¹⁴ Re ohwo nọ a bi wuhrẹ Ebaibol kugbe ọ sai te kẹ ame-ọhọ, o re ru eware nọ o bi wuhrẹ na. Onana o rẹ nwane lọhọ tere ẹsejọ họ. Rekọ nọ o te muẹrohọ irere nọ i bi te owhẹ fikinọ who bi ru lele Ẹme Ọghẹnẹ, ọ sae gwọlọ rọ aro kele owhẹ. (1 Kọr. 11:1)  Hanae nọ ma fodẹ ẹsiẹe na ọ ta nọ: “Me muẹrohọ nọ inievo na a bi ru lele eware nọ me je wuhrẹ na. Oriruo rai u fiobọhọ kẹ omẹ ruẹ oghẹrẹ nọ mẹ sae rọvrẹ amọfa, tuduhọ amọfa awọ jẹ jọ wowou. Inievo na a rẹ ta ẹme owoma amọfa gaga. Fikiere mẹ tẹ gwọlọ nọ mẹ rẹ rọ aro kele ai.”

15. Eme ọ rrọ Itẹ 27:17 nọ u dhesẹ nọ u fo re ma mu usu kugbe ohwo nọ a bi wuhrẹ Ebaibol kugbe nọ ọ be ziọ ewuhrẹ?

¹⁵ Mu usu kugbe ohwo na. Nọ ohwo na ọ be nyaze ewuhrẹ ẹsikpobi na, hai dhesẹ nọ whọ gwọlọ ewoma riẹ. (Fil. 2:4) Whọ sae daoma riẹe ziezi. Wọhọ oriruo, who te muẹrohọ nọ o nwene no evaọ oware jọ, whọ sai jiri iei. Whọ sae jẹ nọe kpahe obe uwuhrẹ Ebaibol riẹ, uviuwou riẹ, gbe iruo riẹ. Dede na, orọnikọ whọ rẹ kiotọ riẹ hẹ. Whọ tẹ be hai lele iei ta ẹme enẹ, u re ru nọ wha rẹ rọ kẹle ohwohwo ziezi. Ma te mu usu kugbei ere, o rẹ whae ze nọ ọ te rọ gwọlọ te kẹ ame-ọhọ. (Se Itẹ 27:17.) Hanae nọ ma fodẹ ẹsiẹe na ọ rrọ ọkobaro oke-kpobi enẹna. Ọ ta nọ: “Fikinọ me mu usu kugbe inievo jọ no evaọ ukoko na, mẹ jẹ hae gwọlọ nọ ẹdẹ ewuhrẹ o te vẹrẹ. Yọ oma o tẹ make rrọ omẹ no dede, mẹ jẹ hai kpohọ iwuhrẹ ghele. Oma o jẹ hae were omẹ nọ mẹ tẹ rrọ kugbe inievo ukoko na nọ i zihe ruọ egbẹnyusu mẹ no na. Yọ onana u fiobọhọ kẹ omẹ fa usu no ahwo nọ a bi koko izi Ọghẹnẹ hẹ. Fikinọ mẹ gwọlọ si kẹle Jihova gbe inievo na viere, mẹ tẹ gbaemu nọ mẹ rẹ họ-ame.”

16. Oware ofa vẹ ma re ru re ukoko na o reria ohwo nọ a bi wuhrẹ Ebaibol kugbe oma?

¹⁶ Nọ ohwo na ọ be daoma nwene na, ru re ukoko na o reriae oma. Whọ sai ru ere nọ who te bi sei gboma. (Hib. 13:2) Denis nọ ọ rrọ obọ Moldova ọ ta kpahe oke nọ a je wuhrẹ Ebaibol kugbei inọ: “Ẹsibuobu inievo na a jẹ hai zizie omẹ avọ aye mẹ kpobọ uwou rai. A jẹ hai gbiku oghẹrẹ nọ Jihova o ro fiobọhọ kẹ ae no, yọ onana o jẹ tuduhọ omai awọ. Oware yena nọ a jẹ hai ru na u fiobọhọ kẹ omai gbaemu nọ ma rẹ gọ Jihova, jẹ ruẹ nọ ma te ru ere uzuazọ mai o te jọ wowoma.” Nọ ohwo nọ a bi wuhrẹ Ebaibol kugbe o te zihe ruọ owhowho-uvie no, whọ sae hai zizie iei re wha gbe kpohọ usi uwoma. Diego nọ ọ rrọ obọ Brazil ọ ta nọ: “Inievo buobu a jẹ hai zizie omẹ re ma gbe kpohọ usi uwoma. Yọ ere mẹ jẹ mae rọ riẹ ae ziezi. Mẹ jọ obọ rai wuhrẹ eware buobu, yọ usu mẹ kugbe ai u ru nọ me ro si kẹle Jihova avọ Jesu ziezi.”

17. Ẹvẹ ekpako ukoko a sai ro fiobọhọ kẹ ohwo nọ a bi wuhrẹ Ebaibol kugbe?

¹⁷ Hai wo uvẹ kẹ ahwo nọ a bi wuhrẹ Ebaibol kugbe. Whai ekpako ukoko, wha te bi dhesẹ uyoyou kẹ ahwo nọ a bi wuhrẹ Ebaibol kugbe, o sai fiobọhọ kẹ ai te kẹ ame-ọhọ. Whọ sae rọ oke jọ ta ẹme kugbe ai ẹsikpobi nọ who kpohọ ewuhrẹ. Whọ tẹ be hae daoma kareghẹhọ edẹ rai, maero nọ a te mu  uyo họ ẹkẹ no, a te ruẹ nọ who gine you rai. Whọ sai ru uvẹ fihọ noke toke nọ whẹ avọ oniọvo jọ wha rẹ rọ nyai wuhrẹ Ebaibol kugbe ohwo riẹ jọ. Ẹsejọhọ oghẹrẹ nọ onana u ti fiobọhọ kẹ ọmọ-uwuhrẹ Ebaibol na te u ti gbe owhẹ unu. Ọkobaro jọ nọ a re se Jackie nọ ọ be rria Nigeria ọ ta nọ: “Akpọ o re gbe ahwo buobu nọ me bi wuhrẹ Ebaibol kugbe unu nọ a tẹ riẹ nọ oniọvo nọ ma gbẹ nya na yọ ọkpako ukoko. Ọjọ evaọ usu rai ọ ta nọ: ‘Epastọ mai ọ sai ru oware utiona vievie he. Edafe ọvo o re kpobọ uwou rai, yọ otẹrọnọ a te kẹe ugho ọvo ọ rẹ rọ nya!’ ” Whaọ, ohwo nọ ọ ta ẹme nana o mu ewuhrẹ họ ẹnyaze no.

18. Ẹvẹ ekpako ukoko a sai ro ru iruo rai nọ a fodẹ evaọ Iruẹru Ikọ 20:28 na?

¹⁸ Fiobọhọ kẹ inievo nọ i bi wuhrẹ Ebaibol kugbe ahwo jẹ tuduhọ ae awọ. Jihova ọ kẹ owhai ekpako ukoko iruo jọ nọ i wuzou gaga. Koyehọ re wha fiobọhọ kẹ inievo na riẹ epanọ a rẹ ta usi uwoma je wuhrẹ amọfa ziezi. (Se Iruẹru Ikọ 20:28.) Oma o tẹ be vuọ oniọvo jọ re o wuhrẹ kugbe ohwo evaọ iraro ra, whọ sae vuẹe nọ ọ kẹ owhẹ uvẹ re who wuhrẹ kugbe ohwo na. Jackie nọ ma fodẹ ẹsiẹe na ọ ta nọ: “Ẹsikpobi ekpako ukoko na a rẹ nọ omẹ kpahe ahwo nọ me bi wuhrẹ kugbe. Yọ me te wo ẹbẹbẹ jọ nọ me bi wuhrẹ Ebaibol kugbe ahwo na, a rẹ vuẹ omẹ eware jọ nọ i re fiobọhọ.” Nọ ekpako ukoko a tẹ be hae tuduhọ inievo nọ i bi wuhrẹ Ebaibol kugbe ahwo awọ, u re fiobọhọ gaga. (1 Tẹs. 5:11) Jackie ọ ta re nọ: “Nọ ekpako ukoko a tẹ tuduhọ omẹ awọ je jiri omẹ rọkẹ oware nọ me ru, o rẹ were omẹ gaga. Oma o rẹ jọ omẹ wọhọ ohwo nọ a kẹ ame odhedhẹ evaọ otọ uvo ogaga. Eme iwowou rai e rẹ kareghẹhọ omẹ nọ emamọ iruo me bi ru na, yọ i re ru omẹ wereva viere nọ me bi wuhrẹ ahwo na.”​—Itẹ 25:25.

19. Eme mai omomọvo ọ rẹ sai ru nọ o rẹ lẹliẹ eva were omai?

¹⁹ O tẹ make rrọ nọ ma ri wo ohwo nọ ma bi wuhrẹ Ebaibol kugbe no ho, ma sai fiobọhọ kẹ ohwo jọ te kẹ ame-ọhọ ghele. Ma te lele oniọvo jọ nyai wuhrẹ kugbe ohwo, ma rẹ rọ emamọ ẹme nọ ma ruẹrẹ kpahe ro fiobọhọ, dede nọ ma rẹ ta ẹme bu gahrọ họ. Nọ ohwo nọ a bi wuhrẹ kugbe o te mu ewuhrẹ họ ẹnyaze no, ma sai mu usu kugbei. Ọ sai je muẹrohọ emamọ uruemu mai nọ ọ rẹ rọ aro kele. Yọ ekpako ukoko a tẹ be hai lele ahwo nọ a bi wuhrẹ Ebaibol kugbe ta ẹme, o rẹ tuduhọ ae awọ. A rẹ jẹ tuduhọ inievo nọ i bi wuhrẹ kugbe amọfa awọ re nọ a tẹ be hai jiri ai je fiobọhọ kẹ ae. Uzẹme riẹ họ, o make kawo kẹhẹ, eva e te were omai gaga nọ ma tẹ sai ru oware jọ nọ u fiobọhọ kẹ ohwo jọ you Jihova, Ọsẹ oyoyou mai na, jẹ nyaze te gọe.