Ahwo jọ nọ a se oria Ebaibol nana vrẹ ọvo a rẹ nọ oghẹrẹ onọ utiona. Rekọ uzẹme na họ, imava a se Mẹfiboshẹt evaọ etenẹ na. Yọ ma tẹ romatotọ rri oware nọ o via na, ma sai wuhrẹ oware jọ noi ze.

Sọl ovie Izrẹl o wo emezae ihrẹ gbe emetẹ ivẹ. Jonatan họ ọmọzae ọkpako riẹ. Uwhremu na, Rizpa ọse Sọl o te yẹ ọmọzae jọ kẹ Sọl nọ a re se Mẹfiboshẹt. Yọ u wo ọmọzae Jonatan jọ nọ a re se Mẹfiboshẹt re. Oyena u dhesẹ nọ Sọl o wo ọmọzae nọ a re se Mẹfiboshẹt, o te je wo ọmọ-uruọmọ nọ a se odẹ ovona.

Nọ u te oke jọ no, Sọl o te mu ahwo Gibiọn nọ a jẹ rria ẹkwotọ Izrẹl họ emukpahe. Ọ jẹ gwọlọ nọ o re kpe ai kpobi no. Yọ o wọhọ nọ o tube kpe ejọ rai. Oware nọ o ru na u yoma gaga. Fikieme? Oke nọ Joshua ọ jọ akpọ, tei te isu ahwo Izrẹl kpobi a re ọvọ kugbe ahwo Gibiọn inọ a re kpe ai hi.—Jos. 9:3-27.

Evaọ oke Sọl yọ ọvọ na ọ gbẹ rrọ otọ. Rekọ ovie na o ru oware nọ a rọwo fihọ evaọ ọvọ na ha, o mu ahwo Gibiọn họ ekpe, ọ jẹ tubẹ gwọlọ kpe ai muotọ. Onana u ru nọ “Sọl avọ uwou riẹ a [rọ] reabe azẹ.” (2 Sam. 21:1) Uwhremu na, a tẹ rọ Devidi mu ovie. Ahwo Gibiọn nọ i kiọkọ a tẹ vuẹ Devidi oware oja nọ Sọl o ru rai na. Kẹsena Devidi ọ tẹ nọ ae oghẹrẹ nọ a gwọlọ nọ a rẹ rọ kioja na re Jihova ọ sai ru ẹkwotọ na wou eware. Orọnikọ ugho oye ahwo Gibiọn a ta nọ a kẹ ae he. A ta nọ jọ a rehọ emezae ihrẹ ọzae nọ ọ “ma omaa nọ o re kpe [ai] muotọ” na ze, re a kpe ai no. (Ik. 35:30, 31) Devidi o te ru epanọ a ta na.—2 Sam. 21:1-6.

Evaọ oke nọ ahwo Gibiọn a ro fi ẹme na hotọ na yọ Sọl avọ Jonatan a whu no evaọ ẹmo. Rekọ Mẹfiboshẹt ọmọzae Jonatan ọ gbẹ jọ uzuazọ. O zihe ruọ ọmo fiki ukie nọ o kie evaọ oke emaha, yọ ma riẹ nọ o wobọ kpahe oware nọ ọsẹ-ode riẹ o ru ahwo Gibiọn na ha. U te no ere no, Devidi ọ re ọvọ kugbe Jonatan inọ usu aimava avọ emọ rai o rẹ jọ bẹdẹ, yọ Mẹfiboshẹt ọ rrọ usu emọ Jonatan. (1 Sam. 18:1; 20:42) Ebaibol ọ ta nọ: “[Devidi] ovie na o te dhesẹ ọdawẹ kẹ Mẹfiboshẹt, ọmọzae Jonatan nọ ọ rrọ ọmọzae Sọl, fiki iyei nọ Devidi avọ Jonatan ọmọzae Sọl a jọ aro Jihova duwu.”—2 Sam. 21:7.

Rekọ Devidi o ru oware nọ ahwo Gibiọn a ta nọ o ru na. Ọ rehọ emezae ivẹ Sọl kẹ ae, odẹ ọjọ Mẹfiboshẹt. Ọ tẹ jẹ rọ emọ-iruọmọ isoi Sọl kẹ ae. (2 Sam. 21:8, 9) Nọ Devidi ọ rehọ ezae ihrẹ na kẹ ae no, abe azẹ nọ a jọ ẹkwotọ na re na o te no otọ.

Oria Ebaibol nana orọnikọ iku anwae jọ gheghe he. Uzi nọ Ọghẹnẹ o jie kẹ ahwo Izrẹl o jọ vevẹ. O ta nọ: “A re kpe emọ họ fiki oware nọ esẹ rai a ru.” (Izie. 24:16) O hae jọ nọ abọ emezae ivẹ Sọl na avọ iruọmọ isoi riẹ na e fo, Jihova ọ hae rọwo nọ a kpe ai hi. Uzi yena ovona o ta nọ: “Fiki uzioraha obọ ohwo ọvo a re ro kpei.” O wọhọ nọ emọ ivẹ Sọl gbe iruọmọ isoi riẹ na a wobọ kpahe oware nọ Sọl o ru ahwo Gibiọn na. Oyejabọ nọ uzou rai u ro lele iei na.

Ma jọ iku nana wuhrẹ nọ orọnikọ uwou kpobi nọ a vi ohwo ọ rẹ nya ha. Nọ ohwo ọ tẹ nyai ru oware uyoma fikinọ ohwo nọ ọ rrọ ọkwa o vi rie, ohwo nọ ọ nya uwou na omariẹ, oware kpobi nọ u no rie ze, ọ rẹ rọ uzou riẹ whae. Agbẹta nọ ohare jọ evaọ Ebaibol o rọ ta nọ: “Ruẹrẹ edhere nọ whọ be nya họ re o jọ riẹriẹriẹ, kẹsena idhere ra kpobi e vẹ te jọ wowoma.”—Itẹ 4:24-27; Ẹf. 5:15.