DANIEL AVỌ MIRIAM a ruọ orọo evaọ Azie 2000, kẹsena a tẹ jẹ rria Barcelona, evaọ Spain. Daniel ọ ta nọ: “Ma je yeri uzuazọ mai vrẹ wọhọ epanọ ahwo kpobi a bi yeri. Iruo mai i ru nọ ma jẹ rọ ruẹ ugho jọ emamọ ehọtẹle re emu, weze kpohọ erẹwho efa, jẹ sẹ osẹ oghaghae. Ma jẹ hai kpohọ usiuwoma ota noke toke re.” Rekọ nọ oke o be nyaharo na, enwene jọ ọ tẹ roma via.

Evaọ okokohọ jọ nọ a ru evaọ 2006, a kẹ ovuẹ jọ nọ u duobọte Daniel gaga, a jọ ovuẹ na nọ inọ: “Kọ ma be dao ẹgba mai kpobi re ma sai fiobọhọ kẹ ahwo nọ ‘a be họrọ ruọ uwhu’ re a sae ruọ edhere nọ o bi kpohọ uzuazọ ebẹdẹ bẹdẹ?” (Itẹ 24:11) A jọ ovuẹ na fiẹgba họ owha-iruo nọ ma re ro fiobọhọ kẹ amọfa riẹ ovuẹ Ebaibol nọ o rẹ kẹ esiwo na. (Iruẹru 20:​26, 27) Daniel ọ ta nọ: “O tẹ jọ omẹ oma nọ mẹ Jihova ọ be ta ẹme kẹ na.” A jọ ovuẹ na ta re nọ, o rẹ kẹ evawere ziezi nọ ma tẹ roma kẹ uvẹ sa-sa nọ u rovie fihọ evaọ iruo Uvie na. Daniel ọ riẹ nọ onana uzẹme. Oke yena aye riẹ o mu iruo ọkobaro họ no yọ ọ be ginẹ wereva.

Daniel ọ ta nọ: “Mẹ tẹ ta nọ oke u te no nọ me re ro kuomarẹriẹ.” Yọ ere me gine ru. O si no oke iruo riẹ, o te mu iruo ọkobaro họ, kẹsena o te je roro kpahe evawere nọ tei te aye riẹ a rẹ sai wo nọ a tẹ kwa kpohọ ẹkwotọ nọ a jọ mae gwọlọ iwhowho-uvie.

Evaọ Asoi 2007, Daniel avọ aye riẹ a te no iruo rai jẹ kwa kpobọ Panama, orẹwho jọ nọ a weze kpohọ no vẹre. Ubrotọ nọ a re se Bocas del Toro Archipelago evaọ Caribbean Sea nọ u wo ikoliko sa-sa o jọ ẹkwotọ ọkpokpọ rai na. Ahwo ẹvẹrẹ nọ a re se Guaymi e mai bu ẹkwotọ nana. Daniel avọ aye riẹ a tẹ jiroro nọ ugho nọ a kokohọ no u ti te ae rẹrote omarai oware wọhọ emera eree evaọ Panama.

Okọ gbe ẹdhighere a je ro no oria ruọ oria evaọ ikoliko na, yọ a kareghẹhọ orọ ọsosuọ nọ a rọ rehọ ẹdhighere dhẹ ugbo nọ u te emaele udhe, a dhẹ igbehru avọ uvo ogaga nọ o jẹ rowo ae. Omojọ u kiọkọ re aro o bi Daniel kie fiki oma nọ o lọhọ e riẹ. Ghele na, ahwo Guaymi nọ iwou rai e kẹle edhere a jẹ hai dede ae rehọ ziezi nọ a jọ erẹ na, maero nọ ọzae-avọ-aye na a wuhrẹ eme jọ no evaọ ẹvẹrẹ na. O raha oke he, a te je wuhrẹ Ebaibol kugbe ahwo udhegbesa soso.

Rekọ nọ ugho rai u re no, evawere ọzae-avọ-aye nana i te zihe ruọ uweri. Daniel ọ ta nọ: “Avọ irui-oviẹ, ma te je roro epanọ ma ti ro zihe kpobọ Spain. O da omai gaga nọ ma be te nyasiọ emọ-uwuhrẹ Ebaibol mai ba.” Rekọ amara nọ o lele i rie, a te yo emamọ usi jọ. Miriam ọ ta nọ: “A zizie omai nọ ma jọ ekobaro obọdẹ. A rẹ ruẹ obọ oghọghọ riẹ hẹ inọ ma daji ẹkwotọ na!”

Fiki enwene nọ ọ jọ ukoko na roma via evaọ 2015, ukoko na o tẹ ta kẹ Daniel avọ aye riẹ nọ a zihe kpohọ iruo ọkobaro oke-kpobi. Kọ eme a ti ru na? A fievahọ eyaa nọ e rrọ Olezi 37:5 nọ o ta nọ: “Rọ oma ra kpobi kẹ ỌNOWO, fievahọ iẹ, o ti ru gba kẹ owhẹ.” A ruẹ iruo nọ a rẹ sae rọ rẹrote omarai nọ a rrọ ekobaro oke-kpobi na, yọ enẹna a rrọ ukoko jọ evaọ ubrotọ Veraguas, obọ Panama.

Daniel ọ ta nọ: “Taure ma te ti no Spain, u mu omai ẹro ho sọ ma rẹ sae kpairoro vrẹ eware jọ fiki iruo Uvie na je yeri umutho uzuazọ. Rekọ uzuazọ utioye ma bi yeri nẹnẹ na, yọ oware ovuovo nọ u gine wuzou o kare omai hi.” Eme ọ be mae kẹ ọzae-avọ-aye nana evawere? A ta nọ: “Re ma fiobọhọ kẹ ahwo nọ a wo omaurokpotọ riẹ Jihova, o be kẹ omai evawere nọ a rẹ ruẹ obọ riẹ hẹ!”