NỌ UKPE 1910 o vrẹ no, ọsẹgboni mẹ a tẹ kwa no ẹwho Tbilisi evaọ Georgia kpobọ Canada, kẹsena a tẹ jẹ rria uwou osese nọ o jọ udhu kẹle iwhre Pelly, evaọ Saskatchewan nọ o rrọ ofẹ jọ Canada. A yẹ omẹ evaọ 1928, yọ mẹ họ ubreyẹ evaọ usu emọ ezeza. Emerae ezeza taure a te ti yẹ omẹ ọsẹ mẹ o ro whu, yọ oni mẹ o whu nọ mẹ gbẹ jọ ọmaha. U kri hi, oniọvo-ọmọtẹ mẹ nọ ọ mae kpako o te je whu nọ ọ kpako te ikpe ikpegbihrẹ no. Kẹsena, oniọvo oni mẹ nọ ọ rrọ ọzae ọ tẹ rehọ omẹ avọ inievo mẹ nọ i kiọkọ fihọ uwou.

Nọ mẹ nwani wuhrẹ onya no, u wo ẹdẹjọ nọ ahwo uviuwou mẹ a ruẹ omẹ nọ me bi si uweli anyenya mai jọ, ọrọ ọzae. Ozọ u te je mu ai gaga nọ anyenya na o ti thihi omẹ, fikiere a te je bo gaga nọ mẹ seba, rekọ me nuhu oma ha. Me kiuke ku ai, me je yo ubo rai na vievie he. Oware nọ Ọghẹnẹ o re ru na, anyenya na ọ nwa omẹ oma ha, rekọ ẹdẹ yena ahwo uviuwou mẹ a rọ riẹ nọ me diezọ.

Ọzae jọ nọ ọ rrọ ogbẹnyusu uviuwou mai ọ tẹ jiroro kẹ ahwo uviuwou mẹ nọ jọ a rọ omẹ kpohọ isukulu ahwo nọ a diezọ nọ a be jọ wuhrẹ emọ efa nọ i diezọ. Fikiere a te fi omẹ họ isukulu ahwo nọ a diezọ nọ ọ rrọ Saskatoon, evaọ Saskatchewan. Oria na o rehọ euwa buobu thabọ no obonọ uviuwou mẹ o jọ, onana u ru nọ ozọ u je ro mu omẹ gaga keme ikpe isoi ọvo mẹ jọ oke yena. Oke ehọlide ọvo a jẹ hae rọ rehọ omẹ kpo nyae ruẹ ahwo uviuwou mẹ. Ukuhọ riẹ, mẹ tẹ riẹ ẹvẹrẹ obọ rọ t’ẹme, je ru nọ mẹ jẹ sai ro lele emọ efa zaharo avọ evawere.

Evaọ 1939, oniọvo ọmọtẹ ọkpako mẹ nọ a re se Marion avọ Bill Danylchuck a tẹ ruọ orọo, kẹsena a tẹ rehọ omẹ avọ oniọvo-ọmọtẹ mẹ ọfa nọ a re se  Frances fihọ uwou. Ae họ ahwo ọsosuọ evaọ uviuwou mai nọ a nyaku Isẹri Jihova. Nọ ma tẹ rrọ ehọlide, a rẹ daoma wuhrẹ omẹ eware nọ ae omarai a bi wuhrẹ evaọ Ebaibol na. Uzẹme na họ, o jọ bẹbẹ gaga re ma ta ẹme kugbe keme a riẹ ẹvẹrẹ obọ rọ t’ẹme he. Rekọ a ruẹ vuhumu nọ mẹ ginẹ gwọlọ gọ Ọghẹnẹ. Mẹ ruẹ nọ oware nọ a bi ru o rọwo kugbe oware nọ Ebaibol na ọ ta, fikiere me te je lele ai kpohọ usiuwoma ota. U kri hi, mẹ tẹ gwọlọ nọ mẹ rẹ họ-ame. Kẹsena evaọ Azie 5, 1941, Bill ọ tẹ họ omẹ ame evaọ odhe jọ nọ a se ame no ozae fihọ. Ame na ọ jọ dhedhẹ gaga!

Nọ me kpohọ ehọlide ẹdẹjọ evaọ 1946, ma kpohọ okokohọ ologbo evaọ ẹwho Cleveland nọ ọ rrọ Ohio, obọ America. Evaọ ẹdẹ ọsosuọ okokohọ na, inievo mẹ a je kere eme na fihọ obe kẹ omẹ re mẹ sai wo otoriẹ rai. Rekọ evaọ ẹdẹ avivẹ, eva e were omẹ gaga nọ mẹ ruẹ nọ utu ahwo jọ nọ a diezọ a jariẹ nọ ohwo jọ ọ jẹ rọ ẹvẹrẹ obọ rọ t’ẹme fa eme na kẹ. Ukuhọ riẹ, mẹ tẹ jẹ reawere okokohọ na, yọ o jọ oware evawere gaga nọ me ro mu otoriẹ uzẹme Ebaibol na họ ewo ziezi!

Oke yena Ẹmo Akpọ Avivẹ ọ nwani kuhọ obọ, yọ uruemu orẹwho-mẹ-oja o da ohwo kpobi oma fia. Nọ me zihe no okokohọ na kpozi, mẹ tẹ gbaemu nọ mẹ rẹ jọ obọ isukulu dikihẹ kẹ eware nọ mẹ rọwo. Fikiere me gbe je yere obiala ha, yọ mẹ gbẹ jẹ so ole orẹwho na ha. Me gbe je ru ehaa sa-sa nọ Ebaibol na o mukpahe he, yọ me gbe je wobọ evaọ iruẹru ichọche he. Onana o were iticha isukulu na vievie he, fikiere a te je guegue omẹ je ta erue kẹ omẹ re mẹ ruẹsi nwene iroro kpahe eware nọ mẹ rọwo. Onana o dina wha ohẹriẹ fihọ udevie emọ isukulu na, rekọ o kẹ omẹ uvẹ nọ mẹ rọ ta usiuwoma. Uwhremu na, emọ eklase mẹ jọ nọ a re se Larry Androsoff, Norman Dittrick, gbe Emil Schneider a jẹ uzẹme na rehọ, yọ aimasa a gbẹ be gọ Jihova rite inẹnẹ.

Oke kpobi nọ me te kpohọ erẹ, mẹ rẹ daoma ta usiuwoma kẹ ahwo nọ a diezọ nọ mẹ ruẹ evaọ ewho efa. Wọhọ oriruo, me kpohọ oria nọ mẹ jọ ruẹ ahwo utu jọ nọ a diezọ evaọ Montreal, mẹ tẹ jọ etẹe ta usiuwoma kẹ Eddie Taeger nọ ọ jọ omọvo utu ahwo ugbarugba jọ. Rite ukpe nukpo nọ o ro whu, ọ jọ omọvo ukoko obọ rọ t’ẹme evaọ Laval, obọ Quebec. Mẹ nyaku Juan Ardanez jẹ ta usiuwoma kẹe re, ọ jẹ rọ ọwhọ kiẹ eware nọ o je wuhrẹ no Ebaibol ze wọhọ ahwo Bẹria. (Iruẹru 17:​10, 11) Ọyomariẹ o kurẹriẹ ziọ ukoko na re, jẹ jọ ọkpako evaọ ukoko Ottawa nọ o jọ Ontario bẹsenọ o ro whu.

Evaọ 1950, mẹ tẹ kwa kpobọ Vancouver. Dede nọ o jẹ hae were omẹ gaga re mẹ ta usiuwoma kẹ ahwo nọ a diezọ, mẹ rẹ gbẹ kareghẹhọ oware nọ o via ẹdẹjọ nọ mẹ jọ iyẹrẹ ta usiuwoma kẹ aye jọ nọ a re se Chris Spicer, nọ o diezọ họ. Aye na o fi odẹ  hotọ nọ mẹ hae kẹe emagazini, ọ tẹ jẹ ta nọ ọ gwọlọ nọ mẹ ruẹ ọzae riẹ nọ a re se Gary. Fikiere me te kpobọ uwou rai, kẹsena ma te je kere eme rọ ta ẹme kẹ ohwohwo, yọ ma ta ẹme lelehie. Ẹdẹ yena mẹ ruẹ e rai ba. Rekọ u gbe omẹ unu gaga inọ evaọ okokohọ ologbo jọ nọ ma ru evaọ Toronto nọ ọ rrọ Ontario nọ imikpe jọ e vrẹ no, a jariẹ re je vuhu omẹ evaọ ogbotu na. Ẹdẹ yena Gary ọ be te họ-ame. Oware nana o kareghẹhọ omẹ nọ u gine wuzou gaga re ma hae ta usiuwoma na oke kpobi, keme ma riẹ oria nọ ubi uzẹme na o sae jọ dhẹ gbe oke nọ o sae rọ dhẹ hẹ.

Nọ oke jọ o ruemu no, mẹ tẹ kwa kpobọ Saskatoon. Mẹ tẹ jọ obei ruẹ aye jọ nọ ọ ta nọ me wuhrẹ Ebaibol na kugbe emetẹ riẹ nọ i diezọ nọ a re se Jean avọ Joan Rothenberger. Aimava na ejime, yọ isukulu ahwo idiezọ nọ me kpohọ na a jọ. U kri hi, emetẹ ivẹ nana a tẹ jẹ vuẹ emọ-eklase rai eware nọ a bi wuhrẹ. Uwhremu na, emetẹ isoi efa nọ e jọ eklase rai na a te zihe ruọ Isẹri Jihova. Ọjọ rai họ Eunice Colin. Okenọ mẹ jọ eklase urere mẹ rọ kake ruẹ Eunice evaọ isukulu na. Evaọ oke yena, u wo ẹdẹjọ nọ Eunice ọ kẹ omẹ iswiti jẹ ta nọ mẹ jọ ogbẹnyusu riẹ. Uwhremu na, mẹ avọ Eunice ma tẹ ruọ orọo, yọ ọ jọ ghaghae kẹ omẹ gaga!

Okenọ oni Eunice ọ riẹ nọ Eunice o bi wuhrẹ Ebaibol na, ọ tẹ ta kẹ ọnọ o wuzou isukulu na nọ ọ daoma kpobi re ọ whaha iẹe. Ọnọ o wuzou isukulu na o tube mi Eunice ebe riẹ kpobi nọ o je ro wuhrẹ Ebaibol na. Rekọ Eunice ọ gba riẹ mu nọ ọ rẹ talamu usu riẹ kugbe Jihova. Okenọ ọ jẹ gwọlọ họ-ame, ọsẹgboni riẹ a vuẹ riẹ nọ, “Who te zihe ruọ Osẹri Jihova, who ti no uwou na!” Eunice o gine no uwou na evaọ okenọ ọ jọ ikpe ikpegbihrẹ, kẹsena uviuwou jọ evaọ ukoko na o tẹ rehọ iẹe fihọ uwou. Ọ ruabọhọ uwuhrẹ riẹ, kẹsena ọ tẹ họ-ame. Okenọ ma ruọ orọo evaọ 1960, ọsẹgboni riẹ a ziọ ehaa-orọo mai hi. Rekọ nọ ikpe e be nyaharo na, ọsẹgboni riẹ a te ti  wo adhẹẹ kẹ omai fiki eware nọ ma rọwo gbe oghẹrẹ nọ ma jẹ rọ yọrọ emọ mai.

Dede nọ mẹ avọ aye mẹ ma diezọ, ma yẹ emezae ihrẹ nọ i diezọ họ. O jọ bẹbẹ re ma yọrọ ae, rekọ ma daoma ruẹ nọ a wuhrẹ ẹvẹrẹ obọ rọ t’ẹme re ma sae ta ẹme kugbe ziezi je wuhrẹ ai uzẹme na. Inievo ukoko na a fiobọhọ kẹ omai gaga re. Wọhọ oriruo, u wo ẹdẹjọ evaọ obọ ewuhrẹ nọ ọyewọ jọ o kere obe kẹ omai nọ emezae mai a be ta ekpehre ẹme evaọ Ọgwa Uvie na. Ma sae kpọ emọ na họ ẹsiẹsiẹ yena. Emezae ene mai nọ a re se, James, Jerry, Nicholas, gbe Steven avọ eyae rai a rrọ ukoko na be gọ Jihova. Ae imane na ekpako ukoko. U te no ere no, Nicholas avọ aye riẹ, Deborah a rrọ uwou ogha Britain bi fiobọhọ evaọ ofẹ efafa ẹvẹrẹ obọ rọ t’ẹme, yọ Steven avọ aye riẹ, Shannan a rrọ utu efafa ẹvẹrẹ obọ rọ t’ẹme re evaọ uwou ogha United States.

Amara ọvo taure ma tẹ gba ikpe udhuvẹ evaọ orọo mai, Eunice o te whu fiki ẹyao ọta. Udu o jariẹ awọ evaọ etoke nọ ọ jẹ rọ mọ na kpobi. Ẹrọwọ nọ o fihọ ẹkparomatha na o bọ riẹ ga evaọ etoke yena. Me bi rẹro okenọ mẹ te rọ wariẹ ruẹ e riẹ nọ a tẹ kpare riẹ ze no.

Evaọ Ava 2012, me kie kpare ọthọ. U te ru nọ o rọ gwọlọ nọ ohwo jọ ọ rẹ rẹrote omẹ. Fikiere mẹ tẹ jẹ rria kugbe ọmọzae mẹ jọ avọ aye riẹ. Enẹna ma rrọ ukoko ẹvẹrẹ obọ rọ t’ẹme nọ o rrọ Calgary, yọ mẹ gbẹ rrọ ọkpako ukoko. Onana họ orọ ọsosuọ nọ mẹ rọ rrọ ukoko ẹvẹrẹ obọ rọ t’ẹme. Dai roro iei, ukoko Oyibo mẹ rrọ anwọ ukpe 1946 ze na. U gbunu kẹhẹ epanọ mẹ sai ro kruga evaọ egagọ Jihova ikpe nana kpobi. Jihova ọ ta nọ ọ rẹ rẹrote emọ nọ i wo esẹ hẹ, yọ o gine ru eyaa riẹ gba. (Ol. 10:14) Me yere ahwo kpobi nọ a je kere eme fihọ obe kẹ omẹ, enọ i wuhrẹ ẹvẹrẹ obọ rọ t’ẹme, gbe enọ e jẹ fa eme nọ a be ta fihọ ẹvẹrẹ obọ rọ t’ẹme kẹ omẹ re mẹ sai wo otoriẹ rai.

Uzẹme na họ, u wo okejọ nọ udu u re whrehe omẹ te epanọ mẹ rọ gwọlọ siọ iruo Uvie na ba, keme mẹ jẹ sai wo otoriẹ ẹme nọ a be ta ha. Yọ o jẹ hae jọ omẹ oma nọ ohwo ọvo o bi wo otoriẹ oware nọ ahwo nọ a diezọ a be rẹriẹ ovao dhe he. Rekọ evaọ oke yena, mẹ jẹ hae kareghẹhọ ẹme nọ Pita ọ ta kẹ Jesu inọ: “Olori, ono ma rẹ nya bru? Who wo eme nọ e rẹ kẹ uzuazọ ebẹdẹ bẹdẹ.” (Jọn 6:​66-68) Wọhọ inievo efa buobu nọ i diezọ evaọ oke mẹ, me wuhrẹ ithihakọ. Me wuhrẹ epanọ ohwo o re thihakọ hẹrẹ Jihova gbe ukoko riẹ, yọ me wo erere ologbo no onana ze no! Enẹna, iwuhrẹ Ebaibol buobu e riẹ no evaọ ẹvẹrẹ obọ rọ t’ẹme, yọ mẹ rẹ sae jọ obọ ewuhrẹ gbe okokohọ reawere omakugbe inievo na evaọ ẹvẹrẹ obọ rọ t’ẹme. Ababọ avro, me yeri emamọ uzuazọ nọ o kẹ omẹ evawere no evaọ egagọ Jihova, Ọghẹnẹ Oride mai na.