MAI ahwo idu eree (8,000) ma kokohọ evaọ ohiohiẹ Ediso-Oka ọrọ Azie 1922, nọ oke o be nyaharo na ọgwa nọ ma jọ na o te muhọ ẹroro. Ohwo-agbara na o te whowho nọ evaọ abọ nana okokohọ na nọ o wuzou gaga na, ohwo nọ u je kpobi ọ rẹ sae kpama vrẹ, rekọ a te kẹ ohwo ọvo uvẹ zihe rueva ha.

A so ile evaọ abọ emuhọ nọ a re se “Ile Egagọ” na, kẹsena Brọda Joseph F. Rutherford ọ tẹ ruọ eplatfọmo. Ahwo buobu evaọ ogbotu na a je rẹro oware nọ u ti lele iei. Ibi ahwo jọ a tẹ jẹ nya kpenẹ avọ enẹ evaọ ọdha na. Brọda Rutherford ọ tẹ ta nọ jọ a keria re a gaviezọ. Nọ ovuẹ riẹ u muhọ no, ma riẹ hẹ sọ ohwo jọ o muẹrohọ omohọ ulogbo nọ a kpiri wowoma jẹhọ obehru evaọ ọgwa na!

Uzoẹme ovuẹ nọ Brọda Rutherford ọ jẹ kẹ na họ, “Uvie odhiwu na o kẹle no.” Oware wọhọ auwa ọvo gbe ubro, uvou riẹ o jẹ rua evaọ ọgwa na, yọ ọ jẹ ta kpahe epanọ eruẹaro oke anwae a je ro whowho ovuẹ Uvie Ọghẹnẹ nọ ma bi rẹro riẹ na ududu. Nọ ọ joma kẹ ovuẹ na re no, ọ tẹ nọ inọ, “Kọ u mu owhai ẹro nọ Ovie oruaro na o mu esuo riẹ họ no?” Ogbotu na kpobi o te bo nọ: “Ee!”

Brọda Rutherford ọ tẹ ta avọ uvo oruarua nọ, “O tẹ rrọ ere, wha zihe kpohọ usiuwoma ota, O whai emọ Ọghẹnẹ nọ ọ mai kpehru na! . . . Rri, Ovie na o muhọ esuo no! Whai họ ahwo-ẹro riẹ. Fikiere wha whowho, wha whowho, wha whowho.”

Okioke yena, omohọ nọ a kpiri na u te ghelie rovie, yọ a kere fihọ iẹe nọ: “Wha Whowho Ovie na avọ Uvie Riẹ.”

Brọda Ray Bopp ọ ta nọ: “Ogbotu na kpobi o te duwuku.” Sista Anna Gardner ọ ta nọ o wọhọ ẹsenọ “ikpo uwou na kpobi i je nuhu fiki abọ nọ a jẹ tehe.” Brọda Fred Twarosh ọ ta nọ: “Ogbotu na kpobi ọ tẹ kpama ẹsiẹvo.” Brọda Evangelos Scouffas ọ ta nọ: “O wọhọ nọ oghẹrẹ ẹgba jọ ọ wọ omai kpama no ekpala nọ ma keria, ma te dikihẹ avọ aro mai nọ o je su-ame.”

Ahwo buobu nọ a jọ okokohọ yena a jẹ ta usiuwoma Uvie na no anwẹdẹ. Rekọ a wo ajọwha ọkpokpọ kẹ iruo na evaọ okokohọ nana. Sista Ethel Bennecoff ọ ta nọ Emọ-Uwuhrẹ Ebaibol na a no okokohọ na “avọ ajọwha gbe uyoyou nọ o vọ udu rai vi epaọ anwẹdẹ kpobi.” Sista Odessa Tuck nọ ọ jọ ikpe ikpegberee oke yena o no okokohọ na avọ ọtamuo inọ ọ rẹ kpahe fihọ use na, “Ono ọ rẹ nya?” Ọ ta nọ: “Mẹ riẹ oria nọ mẹ te nya ha, hayo oghẹrẹ nọ mẹ te rọ nya, gbe oware nọ me ti ru. Oware ovo nọ mẹ riẹ họ, mẹ gwọlọ jọ wọhọ Aizaya, ọnọ ọ ta nọ, ‘Mẹ na! Vi omẹ.’” (Aiz. 6:8) Brọda Ralph Leffler ọ ta nọ: “Obọdẹ ẹdẹ . . . yena nọ ma ghọghọ kẹ na họ ẹdẹ nọ ma ro gine mu ovuẹ Uvie na họ ewhowho, ovuẹ nọ o nya akpọ na soso duwu no nẹnẹ.”

 Agbẹta nọ okokohọ nana nọ a jọ Cedar Point, Ohio ru evaọ ukpe 1922 na o rọ rrọ oware oka evaọ ikuigbe iruẹru idibo Ọghẹnẹ! Brọda George Gangas ọ ta nọ: “Okokohọ yena o ru omẹ wo ọtamuo inọ okokohọ ọvuọvo o re vo omẹ hẹ.” Ọ ta nọ anwọ oke yena vrẹ, okokohọ ọvuọvo o vo rie he. Sista Julia Wilcox o kere nọ: “Mẹ rẹ sai dhesẹ epanọ eva e rẹ were omẹ te he, oke kpobi nọ a tẹ fodẹ okokohọ Cedar Point nọ a ru evaọ ukpe 1922 na evaọ ebe mai. Oma o rẹ wọ omẹ bo nọ, ‘Me yere owhẹ Jihova, nọ whọ rọ kẹ omẹ uvẹ jọ etẹe.’”

Ẹsejọhọ, u wo okokohọ jọ nọ o kẹ omai otujọ buobu evawere gaga je ru omai wo ọwhọ gbe uyoyou ulogbo kẹ Ọghẹnẹ oride mai gbe Ovie riẹ na. Nọ ma bi roro kpahe okokohọ nana gbe efa itieye, oma o rẹ sae wọ omai ta re inọ, “Me yere owhẹ Jihova, nọ whọ rọ kẹ omẹ uvẹ jọ etẹe.”