“Nọ ọmọ oniọvo oni mẹ ọ jẹ gwọlọ omẹ ẹme, mẹ tẹ duọ ẹe uvou kekeke. Me je ti kpei no.”​—Paul.

“Omoware kpobi me re ro mu ofu. Nọ eva e tẹ nwane dha omẹ no, me re fi egbara, te eware nọ emaha e rẹ rọ zaharo, gbe oware kpobi nọ u te omẹ obọ.”​—Marco.

Ẹsejọhọ omai o nwani yoma te orọ ahwo nana ha. Rekọ o rẹ jọ bẹbẹ re ma nyẹ omamai ẹsejọ. Oware nọ o be mae whae ze họ uzioraha nọ ma reuku riẹ mi Adamu na. (Rom 5:12) Ahwo jọ a rẹ sae kpọ ofu rai hi, wọhọ Paul avọ Marco. U te je wo amọfa nọ a rẹ sae kpọ iroro rai hi. A rẹ ruawa gaga. Yọ amọfa a rẹ sae whaha ọfariẹ-ogbe he, hayo idieda-thomawa hayo imu egaga erehọ.

Ahwo nọ a rẹ sae kpọ ofu rai hi, hayo nọ a rẹ sai si ekpehre iroro gbe ekpehre isiuru no udu hu a rẹ sae raha uzuazọ rai kuotọ. Kọ ẹvẹ ma sae rọ whaha onana? Ma re wo oma-onyẹ. Re ma sai wo uruemu nana, joma kuyo enọ esa nana: (1) Eme họ oma-onyẹ? (2) Fikieme u ro wuzou? (3) Ẹvẹ ma sai ro wo uruemu nana nọ o rrọ abọjọ “ubi ẹzi na”? (Gal. 5:22, 23) Kẹsena ma vẹ te ta kpahe oware nọ ma rẹ sai ru otẹrọnọ ma sae nyẹ omamai evaọ oware jọ họ.

Ohwo nọ o wo oma-onyẹ, orọnikọ oware kpobi nọ o sa noi eva ze o re ru hu. Ọ rẹ yọroma re ọ gbẹ ta ẹme hayo ru oware nọ o rẹ dha Ọghẹnẹ eva ha.

Ma rẹ sai wuhrẹ oma-onyẹ mi Jesu. Ebaibol na ọ ta nọ: “Nọ a jẹ lae eka, ọ la eka zihe he. Nọ ọ jẹ ruẹ uye, o seha kẹ enọ e jẹ kẹe uye he, rekọ o mu omariẹ họ obọ Ọnọ o re bruoziẹ okiẹrẹe na.” (1 Pita 2:23) Ere Jesu o ru evaọ okenọ a kare iẹe fihọ ure-oja. Dede nọ a jẹ lae eka ọ nyẹ omariẹ. (Mat. 27:39-44) Taure oke nana u te ti te, nọ isu egagọ nọ i mukpahe iẹe a jẹ gwọlọ ru ei ta ẹme nọ a rẹ rọ rehọ uzi kru ei, a ru bẹ. Jesu ọ nyẹ omariẹ. (Mat. 22:15-22) Ofariẹ, okenọ ahwo Ju jọ nọ eva e jẹ dha a tọlọ itho re a ro fi ei, ọ kpọ rai unu hu. Ebaibol ọ ta nọ: “Jesu o te dhere, ọ tẹ nya no etẹmpol na.” (Jọn 8:57-59) Oma-onyẹ riẹ u gbunu kẹhẹ!

Kọ ma sai ru epanọ Jesu o ru na? Ma sae daoma. Pita ukọ na o kere nọ: “Kristi . . . ọ ruẹ uye kẹ owhai, ọ nyasiọ oriruo ba kẹ owhai re wha lele ithihi riẹ kpekpekpe.” (1 Pita 2:21) Dede nọ ma gba ha, ma sai lele oriruo oma-onyẹ Jesu kpekpekpe. Fikieme u ro wuzou re ma ru ere?

Ma tẹ gwọlọ nọ Jihova ọ wereva kugbe omai, ma re wo oma-onyẹ. O tẹ make rọnọ u kri no nọ ma be rọ gọ Jihova, ọ rẹ sae fa usu no omai otẹrọnọ ma gbẹ nyẹ omamai hi.

Kareghẹhọ Mosis nọ ọ jọ “ọzae nọ ọ mai wolẹ kpaobọ evaọ usu ahwo kpobi nọ a jọ otọakpọ na.” (Ik. 12:3) Dede nọ ọ nyẹ omariẹ ikpe buobu nọ ahwo Izrẹl a jẹ rọ go, ẹdẹ jọ ọ sae gba omariẹ hẹ. Nọ a wariẹ mu enu họ ebru inọ a wo ame he, eva e tẹ dha Mosis gaga. Ọ rọ ofu ta ẹme kẹ ae, inọ: “Wha gaviezọ, whai ahwo ọkparesuọ! Kọ wha be ginẹ gwọlọ nọ ma rehọ ame no ugbehru-utho nana ze kẹ owhai?”​—Ik. 20:2-11.

Mosis ọ nyẹ omariẹ evaọ onana ha. Ọ rehọ orro kẹ Jihova ha, inọ ọye họ Ọnọ ọ rọ edhere igbunu kẹ ae ame na. (Ol. 106:32, 33) Onana o tẹ whae ze nọ Jihova ọ gbẹ rọ kẹe uvẹ ruọ eva Ẹkwotọ Eyaa na ha. (Ik. 20:12) Ababọ avro, Mosis ọ vioja onana bọwo ẹdẹ uwhu riẹ.​—Izie. 3:23-27.

Eme onana u wuhrẹ omai? O tẹ make rọnọ ma rrọ ukoko Jihova kri no, ma re duwu eme họ kẹ ahwo nọ a ru eva dha omai vievie he, hayo enọ ma be kẹ ohrẹ. (Ẹf. 4:32; Kọl. 3:12) Nọ ma be kpako na, o rẹ sae ginẹ jọ bẹbẹ ẹsejọ re ma gba omamai. Rekọ kareghẹhọ Mosis. Ajọ ma raha emamọ odẹ nọ ma wo vievie he fiki oware jọ nọ ma jọ gba omamai hi. Kọ ẹvẹ ma sai ro wo emamọ uruemu nana?

Lẹ se Jihova re ọ kẹ owhẹ ẹzi ọfuafo. Fikieme? Keme oma-onyẹ yọ abọjọ ubi ẹzi Ọghẹnẹ, yọ Jihova ọ rẹ rọ ẹzi riẹ kẹ enọ e yare riẹ. (Luk 11:13) Ẹzi Jihova o re fiobọhọ kẹ omai nyẹ omamai. (Fil. 4:13) Ẹzi riẹ o re je fiobọhọ kẹ omai wo iruemu efa nọ e rẹ lẹliẹ omai wo oma-onyẹ. Uruemu utioye jọ họ uyoyou.​—1 Kọr. 13:5.

Kẹnoma kẹ oware kpobi nọ o rẹ sae lẹliẹ owhẹ kie ruọ odawọ. Wọhọ oriruo, u fo vievie he re who kpohọ eria itanẹte hayo romakẹ eware arozaha nọ a be jọ dhesẹ eware nọ i kiehọ họ. (Ẹf. 5:3, 4) Ma rẹ kẹnoma kẹ oware kpobi nọ o rẹ lẹliẹ oware  uyoma si omai urru. (Itẹ 22:3; 1 Kọr. 6:12) Ma rehọ iẹe nọ o rrọ bẹbẹ kẹ ohwo jọ re o si isiuru ọfariẹ-ogbe no udu. Ohwo otiọye na ọ rẹ sae jiroro nọ o re gbe se obe nọ o ta kpahe usu ọmọtẹ avọ ọmọzae he hayo rri ifimu itieye he.

O sae jọ bẹbẹ re ma ru onana. Rekọ, ma tẹ daoma ru ei, Jihova ọ te kẹ omai ẹgba nọ ma sae rọ whaha oware uyoma. (2 Pita 1:5-8) O ti fiobọhọ kẹ omai si ekpehre iroro no udu, jẹ whaha eme gbe iruemu nọ i fo ho. Ere o via kẹ Paul avọ Marco nọ ma fodẹ ẹsiẹ na. Aimava a siọ ofu ba uwhremu na. U wo oniọvo-ọmọzae ọfa jọ nọ ọ jẹ hai lele ahwo whọ gaga nọ ọ tẹ be dhẹ omoto. Kọ eme o fiobọhọ kẹe? Ọ ta nọ: “Kẹdẹ kẹdẹ mẹ jẹ hae lẹ se Ọghẹnẹ no udu kpobi ze. Me se izoẹme buobu nọ e ta kpahe oma-onyẹ evaọ ebe mai, me te je fi eria Ebaibol nọ e rẹ sai fiobọhọ kẹ omẹ họ uzou. Dede nọ u kri no nọ mẹ be rọ daoma fihọ onana, kohiohiẹ kohiohiẹ mẹ rẹ gbaemu nọ mẹ rẹ whaha ofu. Mẹ rẹ jẹ daoma kaki no uwou nọ me te bi kpohọ oria, re mẹ gbẹ varioma ha evaọ edhere.”

Ẹsejọ ma rẹ sae nyẹ omamai hi. Nọ o tẹ via ere, ẹsejọhọ omovuọ o te jọ omai lẹ se Jihova ha. Rekọ oke utiona o tubẹ mae gwọlọ nọ ma rẹ lẹ. Fikiere, lẹ se Jihova ababọ oke oraha. Ta kẹe nọ ọ rọvrẹ owhẹ je fiobọhọ kẹ owhẹ. Whọ vẹ jẹ gbaemu nọ who re gbe ru oware uyoma yena ẹdẹfa ha. (Ol. 51:9-11) Jihova ọ te re ohrọ ra, o ti le owhẹ kufiẹ hẹ. (Ol. 102:17) Jọn ukọ na ọ kareghẹhọ omai nọ azẹ Ọmọ Ọghẹnẹ “o re ru omai fo no uzioraha kpobi.” (1 Jọn 1:7; 2:1; Ol. 86:5) Kareghẹhọ nọ Jihova ọ ta kẹ idibo riẹ nọ a hae rọvrẹ amọfa ẹsikpobi. Fikiere, ma riẹ nọ ọ te rọvrẹ omai re.​—Mat. 18:21, 22; Kọl. 3:13.

O kẹ Jihova uye nọ Mosis o mu ofu kẹ ahwo Izrẹl evaọ udhude na. Rekọ Jihova ọ rọvrẹ riẹ. Yọ Ọghẹnẹ ọ jọ Ebaibol na ta nọ Mosis yọ ohwo nọ o wo ẹrọwọ gaga nọ ma rẹ rọ aro kele. (Izie. 34:10; Hib. 11:24-28) Jihova ọ kẹ Mosis uvẹ ruọ Ẹkwotọ Eyaa na ha, rekọ ọ te kpare iẹe no uwhu ze re ọ rria akpọ ọkpokpọ na bẹdẹ bẹdẹ. Oghale utioye na u ti te omai obọ otẹrọnọ ma daoma kpobi re ma wo oma-onyẹ.​—1 Kọr. 9:25.