A yẹ omẹ evaọ Asoi 19, 1940, evaọ ẹwho nọ a re se Amioûn, obọ Lebanon. Nọ a yẹ omẹ no, imikpe jọ nọ i lele i rie, ma tẹ kwa kpobọ Tripoli. Ma you ohwohwo gaga evaọ uwou mai, ma te je you Jihova re, yọ eva e jẹ were omai. Emọ isoi ọsẹgboni mẹ a yẹ. Emetẹ esa, emezae ivẹ, yọ mẹ họ ubreyẹ. Egagọ Jihova họ oware nọ o mae jọ ọsẹgboni mẹ oja, orọnikọ epanọ ma re ro wo ugho ho. Ma re wuhrẹ Ebaibol, ma re kpohọ ewuhrẹ je kpohọ usi uwoma ẹsikpobi.

Inievo nọ a rọ ẹzi wholo e jọ ukoko mai ziezi. Ọjọ rai họ Brọda Michel Aboud, ọye ọ jẹ hai ru uwuhrẹ obe ukoko kẹ omai. Obọ New York ọ jọ kurẹriẹ ziọ ukoko na. Kẹsena evaọ 1921, ọ tẹ wha usi uwoma na ziọ obọ Lebanon. O fiobọhọ kẹ inievo-emetẹ ivẹ jọ nọ i nwrotọ no isukulu Giliad ze gaga, yọ ọ jẹ hae kẹ ae adhẹẹ gaga re. Edẹ rai họ Anne Beavor, gbe Gwen Beavor. Mai kpobi ma te ti zihe ruọ egbẹnyusu ekpekpe. Uwhremu na ma te kpohọ ọvuọ oboriẹ. Nọ ikpe buobu e vrẹ no, mẹ tẹ ruẹ Anne evaọ obọ United States, yọ eva e were omẹ gaga. Nọ omoke jọ o vrẹ no, mẹ tẹ jẹ ruẹ Gwen, oke nana yọ o wo ọzae no. Brọda Wilfred Gooch họ ọzae riẹ, yọ aimava na a je ru iruo evaọ uwou ogha London, obọ England.

Oke nọ mẹ gbẹ jọ ọmaha, Isẹri Jihova nọ e jọ Lebanon a tulo ho. Dede na, ma jẹ ta usi uwoma na kẹ ahwo kpobi avọ ajọwha. Ma jẹ ta usi uwoma na dede nọ isu egagọ na jọ a jẹ wọso omai. Jọ me gbiku eware jọ nọ e via oke yena nọ mẹ gbẹ kareghẹhọ.

Ẹdẹ jọ, mẹ avọ oniọvo-ọmọtẹ mẹ nọ a re se Sana ma jẹ ta usi uwoma kẹ ahwo evaọ ighẹ jọ. Olorida egagọ jọ ọ tẹ nyaze oria nọ ma jẹ jọ ta usi uwoma na. Yọ o wọhọ nọ ohwo jọ o se rie ze. O te mu oniọvo mẹ eka họ ẹla. O te bi je ru ozighi. O te gele oniọvo mẹ no istẹpo na ziọ obotọ, oniọvo mẹ ọ tẹ nwoma. Ohwo jọ o te se iporisi. Nọ iporisi na e nyaze, a te ru re ohwo jọ o fiobọhọ kẹ oniọvo mẹ nọ ọ nwoma na. A te mu olorida na kpobọ ogba iporisi. A tẹ jọ obei ruẹ nọ kpakọ uresa o rrọ ẹkpa riẹ. Ọga iporisi na ọ tẹ nọe nọ: “Kọ whẹ ginọ osu egagọ manikọ osu ahwo ugbarugba?”

Mẹ kareghẹhọ oware ofa jọ nọ o via. Ukoko mai o haya omoto nọ ma ro kpohọ ẹwho jọ nyae ta usi uwoma. Usi uwoma na o jẹ were omai oma ọvo. Rekọ nọ olorida egagọ jọ o yo nọ ma be ta usi uwoma evaọ ẹwho na, o te koko ahwo họ ze ti ru ozighi. A tẹ jẹ rọ itho fi omai, jẹ nwa ọsẹ mẹ oma. Ovao riẹ kpobi u te je hwẹ azẹ. Oni mẹ o te kru rie kpobọ omoto nọ ma ro ze na. Mai ahwo nọ a kiọkọ ma tẹ rọ kpahe ae, yọ udu u bi bru omai. Ẹme nọ oni mẹ ọ ta oke nọ o je ro ririe azẹ no ọsẹ mẹ ovao o rẹ thọrọ omẹ ẹro ho. Ọ ta nọ: “Jihova, ivie rọvrẹ rai. Keme a riẹ oware nọ a bi ru hu.”

U wo ẹdẹ ọfa jọ nọ ma rọ nyae ruẹ imoni mai evaọ obọ ẹwho nọ ma no ze. Nọ ma te obọ amọ ọsẹ-ologbo mẹ, ma tẹ ruẹ ibishọpo jọ evaọ uwou na. Ibishọpo na ọ riẹ nọ ọsẹgboni mẹ yọ Isẹri Jihova. Ibishọpo na ọ tẹ jẹ gwọlọ ru re oma o vuọ omẹ dede nọ ikpe ezeza ọvo mẹ jọ. Ọ nọ omẹ nọ: “Fikieme whọ gbẹ re rọ họ-ame he?” Mẹ tẹ ta kẹe nọ ọmaha mẹ gbẹ rrọ, inọ mẹ rẹ riẹ Ebaibol ziezi je wo ẹrọwọ ziezi re mẹ tẹ te họ-ame. Ẹme nọ mẹ ta kẹe na ọ were riẹ hẹ. Ọ tẹ vuẹ ọsẹ-ologbo mẹ nọ mẹ be wharo.

Dede na, ẹmẹsejọ ọvo oghẹrẹ eware itieye e via kẹ omai. Uzẹme riẹ họ, ahwo Lebanon a rrọ whẹtiẹ whẹtiẹ, yọ a re dede ohwo rehọ ziezi. Fikiere ahwo a jẹ hai yo usi uwoma ziezi, yọ ma je wuhrẹ Ebaibol kugbe ahwo buobu.

Oke nọ mẹ gbẹ jọ isukulu, oniọvo-ọmọzae jọ o te no Venezuela ziọ obọ Lebanon. Ukoko mai ọ jẹ hae rọ ziọ ewuhrẹ, ọ tẹ te rọ ere riẹ oniọvo mẹ ọrọ ọmọtẹ nọ a re se Wafa. Nọ u te oke jọ no, a tẹ rọo jẹ kwa kpobọ Venezuela. Oniọvo mẹ ọ jẹ hai kere ileta se omai, yọ ọ jẹ hae jọ ileta na vuẹ ọsẹ mai inọ ma ru re ma kwa kpobọ Venezuela. Oware nọ ọ jẹ hae rọ ta ere na họ, ẹro mai o je voi gaga. Uwhremu na ma tẹ te ginẹ kwa kpobọ Venezuela.

 Ukpe 1953 ma rọ kwa. Ẹwho nọ a re se Caracas ma jẹ rria, yọ oria na o kẹle ighẹ prẹsidẹnte Venezuela. Fikinọ mẹ gbẹ jọ ọmaha oke yena, mẹ jẹ hai rri ughe prẹsidẹnte na nọ ọ tẹ be dhẹ omoto owowoma riẹ vrẹ. O jẹ hae were omẹ gaga. Rekọ oke yena, eware e gbẹ jọ thọhọ thọhọ kẹ ọsẹgboni mẹ keme a re te riẹ ẹvẹrẹ na gbe uruemu ẹwho na ha, yọ emu rai ọ re te reria ae oma ha. U te no ere no, ezi iso gbe ezi ivo rai ọ re te reria ae oma gbe he. Evaọ oke nana nọ ma re dowọ mu otọ họ na, oware okpẹtu jọ o tẹ via.

Ọsẹ mẹ o kie ẹyao. Ma rẹro oware utiona vievie he, keme ọ jẹ mọ họ evaọ oke nọ ma je no obọ uwou ze. Ẹyao o ri kru rie fihotọ ẹdẹvo ho. Edọkita ọ tẹ ta nọ o wo ẹyao ọta. Kẹsena a te ru obẹrọ kẹe. Rekọ oka nọ u lele i rie o te whu. Uwhu riẹ na o da omai gaga.

Ma sae ruẹ unu gbiku epanọ uwhu ọsẹ mai o da omai te he! Ikpe ikpegbesa ọvo mẹ jọ oke yena, u gbe omai unu gaga. Ma je roro nọ akpọ o re kẹ omai no, ma roro nọ ma te gbẹ sae wereva ofa ha. Evaọ etoke jọ soso, u je mu oni mẹ ẹro ho inọ ọzae riẹ o gine whu no. Rekọ Jihova ọ kẹ omai udu nọ ma sai ro thihakọ je yeri akpọ mai vrẹ. Nọ me te ikpe ikpegbezeza no, me te nwrotọ no ekọleji evaọ Caracas. Mẹ tẹ jẹ gwọlọ nọ mẹ rẹ hai ru omoware nọ mẹ sae rọ rẹrote uviuwou mai.

Evaọ etoke nana, oniọvo jọ ọ jariẹ nọ a re se Rubén Araujo nọ o nwrotọ no isukulu Giliad ze nọ o zihe ziọ Venezuela. Ọ tẹ rehọ oniọvo-ọmọtẹ mẹ Sana. Uwhremu na a tẹ kwa kpobọ New York. Nọ ahwo uviuwou mẹ a ta nọ me kpohọ yunivasiti, kọ obọ New York mẹ rọ nya re mẹ jọ kugbe oniọvo mẹ avọ ọzae riẹ. Aimava na a fiobọhọ kẹ omẹ kruga ziezi evaọ ukoko na evaọ oke nọ mẹ jọ kugbe ae. Inievo efa jọ a fiobọhọ kẹ omẹ re evaọ ukoko Brooklyn Spanish nọ ma jọ. Ejọ rai họ, Brọda Milton Henschel gbe Brọda Frederick Franz. Aimava na a jọ iruo Ebẹtẹle evaọ Brooklyn.

Nọ ukpe ọsosuọ nọ mẹ rọ jọ yunivasiti na u bi te ekuhọ no, me te je roro kpahe oware nọ mẹ te rọ uzuazọ mẹ ru. Oke yena mẹ jẹ hai se izoẹme sa-sa evaọ Uwou-Eroro Na nọ e ta kpahe epanọ Oleleikristi o re ro fi emamọ itee họ. Mẹ jẹ hai roro kpahe eme nana. Me muẹrohọ nọ ekobaro gbe inievo nọ e rrọ iruo Ebẹtẹle nọ ma gbẹ rrọ ukoko a be wereva gaga. Yọ mẹ gwọlọ nọ mẹ rẹ wereva wọhọ inievo nana. Whaọ oke nana mẹ re te họ-ame he. U gbe kri hi, mẹ tẹ ruẹ nọ mẹ rẹ rọ uzuazọ mẹ mudhe kẹ Jihova, yọ ere me gine ru. Mẹ tẹ họ-ame evaọ Asa 30, 1957.

Nọ mẹ họ-ame no, me te je roro kpahe oware ofa nọ me re ru, koyehọ epanọ me re ro mu iruo odibọgba oke-kpobi họ. Iruo nana e ginẹ were omẹ, rekọ me roro nọ o te lọhọ họ re mẹ jọ ọkobaro oke-kpobi. Ẹme na họ, ẹvẹ mẹ te sae rọ jọ ọkobaro yọ mẹ rrọ  isukulu? Mẹ avọ amọ oni mẹ gbe inievo mẹ nọ a rrọ obọ Venezuela ma jẹ hai kere ileta se ohwohwo. Me je kere se ae inọ mẹ gwọlọ siọ isukulu na ba re me zihe kpobọ Venezuela, mẹ vẹ jọ obei jọ ọkobaro.

Me zihe kpobọ Caracas evaọ Azeza 1957. Nọ me te obei mẹ tẹ ruẹ nọ eware e lọhọ tere he evaọ uviuwou mai. U fo nọ omọfa jọ o re ru iruo re o kuobọgbe rẹrote uviuwou na. Whaọ mẹ gwọlọ fiobọhọ, kọ ẹvẹ mẹ te sai ro ru ei? Oware nọ Ọghẹnẹ o re ru na, a tẹ rehọ omẹ iruo evaọ ebanke jọ. Dede na, mẹ gwọlọ jọ ọkobaro re, keme oware nọ o lẹliẹ omẹ kpozi oye. Fikiere me te je ru ivẹ na. Me je wo uvẹ vievie he, rekọ eva e jẹ were omẹ gaga.

Oware ofa jọ nọ o lẹliẹ eva were omẹ gaga họ, oniọvo-ọmọtẹ jọ nọ a re se Sylvia. Oniọvo-ọmọtẹ nana ohwo Germany, o wo erru gaga, o te je you Jihova. Avọ ọsẹgboni riẹ a kwa ziọ Venezuela. U kri hi, ma tẹ ruọ orọo. Ma yẹ ọmọtẹ gbe ọmọzae. Odẹ ọrọ ọmọzae Michel, ọrọ ọmọtẹ kọ Samira. Oni mẹ ọ kwa bru omai ze, ma tẹ jẹ rẹrotei. Nọ u te oria jọ, mẹ tẹ siọ iruo ọkobaro na ba re mẹ sai ru iruo ziezi nọ mẹ rẹ rọ rẹrote uviuwou na. Dede na me gbe wo ajọwha usi uwoma ota ziezi. Mẹ avọ aye mẹ ma jẹ hai ru ọkobaro obufihọ nọ mẹ tẹ rrọ ilivi.

Emọ mẹ a gbẹ jọ isukulu evaọ oke nọ oware nọ mẹ fodẹ evaọ obọ emuhọ na o rọ via. Ugho o ginẹ jọ omai obọ, yọ a jẹ kẹ omẹ adhẹẹ gaga evaọ oria iruo mẹ. Ghele na, mẹ gwọlọ nọ a rẹ riẹ omẹ wọhọ Osẹri Jihova nọ o se egagọ Ọghẹnẹ gboja ziezi. Me te je roro kpahe oware nọ me re ru re a sae riẹ omẹ ere. Fikiere mẹ avọ aye mẹ ma tẹ keria totọ, ma tẹ jiroro kpahe ugho nọ ma bi wo gbe eware nọ ma be rehọ iẹe ru. Ma ruẹ nọ mẹ tẹ siọ iruo na ba, a te hwa omẹ osa ulogbo jọ. Yọ nọ orọnọ ma reosa ovo ho na, ma ti wo ugho nọ ma rẹ re oke lelehie ghele.

Dede nọ o lọhọ tere he, mẹ siọ iruo na ba. Yọ aye mẹ gbe oni mẹ a rọwo fihọ iẹe re. Koyehọ ọkobaro oke-kpobi mẹ be te wariẹ jọ na, yọ eva e were omẹ gaga. Eware kpobi e jẹ riẹ nya. Rekọ u kri hi, oware nọ ma rẹro riẹ hẹ o tẹ via.

Ẹdẹ jọ, edọkita mai ọ tẹ vuẹ omai nọ aye mẹ o dihọ. Ma riẹ vẹre he, rekọ nọ edọkita na ọ vuẹ omai, eva e were omai gaga. Ghele na, me je roro nọ, kọ mẹ te gbẹ sae jọ ọkobaro nọ mẹ gwọlọ jọ na? U kri hi iroro mai i  te kpohọ ọmọ nọ a ti yẹ ze na no. Ma je rẹro riẹ ọvo. Rekọ me je roro sọ mẹ te gbẹ sae jọ ọkobaro ghele.

Ma tẹ rọ ẹme na jiroro je ku ei họ nọ mẹ rẹ jọ ọkobaro ghele. Evaọ Ane 1985, aye mẹ o te yẹ Gabriel. O make jọ ere na, mẹ siọ iruo ebanke na ba jẹ wariẹ mu iruo ọkobaro na họ evaọ Azeza 1985. Nọ u te oke jọ, a tẹ rọ omẹ mu omọvo Ogbẹgwae Uwou Ogha. Rekọ orọnọ Caracas uwou ogha na o jọ họ, fikiere isiava hayo isiasa ẹkpoka mẹ jẹ hai kpobọ uwou ogha na nyai ru iruo, yọ no oria mai te obei o jọ oware wọhọ emaele udhuvẹ-gbikpe.

Ẹwho nọ a re se La Victoria uwou ogha na o jọ, fikiere ma tẹ kwa kpohọ obei re ma sae kẹle uwou ogha na. Eware buobu i nwene nọ ma kwa nya. Ahwo uviuwou mẹ a daoma kẹ omẹ gaga keme a rọwo nọ ma kwa nya. Oware nọ a ru na o da omẹ ẹro fia. Oniọvo mẹ ọrọ ọmọtẹ nọ a re se Baha ọ rọwo nọ ọ te hae rẹrote oni mai. Michel o wo aye no oke yena, rekọ Samira avọ Gabriel a gbe kiọkọ uwou na. Fikiere nọ ma kwa kpobọ La Victoria no na, koyehọ a kwa siọ egbẹnyusu rai nọ e rrọ obọ Caracas kpobi ba no. U te no ere no, okpẹwho ọ reria aye mẹ oma no, fikiere o nwane lọhọ kẹe he re ẹwho ọsese nọ ma kwa kpohọ na ọ reria ae oma. Yọ mai kpobi ma daoma epanọ uwou osese o rẹ rọ reria omai oma. Oghẹrẹ nọ ma je ru eware u nwene gaga nọ ma kwa no Caracas kpobọ La Victoria.

Nọ u te oke jọ, Gabriel o te wo aye, Samira omariẹ o te ti no uwou na no. Kẹsena evaọ 2007 a te zizie omẹ avọ aye mẹ inọ ma sae kwa ziọ uwou ogha na, ma te ru ere. Ma gbẹ rrọ obei rite inẹnẹ. Michel ọmọzae ọkpako mai ọ rrọ ọkpako ukoko, yọ avọ aye riẹ Monica ekobaro. Gabriel omariẹ yọ ọkpako ukoko re, yọ avọ aye riẹ Ambra a rrọ obọ Italy. Samira yọ ọkobaro oke-kpobi, yọ ọ rẹ jọ obọ uwou riẹ ru iruo Ebẹtẹle.

U wo eware buobu nọ me ru evaọ egagọ Ọghẹnẹ. Mẹ be vioja ha inọ mẹ rọ uzuazọ mẹ ru iruo Ọghẹnẹ keleme. Ukpoye, eva e be were omẹ ọvo inọ mẹ rọ uzuazọ mẹ ru eware buobu evaọ egagọ Jihova. Mẹ ruẹ nọ u wuzou gaga re ma wo usu okpekpe kugbe Jihova. Oware kpobi nọ ma gwọlọ ru evaọ egagọ riẹ, te o rẹ bẹ, te o rẹ bẹ tere he, Jihova ọ rẹ sae kẹ omai udhedhẹ nọ “u vi otoriẹ kpobi,” ma vẹ sai ru ei. (Fil. 4:6, 7) Iruo nọ mẹ avọ aye mẹ ma rrọ Ebẹtẹle ru e be were omai. Yọ Jihova ọ ghale omai gaga no keme ma rehọ e riẹ karo evaọ oware kpobi nọ ma bi ru.