1. Eware jọ vẹ e rẹ sae lẹliẹ ozọ mu ohwo?

 JOMA ta kpahe oware nọ o via kẹ inievo mai jọ. Nestor avọ aye riẹ María a jẹ gwọlọ nọ a rẹ kwa kpohọ oria nọ iwhowho-uvie e rrọ tere he. * Re a sai ru ere, o te gwọlọ nọ a rẹ kpairoro vrẹ eware jọ nọ a je ro yeri akpọ. Rekọ ozọ u je mu ai inọ eware e te jọ gaga kẹ ae, eva e te gbẹ were ae tere he nọ a gbe wo ugho te epaọ ọsosuọ họ. Oniọvo ọfa họ Biniam. Nọ Biniam o kurẹriẹ ziọ ukoko na evaọ orẹwho nọ a bi jo kpokpo Isẹri Jihova, ọ ruẹ nọ ẹsejọhọ ukpokpoma na u ti tei oma re. Ozọ u je mu ei gaga. Rekọ oware nọ ọ jẹ mai dhozọ riẹ họ, oware nọ ahwo uviuwou riẹ a ti ru nọ a te yo nọ o kuomagbe Isẹri Jihova no. Oniọvo ọfa nọ a re se Valérie, edọktọ a vuẹ riẹ inọ o wo ẹyao ọta jọ nọ o yoma gaga. Oniọvo na ọ jẹ kake ruẹ edọktọ nọ o re siwi ei ababọ azẹ nọ a re se fihọ iẹe oma ha. Ozọ u te je mu ei inọ ẹyao na o ti kpei no.

2. Fikieme ma gbẹ rọ dhozọ ga hrọ họ?

² Kọ oghẹrẹ eware nọ ma fodẹ na i ru ozọ mu owhẹ no ẹdẹ jọ? Eware itieye na e lẹliẹ ozọ mu omai otujọ buobu no. Rekọ ma tẹ be dhozọ ga hrọ, ma sai ru eware jọ nọ e rẹ raha usu mai avọ Jihova. Yọ oware nọ Setan ọ gwọlọ oye. Ọ gwọlọ nọ ozọ u mu omai te epanọ ma gbe ro koko izi Jihova ha, yọ uzi jọ nọ ọ gwọlọ nọ ma koko ho họ, orọ usi uwoma ota na. (Evia. 12:17) Setan ọ rrọ yoyoma gaga, obọ o rẹ rrọe he, o te je wo ẹgba re. Kọ u wo eware nọ whọ rẹ sai ru rọ thọ omara?

3. Eme ọ sai fiobọhọ kẹ omai nọ ma gbẹ rọ dhozọ ga hrọ họ?

³ U te mu omai ẹro nọ Jihova o you omai, yọ ọ rrọ abọ mai, Setan ọ sai ru ozọ mu omai hi. (Ol. 118:6) Wọhọ oriruo, oghoghẹrẹ ebẹbẹ i te odibo Ọghẹnẹ nọ o kere Olezi  avọ 118 na. Ahwo buobu a mukpahe iẹe, te ikpahwo-esuo jọ dede (owọ avọ 9, 10). Ẹsejọ ahwo a je ru ei eware nọ e nyawo riẹ gaga (owọ avọ 13). U te je wo oke jọ nọ Jihova ọ whọku ei gaga re (owọ avọ 18). Ghele na, ọ so nọ: “Ozọ u re mu omẹ hẹ.” Ọ riẹ nọ dede nọ Jihova ọ whọku ei, Ọsẹ obọ odhiwu riẹ na o you rie gaga. U mu ọso-ilezi na ẹro inọ oghẹrẹ kpobi nọ eware i yoma kẹe te kẹhẹ, Ọghẹnẹ oyoyou riẹ na ọ rrọ kugbei ẹsikpobi yọ o ti fiobọhọ kẹe.—Ol. 118:29.

4. U te mu omai ẹro nọ Ọghẹnẹ o you omai, ozọ eme u ti gbe mu omai hi?

⁴ Jọ u mu omai ẹro nọ Jihova o you omai. U te mu omai ẹro, ma rẹ gbẹ dhozọ eware esa jọ nọ ahwo buobu a rẹ dhozọ rai hi. Eye họ, (1) ozọ inọ ma te sae kuọ uviuwou mai hi, (2) ozọ ahwo-akpọ, gbe (3) ozọ uwhu. Oware nọ u fiobọhọ kẹ inievo esa nọ ma ta ẹme kpahe evaọ edhe-ẹme ọsosuọ na si ozọ no ẹro họ, u mu rai ẹro ziezi inọ Ọghẹnẹ o you rai.

5. Eware jọ vẹ e rẹ sae lẹliẹ ọsẹ hayo oni nọ ọ be rẹrote uviuwou ruawa? (Rri uwoho nọ o rrọ uke emagazini na.)

⁵ Ọnọ o wuzou uviuwou o re ru iruo ziezi re ọ sae rẹrote uviuwou riẹ keme ọ riẹ nọ iruo nọ Ọghẹnẹ ọ kẹ riẹ ọye. (1 Tim. 5:8) Otẹrọnọ whẹ yọ ọsẹ hayo oni nọ ọ be kuọ uviuwou, ẹsejọhọ evaọ oke ẹyao COVID-19 na whọ jẹ ruawa inọ who ti gbe wo iruo nọ whọ rẹ rọ kuọ ahwo uviuwou ra ha. Ẹsejọhọ ozọ u je mu owhẹ inọ whọ te gbẹ ruẹ ugho nọ whọ te rọ dẹ emu hayo hwa osa uwou ho. Ẹsejọhọ ozọ u je mu owhẹ inọ a ti si owhẹ no iruo, yọ a te si owhẹ no iruo, whọ te sae ruẹ iruo efa ha. Hayo o sae jẹ jọ nọ ozọ nọ u je mu Brọda Nestor avọ aye riẹ María nọ ma ta ẹme te evaọ obọ emuhọ na u je mu owhẹ re. Ozọ u je mu ai inọ a te sae kpairoro vrẹ eware jọ nọ a be rọ reakpọ kuoma ha. Setan ọ rehọ eware itienana rọ wha ozọ họ ahwo buobu ẹro no, nọ u ru nọ a rọ siọ Jihova ba ẹgọ.

6. Eme Setan ọ be gwọlọ nọ ma hai roro?

⁶ Setan ọ gwọlọ nọ ma hai roro nọ Jihova o you omai hi, inọ u te te ẹme oghẹrẹ nọ ma rẹ rọ kuọ uviuwou mai, omomọvo ọ rẹ dhogbo yena kẹ omariẹ. Ma te bi roro ere, o sae jọ omai oma nọ u fo re ma ru oware kpobi nọ ma rẹ sai ru re okọ hayo iruo mai e nyaharo, o tẹ make rọnọ ma re ru eware jọ nọ e rẹ dha Jihova eva.

7. Eme Jesu ọ ta nọ o lẹliẹ udu rrọ omai awọ?

⁷ Jesu nọ ọ riẹ Ọsẹ na vi omai kpobi na ọ ta nọ jọ ozọ u mu omai hi, inọ Ọghẹnẹ mai “ọ riẹ eware nọ [ma] gwọlọ taure [ma] tẹ te yare iẹe dede.” (Mat. 6:8) Jesu ọ tẹ jẹ riẹ nọ u no Jihova eva ze re ọ kẹ omai eware nọ ma rẹ rọ kuọ omamai. Mai Ileleikristi yọ ahwo uviuwou Ọghẹnẹ, yọ Jihova họ ọnọ o wuzou uviuwou na. Fikiere, ma riẹ nọ ọ te siọ omai ba ẹko ho keme ọye ọvo o fi uzi nọ o rrọ 1 Timoti 5:8 na họ.

8. (a) Ozọ u te bi mu omai inọ ma te sae kuọ uviuwou mai hi, eme ma rẹ kareghẹhọ? (Matiu 6:31-33) (b) Who te rri uwoho na, ẹvẹ ma sae rọ rehọ aro kele oniọvo nọ avọ aye riẹ a be wọ emu se oniọvo-ọmọtẹ ọdekọ na?

⁸ Nọ u te mu omai ẹro ziezi inọ Jihova o you omai je you uviuwou mai, ma te vro vievie he sọ Jihova ọ te kẹ omai eware nọ ma te rọ kuọ uviuwou mai. (Se Matiu 6:31-33.) Jihova ọ gwọlọ nọ ọ rẹ rẹrote omai, yọ ere o bi gine ru, keme Ọsẹ oyoyou mai na o re ru ọghọ gaga. Oke nọ Jihova ọ ma akpọ na, ọ ma emamọ eware buobu fihọ iẹe, orọnikọ ọ ma omai fihọ  akpọ na inọ thakpinọ ma zọ họ. Fikinọ o you omai, ọ kẹ omai eware buobu nọ ma rẹ rọ reakpọ kuoma. (Emu. 2:9) Dede na, ẹsejọ umutho eware ọvo ma re wo. Joma kareghẹhọ inọ umutho eware o nwani dhesẹ nọ u re muotọ no ho. Jihova ọ re siọ omai ba ẹdẹvo ho. (Mat. 6:11) Joma hae kareghẹhọ inọ eware nọ ma kpairoro vrẹ e tẹ maki bu kẹhẹ, i te oware ovo ho nọ a tẹ rehọ ae wawo eghale nọ Ọghẹnẹ ọ te kẹ omai enẹna gbe enọ ọ ruẹrẹ kpahe kẹ omai evaọ obaro. Oware yena Brọda Nestor avọ aye riẹ María a kareghẹhọ re.—Aiz. 65:21, 22.

9. Eme who wuhrẹ no iku Brọda Nestor avọ aye riẹ María ze?

⁹ Brọda Nestor avọ aye riẹ María a jẹ reakpọ kuoma evaọ obọ Colombia. A ta nọ: “Ma jẹ jiroro epanọ ma sai ro siobọno eware jọ re ma sai wo oke nọ ma rẹ rọ ta usi uwoma na ziezi. Rekọ ozọ u je mu omai inọ ugho o gbẹ rrọ omai obọ te epanọ o rrọ obọnana ha, eva e te were omai hi.” Eme o fiobọhọ kẹ ae si ozọ yena no ẹro? A roro te eware nọ Jihova o ru kẹ ae no. Onana u ru nọ u ro mu ae ẹro ziezi inọ Jihova ọ te rẹrote ai. Fikiere a te no iruo nọ a jọ nọ a jẹ jọ hwae osa ziezi. A tẹ zẹ uwou rai no. Kẹsena a tẹ kwa kpohọ ofẹ orẹwho na ọfa nọ iwhowho-uvie e rrọ tere he. Kọ a ta nọ, o hae jọ nọ a riẹ, a hae te jiroro yena ha? Nestor ọ ta nọ: “Ma ruẹ nọ ẹme nọ ọ rrọ Matiu 6:33 na uzẹme. Oware ovo o re kare omai ẹdẹvo ho. Yọ obọnana eva e be tubẹ mae were omai.”

10. Fikieme ma rẹ sae rọ ta nọ ohwo nọ ọ dhozọ ohwo-akpọ ibe riẹ, ọ dhẹ thọ họ?

¹⁰ No otọ avọ otọ ze ahwo-akpọ a bi ro si uye se ahwo-akpọ ibe rai. (Ọtausi. 8:9) Wọhọ oriruo, ahwo nọ a rrọ ọkwa a re kienyẹ ahwo nọ a rrọ otọ rai. Ikpehre ahwo a re kpokpo amọfa, họre ae, je tube kpe ai dede. Emọ jọ evaọ obọ isukulu a rẹ gwọlọ emọ isukulu ibe rai ẹme. Yọ ahwo jọ dede a re tube gboja kẹ ahwo uviuwou rai. Agbẹta nọ ohwo-akpọ ọ rẹ rọ dhozọ ohwo-akpọ ibe riẹ na! Nọ Setan ọ ruẹ onana, o te bi fi obọ họ iẹe. Evaọ oghẹrẹ vẹ?

11-12. Oware uyoma vẹ Setan o bi ru fikinọ ọ riẹ nọ ozọ ohwo-akpọ o sai mu omai?

¹¹ Setan ọ be daoma ru re ma dhozọ ohwo-akpọ te epanọ ma rẹ rọ siọ usi uwoma na ba ẹta hayo siọ eware efa nọ  ma bi ru kẹ Jihova ba. Setan ọ be rehọ egọmeti kpokpo omai evaọ erẹwho sa-sa re ọ whaha omai iruo nọ Jihova ọ kẹ omai. (Luk 21:12; Evia. 2:10) Evaọ akpọ nana nọ Setan o bi su na, ahwo buobu a re gu erue fihọ Isẹri Jihova uzou. Ahwo nọ a rọwo erue nana a sai se omai ẹkoko hayo kpokpo omai dede. (Mat. 10:36) Kọ u bi gbe omai unu inọ Setan o bi ru eware nana? U gbe omai unu vievie he. Keme evaọ oke ikọ na o je ru eware itieye na.—Iruẹru 5:27, 28, 40.

¹² U te no egọmeti nọ Setan ọ be gwọlọ rọ wha ozọ họ omai ẹro no, u wo idhere efa nọ ọ be rọ daoma ru ozọ mu omai. Ozọ epanọ a te rọ vuẹ ahwo uviuwou rai inọ a kurẹriẹ ziọ ukoko na no u re mu ahwo jọ nọ a kurẹriẹ obọ. Ozọ nana u tube mu ai vi ozọ ukpe. Inievo nana a you ahwo uviuwou rai gaga, yọ a hae gwọlọ nọ a nyaze te gọ Jihova re. O be da ae gaga inọ ahwo uviuwou rai a be ta ẹme oyoma Ọghẹnẹ uzẹme na gbe idibo riẹ. Rekọ uzẹme riẹ họ ahwo jọ nọ a je kpokpo ahwo uviuwou rai nọ i kurẹriẹ ziọ ukoko na, a kurẹriẹ uwhremu na. Kọ otẹrọnọ ahwo uviuwou mai a siọ omai fikinọ ma kurẹriẹ ziọ ukoko Jihova, eme ma re ru?

13. Nọ ahwo uviuwou mai a tẹ siọ omai, eme ma rẹ kareghẹhọ nọ ozọ u gbe mu omai hi? (Olezi 27:10)

¹³ Ẹme nọ ọ rrọ Olezi 27:10 na o rẹ lẹliẹ udu te omai otọ. (Sei.) Ma tẹ kareghẹhọ oghẹrẹ nọ Jihova o you omai te, ozọ u re mu omai hi nọ a tẹ be maki kpokpo omai. Ma te thihakọ, Jihova ọ te ghale omai. Ọ te kẹ omai eware nọ ma rẹ rọ kuọ oma mai. Ọ te rọ ẹme riẹ wuhrẹ omai, yọ ọ te sasa omai oma. Ohwo ọvuọvo nọ ọ rẹ sae rẹrote omai te Jihova, ọ rrọ họ. Nwanọ ere Jihova ọ rẹrote Biniam nọ ma fodẹ ẹsiẹ na.

14. Eme whọ jọ iku Biniam na wuhrẹ?

¹⁴ Dede nọ Biniam ọ riẹ nọ o te kurẹriẹ ziọ ukoko Isẹri Jihova a ti kpokpo iei gaga, o kurẹriẹ ghele. Ọ riẹ nọ Jihova o you rie, onana o tẹ lẹliẹe si ozọ no ẹro. Ọ ta nọ: “Egọmeti a kpokpo omai gaga. U tube vi epanọ me roro nọ a ti kpokpo omai te. Rekọ oware jọ nọ u tube mu omẹ ozọ vi ukpokpoma egọmeti họ, ozọ inọ ahwo uviuwou mẹ a ti kpokpo omẹ. Ozọ u je mu omẹ inọ ọsẹ mẹ o te yo nọ me kurẹriẹ ziọ ukoko Isẹri Jihova no, eva e te were iẹe he, yọ uviuwou mẹ a ti roro nọ akpọ mẹ ọ raha kuotọ no.” O make jọ ere  na, Biniam ọ riẹ vevẹ inọ Jihova ọ rẹ rẹrote ahwo nọ o you. Ọ ta nọ: “Mẹ romatotọ roro oghẹrẹ nọ Jihova o ro fiobọhọ kẹ idibo riẹ evaọ oke nọ akpọ ọ jẹ rọ bẹ ae, oke nọ ahwo a je mukpahe ae, gbe oke nọ ahwo a jẹ họre ae dede. Mẹ riẹ nọ mẹ gbẹ nyasiọ Jihova ba ha, ọ te ghale omẹ. Ipolisi i mu omẹ unuẹse buobu je kpe omẹ ukpe iyẹ. Rekọ Jihova o fiobọhọ kẹ omẹ. Ma tẹ talamu Jihova, ọ rẹ nyasiọ omai ba ha.” Jihova ọ rẹrote Biniam ziezi wọhọ epanọ ọsẹ ọ rẹ rẹrote ọmọ riẹ. Yọ idibo Jihova a fiobọhọ kẹe wọhọ ahwo uviuwou riẹ.

15. Fikieme ma be hae rọ dhozọ uwhu?

¹⁵ Ebaibol ọ ta nọ uwhu yọ ọwegrẹ. (1 Kọr. 15:25, 26) Ma tẹ ruẹ oware nọ o rẹ sai si uwhu kpe omai, ozọ u re mu omai. Oriruo jọ họ, nọ ma tẹ be mọ gaga hayo okpẹyao o te kie ohwo jọ nọ ọ kpekpe omai oma gaga. Fikieme ma be hae rọ dhozọ uwhu? Keme Jihova ọ ma omai evaọ oghẹrẹ nọ ma rọ gwọlọ nọ ma rẹ rria bẹdẹ bẹdẹ. (Ọtausi. 3:11) Ozọ uwhu u woma evaọ abọ jọ keme o sae lẹliẹ omai yọroma kẹ eware nọ e rẹ sai si uwhu kpe omai. Wọhọ oriruo, o rẹ sae lẹliẹ omai re emamọ emu nọ o rẹ lẹliẹ oma mai jọ ziezi. Ma vẹ jẹ hae zaha arozaha nọ u re ru oma sasa omai, kpohọ ọspito jẹ rehọ imu nọ ma tẹ be mọ. Ma vẹ jẹ whaha oware kpobi nọ o rẹ sai si uwhu kpe omai.

16. Eme Setan o bi ru fikinọ ọ riẹ nọ ozọ uwhu u re mu omai?

¹⁶ Setan ọ riẹ nọ ma gwọlọ whu vievie he. Ọ ta nọ ma sai siobọno oware kpobi nọ ma wo, jẹ tubẹ siọ Jihova ba ẹgọ dede, re uzuazọ mai o sai te odẹ. (Job 2:4, 5) Rekọ ẹme yena nọ Setan ọ ta na yọ ọrue koikoi. O make rrọ ere na, Ebaibol ọ ta nọ Setan “o wo ogaga nọ ọ rẹ rọ wha uwhu ze.” Fikiere ọ sae gwọlọ edhere kpobi nọ o re ro fi ozọ uwhu họ omai ẹro re ma siọ Jihova ba ẹgọ. (Hib. 2:14, 15) Ẹsejọ, ahwo nọ Setan o bi ro ruiruo a rẹ vuẹ idibo Jihova inọ a ti kpe ai no nọ a gbẹ siọ Jihova ba ẹgọ họ. U te no ere no, nọ Setan ọ tẹ ruẹ nọ ma be mọ gaga, ọ sae rọ uvẹ yena gwọlọ gele omai no abọ Jihova no. Edọktọ hayo ahwo uviuwou mai nọ a be gọ Jihova ha a sae ta nọ ma se azẹ fihọ oma. Rekọ ma riẹ nọ ohwo nọ o ru oware utioye na ọ thọ uzi Ọghẹnẹ. Ohwo jọ ọ sae jẹ vuẹ omai nọ ma ru oware jọ nọ ma riẹ nọ o rẹ dha Jihova eva re ma ruẹsi siwi omamai.

17. Wọhọ epanọ o rrọ Ahwo Rom 8:37-39, fikieme ma gbẹ rọ dhozọ uwhu hu?

¹⁷ Ma gwọlọ whu hu. Rekọ ma riẹ nọ ma tẹ maki whu, Jihova ọ te kareghẹhọ omai fikinọ o you omai. (Se Ahwo Rom 8:37-39.) Nọ ahwo nọ a kpekpe Jihova oma a te whu, Jihova ọ rẹ kareghẹhọ ae wọhọ ẹsenọ a gbẹ rrọ uzuazọ. (Luk 20:37, 38) U bi si ei urru gaga inọ ọ rẹ kpare ae ze. (Job 14:15) Jihova o siobọno Ọmọ ọghaghae riẹ na re o whu kẹ omai, re ma sai “wo uzuazọ ebẹdẹ bẹdẹ.” (Jọn 3:16) Ma riẹ nọ Jihova o you omai gaga, yọ ọ gwọlọ nọ ma wo evawere. Fikiere nọ ma tẹ be mọ, hayo nọ a tẹ ta nọ a ti kpe omai no, ukpenọ ma nyasiọ Jihova ba, u fo re ma nyabru ei re ọ sasa omai oma, kẹ omai areghẹ, je fiobọhọ kẹ omai kru ẹrọwọ mai. Nwanọ ere Valérie avọ ọzae riẹ a ru.—Ol. 41:3.

18. Eme who wuhrẹ no iku Valérie na ze?

¹⁸ Oke nọ Valérie ọ jọ ikpe ọgbagbisoi, edọktọ a tẹ vuẹe nọ o wo ẹyao ọta jọ nọ o yoma gaga nọ a rẹ kake ruẹ ọkpọ riẹ hẹ. Eme o fiobọhọ kẹe nọ ozọ uwhu u gbe je  mu ei hi? Ọ riẹ nọ Jihova o you rie. Ọ ta nọ: “Nọ ma yo nọ me wo oghẹrẹ ẹyao ọta otiọye, akpọ o gbe omẹ avọ ọzae mẹ unu. Edọktọ a vuẹ omẹ nọ re mẹ sae zọ, a te bẹre omẹ, yọ obẹrọ na o te jọ orọ uwhu gbe azọ. Edọktọ kpobi nọ ma nyabru ọ rẹ ta nọ ọ sai ru ei hi ababọ azẹ nọ o re se fihọ omẹ oma. Ozọ u mu omẹ, rekọ mẹ riẹ nọ mẹ sae rehọ azẹ hẹ keme Ọghẹnẹ ọ rẹ ghọ oware utioye. No emaha mẹ ze, Jihova o bi ru eware buobu kẹ omẹ nọ u dhesẹ nọ o you omẹ. Whaọ oke nọ me re ro dhesẹ nọ me you rie u te no. Oke kpobi nọ edọktọ a tẹ ta ẹme jọ nọ o mu omẹ ozọ kpahe oma mẹ na, mẹ rẹ daoma gaga re me ru oware nọ o rẹ lẹliẹ Jihova rọ omẹ seha, me ve je ru oma vuọ Setan. Uwhremu na, mẹ tẹ ruẹ edọktọ nọ ọ bẹre omẹ ababọ azẹ nọ o se fihọ omẹ oma. Dede nọ oma mẹ o re ga ziezi hi, Jihova ọ re siọ omai ba ẹdẹvo ho. Wọhọ oriruo, oka ọvo taure edọktọ a tẹ te vuẹ omẹ nọ ẹyao nana ọ rrọ omẹ oma, ma jọ Uwuhrẹ Uwou-Eroro wuhrẹ uzoẹme jọ nọ o ta nọ ‘Epanọ Ma Sae rọ Rẹriẹ Ovao Dhe Ebẹbẹ Inẹnẹ avọ Udu.’ * Uzoẹme na u fiobọhọ kẹ omai gaga. Ma se rie unuẹse buobu. Izoẹme itienana, ewuhrẹ nọ ma jẹ hae nya ẹsikpobi, Ebaibol nọ ma jẹ hai se, gbe olẹ, o lẹliẹ omẹ avọ ọzae mẹ kru udu ga je ru oware nọ o rẹ were Jihova.”

19. Eme ọ te via kẹle na?

¹⁹ Jihova o bi fiobọhọ kẹ idibo riẹ evaọ akpọ na soso. Oyejabọ nọ a be sai ro thihakọ ebẹbẹ buobu jẹ dadamu kẹ Ẹdhọ. (1 Pita 5:8, 9) Whẹ omara whọ sai dikihẹ ga re. Kẹle na, Jihova ọ te rehọ Jesu gbe enọ i ti lele iei su na “raha iruo Ẹdhọ” no. (1 Jọn 3:8) Idibo Ọghẹnẹ a gbẹ “te dhozọ oware ovo ho,” yọ “oware ovo o te wha iguegue” họ ae oma ha. (Aiz. 54:14; Mae. 4:4) Ri bọwo oke yena, ẹbẹbẹ ọ tẹ maki te omai, joma kru udu ga.

20. Eme o ti fiobọhọ kẹ omai si ozọ no ẹro?

²⁰ Joma hae kareghẹhọ ẹsikpobi nọ Jihova o you omai idibo riẹ, ọ tẹ be jẹ thọ omai. Oware jọ nọ u re fiobọhọ kẹ omai kareghẹhọ onana họ, ma rẹ hai roro didi kpahe epanọ Jihova ọ rọ thọ idibo riẹ evaọ oke nọ u kpemu. Ma vẹ jẹ hai gbiku itieye na nọ ma tẹ rrọ kugbe amọfa. U te no ere no, joma hae kareghẹhọ epanọ Jihova o ro fiobọhọ kẹ omai no. Avro ọ riẹ hẹ, Jihova ọ rẹ sai fiobọhọ kẹ omai si ozọ no ẹro!—Ol. 34:4.