1-2. Wọhọ epanọ o rrọ 1 Timoti 6:20, eme a ta kẹ Timoti nọ o ru?

ẸSIBUOBU ma rẹ rọ oware oghaghae mai kẹ omọfa re o kru kẹ omai. Wọhọ oriruo, ma re fi ugho họ ebanke re a sẹro riẹ kẹ omai. Ma tẹ rọ oware oghaghae mai kẹ ohwo kru, ma rẹ gwọlọ nọ o vru hayo a thoi hi. Fikiere, ma riẹ oghẹrẹ nọ o rẹ jọ nọ ohwo ọ tẹ rọ oware oghaghae riẹ kẹ omọfa kru.

² Se 1 Timoti 6:20. Pọl ukọ na ọ kareghẹhọ Timoti inọ a mu oware oghaghae jọ họ iẹe obọ. Eme ọye? Eriariẹ oware nọ Ọghẹnẹ o wo họ iroro kẹ ohwo-akpọ. A te je mu oware oghaghae ofa họ iẹe obọ. A ta kẹe nọ ọ “vuẹ ẹme na,” inọ jọ o “ru iruo ọtausiuwoma.” (2 Tim. 4:2, 5) Pọl ọ kpokpa họ Timoti obọ nọ ọ sẹro oware nọ a mu họ iẹe obọ na. A mu eware eghaghae jọ họ omai obọ wọhọ epanọ a mu họ Timoti obọ na. Eme ọye? Kọ fikieme ma rẹ rọ sẹro eware eghaghae nọ Jihova o mu họ omai obọ na?

3-4. Fikieme uzẹme na o rọ rrọ ghaghae?

³ Jihova o bi fiobọhọ kẹ omai wo otoriẹ Ẹme riẹ gbagba. Eware nọ ma bi wuhrẹ evaọ Ebaibol na e rrọ ghaghae keme i re fiobọhọ kẹ omai wo usu okpekpe kugbe Jihova. I re je ru omai riẹ oware nọ o rẹ kẹ uvi evawere. Ma te wuhrẹ eware nana je bi fi ai họ iruo, ohwo ọvo ọ rẹ sae viẹ omai họ họ. Onana u re je fiobọhọ kẹ omai kẹnoma kẹ ikpehre iruemu.​—1 Kọr. 6:9-11.

⁴ Oware ofa nọ o lẹliẹ iwuhrẹ Ebaibol na rrọ ghaghae họ, ahwo nọ i wo omaurokpotọ, nọ i wo “emamọ eva” ọvo Jihova o re dhesẹ ai kẹ. (Iruẹru 13:48) Ahwo otiọna a re vuhumu nọ “ọrigbo nọ a re fievahọ” na ọvo Jihova o bi  ro wuhrẹ ahwo uzẹme na. (Mat. 11:25; 24:45) Ababọ ọrigbo nana ma sai wo otoriẹ uzẹme na ha, yọ oware ovuọvo nọ o ghare te uzẹme na o rrọ họ.​—Itẹ 3:13, 15.

5. Eme ọfa Jihova o mu họ omai obọ?

⁵ U wo oware ofa nọ Jihova o mu họ omai obọ. Ọ gwọlọ nọ ma wuhrẹ ahwo kpahe ọyomariẹ gbe oware nọ o ti ru evaọ obaro. (Mat. 24:14) Usi uwoma nọ ma be ta na o rrọ ghaghae gaga keme u re fiobọhọ kẹ ahwo kurẹriẹ ziọ ukoko Jihova, a vẹ sai wo ẹruore uzuazọ ebẹdẹ bẹdẹ. (1 Tim. 4:16) Te ma be rehọ euwa buobu ta usi uwoma hayo ma be sae ta tere he fiki epanọ eware e rrọ kẹ omai, iruo nọ e mai wuzou evaọ oke nana ma bi ru na. (1 Tim. 2:3, 4) A rẹ ruẹ oware nọ u woma tei hi nọ ma rọ rrọ ibe iruiruo Ọghẹnẹ!​—1 Kọr. 3:9.

6. Eme ọ via kẹ ahwo jọ nọ a rri otọ mu hu?

⁶ Ileleikristi jọ evaọ oke Timoti, a se rie gb’oware ovo ho inọ a rrọ ibe iruiruo Ọghẹnẹ. Wọhọ oriruo, fikinọ eware akpọ na i je si Dimas urru, ọ nyasiọ iruo Ọghẹnẹ nọ o je lele Pọl ru ba. (2 Tim. 4:10) O wọhọ nọ Fajẹlọs avọ Hẹmojẹnis a nyasiọ usi uwoma nọ a jẹ ta ba fikinọ ozọ u je mu ai inọ a ti kpokpo ai epanọ a je kpokpo Pọl na. (2 Tim. 1:15) Himẹnayọs, Alẹkzanda, gbe Falitọs a wọso ukoko na je kie no egagọ Ọghẹnẹ no. (1 Tim. 1:19, 20; 2 Tim. 2:16-18) O sae jọnọ ahwo nana kpobi a jẹ gọ Ọghẹnẹ ziezi vẹre, rekọ uwhremu na a gbe se oware nọ a mu họ ae obọ na gb’oware ovo ho.

7. Eme Setan ọ be daoma ru re ma gbabọkẹ eware nọ Jihova o mu họ omai obọ na?

⁷ Eme Setan ọ be daoma ru re ma gbabọkẹ eware nọ Jihova o mu họ omai obọ na? Joma fodẹ ejọ rai. Ọ rẹ rọ ighe etẹlẹvisiọno, itanẹte, ebe, gbe eware itieye na efa rọ gwọlọ gele omai no edhere Ọghẹnẹ no. Setan ọ rẹ gwọlọ bẹbẹ omai họ re ma kuomagbe ehwa mai ru oware uyoma. O re je ru nọ imoni mai hayo egọmeti a re ro kpokpo omai re ma siọ usi uwoma na ba ẹta. Setan ọ rẹ jẹ gwọlọ ru omai gaviezọ kẹ “eware nọ e wọso uzẹme na nọ a bi se ugbese nọ ‘eriariẹ,’ ” re ma kie no edhere Ọghẹnẹ no.​—1 Tim. 6:20, 21.

8. Eme who wuhrẹ no oware nọ o via kẹ Daniẹl na ze?

⁸ Ma gbẹ yọroma ha, ma sae rọ ẹmẹrera kiukeku izi Ọghẹnẹ. Joma ta kpahe oniọvo jọ nọ a re se Daniel. * Igemu ekọmputa e rẹ were iẹe ẹfa gaga. Ọ ta nọ:  “Oware wọhọ ikpe ikpe mẹ jọ nọ me mu igemu ekọmputa họ ẹfa. Evaọ oke ọsosuọ, igemu nọ mẹ jẹ fa i yoma tere he. Rekọ ẹmẹrera na, me te mu enọ a rẹ jọ họre gbe enọ a be jọ dhesẹ iruẹru-imizi họ ẹfa.” Uwhremu na ọ tẹ jẹ rehọ euwa ikpegbisoi soso fa igemu na kẹdẹ kẹdẹ. Daniel ọ ta nọ, “Mẹ riẹ nọ igemu nọ mẹ jẹ fa na i yoma, yọ oke nọ mẹ jẹ rọ fa ae u bu hrọ. Onana o jẹ raha usu nọ me wo kugbe Jihova. Evaọ oke yena obe uvru u wholo omẹ no, mẹ gbẹ jẹ sae siọ uruemu na ba ha.” Ma gbẹ yọroma ha, oghẹrẹ arozaha otiọna ọ rẹ sae rọ ẹmẹrera daruọ omai oma te epanọ ma re ro kiukeku uzẹme na. O tẹ via ere ma rẹ sae rọ ẹmẹrera ku eware nọ Jihova o mu họ omai obọ na fiẹ.

9. Wọhọ epanọ o rrọ 1 Timoti 1:18, 19, eme Pọl ọ ta nọ Timoti ọ wọhọ?

⁹ Se 1 Timoti 1:18, 19. Pọl ọ ta nọ Timoti ọ wọhọ ọgbaẹmo, ọ tẹ tuduhọ iẹe awọ nọ jọ ọ “ruabọhọ fi emamọ ẹmo na.” Onana yọ ẹmo gheghe he, rekọ ọ be ta kpahe epanọ Timoti ọ rẹ rọ whaha oware kpobi nọ o rẹ sae raha usu riẹ kugbe Ọghẹnẹ. Ẹvẹ Ileleikristi a rọ wọhọ egbaẹmo nọ i bi fi ẹmo? Kọ emamọ iruemu vẹ u fo nọ ọgbaẹmo Kristi o re wo? Joma ta kpahe eware isoi jọ nọ ma rẹ sai wuhrẹ no oriruo nọ Pọl ọ kẹ na ze. Eware nana i ti fiobọhọ kẹ omai kru uzẹme na ga.

10. Eme u re dhesẹ nọ ohwo ọ rọ oma riẹ kpobi kẹ Ọghẹnẹ, kọ ẹvẹ u ro fo re ma ru ere?

¹⁰ Omarọkẹ Ọghẹnẹ. Emamọ isoja ọ rẹ ruẹrẹ oma kpahe inọ o re whu kẹ orẹwho riẹ. Ọ rẹ dawo ẹgba riẹ kpobi re ọ thọ ahwo orẹwho riẹ. Pọl ọ tuduhọ Timoti awọ nọ ọ romakẹ Ọghẹnẹ, koyehọ ọ rẹ rọ udu riẹ kpobi you Ọghẹnẹ, yọ ọ rẹ kuvẹ re oware jọ u si ei no abọ Ọghẹnẹ hẹ. (1 Tim. 4:7) Uyoyou nọ ma wo kẹ Ọghẹnẹ o tẹ ga ziezi, ma tẹ jẹ rọ oma mai kpobi kẹe ma te kuvẹ hẹ re oware jọ u gele omai no egagọ riẹ.​—1 Tim. 4:8-10; 6:6.

11. Fikieme o rọ gwọlọ nọ ma re kru oma ga ziezi?

¹¹ Oma-ukruga. Isoja o re kru oma ga ziezi re ọ sai ru iruo riẹ. Timoti o kru oma ga ziezi evaọ iruo Ọghẹnẹ. Oyejabọ nọ o ro ru epanọ Pọl ọ ta kẹe inọ jọ ọ dhẹ siọ isiuru iyoma ba re o wo emamọ uruemu je kuomagbe ahwo nọ a kruga evaọ egagọ Ọghẹnẹ. (2 Tim. 2:22) Re Timoti ọ sai ru onana kpobi okolo iruo ho. Ere o gwọlọ nọ mai omamai ma re kru oma ga ziezi re, re ma sai fi kparobọ evaọ ẹmo nọ ma bi lele uzioraha nọ ma reuku riẹ fi na. (Rom 7:21-25) U te no ere no, ma re fi oma hotọ vievie he nọ ma tẹ gwọlọ ba uruemu anwae na no oma je fi okpokpọ na họ. (Ẹf. 4:22, 24) Yọ ma te no iruo ze evaọ owọwọ nọ oma o rrọ omai no, o gwọlọ nọ ma rẹ gba omamai họ re ma sai kpohọ ewuhrẹ.​—Hib. 10:24, 25.

12. Ẹvẹ ma sae rọ riẹ epanọ ma rẹ rọ rehọ Ebaibol na fiobọhọ kẹ omamai gbe amọfa?

¹² Ọgbaẹmo o re wuhrẹ epanọ ọ rẹ rọ rehọ ekwakwa ẹmo riẹ fi ẹmo. Re ọ sae riẹ epanọ ọ rẹ rọ rehọ eware nana fi ẹmo ziezi, o gwọlọ nọ o re wuhrẹ kẹse kẹse. Ere u fo nọ ma rẹ riẹ oghẹrẹ nọ ma rẹ rehọ Ebaibol na fiobọhọ kẹ omamai, jẹ rehọ iẹe wuhrẹ amọfa. (2 Tim. 2:15) Ma re wuhrẹ idhere jọ nọ ma re ro ru onana nọ ma te kpohọ ewuhrẹ. Rekọ re ma sae rọ Ebaibol na wuhrẹ ahwo uzẹme na ziezi, ma re wuhrẹ Ebaibol na kẹ omamai kẹse kẹse. Joma hai wuhrẹ Ebaibol na re ẹrọwọ mai ọ ga ziezi. Orọnikọ ese ọvo ma re sei hi. Ma rẹ daoma roro didi kpahe eware nọ ma bi se jẹ hae kiẹ ebe ukoko  na, re ma sai wo otoriẹ oware nọ ma se gbe oghẹrẹ nọ ma sai ro fi ei hiruo. (1 Tim. 4:13-15) Ma te ru ere ma te riẹ oghẹrẹ nọ ma sae rọ rehọ Ebaibol na wuhrẹ ahwo. Yọ, ma tẹ be rehọ Ebaibol na wuhrẹ ahwo, orọnikọ ese ọvo ma re sei kẹ ae he. Ma re je fiobọhọ kẹ ae wo otoriẹ oware nọ ma se na gbe epanọ a sai ro fi ei hiruo. Ma tẹ be hai wuhrẹ Ebaibol na kẹ omamai kẹse kẹse u re fiobọhọ kẹ omai rehọ Ẹme Ọghẹnẹ wuhrẹ amọfa ziezi.​—2 Tim. 3:16, 17.

13. Wọhọ epanọ o rrọ Ahwo Hibru 5:14, fikieme ma re ro wo orimuo?

¹³ Orimuo. O gwọlọ nọ isoja o re vuhu oware nọ o rẹ sae wha uwhu sei evaọ ẹmo, ọ vẹ kẹnoma kẹe. Epọvo na re, ma re vuhu eware nọ e rẹ sae raha usu mai kugbe Ọghẹnẹ, ma vẹ kẹnoma kẹ ae. (Itẹ 22:3; se Ahwo Hibru 5:14.) Wọhọ oriruo u fo nọ ma rẹ kẹnoma kẹ erozaha gbe ifimu nọ i fo ho. Erozaha gbe ighe sa-sa nọ a be jọ etẹlẹvisiọno dhesẹ nẹnẹ yọ erọ ọfariẹ-ogbe. Ighe itiena e rẹ dha Ọghẹnẹ eva je si uye se omai. Fikiere ma rẹ whaha ighe nọ e rẹ sae rọ ẹmẹrera si omai no edhere Ọghẹnẹ.​—Ẹf. 5:5, 6.

14. Ẹvẹ orimuo nọ Daniẹl o wo u ro fiobọhọ kẹe?

¹⁴ Daniẹl nọ ma ta ẹme te ẹsiẹ na o te ti vuhumu nọ igemu ozighi gbe erọ imizi nọ ọ be hae fa na i bi ti fi ei họ ẹbẹbẹ. Ọ tẹ kiẹ ebe ukoko na re ọ riẹ oware nọ o rẹ sai fiobọhọ kẹe fi ẹbẹbẹ nana kparobọ. Eme u no rie ze? Ọ siọ igemu ekọmputa nọ i woma ha na ba ẹfa, je si odẹ riẹ no usu ahwo nọ a rẹ jọ itanẹte vi igemu itieye na se. O te je bru usu no ahwo nọ a gbẹ jẹ fa. Daniẹl ọ ta nọ, “Ukpenọ mẹ fa igemu ekọmputa, enẹna mẹ be hae nyai ru eware efa, je kuomagbe inievo ukoko na.” Obọnana Daniẹl yọ ọkobaro ọ tẹ jẹ rrọ ọkpako ukoko.

15. Fikieme ma rẹ rọ yọroma kẹ iku erue?

¹⁵ Ma rẹ yọroma gaga kẹ eme eviẹhọ nọ otu nọ o kie no ẹrọwọ na no a rẹ ta, wọhọ epanọ Timoti o ru. (1 Tim. 4:1, 7; 2 Tim. 2:16) Wọhọ oriruo, ahwo nana a rẹ sai gu erue kpahe inievo mai hayo ta eme nọ e rẹ lẹliẹ omai wo avro kpahe ukoko Jihova. Ma gbẹ yọroma ha, eme itieye na e rẹ sai whrehe ẹrọwọ mai. Joma rọwo eme yena vievie he. Fikieme? Ahwo nọ “iroro rai i gbeku no nọ a gbe wo otoriẹ uzẹme na ha” ae a re gbe iku erue nana.  Oware nọ a gwọlọ kpobi họ “avro-ọvro gbe ikẹ-isio.” (1 Tim. 6:4, 5) A gwọlọ nọ ma rọwo eme ọtaraha rai na re ma viẹro ku inievo mai evaọ ukoko na.

16. Eme ma rẹ tẹrovi?

¹⁶ Tẹrovi iruo Uvie na. O gwọlọ nọ Timoti nọ ọ jọ “emamọ osoja Kristi Jesu” na ọ rẹ tẹrovi iruo usi uwoma ota na. O re le ugho gbe eware efa siọ iruo Uvie na ba ha. (2 Tim. 2:3, 4) Jọ mai kpobi ma ru epanọ Timoti o ru na. Ma re le ugho gbe eware efa siọ egagọ Ọghẹnẹ ba vievie he. “Ogaga eviẹhọ efe” o rẹ sai ru nọ ma re ro siuke kpemu evaọ egagọ Jihova, je ru nọ ma gbe ro wo uvẹ nọ ma re ro se Ebaibol na hayo rehọ iẹe wuhrẹ amọfa ha. (Mat. 13:22) Joma tẹrovi iruo Ọghẹnẹ jẹ kpairoro vrẹ eware jọ evaọ uzuazọ, re ma sai wo oke gbe ẹgba nọ ma rẹ rọ “kake gwọlọ Uvie na.”​—Mat. 6:22-25, 33.

17-18. Eme o re fiobọhọ kẹ omai whaha oware nọ o rẹ sae raha usu mai kugbe Jihova?

¹⁷ Riẹ oware nọ who ti ru kpahotọ. Isoja ọ rẹ riẹ oware nọ o ti ru kpahotọ taure ozighi o te ti du lahwe. Re ma sae sẹro eware nọ Jihova o mu họ omai obọ, ma rẹ jowọ vẹrẹ vẹrẹ nọ ma tẹ ruẹ nọ ẹbẹbẹ ọ be tha. Eme ọ rẹ sai fiobọhọ kẹ omai ru ere? Ma rẹ riẹ oware nọ ma ti ru taure ẹbẹbẹ ọ tẹ te roma lahwe.

¹⁸ Wọhọ oriruo, ma te kpohọ epati nọ ma jọ muẹrohọ nọ o wọhọ nọ ẹbẹbẹ ọ te romavia, ma rẹ rọ ẹro da oria nọ ma rẹ rọ dhẹ otẹrọnọ ẹbẹbẹ o du lahwe. Fikieme? Ma tẹ hẹrẹ nọ ozighi o du lahwe tao, ma rẹ riẹ obonọ ma rẹ dhẹ nya ha. Epọvo na re, ma rẹ riẹ oware nọ ma re ru kpahotọ otẹrọnọ ighe ọfariẹ-ogbe gbe erọ ozighi e roma lahwe idudhe nọ ma te bi rri etẹlẹvisiọno. U te no ere no, ma rẹ riẹ oware nọ ma re ru otẹrọnọ ma jọ etẹlẹvisiọno hayo itanẹte yo eme ahwo nọ i kie no ẹrọwọ na no. Otẹrọnọ ma riẹ oware nọ ma re ru no taure ma tẹ te ruẹ eware itieye na, u re fiobọhọ kẹ omai whaha oware nọ o rẹ sae raha usu mai kugbe Jihova. Ma vẹ sae jọ fuafo evaọ aro riẹ.​—Ol. 101:3; 1 Tim. 4:12.

19. Irere vẹ ma ti wo nọ ma tẹ sẹro eware eghaghae nọ Jihova o mu họ omai obọ na ziezi?

¹⁹ Ajọ ma sẹro eware eghaghae nọ Jihova o mu họ omai obọ na gaga. Eyehọ iwuhrẹ uzẹme na gbe uvẹ nọ ma be rọ rehọ ai wuhrẹ amọfa. Ma te ru ere, udu u re brukpe omai hi. Uzuazọ mai o te jọ kpatiẹ, ma ve ti je fiobọhọ kẹ amọfa riẹ Jihova. Avro ọ riẹ hẹ, Jihova Ọghẹnẹ mai o ti fiobọhọ kẹ omai sẹro oware nọ o mu họ omai obọ na ziezi.​—1 Tim. 6:12, 19.