1-2. Ẹvẹ Ọtausiuwoma Na 11:6 u ro kiekpahe usi uwoma ota mai?

EVAỌ erẹwho jọ ahwo a rẹ gaviezọ kẹ usi uwoma gaga. O rẹ wọhọ ẹsenọ a hẹrẹ usi uwoma na bẹ no. Rekọ evaọ erẹwho efa, ahwo a rẹ gaviezọ kẹ usi uwoma tere he, a rẹ gwọlọ yo ho nọ whọ tẹ be ta ẹme kpahe Ọghẹnẹ hayo Ebaibol. Ẹvẹ o rrọ evaọ oria ra? Oghẹrẹ kpobi nọ o rrọ kẹhẹ, Jihova ọ gwọlọ nọ ma ta usi uwoma na bẹsenọ ọ rẹ ta nọ iruo na i te no.

² Nọ oke nọ Jihova o fihọ u te te no, iruo na i ti kuhọ “urere na o vẹ te ze.” (Mat. 24:14, 36) Taure oke yena u te ti te, ẹvẹ ma sai ro ru oware nọ Ebaibol ọ ta na inọ “whọ jọ obọ ra u serihọ họ”? *​—Se Ọtausiuwoma Na 11:6.

3. Eme ma ti wuhrẹ evaọ uzoẹme nana?

³ Uzoẹme nọ o vrẹ na o ta kpahe eware ene nọ ma re ru re ma ruẹse jọ “ikuori ahwo.” (Mat. 4:19) Uzoẹme nana o te ta kpahe eware esa nọ e rẹ sai fiobọhọ kẹ omai ruabọhọ usi uwoma ota na ghelọ ebẹbẹ nọ ma wo kẹhẹ. Ma ti wuhrẹ oware nọ u ro fo (1) re ma rọ iruo usi uwoma ota na karo, (2) re ma wo odiri, (3) re ma wo ẹrọwọ ọgaga.

4. Fikieme o rọ gwọlọ nọ ma tẹrovi iruo nọ Jihova ọ kẹ omai na?

⁴ Jesu ọ ta nọ eware sa-sa e te via evaọ edẹ urere na nọ e rẹ sai si iroro mai no iruo usi uwoma ota na. Ọ kẹ ilele riẹ ohrẹ inọ jọ a “ruabọhọ erou.” (Mat. 24:42) Nẹnẹ na,  ahwo buobu a bi ru ọkpọ eware nọ ahwo oke Noa a je ru nọ o wha riẹ ze nọ a gbẹ rọ gaviezọ kẹ unuovẹvẹ Noa ha. (Mat. 24:37-39; 2 Pita 2:5) Fikiere joma tẹrovi iruo nọ Jihova ọ kẹ omai na.

5. Ẹvẹ Iruẹru Ikọ 1:6-8 u ro dhesẹ epanọ u fo nọ ma rẹ ta usi uwoma na thabọ te?

⁵ O gwọlọ nọ ma rẹ romakẹ iruo usi uwoma ota na ziezi nẹnẹ. Jesu ọ ta nọ iruo na e te jọ ruaro, yọ a ti gbe ru ai nọ o te whu no. (Jọn 14:12) Nọ Jesu ọ kparoma no uwhu ze no, o ru oware igbunu jọ. O ru nọ ilele riẹ a ro kpe iyei buobu. Ọ tẹ rọ uvẹ yena wuhrẹ ai nọ ikuori ahwo nọ a rẹ jọ u wuzou vi oware ofa kpobi. (Jọn 21:15-17) Taure Jesu o te ti kpobọ odhiwu ọ vuẹ ilele riẹ nọ orọnikọ orẹwho Izrẹl ọvo a te jọ ta usi uwoma na ha, a te tae thabọ te oka avọ oka akpọ na. (Se Iruẹru Ikọ 1:6-8.) Nọ ikpe buobu e vrẹ no, Jesu ọ jọ eruẹaruẹ dhesẹ oware nọ o te via “evaọ ẹdẹ Olori na” kẹ Jọn ukọ na. * Jọn ọ ruẹ eware buobu evaọ eruẹaruẹ na. Oware jọ nọ u gbe rie unu gaga họ, ọ ruẹ ukọ-odhiwu nọ o bi “whowho usi uwoma ebẹdẹ bẹdẹ kẹ . . . orẹwho, orua, ẹrọunu gbe utu ahwo kpobi,” onọ u dhesẹ nọ ikọ-odhiwu e be kpọ iruo usi uwoma ota na. (Evia. 1:10; 14:6) O rrọ vevẹ nọ Jihova ọ gwọlọ nọ ma ta usi uwoma na bẹsenọ ọ rẹ ruẹ nọ u te no.

6. Eme o re fiobọhọ kẹ omai rọ iruo usi uwoma ota na karo?

⁶ Ma te roro kpahe oghẹrẹ nọ Jihova o bi ro fiobọhọ kẹ omai, o rẹ whae ze nọ ma rẹ rọ rehọ iruo usi uwoma ota na karo. Wọhọ oriruo o fiobọhọ kẹ omai wo ebe buobu, te enọ a rekọdo, gbe ividio buobu evaọ oria itanẹte mai na. A rehọ evẹrẹ nọ i bu vi odu (1,000) soso ru eware nana fihọ oria itanẹte mai na. (Mat. 24:45-47) U te no ere no, evaọ akpọ  nana nọ okugbe ọ rrọ họ na, nọ ahwo a be jọ họre kẹ ọvuọ isuẹsu riẹ, ọvuọ egagọ riẹ, je bi si kẹ ọvuọ uwou riẹ na, idibo Ọghẹnẹ nọ i bu vi ima eree soso a wo okugbe. Wọhọ oriruo, evaọ Edisoi-Oka, edẹ ikpegbizii amara Ane, 2019, Isẹri Jihova nọ e rrọ akpọ na soso a rri ividio nọ a jo se isase Ebaibol okpẹdoke yena. Evaọ owọwọ ẹdẹ yena, ahwo nọ a bu te ima udhe, idu egba izii gbe ikpegbizii, gbe udhuvẹ-gbọvo (20,919,041) a kokohọ ru ekareghẹhọ uwhu Jesu. Ma te roro kpahe eware igbunu nọ Jihova o bi ru kẹ omai evaọ ukoko na u re fiobọhọ kẹ omai rọ iruo usi uwoma ota na karo.

7. Ẹvẹ oriruo Jesu o re ro fiobọhọ kẹ omai rọ iruo usi uwoma ota na karo?

⁷ Oware ofa nọ o rẹ sai fiobọhọ kẹ omai rọ iruo usi uwoma ota na karo họ oriruo Jesu nọ ma rẹ rọ aro kele. Ọ kẹ uvẹ hẹ re oware jọ o lẹliẹe si ovao no iruo usi uwoma ota na. (Jọn 18:37) Oke nọ Setan ọ ta nọ ọ rẹ kẹe “ekwotọ-ivie akpọ na kpobi gbe oruaro rai,” ọ rọwo mi ei hi. Yọ oke nọ a jẹ gwọlọ rehọ iẹe mu ovie, ọ rọwo ho. (Mat. 4:8, 9; Jọn 6:15) O kie lele efe akpọ na gbe he, yọ dede nọ a je kpokpo iei gaga, ọ ruabọhọ usi uwoma ota na. (Luk 9:58; Jọn 8:59) Nọ edawọ i te te omai, ma rẹ gbẹ sae rọ iruo usi uwoma ota na karo nọ ma tẹ kareghẹhọ ohrẹ nọ Pọl ọ kẹ omai. Ọ tuduhọ Ileleikristi awọ nọ a rọ aro kele oriruo Jesu re o gbẹ ‘bẹ ae no’ ho.​—Hib. 12:3.

8. Eme ohwo nọ o wo odiri o re ru, kọ fikieme u ro wuzou gaga re ma wo odiri enẹna?

⁸ Ohwo nọ o wo odiri ọ rẹ hẹrẹ bẹsenọ eware i re woma. Te ma wo ẹbẹbẹ jọ nọ ma gwọlọ nọ o kuhọ hayo ma bi rẹro emamọ oware jọ, ma re wo odiri. Oke nọ ozighi ọ da ẹkwotọ Juda fia, Habakọk ọruẹaro na ọ jẹ gwọlọ nọ ẹbẹbẹ na o kuhọ vẹrẹ vẹrẹ. (Hab. 1:2) Oke nọ Jesu ọ jọ otọakpọ, ilele riẹ a je rẹro nọ Uvie Ọghẹnẹ “o te romavia okioke yena” re u siwi ai no obọ ahwo Rom nọ a je kienyẹ ae. (Luk 19:11) Mai omamai, ma gwọlọ nọ Uvie Ọghẹnẹ o ze vẹrẹ vẹrẹ re u ti si eware iyoma nọ e rrọ akpọ na via no, re u ru otọakpọ na fihọ ọkpokpọ nọ ahwo okiẹrẹe ọvo a rẹ jọ. (2 Pita 3:13) Ghele na, ma re wo odiri, ma rẹ hẹrẹ oke nọ Jihova o fihọ. Joma ta kpahe idhere jọ nọ Jihova o bi ro wuhrẹ omai odiri.

9. Iriruo vẹ i dhesẹ nọ Jihova o wo odiri?

⁹ Jihova o wo odiri gaga, yọ u fo nọ ma rẹ rọ aro kele odiri riẹ. Oke nọ ọ ta kẹ Noa nọ o ku okọ, ọ kẹ riẹ oke ziezi nọ o re ro ku okọ na jẹ ‘ta usi uwoma’ kẹ ahwo. (2 Pita 2:5; 1 Pita 3:20) Oke nọ Jihova ọ jẹ gwọlọ raha Sọdọm avọ Gomora, ọ gaviezọ kẹ Abraham nọ o je dhei ẹnẹnọ sọ u fo re ọ raha ahwo nọ a rrọ Sọdọm avọ Gomora kpobi no. (Emu. 18:20-33) U te no ere no, ikpe buobu emọ Izrẹl a yoẹme kẹ Jihova ha. Yọ oke nana kpobi, o wo odiri kẹ ae. (Neh. 9:30, 31) Jihova o gbe bi wo odiri kẹ ahwo nẹnẹ re a sai “wo uvẹ nọ a re ro kurẹriẹ.” (2 Pita 3:9; Jọn 6:44; 1 Tim. 2:3, 4) Iriruo nana kpobi i dhesẹ nọ mai omamai ma re gbe wo odiri nọ ma be ta usi uwoma je wuhrẹ ahwo na. U te no ere no, Jihova ọ rehọ ọtadhesẹ jọ evaọ Ebaibol na wuhrẹ omai odiri.

10. Eme a ta kpahe ọwhẹrẹ evaọ Jemis 5:7, 8 nọ u fo nọ ma rẹ rọ aro kele?

¹⁰ Se Jemis 5:7, 8. Iruo ọwhẹrẹ nọ a ta  ẹme kpahe evaọ etenẹ na i re wuhrẹ omai odiri. Uzẹme, ekakọ jọ e rẹ kake who gaga. Rekọ ekakọ buobu e rẹ rehọ oke ziezi re e tẹ te who. Evaọ Izrẹl, no oke nọ a rẹ rọ kọ eware rite oke nọ e rẹ rọ who, o rẹ rehọ oware wọhọ emerae ezeza. Evaọ Izrẹl, ọwhẹrẹ ọ rẹ kọ eware nọ iso ọsosuọ e tẹ rrọ no, onọ u kiefihọ amara akpe mai. O ve vu eware na nọ iso urere e tẹ rrọ no, onọ u kiefihọ amara ane mai. (Mak 4:28) Ma tẹ be rọ aro kele odiri ọwhẹrẹ, u re dhesẹ nọ ma wo areghẹ. Rekọ ẹsikpobi onana o rẹ jọ lọlọhọ họ.

11. Ẹvẹ odiri ọ sai ro fiobọhọ kẹ omai evaọ iruo usi uwoma ota mai?

¹¹ Fikinọ ma gba ha, ma rẹ gwọlọ nọ ẹdẹdẹ nọ ma ru oware ma rẹ re erere riẹ. Rekọ re ohwo o te ti vu oware, o re kporo udhu, ọ vẹ kọ oware na je ku ame ku ei. Ọ vẹ gbẹ ẹbe họ iẹe jẹ hẹrẹ bẹsenọ oware na o rẹ who tao. Epọvo na iruo usi uwoma ota mai na e rrọ. Nọ ma te kpohọ usi uwoma, ma rẹ nyaku ahwo jọ nọ a be rọ ekpehre ubiẹro rri Isẹri Jihova. Re ahwo otiọnana a te ti nwene oghẹrẹ nọ a bi rri omai jẹ gaviezọ kẹ eware nọ ma bi wuhrẹ ai, o rẹ rehọ oke. Odiri o rẹ whae ze nọ ma rẹ rọ ruabọhọ usi uwoma ota na nọ ma tẹ nyaku ahwo nọ a gwọlọ gaviezọ họ. Ahwo jọ a tẹ make gaviezọ kẹ omai dede, ma re wo odiri ghele keme ma sae gba ahwo nọ ma bi wuhrẹ họ rọwo ẹme nọ Ebaibol ọ ta ha. Makọ ilele Jesu dede, oke jọ o jariẹ nọ a jẹ kaki wo otoriẹ oware nọ Jesu o je wuhrẹ ai hi. (Jọn 14:9) Joma kareghẹhọ nọ ma rẹ sae kọ je ku ame ku, rekọ Ọghẹnẹ ọvo ọ rẹ sai ru ei rro.​—1 Kọr. 3:6.

12. Ẹvẹ ma sai ro wo odiri kẹ imoni mai nọ ma tẹ gwọlọ ta usi uwoma kẹ ae?

¹² O rẹ jọ bẹbẹ re ma wo odiri nọ ma tẹ gwọlọ ta usi uwoma kẹ imoni mai. Rekọ  ẹme nọ ọ rrọ obe Ọtausiuwoma Na 3:1, 7 o sai fiobọhọ kẹ omai. O ta nọ: “U wo oke . . . nọ a re ro fibo gbe oke nọ a rẹ rọ ta ẹme.” Ma rẹ sae rọ emamọ uruemu mai ta usi uwoma ẹsikpobi. O make rrọ ere na, ma rẹ rọ ẹro da uvẹ kpobi nọ ma rẹ rọ ta ẹme no Ebaibol ze. (1 Pita 3:1, 2) Dede nọ ma rẹ daoma rọ ọwhọ ta usi uwoma na je wuhrẹ ahwo, ma rẹ daoma wo odiri kẹ ahwo kpobi, te ahwo uviuwou mai.

13-14. Fodẹ iriruo ahwo jọ nọ i wo odiri nọ ma rẹ sae rọ aro kele.

¹³ Iriruo ahwo jọ nọ a gbiku rai fihọ Ebaibol na gbe idibo Jihova jọ evaọ oke mai nana o rẹ sai wuhrẹ omai odiri. Habakọk ọ jẹ gwọlọ nọ eware iyoma nọ a je ru evaọ oke riẹ i kuhọ vẹrẹ vẹrẹ. Dede na ọ ta nọ: “Me ti gbe dikihẹ oria nọ mẹ rẹ jọ rou na.” (Hab. 2:1) O jọ Pọl ukọ na oja gaga inọ o re ru iruo usi uwoma ota riẹ na “te urere.” Rekọ onana o rehọ oke. Ghele na ọ rọ odiri “se isẹri ziezi kpahe usi uwoma” na.​—Iruẹru 20:24.

¹⁴ Joma ta kpahe oniọvo jọ avọ aye riẹ nọ a nwrotọ no Isukulu Giliad, a te dhe ai kpohọ orẹwho nọ Isẹri Jihova a rrọ tere he. U wo egagọ nọ ahwo buobu a rrọ evaọ orẹwho nana, yọ orọnikọ ichọche he. Ahwo buobu a jẹ rọwo nọ a wuhrẹ Ebaibol kugbe ai hi. Rekọ inievo efa nọ a gbẹ jọ eklase evaọ Giliad na, nọ a vi kpohọ erẹwho efa a jẹ hae vuẹ ae epanọ a bi wuhrẹ Ebaibol kugbe ahwo bu te, yọ ejọ i bi kurẹriẹ. Dede nọ ahwo buobu a jẹ rọwo wuhrẹ Ebaibol ho, ọzae-avọ-aye nana a ruabọhọ usi uwoma ota na. Nọ a jọ ẹkwotọ nana ta usi uwoma te ikpe eree no, ọmọ-uwuhrẹ Ebaibol rai jọ ọ tẹ te họ-ame. Eme oriruo idibo Jihova oke anwae gbe erọ oke mai nana i wuhrẹ owhẹ? Ahwo nana a dadamu iruo na, obọ o rrọ rai hi, yọ Jihova ọ ghale rai fiki odiri rai. Jọ mai kpobi ma “rọ aro kele enọ e rọ ẹkwoma ẹrọwọ gbe odiri reuku eyaa na.”​—Hib. 6:10-12.

15. Eme ma rọwo, nọ o be lẹliẹ omai ta usi uwoma na avọ ọwhọ?

¹⁵ Ma rọwo eware nọ ma bi wuhrẹ ahwo na, fikiere ma gwọlọ vuẹ ahwo buobu kpahe eware nana. U mu omai ẹro nọ eyaa nọ e rrọ Ebaibol na i ti rugba. (Ol. 119:42; Aiz. 40:8) Ma be rọ ẹro ruẹ eruẹaruẹ Ebaibol nọ i bi rugba nẹnẹ. Ma be ruẹ ahwo buobu nọ a bi siobọno ikpehre iruemu je yeri emamọ uzuazọ fikinọ a bi ru oware nọ Ebaibol ọ ta. Enana kpobi i ru omai riẹ nọ emamọ usi na yọ oware nọ ma rẹ vuẹ ahwo kpobi.

16. Wọhọ epanọ o rrọ obe Olezi 46:1-3, ẹvẹ ẹrọwọ nọ ma fihọ Jihova avọ Jesu o sai ro fiobọhọ kẹ omai ruabọhọ usi uwoma ota na?

¹⁶ Ma fi ẹrọwọ họ Jihova Ọghẹnẹ re, ọnọ o wo ovuẹ nọ ma bi whowho kẹ ahwo na. Ma tẹ jẹ rọwo Jesu, ọnọ o ro mu Ovie ọrọ Uvie riẹ. (Jọn 14:1) Ma riẹ nọ ẹbẹbẹ ọvo nọ o re te omai nọ Jihova ọ rẹ jọ dhogbo bru omai ze he ọ rrọ họ. (Se Olezi 46:1-3.) U te no ere no, ma riẹ nọ dede nọ Jesu ọ rrọ obọ odhiwu, ọ be rọ ogaga gbe udu nọ Jihova ọ kẹ riẹ kpọ iruo usi uwoma ota mai na.​—Mat. 28:18-20.

17. Kẹ oriruo jọ nọ u dhesẹ nọ u fo re ma gbẹ ta usi uwoma na.

¹⁷ Ma te wo ẹrọwọ, ma re fievahọ Jihova inọ o ti ru nọ ahwo nọ ma be ta usi uwoma kẹ a ti ro kurẹriẹ. Yọ ẹsejọ dede o re ru onana evaọ idhere nọ ma rẹro riẹ hẹ. (Ọtausi. 11:6) Wọhọ oriruo, kẹdẹ  kẹdẹ ahwo nọ a be nya edhere vrẹ a rẹ ruẹ ebe mai nọ ma fihọ oware nọ ma re fi ebe họ ghelie na. Kọ edhere nana nọ ma be rọ ta usi uwoma na u bi gine fiobọhọ? Ee! Odibọgba Uvie Mai ọrọ Akpegbọvo 2014 o ta kpahe ọmọtẹ yunivasiti jọ nọ ọ gwọlọ kere kpahe Isẹri Jihova. Ọ riẹ oria nọ Ọgwa Uvie ọ rrọ họ. Rekọ ọ tẹ ruẹ oware nọ ma re fi ebe họ ghelie na nọ a fi ebe họ evaọ obọ isukulu rai. Ọ tẹ jẹ ruẹ obe jọ nọ u fiobọhọ kẹe kere iku kpahe Isẹri Jihova. Uwhremu na, ọmọtẹ nana o zihe ruọ Osẹri Jihova, yọ enẹna ọ rrọ ọkobaro oke-kpobi. Iku itiena nọ ma be hae jọ ebe mai se na i dhesẹ nọ ahwo buobu a gbẹ riẹ nọ u fo nọ a re yo usi uwoma na.

18. Ẹvẹ u ro mu omai ẹro nọ oke nọ Jihova o fihọ kẹ usi uwoma ota na o te vrẹ hẹ?

¹⁸ Ma riẹ nọ iruo usi uwoma ota na i ti kuhọ evaọ oke nọ Jihova o fihọ. Kareghẹhọ oware nọ o via evaọ oke Noa. Oware nọ Jihova o ru oke yena u dhesẹ nọ oke kpobi nọ o fihọ kẹ oware o rẹ vrẹ hẹ. Oware wọhọ ikpe udhozeza (120) taure o tẹ te via, Jihova o fi oke họ nọ Owhe na o ti ro ku. Nọ ikpe buobu e vrẹ no, Jihova ọ tẹ ta kẹ Noa nọ jọ o ku okọ. Ere Noa o ro mu okọ na họ eku, yọ o ru iruo na oware wọhọ ikpe udhuvẹ hayo udhuvẹ-gbikpe taure Owhe na o te ti ku ze. Nọ o je ku okọ na yọ ọ be vẹvẹ ahwo unu kpahe oware nọ o be te via na, rekọ a gaviezọ họ. Ghele na, ọ ruabọhọ iruo na bẹsenọ Jihova ọ rọ ta nọ oke nọ o re ro fi erao họ okọ na u te no. Oke nọ Jihova o fihọ o nwani te no, “ọ tẹ kare ẹthẹ na.”​—Emu. 6:3; 7:1, 2, 16.

19. Eme ma te rọ ẹro ruẹ kẹle na nọ ma gbe seri iruo usi uwoma ota na họ họ?

¹⁹ Kẹle na, Jihova ọ te ta nọ iruo usi uwoma ota na i te no. Ọ vẹ te “kare ẹthẹ na,” wọhọ odẹme. Ọ te raha uyero-akpọ Setan muotọ, ọ vẹ rọ akpọ ọkpokpọ na ze. Bọo oke yena, joma rọ aro kele oriruo Noa, Habakọk, gbe amọfa nọ a ruabọhọ iruo nọ Ọghẹnẹ ọ kẹ rai. Joma rọ iruo usi uwoma ota na karo, je wo odiri kẹ ahwo. Joma fi ẹrọwọ họ Jihova je fievahọ eyaa riẹ.