1. Eme Jihova ọ ta nọ o te via evaọ oke mai na?

JIHOVA ọ ta nọ evaọ oke mai na, “ezae ikpe evaọ evẹrẹ erẹwho na kpobi a rẹ te jabọ kru, ẹhẹ, a te zaza abọ mu ewu othethei ohwo Ju, yọ a be ta nọ: ‘Ma gwọlọ lele owhai, keme ma yo nọ Ọghẹnẹ ọ rrọ kugbe owhai.’” (Zẹk. 8:23) “Ohwo Ju” nọ a ta kpahe evaọ etenẹ na o dikihẹ kẹ Ileleikristi nọ Ọghẹnẹ ọ rọ ẹzi ọfuafo wholo. A jọ Ebaibol na se ai “Izrẹl Ọghẹnẹ” re. (Gal. 6:16) “Ezae ikpe” na i dikihẹ kẹ ahwo nọ a wo ẹruore inọ a te rria otọakpọ na bẹdẹ bẹdẹ. A vuhumu nọ Jihova ọ salọ Ileleikristi nọ a rọ ẹzi wholo na no, fikiere a rri rie fihọ uvẹ-ọghọ re a lele ai gọ Jihova.

2. Ẹvẹ “ezae ikpe” na a re ro “lele” enọ a rọ ẹzi wholo na?

² Dede nọ a rẹ sae riẹ edẹ ahwo kpobi nọ Ọghẹnẹ ọ rọ ẹzi wholo nọ i gbe kiọkọ otọakpọ nẹnẹ hẹ, * enọ i wo ẹruore otọakpọ na a rẹ sai “lele” enọ a rọ ẹzi wholo na. Evaọ oghẹrẹ vẹ? Ebaibol na ọ ta nọ “ezae ikpe” na a te “zaza abọ mu ewu othethei ohwo Ju, yọ a be ta nọ: ‘Ma gwọlọ lele owhai, keme ma yo nọ Ọghẹnẹ ọ rrọ kugbe owhai.’” Muẹrohọ nọ oria ikere na o fodẹ “ohwo Ju.” Rekọ “owhai” nọ a jọ oria ovona ta na u dhesẹ nọ orọnikọ omọvo ho. Fikiere ohwo Ju nana yọ omọvo ho rekọ Ileleikristi kpobi nọ Ọghẹnẹ ọ rọ ẹzi wholo. Ileleikristi nọ  i wo ẹruore otọakpọ na a bi kuomagbe enọ a rọ ẹzi wholo na gọ Jihova. Rekọ a re rri rai fihọ isu rai hi, keme a vuhumu nọ Jesu họ Osu rai.​—Mat. 23:10.

3. Enọ vẹ ma te jọ uzoẹme nana kiyo rai?

³ Nọ orọnọ ikpodhiwu jọ a gbẹ rrọ otọakpọ nẹnẹ na, ahwo jọ a rẹ sae nọ inọ: (1) Ẹvẹ u fo nọ ahwo nọ Ọghẹnẹ ọ rọ ẹzi wholo a re rri omarai? (2) Ẹvẹ u fo nọ ma re rri ohwo nọ ọ re ebrẹdi jẹ da udi na evaọ ẹdẹ Ekareghẹhọ na? (3) Otẹrọnọ unu ahwo nọ a be re jẹ da u bi dhe ebuebu, kọ u fo re ma ruawa kpahe onana? Ma te jọ uzoẹme nana kiyo enọ nana.

4. Didi unuovẹvẹ o rrọ 1 Ahwo Kọrint 11:27-29 nọ u fo nọ enọ a rọ ẹzi wholo na a re roro didi kpahe, kọ fikieme?

⁴ U fo nọ otu nọ a rọ ẹzi wholo na a re roro didi kpahe unuovẹvẹ nọ o rrọ obe 1 Ahwo Kọrint 11:27-29. (Sei.) Ẹvẹ a sae rọ ta nọ ohwo nọ a rọ ẹzi wholo nọ ọ re ebrẹdi jẹ da udi na “o te he”? O rẹ sae via ere nọ ohwo yena o gbe bi koko izi ikiẹrẹe Jihova ha. (Hib. 6:4-6; 10:26-29) Enọ a rọ ẹzi wholo na a riẹ nọ o gwọlọ nọ a re kru ẹrọwọ rai otẹrọnọ a ginẹ gwọlọ wo “osa use obọ odhiwu nọ Ọghẹnẹ  ọ rọ ẹkwoma Kristi Jesu se” ai na.​—Fil. 3:13-16.

5. Ẹvẹ u fo nọ enọ a rọ ẹzi wholo na a re rri omarai?

⁵ Ẹzi Jihova o re fiobọhọ kẹ idibo riẹ wo omaurokpotọ, orọnikọ omorro ho. (Ẹf. 4:1-3; Kọl. 3:10, 12) Fikiere enọ a rọ ẹzi wholo na a re roro nọ a woma vi amọfa ha. A riẹ nọ a tẹ rọ ẹzi wholo ohwo, oyena o nwani dhesẹ nọ Jihova ọ rẹ rọ ẹzi riẹ kẹ ohwo yena vi idibo riẹ efa ha. Yọ a re rri omarai nọ a wo otoriẹ Ebaibol na vi amọfa ha. A rẹ vuẹ omọfa vievie he inọ Ọghẹnẹ ọ rọ ẹzi wholo ohwo yena no, fikiere jọ o mu ebrẹdi na họ ẹre je mu udi na họ ẹda. Ukpoye, a re wo omaurokpotọ jẹ riẹ nọ Jihova ọvo ọ rẹ sai ziezi ohwo kẹ uzuazọ obọ odhiwu.

6. Wọhọ epanọ o rrọ obe 1 Ahwo Kọrint 4:7, 8, uruemu vẹ u fo nọ Ileleikristi nọ a rọ ẹzi wholo a re dhesẹ?

⁶ Dede nọ enọ a rọ ẹzi wholo na a rri use obọ odhiwu rai na fihọ uvẹ-ọghọ ulogbo, a re rẹro nọ amọfa a te kẹ ae adhẹẹ vi ibe Ileleikristi rai hi. (Fil. 2:2, 3) A riẹ re nọ okenọ Jihova ọ rọ ẹzi wholo ai, o ru amọfa riẹ onana ha. Fikiere, u re gbe ohwo nọ a rọ ẹzi wholo unu hu nọ amọfa a gbẹ kake rọwo ho inọ a ginẹ rọ ẹzi wholo iei no. Ọ riẹ nọ Ebaibol ọ ta nọ ma du nwane rọwo ho, nọ ohwo jọ ọ tẹ ta nọ Ọghẹnẹ ọ kẹ riẹ obọdẹ owha-iruo jọ. (Evia. 2:2) Ohwo nọ a rọ ẹzi wholo o re gogo iei hi, re amọfa a ruẹse kẹe adhẹẹ vi Ileleikristi efa. Yọ ọ rẹ rehọ iẹe ya-oma vievie he.​—Se 1 Ahwo Kọrint 4:7, 8.

7. Eme Ileleikristi nọ a rọ ẹzi wholo a rẹ whaha, kọ fikieme?

⁷ Orọnikọ ikpodhiwu ibe rai ọvo Ileleikristi nọ a rọ ẹzi wholo a rẹ gwọlọ kuomagbe he, wọhọ ẹsenọ a rrọ oghẹrẹ ukoko jọ. A re du gwọlọ ikpodhiwu efa ha re a ruẹse gbẹ hae ta ẹme kpahe ẹruore obọ odhiwu rai hayo re a wo itu rai sa nọ a re kuomagbe kẹ uwuhrẹ Ebaibol. (Gal. 1:15-17) Ukoko Ọghẹnẹ o rẹ jọ okugbe ọvo ho nọ Ileleikristi nọ a rọ ẹzi wholo a te bi ru ere. A rẹ rọ enẹ wọso ẹzi ọfuafo na, onọ u bi fiobọhọ kẹ idibo Ọghẹnẹ wo udhedhẹ gbe okugbe.​—Rom 16:17, 18.

8. Fikieme whọ rẹ rọ yọroma kpahe oghẹrẹ nọ who re rri otu nọ a rọ ẹzi wholo? (Rri ẹme-obotọ na re.)

⁸ Ẹvẹ u fo nọ ma re rri inievo-emetẹ gbe erọ emezae nọ a rọ ẹzi wholo? O thọ re ma rri ohwo jọ kpehru vrẹta, ọ tẹ makọ rrọ oniọvo nọ a rọ ẹzi wholo dede. (Mat. 23:8-12) Nọ Ebaibol na ọ ta kpahe  ekpako ukoko, ọ tuduhọ omai awọ nọ ma “rọ aro kele ẹrọwọ rai.” (Hib. 13:7) Dede na, ọ vuẹ omai nọ ma rehọ ohwo-akpọ jọ wọhọ osu mai hi. Uzẹme inọ Ebaibol na ọ ta nọ u wo ahwo jọ nọ u fo nọ a rẹ kẹ “ọghọ akuava.” Rekọ ma re ru onana fikinọ ahwo nana a bi “ru iruo ẹruọsa rai ziezi” je bi “ru iruo gaga evaọ ẹmeọta gbe amọfa owuhrẹ,” orọnikọ fikinọ a rọ ẹzi wholo ai hi. (1 Tim. 5:17) Ma tẹ be hai jiri hayo rri inievo nọ a rọ ẹzi wholo kpehru ga hrọ, onana o sae jarai oma oghẹrẹ jọ. * Mai yoma na, o sae lẹliẹ ai fu uke. (Rom 12:3) Mai ọvuọvo ma gwọlọ ru oware nọ o rẹ lẹliẹ oniọvo Kristi nọ a rọ ẹzi wholo ru oware uyoma utioye he.​—Luk 17:2.

9. Ẹvẹ ma sai ro dhesẹ nọ ma wo adhẹẹ kẹ Ileleikristi nọ a rọ ẹzi wholo?

⁹ Ẹvẹ ma sai ro dhesẹ nọ ma wo adhẹẹ kẹ ahwo nọ Jihova ọ rọ ẹzi riẹ wholo? Ma rẹ nọ ae kpahe oghẹrẹ nọ a rọ rehọ ẹzi wholo ai hi. Onana yọ ẹme obọ ohwo, onọ u fo nọ ma rẹ nọ kpahe he. (1 Tẹs. 4:11; 2 Tẹs. 3:11) Yọ ma re roro ho inọ Ọghẹnẹ ọ rọ ẹzi wholo ahwo uviuwou okpodhiwu re, wọhọ ọzae hayo aye riẹ, ọsẹ hayo oni riẹ. Ohwo ọ rẹ reuku uvẹ-ọghọ nana mi uviuwou riẹ hẹ. Obọ Ọghẹnẹ u re no ze. (1 Tẹs. 2:12) U fo nọ ma rẹ jẹ daoma whaha enọ nọ e rẹ sae kẹ ohwo uye. Wọhọ oriruo, u fo nọ ma rẹ nọ aye oniọvo nọ a rọ ẹzi wholo epanọ o riẹe oma ha inọ ọzae riẹ o ti kpobọ odhiwu se iẹe ba, ọ vẹ te rria otọakpọ na bẹdẹ bẹdẹ ababọ riẹ. U mu omai ẹro ziezi nọ evaọ akpọ ọkpokpọ na, Jihova o ti “ru ẹgwọlọ oware kpobi nọ o rrọ uzuazọ kẹe.”​—Ol. 145:16.

10. Nọ “iruemu ahwo jọ” e gbẹ be were omai vrẹta ha, ẹvẹ onana o sae rọ thọ omai?

¹⁰ O rẹ thọ omai re nọ ma gbe rri Ileleikristi nọ a rọ ẹzi wholo kpehru vi ibe Ileleikristi mai efa ha. Evaọ oghẹrẹ vẹ? Ebaibol na ọ vuẹ omai nọ Ileleikristi jọ nọ a rọ ẹzi wholo a sai kie no egagọ Jihova. (Mat. 25:10-12; 2 Pita 2:20, 21) Rekọ nọ “iruemu ahwo jọ” e gbẹ be were omai vrẹta ha, ma te gwọlọ rọ aro kele oware kpobi nọ a ru hu, te a rrọ inievo nọ a rọ ẹzi wholo, enọ a riẹ ziezi, hayo enọ e gọ Jihova kri no. (Jud 16, ẹme-obotọ) Otẹrọnọ inievo itienana a kie no egagọ Jihova, ẹrọwọ mai o gbe whrehe he yọ mai omamai ma gbe kie no egagọ Jihova ha.

11. Eme ma muẹrohọ kpahe unu ahwo nọ a be re ebrẹdi jẹ da udi na?

¹¹ Evaọ ikpe jọ nọ i kpemu, unu ahwo nọ a jẹ re ebrẹdi jẹ da udi na u je kpotọ. Rekọ anwọ okejọ ze na, unu ahwo na u bi dhe ebuebu kukpe kukpe. Kọ u fo re ma ruawa kpahe onana? Ijo. Joma ta kpahe eware jọ nọ u fo nọ ma rẹ kareghẹhọ ẹsikpobi.

12. Fikieme ma gbẹ rọ ruawa kpahe unu ahwo nọ a be re ebrẹdi jẹ da udi na ha?

¹² “Jihova ọ riẹ enọ e rrọ eriẹ.” (2 Tim. 2:19) Inievo nọ i bi kele ahwo nọ a re ebrẹdi jẹ da udi na evaọ Ekareghẹhọ na a riẹ enọ a ginẹ rọ ẹzi wholo ho, Jihova ọvo ọ riẹ. Fikiere, enọ i bi roro nọ a rọ ẹzi wholo ai kpakiyọ ere o rrọ họ, a rrọ usu ahwo nọ inievo na a bi kele. Wọhọ oriruo, ahwo jọ nọ a jẹ hae re ebrẹdi jẹ da udi na a seba uwhremu na. Amọfa a sae jẹ jariẹ nọ iroro rai e gba tere he, nọ o rẹ sae lẹliẹ ae roro nọ a ti lele Jesu su  evaọ obọ odhiwu. Onana u dhesẹ vevẹ nọ ma riẹ uzedhe unu ahwo nọ a rọ ẹzi wholo nọ i gbe kiọkọ otọakpọ nẹnẹ hẹ.

13. Kọ Ebaibol na ọ fodẹ unu ahwo nọ a rọ ẹzi wholo nọ a ti kiọkọ otọakpọ na evaọ okenọ uye ulogbo na u ti muhọ?

¹³ Ileleikristi nọ a rọ ẹzi wholo a te jọ eria sa-sa akpọ na evaọ okenọ Jesu ọ te nyaze te rehọ ae kpobọ odhiwu. (Mat. 24:31) Ebaibol na ọ ta nọ evaọ edẹ urere na, umutho jọ evaọ usu Ileleikristi nọ a rọ ẹzi wholo na a ti kiọkọ otọakpọ na. (Evia. 12:17) Rekọ ọ fodẹ unu ahwo nọ a ti kiọkọ họ evaọ okenọ uye ulogbo na u ti muhọ.

14. Wọhọ epanọ o rrọ obe Ahwo Rom 9:11, 16, eme u fo nọ ma re vuhumu kpahe ẹsalọ ikpodhiwu na?

¹⁴ Jihova họ ọnọ ọ rẹ jiroro okenọ ọ rẹ rọ salọ ikpodhiwu. (Rom 8:28-30) Jihova o mu ikpodhiwu na họ ẹsalọ nọ ọ kpare Jesu no uwhu ze no. O wọhọ nọ evaọ ikpe-udhusoi ọsosuọ, Ileleikristi uzẹme kpobi Jihova ọ rọ ẹzi wholo. Rekọ ikpe buobu nọ i lele i rie, ahwo buobu nọ a se omarai Ileleikristi a je lele oriruo Jesu hu. Ghele na, evaọ etoke ikpe yena, Jihova ọ rọ ẹzi riẹ wholo umutho Ileleikristi uzẹme nọ e jariẹ. A jọ wọhọ iwhiti nọ Jesu ọ ta nọ e te rro evaọ udevie ikpoko na. (Mat. 13:24-30) Evaọ edẹ urere nana, Jihova ọ gbẹ be salọ enọ e te jọ usu ahwo idu udhuhrẹ-gbene (144,000) na. * Fikiere, Ọghẹnẹ ọ tẹ jiroro nọ ọ rẹ  salọ ahwo nana jọ omoke kakao taure urere na o tẹ te ze, ọ riẹ oware nọ o bi ru. (Se Ahwo Rom 9:11, 16.) * O gwọlọ nọ ma rẹ yọroma, ogbẹrọ ere he ma vẹ te jọ wọhọ iruiruo nọ Jesu ọ ta kpahe evaọ ọtadhesẹ riẹ jọ na. A jẹ go kpahe unuigho nọ olori rai ọ kẹ otu nọ o mu iruo họ evaọ auwa urere.​—Mat. 20:8-15.

15. Kọ ikpodhiwu kpobi e rrọ usu “ọrigbo nọ a re fievahọ nọ o wo areghẹ” nọ a fodẹ evaọ Matiu 24:45-47 na? Ru ei vẹ.

¹⁵ Orọnikọ ikpodhiwu kpobi e rrọ usu “ọrigbo nọ a re fievahọ nọ o wo areghẹ na” ha. (Se Matiu 24:45-47.) Wọhọ epanọ o jọ evaọ ikpe-udhusoi ọsosuọ, Jihova avọ Jesu a be rọ umutho ahwo jọ ko hayo wuhrẹ ahwo buobu nẹnẹ. Evaọ ikpe-udhusoi ọsosuọ, umutho jọ evaọ usu Ileleikristi nọ a rọ ẹzi wholo na ọvo Jihova o ro kere Ikereakere Griki Ileleikristi na. Yọ nẹnẹ, umutho Ileleikristi jọ nọ a rọ ẹzi wholo ọvo a wo owha-iruo nọ a rẹ rọ kẹ idibo Ọghẹnẹ “emu . . . evaọ ẹruoke.”

16. Eme whọ jọ uzoẹme nana wuhrẹ no?

¹⁶ Eme ma jọ uzoẹme nana wuhrẹ no? Jihova ọ jiroro nọ ọ rẹ kẹ idibo riẹ buobu uzuazọ ebẹdẹ bẹdẹ evaọ otọakpọ, jẹ rehọ uzuazọ obọ odhiwu kẹ enọ i ti lele Jesu su. Jihova ọ be ghale idibo riẹ kpobi, te “ohwo Ju” na gbe “ezae ikpe” na, yọ ọ gwọlọ nọ aikpobi a re koko izi evona je kru ẹrọwọ rai. O gwọlọ nọ aikpobi a rẹ romakpotọ. Aikpobi a rẹ gọe evaọ okugbe ọvo. O tẹ jẹ gwọlọ nọ aikpobi a rẹ daoma ru re udhedhẹ o jọ ukoko na ẹsikpobi. Nọ uyero-akpọ nana o be kẹle ekuhọ no na, jọ mai kpobi ma ruabọhọ egagọ Jihova je lele Kristi wọhọ “uthuru ọvo.”​—Jọn 10:16.