1-2. Eme ukọ-odhiwu jọ ọ ta kẹ eyae nọ i kpohọ oria nọ a ki Jesu fihọ, kọ eme Jesu omariẹ ọ ta kẹ ae?

EVAỌ irioke Nisan 16, 33 C.E., eyae jọ nọ i wo ozodhẹ Ọghẹnẹ nọ ọkora ọ da oma fia a wọ bi kpohọ oria nọ a ki Jesu fihọ. Oke nana yọ okpẹdoke gbe ubro o ruọ emu no anwẹnọ a ro ki Jesu na. Nọ a te oria nọ uki na o rrọ re a rọ idẹ gbe eware nọ i re gbo ore awere wholo ugboma Jesu, akpọ o gbe rai unu nọ a ruẹ nọ uki na o rrọ ofofe! Ukọ-odhiwu jọ ọ tẹ vuẹ eyae na nọ Jesu ọ kparoma no. O te fibae nọ: “O bi kpobọ Galili nyae hẹrẹ owhai. Wha te jọ obei ruẹ e riẹ.”​—Mat. 28:1-7; Luk 23:56; 24:10.

² Nọ eyae na a no oria uki na no, Jesu omariẹ ọ tẹ romavia kẹ ae jẹ ta kẹ ae nọ: “Wha nyae vuẹ inievo mẹ re a kpobọ Galili, a te jọ obei ruẹ omẹ.” (Mat. 28:10) U muẹro nọ Jesu o wo obọdẹ eware jọ nọ ọ gwọlọ vuẹ ilele riẹ, keme ọruẹrẹfihotọ omakugbe nana họ orọ ọsosuọ nọ o ru nọ ọ kparoma no uwhu ze no!

3-4. Fikieme ma sae rọ ta nọ orọnikọ ikọ na ọvo a kẹ ujaje nọ o rrọ Matiu 28:19, 20 na ha? (Rri uwoho nọ o rrọ uke emagazini na.)

³ Se Matiu 28:16-20. Evaọ okenọ ilele Jesu a kokohọ wọhọ epanọ ọ vuẹ rai na, ọ ta kpahe iruo nọ ilele riẹ a ti ru evaọ etoke ikpe-udhusoi ọsosuọ na soso, yọ iruo yena ma gbe bi ru nẹnẹ na. Jesu ọ ta nọ: “Wha nya, re wha ru ahwo zihe ruọ ilele evaọ udevie ahwo erẹwho na kpobi, . . . wha wuhrẹ ae re a ru eware kpobi nọ me jie uzi rai kẹ owhai.”

⁴ Jesu ọ gwọlọ nọ ilele riẹ kpobi a rẹ ta usi uwoma na. Orọnikọ ikọ ikpegbọvo riẹ na ọvo o jie uzi na kẹ hẹ. Ẹvẹ ma  rọ riẹ? Ma riẹ ere keme okenọ Jesu ọ jọ ugbehru obọ Galili vuẹ ae nọ a nyai ru ahwo zihe ruọ ilele na, orọnikọ ikọ ikpegbọvo na ọvo a jọ etẹe he. Kareghẹhọ nọ ukọ-odhiwu na ọ ta kẹ eyae na nọ: “Wha te jọ [obọ Galili] ruẹ e riẹ.” Onana u dhesẹ nọ eyae nọ i wo ẹrọwọ a jariẹ ẹdẹ yena. Rekọ amọfa jọ a jariẹ re. Pọl ukọ na ọ ta nọ Jesu ọ “romavia kẹ inievo nọ i bu vi egba isoi (500) ẹsiẹvo.” (1 Kọr. 15:6) Diẹse ọ jọ romavia kẹ ae?

5. Ẹvẹ ma rọ riẹ nọ omakugbe obọ Galili na oye obe 1 Ahwo Kọrint 15:6 o be ta kpahe?

⁵ U wo eware jọ nọ i ru omai riẹ nọ omakugbe obọ Galili nọ a ta kpahe evaọ obe Matiu uzou avọ 28 na, oye Pọl o wo họ iroro. Eware vẹ? Orọ ọsosuọ, ẹkwotọ Galili ibuobu ilele Jesu a no ze. Fikiere o te mae lọhọ re ogbotu ahwo otiọye a kokohọ ugbehru jọ evaọ obọ Galili viukpọ uwou ohwo jọ evaọ Jerusalẹm. Orọ avọ ivẹ, nọ Jesu ọ kparoma no, ọ jọ obọ Jerusalẹm romavia kẹ ikọ ikpegbọvo riẹ no vẹre evaọ uwou jọ. O hae jọnọ ikọ na ọvo ọ gwọlọ ta kẹ nọ a nyae ta usi uwoma je ru ahwo zihe ruọ ilele, ọ hae te vuẹ ae evaọ Jerusalẹm ukpenọ ọ rẹ jẹ ta kẹ ae avọ eyae na gbe amọfa inọ a nyabru ei ziọ obọ Galili.​—Luk 24:33, 36.

6. Ẹvẹ Matiu 28:20 u ro dhesẹ nọ ujaje Jesu na u te oke mai na, kọ ẹvẹ a bi ro ru lele ujaje na nẹnẹ?

⁶ Joma ta kpahe oware avọ esa nọ u wuzou gaga. Orọnikọ Ileleikristi ikpe-udhusoi ọsosuọ ọvo Jesu o jie uzi na kẹ hẹ. Ẹvẹ ma rọ riẹ? Nọ Jesu o je ku ẹme riẹ họ, ọ ta nọ: “Mẹ rrọ kugbe owhai edẹ na kpobi rite oke urere uyero-akpọ na.” (Mat. 28:20) Wọhọ epanọ Jesu ọ ginẹ ta na, ahwo buobu gbidi gbidi a bi ru iruo nana nẹnẹ. Kukpe kukpe, ahwo nọ a bu te oware wọhọ idu egba esa (300,000) soso a bi zihe ruọ ilele Jesu jẹ be họ-ame evaọ ukoko Jihova.

7. Eme ma be te ta kpahe, kọ fikieme?

⁷ Ahwo buobu nọ ma wuhrẹ Ebaibol kugbe no a wo ẹnyaharo jẹ họ-ame no. Rekọ ejọ nọ ma bi wuhrẹ kugbe kẹse kẹse a be rọwo nuhu oma re a zihe ruọ ilele Jesu hu. Uwuhrẹ na o be were ae, rekọ a bi ru epanọ a rẹ rọ họ-ame he. Otẹrọnọ who bi wuhrẹ Ebaibol kugbe ohwo jọ, u mu omai ẹro nọ whọ gwọlọ fiobọhọ kẹe re o fi eware nọ o bi wuhrẹ na họ iruo je zihe ruọ olele Jesu. Ma te jọ uzoẹme nana ta kpahe epanọ ma sai ro wuhrẹ ae evaọ oghẹrẹ nọ u re ro te ai udu, a ve je wo ẹnyaharo. Fikieme o rọ gwọlọ nọ ma rẹ ta kpahe onana? Keme u re te okenọ ma rẹ rọ jiroro sọ ma rẹ ruabọhọ uwuhrẹ na hayo dobọ riẹ ji.

8. Fikieme o sae rọ jọ bẹbẹ kẹ emọ-uwuhrẹ Ebaibol mai jọ re a you Jihova?

⁸ Jihova ọ gwọlọ nọ uyoyou nọ ahwo a wo kẹe oye u re ru ai gọe. Fikiere, ma rẹ daoma fiobọhọ kẹ emọ-uwuhrẹ Ebaibol mai riẹ nọ Jihova ọ be daezọ rai omomọvo, o te je you rai gaga. Ma re fiobọhọ kẹ ae vuhumu nọ Jihova yọ “ọsẹ enọ i wo esẹ hẹ gbe ọnọ ọ rẹ thọ eyae-uku.” (Ol. 68:5) Nọ emọ-uwuhrẹ Ebaibol ra a tẹ ruẹ epanọ Ọghẹnẹ o you rai te, onana o sai duobọte ai, u ve ru ai you rie vi epaọ ọsosuọ. O sae jọ bẹbẹ kẹ emọ-uwuhrẹ Ebaibol jọ re a rri Jihova wọhọ Ọsẹ oyoyou keme ọsẹ nọ o yẹ rai o dhesẹ uyoyou kẹ ae vievie he. (2 Tim. 3:1, 3) Fikiere, nọ who bi ru uwuhrẹ Ebaibol na, romatotọ ta kpahe emamọ iruemu nọ Jihova o wo. Fiobọhọ kẹ emọ-uwuhrẹ Ebaibol ra riẹ  nọ Ọghẹnẹ ọ gwọlọ nọ a wo uzuazọ ebẹdẹ bẹdẹ, yọ ọ gwọlọ fiobọhọ kẹ ae woi. Eme ọfa ma rẹ sai ru?

9-10. Ebe vẹ ma re ro wuhrẹ Ebaibol kugbe ahwo, kọ fikieme?

⁹ Rehọ obe “Eme Ebaibol na Ọ rẹ Sai Wuhrẹ Omai?” gbe “Ru Eware nọ Ọghẹnẹ O re ro You Owhẹ” ro wuhrẹ ahwo. A kere ebe yena evaọ oghẹrẹ nọ i re ro fiobọhọ kẹ omai wuhrẹ emọ-uwuhrẹ Ebaibol mai re a you Jihova. Wọhọ oriruo, a jọ uzou 1 obe Eme Ebaibol na Ọ rẹ Sai Wuhrẹ Omai na kiyo enọ nana: Ọghẹnẹ ọ be daezọ mai manikọ ọ rrọ eva gaga?, Ẹvẹ o rẹ jọ Ọghẹnẹ oma nọ ahwo a tẹ be ruẹ uye?, gbe Whọ sae jọ ogbẹnyusu Jihova? Kọ ẹvẹ kpahe obe Ru Eware nọ Ọghẹnẹ O re ro You Owhẹ na? Obe nana u re fiobọhọ kẹ ọmọ-uwuhrẹ Ebaibol riẹ oghẹrẹ nọ o re ro fi ehri-izi Ebaibol họ iruo re ọ ruẹsi yeri emamọ uzuazọ je si kẹle Jihova. O tẹ make rọnọ whọ rehọ ebe nana wuhrẹ amọfa no, daoma ruẹrẹ oma kpahe kẹ uwuhrẹ kpobi, jẹ hai roro  kpahe oware nọ u ti fiobọhọ kẹ ọmọ-uwuhrẹ na.

¹⁰ Kọ eme who re ru otẹrọnọ ọmọ-uwuhrẹ ọ nọ onọ jọ, rekọ obe nọ a jọ ta kpahe onana o rrọ usu ebe nọ e rrọ Ẹkpẹti Ekwakwa Ewuhrẹ mai na ha? Whọ sae ta kẹe nọ ọye ọvo o se obe na kẹ omariẹ re whọ sae ruabọhọ obe uwuhrẹ riẹ, onọ whọ be rehọ obe jọ evaọ usu enọ ma fodẹ na ru na.

11. Oke vẹ ma re ro muhọ ẹlẹ kugbe ọmọ-uwuhrẹ Ebaibol, kọ ẹvẹ ma sai ro fiobọhọ kẹe riẹ nọ onana u wuzou gaga?

¹¹ Rọ olẹ mu uwuhrẹ na họ. O gwọlọ nọ ma rẹ rọ olẹ mu uwuhrẹ Ebaibol kpobi họ je ku ei họ nọ uwuhrẹ na o tẹ nwane dowọ muotọ no. Ma re fiobọhọ kẹ ọmọ-uwuhrẹ Ebaibol na riẹ nọ ẹzi Ọghẹnẹ ọvo ọ rẹ sai fiobọhọ kẹ omai wo otoriẹ Ẹme Ọghẹnẹ. Nọ inievo jọ a tẹ gwọlọ ta ẹme kpahe olẹ, a re se obe Jemis 1:5, onọ o ta nọ: “Otẹrọnọ ohwo jọ evaọ usu rai o wo areghẹ tere he, jọ ọ hae yare Ọghẹnẹ.” Oniọvo na ọ vẹ nọ ọmọ-uwuhrẹ na nọ, “Ẹvẹ ma sae rọ yare Ọghẹnẹ kẹ areghẹ?” Ẹsejọhọ ọmọ-uwuhrẹ na ọ te ta nọ ma rẹ lẹ se Ọghẹnẹ.

12. Ẹvẹ whọ sae rọ rehọ obe Olezi 139:2-4 fiobọhọ kẹ ọmọ-uwuhrẹ Ebaibol riẹ oghẹrẹ nọ ọ rẹ lẹ?

¹² Wuhrẹ iẹe epanọ a rẹ lẹ. Fiobọhọ kẹe vuhumu nọ Jihova ọ gwọlọ yo elẹ riẹ nọ ọ lẹ no udu ze. Ru ei vẹ kẹe nọ ma tẹ be lẹ se Jihova, ma rẹ sai horie eva mai kẹe, tubẹ vuẹe eware nọ ma rẹ sae ta kẹ ohwo ọvo ho. Kareghẹhọ nọ Jihova ọ riẹ oware kpobi nọ o rrọ omai udu. (Se Olezi 139:2-4.) Ma rẹ sae jẹ tuduhọ iẹe awọ nọ ọ yare Ọghẹnẹ re o fiobọhọ kẹe siobọno iroro ethọthọ hayo ekpehre uruemu. Ma rehọ iẹe nọ u wo oghẹrẹ ehaa jọ nọ i no obọ egedhọ ze nọ e be were ohwo nọ who bi wuhrẹ Ebaibol kugbe. Ọ riẹ nọ ehaa na e thọ, rekọ u wo eware jọ nọ e be jarai were iẹe. Eme who re ru? Vuẹe nọ jọ ọ ta oghẹrẹ nọ oware na o riẹe oma dẹẹ kẹ Jihova re ọ jẹ lẹe nọ o fiobọhọ kẹe you oware nọ Ọghẹnẹ o you ọvo.​—Ol. 97:10.

13. (a) Fikieme ma re ro zizie ọmọ-uwuhrẹ Ebaibol mai ziọ ewuhrẹ evaọ ẹruoke? (b) Eme ma re ru re ọ siọ ọrọrara ba eru nọ ọ tẹ ziọ ewuhrẹ?

¹³ Zizie ọmọ-uwuhrẹ Ebaibol ra ziọ ewuhrẹ evaọ ẹruoke. Oware nọ ọ te jọ obọ ewuhrẹ yo jẹ ruẹ u ti duobọtei udu je fiobọhọ kẹe wo ẹnyaharo. Dhesẹ ividio Eme A rẹ Jọ Ọgwa Uvie Ru? na kẹe, kẹsena who ve zizie ei nọ o lele owhẹ kpohọ ewuhrẹ. O tẹ lọhọ, whọ sae vuẹe nọ whọ te hwa ugho nọ ọ te rọ jẹ ofa. U ti woma re whọ hae wha inievo sa-sa lele oma nyai wuhrẹ iẹe. Onana u ti ru nọ ọ te rọ riẹ inievo sa-sa, nọ ọ jẹ ziọ ewuhrẹ, ọ gbẹ nwani ru ọrọrara ha.

14. Eme ọ rẹ sai fiobọhọ kẹ ọmọ-uwuhrẹ Ebaibol wo ẹnyaharo?

¹⁴ Oware nọ o rrọ omai oja họ epanọ ma re ro fiobọhọ kẹ ọmọ-uwuhrẹ Ebaibol mai re o wo ẹnyaharo. (Ẹf. 4:13) Nọ ohwo ọ tẹ rọwo nọ ma wuhrẹ Ebaibol kugbei, ẹsejọhọ oware nọ o riẹe oja họ erere nọ o ti wo no uwuhrẹ na ze. Rekọ nọ uyoyou nọ o wo kẹ Jihova u bi dhe ẹgẹga na, ẹsejọhọ o ti roro kpahe epanọ ọ sai ro fiobọhọ kẹ amọfa, te inievo ukoko na dede. (Mat. 22:37-39) Nọ whọ tẹ ruẹ nọ u te epanọ whọ sae rọ vuẹe no, ta kẹe nọ o wo uvẹ nọ o re ro ru unevaze rọkẹ ẹnyaharo iruo Uvie na.

15. Ẹvẹ ma sai ro fiobọhọ kẹ ọmọ-uwuhrẹ Ebaibol ru oware nọ u fo nọ ebẹbẹ e tẹ romavia?

¹⁵ Wuhrẹ iẹe oware nọ o re ru nọ ebẹbẹ e  tẹ romavia. Dae rehọ iẹe nọ ọmọ-uwuhrẹ ra nọ ọ rrọ owhowho-uvie nọ ọ re họ-ame he ọ vuẹ owhẹ nọ oniọvo jọ evaọ ukoko na o ru rie eva dha. Ukpenọ whọ rẹ jọ abọjọ, vuẹe eware nọ Ebaibol ọ ta nọ ọ rẹ sai ru. Ọ sae rọvrẹ oniọvo na. Rekọ otẹrọnọ ọ sae rọvrẹe he, ọ sae nyabru oniọvo na ọ vẹ rọ unu kpotọ ta ẹme na kugbei evaọ oghẹrẹ nọ o re ro ‘wo oniọvo na tobọ.’ (Rri Matiu 18:15.) Fiobọhọ kẹe ruẹrẹ ẹme nọ ọ te ta kpahe. Wuhrẹ iẹe epanọ ọ sae rọ jọ JW Library^®, Obe Ekiakiẹ Rọkẹ Isẹri Jihova, gbe jw.org^® kiẹ gwọlọ eware sa-sa nọ ọ rẹ sai ru kpahe ẹbẹbẹ na. Ọ tẹ riẹ oware nọ o re ru kpahe ebẹbẹ itiena ziezi taure ọ tẹ te họ-ame, u ti fiobọhọ kẹe yerikugbe inievo na ziezi nọ ọ tẹ họ-ame no.

16. Fikieme u ro woma re whọ wha oniọvo ọfa lele oma nyai ru uwuhrẹ?

¹⁶ Hae ta kẹ inievo efa evaọ ukoko na​—te ọsẹro okogho evaọ etoke iweze riẹ​—re a kuomagbe owhẹ nọ who te bi ru uwuhrẹ na. Fikieme? U te no ẹjiroro sa-sa nọ ma fodẹ no vẹre na, oware ofa nọ who re ro ru ere họ, inievo efa a sai fiobọhọ kẹ ọmọ-uwuhrẹ na evaọ abọ nọ whọ riẹ kpahe tere he. Wọhọ oriruo, ma rehọ iẹe nọ ọmọ-uwuhrẹ na ọ daoma bẹ no re ọ siọ ivovavovo ba. Whọ sai zizie oniọvo jọ lele oma, ọnọ o jọ bẹbẹ kẹ re o siobọno uruemu na, rekọ ukuhọ riẹ o te fi ẹbẹbẹ na kparobọ. Oniọvo na ọ rẹ sae vuẹe eware sa-sa nọ o re ru nọ e rẹ sai gine fiobọhọ kẹe. Rekọ who te rri nọ whọ te sae jọ iraro oniọvo nọ o wo onaa ziezi ru uwuhrẹ na ha, whọ sae vuẹ ọyomariẹ nọ jọ o ru uwuhrẹ na ẹdẹ yena. Oghẹrẹ kpobi nọ o rrọ kẹhẹ, daoma ru epanọ inievo efa nọ i wo onaa ziezi a re ro fiobọhọ kẹ ọmọ-uwuhrẹ Ebaibol ra na. Kareghẹhọ nọ oware nọ o rrọ omai oja họ epanọ ma re ro fiobọhọ kẹ ọmọ-uwuhrẹ na re o wo ẹnyaharo.

17-18. Eme u fo nọ who re roro kpahe nọ whọ tẹ be jiroro sọ whọ rẹ siọ uwuhrẹ na ba?

¹⁷ Nọ whọ tẹ ruẹ nọ ọmọ-uwuhrẹ Ebaibol ra o bi ru inwene evaọ uzuazọ riẹ hẹ, whọ sae nọ omara nọ, ‘Kọ mẹ siọ uwuhrẹ na ba?’ Re whọ sae riẹ oware nọ u fo nọ who re ru, kaki roro kpahe epanọ ẹgba riẹ o te. Ahwo jọ a re wo ẹnyaharo vẹrẹ te amọfa ha. Nọ omara nọ: ‘Kọ ọmọ-uwuhrẹ mẹ na ọ be daoma wo ẹnyaharo ghelọ oghẹrẹ nọ eware e rrọ kẹe?’ ‘Kọ o bi “ru” eware nọ o bi wuhrẹ na?’ (Mat. 28:20) Ẹnyaharo riẹ ọ tẹ be make rehọ oke, u fo nọ a rẹ ruẹ inwene jọ evaọ uzuazọ riẹ.

¹⁸ Kọ eme who re ru otẹrọnọ who wuhrẹ obe kugbe ohwo kri no rekọ o bi se uwuhrẹ na gboja ha? Roro kpahe oriruo nana: Ọmọ-uwuhrẹ Ebaibol ra o wuhrẹ obe Eme Ebaibol na Ọ rẹ Sai Wuhrẹ Omai na re no,  yọ ẹsejọhọ o tube mu obe Ru Eware nọ Ọghẹnẹ O re ro You Owhẹ na họ ewuhrẹ no, rekọ ọ re ziọ ewuhrẹ ẹdẹvo ho, yọ ọ re tubẹ ziọ Emu Owọwọ dede he. Yọ ẹsibuobu ọ rẹ rọ fiki eware nọ i fioka ha va uwuhrẹ riẹ. Otẹrọnọ enẹ ọmọ-uwuhrẹ Ebaibol ra o bi ru, u ti woma re who lele iei ta ẹme kpahe onana. *

19. Eme whọ rẹ sae ta kẹ ohwo nọ o bi se uwuhrẹ riẹ gboja ha, kọ eme u fo nọ who re roro kpahe?

¹⁹ Whọ rẹ sae nọe nọ, ‘Eme who roro nọ o te mai ru ei jọ bẹbẹ kẹ owhẹ re who zihe ruọ Osẹri Jihova?’ Ọmọ-uwuhrẹ na ọ sae kuyo nọ, ‘Whọ sae hae nyaze ti wuhrẹ Ebaibol kugbe omẹ, rekọ mẹ te sae jọ Osẹri Jihova vievie he!’ Otẹrọnọ who wuhrẹ obe kugbei kri no yọ o gbe wo iroro itiena ghele, kọ who roro nọ u fo re whọ ruabọhọ uwuhrẹ na? Evaọ abọdekọ riẹ, ọmọ-uwuhrẹ ra na ọ sae vuẹ owhẹ oware jọ nọ o be whaha iẹe ẹnyaharo. Wọhọ oriruo, o sae jọnọ ozọ usi uwoma ota nuwou ruọ uwou u bi mu ei gaga. Nọ whọ riẹ ẹbẹbẹ riẹ no na, whọ te riẹ oghẹrẹ nọ who re ro fiobọhọ kẹe.

20. Ẹvẹ Iruẹru Ikọ 13:48 o sai ro fiobọhọ kẹ omai riẹ sọ ma rẹ ruabọhọ uwuhrẹ hayo se iẹe ba?

²⁰ Emọ-uwuhrẹ Ebaibol jọ a wọhọ ahwo Izrẹl evaọ oke Izikiẹl. Jihova ọ ta kẹ Izikiẹl kpahe ae nọ: “Rri! Whọ wọhọ ole obẹlẹ rọkẹ ae, onọ a rọ emamọ uvou so jẹ rehọ akpata-ifi kporo avọ onaa. A ti yo eme ra, rekọ ohwo ọvo o ti ru lele ai hi.” (Izik. 33:32) O sae jọ bẹbẹ kẹ omai re ma ta kẹ ohwo jọ inọ ma ti gbe wuhrẹ kugbei hi. Rekọ kareghẹhọ nọ “oke nọ u kiọkọ u tulo ho.” (1 Kọr. 7:29) Ukpenọ ma rẹ gbẹ raha oke wuhrẹ kugbe ohwo nọ o bi wo ẹnyaharo ho, ma rẹ daoma gwọlọ amọfa nọ a bi dhesẹ via nọ a “wo emamọ eva, nọ a ti wo uzuazọ ebẹdẹ bẹdẹ.”​—Se Iruẹru Ikọ 13:48.

21. Eme họ uzoẹme ẹgbukpe mai orọ 2020, kọ eme u ti fiobọhọ kẹ omai ru?

²¹ Evaọ ukpe 2020, uzoẹme ẹgbukpe mai na u ti fiobọhọ kẹ omai tẹrovi oghẹrẹ nọ ma re ro wo onaa ziezi, re ma sai ru ahwo zihe ruọ ilele. Ẹme jọ nọ Jesu ọ ta evaọ omakugbe obọdẹ nọ o zizie ilele riẹ kẹ evaọ ugbehru obọ Galili na a rọ uzoẹme ẹgbukpe mai na no ze, inọ: “Wha nya, re wha ru ahwo zihe ruọ ilele . . . , wha họ ae ame.”​—Mat. 28:19.