1. Ẹvẹ oma o rẹ jọ owhẹ nọ whọ tẹ kareghẹhọ nọ Ọghẹnẹ o you owhẹ?

JỌN ukọ na o kere nọ: “Ọghẹnẹ họ uyoyou.” (1 Jọn 4:8) Ẹme nana nọ ọ ta kpẹkpẹe na o kareghẹhọ omai obọdẹ oware jọ inọ, wọhọ epanọ uzuazọ u no obọ Ọghẹnẹ ze na, ere ọvona uyoyou u no obọ Ọghẹnẹ ze. Jihova o gine you omai gaga! Fiki uyoyou nọ Ọghẹnẹ o wo kẹ omai, udu o rrọ omai awọ, eva evo e be were omai.

2. Wọhọ epanọ o rrọ Matiu 22:37-40, ijaje ivẹ vẹ e mai wuzou, kọ fikieme o sae rọ jọ bẹbẹ re ma koko orọ avọ ivẹ na?

² Orọnikọ u te je Oleleikristi o re ro dhesẹ uyoyou hu. Onana yọ ujaje nọ u no obọ Ọghẹnẹ ze. (Se Matiu 22:37-40.) Ma tẹ riẹ Jihova ziezi, o sae jọ lọlọhọ re ma koko ujaje ọsosuọ na. O rrọ ere keme oware ovo o rẹ thọ Jihova obọ họ, o re roro kẹ omai, jẹ be rẹrote omai ziezi. Rekọ o sae jọ bẹbẹ re ma koko ujaje avọ ivẹ na. Fikieme? Keme ibe Ileleikristi mai nọ e rrọ erivẹ mai nọ ma bi lele ru eware kẹdẹ kẹdẹ a gba ha. A sai ru oware nọ o rẹ kẹ omai uye, hayo ta ẹme nọ ọ rẹ da omai. Jihova ọ riẹ nọ ma te hai ru ohwohwo thọ ẹsejọ. Oyejabọ nọ ọ rọ rehọ ẹzi riẹ fiobọhọ kẹ ahwo nọ a kere Ebaibol na, re a kere kpahe oware nọ u ro fo re ma dhesẹ uyoyou gbe epanọ ma sai ro dhesẹ iẹe. Omọvo ahwo yena jọ họ Jọn.​—1 Jọn 3:11, 12.

3. Eme Jọn ọ ta nọ Oleleikristi kpobi o re ru?

³ Jọn o kere nọ, u wuzou gaga re Oleleikristi kpobi o dhesẹ uyoyou. Unuẹse nọ Jọn ọ jọ iku nọ o kere kpahe uzuazọ Jesu fodẹ “uyoyou” u bu vi unuẹse nọ a jọ obe  Matiu rite Luk fodẹ uyoyou. Oke nọ Jọn o kere iku Jesu gbe ileta esa riẹ yọ ọ kpako te oware wọhọ ikpe udhusoi no. Eware nọ Jọn o kere na kpobi i dhesẹ nọ uyoyou họ oware nọ o rẹ wọ Oleleikristi ru oware kpobi. (1 Jọn 4:10, 11) Ghele na, orọnọ no emaha ze Jọn omariẹ ọ riẹ onana ha. O rehọ oke re o te ti vuhu onana mu.

4. Kọ no emaha ze Jọn o dhesẹ uyoyou?

⁴ Oke nọ Jọn ọ gbẹ maha, ẹsikpobi ọ jẹ hai dhesẹ uyoyou hu. Wọhọ oriruo, u wo oke jọ nọ Jesu avọ ikọ riẹ a nya orọ Sameria nọ a je kpobọ Jerusalẹm. Nọ a te iwhre Sameria jọ, ahwo iwhre na a rọwo dede ae rehọ họ. Kọ eme Jọn o ru? Ọ ta kẹ Jesu nọ jọ a lẹ re erae i no odhiwu ze te mahe ahwo iwhre na kpobi no. (Luk 9:52-56) Evaọ oke ofa, Jọn o ru oware ofa nọ u dhesẹ nọ o you ibe ikọ riẹ na tere he. O wọhọ nọ avọ oniọvo riẹ Jemis a ta kẹ oni rai nọ ọ lẹ Jesu re ọ kẹ ae ekwa ilogbo evaọ Uvie riẹ. Nọ ikọ nọ i kiọkọ a yo kpahe oware nọ Jemis avọ Jọn a ru, eva e dha rai gaga. (Mat. 20:20, 21, 24) Rekọ dede nọ Jọn o ru eware nana kpobi nọ i fo ho na, Jesu o you rie ghele.​—Jọn 21:7.

5. Eme ma ti wuhrẹ evaọ uzoẹme nana?

⁵ Ma te jọ uzoẹme nana ta kpahe emamọ oriruo Jọn ukọ na gbe eware nọ o kere kpahe uyoyou. Ma te jariẹ ruẹ epanọ ma sai ro dhesẹ uyoyou kẹ ibe Ileleikristi mai. Ma ti je wuhrẹ kpahe obọdẹ edhere jọ nọ enọ i wuzou uviuwou a sai ro dhesẹ nọ a you ahwo uviuwou rai.

6. Ẹvẹ Jihova o ro dhesẹ nọ o gine you omai?

⁶ Ẹsibuobu ma re roro nọ eme awere nọ ma ta kẹ ahwo oye u re dhesẹ nọ ma you rai. Rekọ eware nọ ma bi ru eye e rẹ mai dhesẹ via inọ ma gine you ohwo. (Je rri Jemis 2:17, 26.) Wọhọ oriruo, Jihova o you omai. (1 Jọn 4:19) Eme ewewere nọ a kere fihọ Ebaibol na i dhesẹ nọ o gine you omai. (Ol. 25:10; Rom 8:38, 39) Ghele na, orọnikọ eme nọ Ọghẹnẹ ọ ta ọvo i dhesẹ nọ o you omai hi. Eware nọ o ru e tubẹ mai dhesẹ uyoyou riẹ via. Jọn o kere nọ: “Ẹkwoma onana Ọghẹnẹ o ro dhesẹ uyoyou riẹ kẹ omai, inọ Ọghẹnẹ o vi Ọmọ ọvo riẹ ziọ akpọ na re ma ruẹsi wo uzuazọ ẹkwoma riẹ.” (1 Jọn 4:9) Jihova o vi Ọmọ oyoyou riẹ ze akpọ na re ọ reoja je whu kẹ omai (Jọn 3:16) Avro ọ riẹ vievie he inọ Jihova o gine you omai.

7. Ẹvẹ Jesu o ro dhesẹ nọ o you omai?

 ⁷ Jesu ọ ta kẹ ilele riẹ nọ o you rai. (Jọn 13:1; 15:15) Orọnikọ ẹmeunu ọvo o ro dhesẹ onana ha. Oware nọ o ru u dhesẹ nọ o gine you rai gaga, yọ ere o you omai kpobi re. Jesu ọ ta nọ: “Ohwo ọvo o wo uyoyou nọ o rro vi onana ha, inọ ohwo jọ o re siobọno uzuazọ riẹ fiki egbẹnyusu riẹ.” (Jọn 15:13) Nọ ma te roro kpahe oware nọ Jihova avọ Jesu a ru kẹ omai, eme u fo nọ ma re ru?

8. Eme 1 Jọn 3:18 o ta nọ ma ru?

⁸ Ma te bi yoẹme kẹ Jihova avọ Jesu, u re dhesẹ nọ ma you rai. (Jọn 14:15; 1 Jọn 5:3) Jesu o te je juzi kẹ omai nọ ma you ohwohwo. (Jọn 13:34, 35) Orọnikọ unu ọvo ma rẹ rọ ta nọ ma you ibe Ileleikristi mai hi, ma re je dhesẹ iẹe via evaọ eware nọ ma bi ru. (Se 1 Jọn 3:18.) Eware jọ vẹ ma re ru ro dhesẹ nọ ma you ibe Ileleikristi mai?

9. Eme Jọn o ru fiki uyoyou nọ o wo kẹ amọfa?

⁹ Jọn ọ nyasiọ okọ iyei-ikpe nọ avọ ọsẹ riẹ a jẹ kọ ba. O hae jọnọ ọ ruabọhọ okọ na, ẹsejọhọ ọ hai ti wo igho buobu. Rekọ o ru ere he. Ukpoye, ọ rehọ edẹ uzuazọ riẹ nọ i kiọkọ kpobi wuhrẹ amọfa kpahe Jihova avọ Jesu. Iruo nọ Jọn ọ romakẹ na e lọhọ vievie he. A je kpokpo iei gaga, a tube mu ei kpohọ ugbo obojọ nyai fihọ evaọ oke nọ ọ kpako gaga no. (Iruẹru 3:1; 4:1-3; 5:18; Evia. 1:9) Makọ oke nọ Jọn ọ jọ uwou-odi fikinọ ọ be ta usi uwoma kpahe Jesu, o je ru eware nọ i dhesẹ nọ o bi roro kpahe amọfa. Wọhọ oriruo, nọ a mu ei kpobọ ukoliko Patmọs, ẹsiẹe o ro kere obe Eviavia. Kẹsena o te vi ei se ikoko sa-sa re a ruẹse riẹ “eware nọ e te via hrọ kẹle na.” (Evia. 1:1) O wọhọ nọ, nọ a siobọnoi no obọ Patmọs ze ẹsiẹe o ro kere obe Usi Uwoma riẹ kpahe uzuazọ Jesu gbe odibọgba riẹ. O te je kere ileta esa rọ bọ inievo na ga jẹ tuduhọ ae awọ. Ẹvẹ whọ sae rọ rehọ aro kele Jọn evaọ oghẹrẹ nọ ọ jẹ hai ro roro kpahe amọfa?

10. Ẹvẹ whọ sai ro dhesẹ nọ who you amọfa?

¹⁰ Oware nọ whọ be rọ uzuazọ ra ru oye u re dhesẹ sọ who you amọfa. Evaọ akpọ Setan nọ ma rrọ na, ahwo a rẹ gwọlọ nọ whọ rọ oke gbe ẹgba ra kpobi ru eware nọ e rẹ wha erere se owhẹ ọvo. A rẹ gwọlọ nọ who le efe hayo okpodẹ. Rekọ inievo mai nọ e rrọ eria sa-sa akpọ na a bi ru ere he. A be rehọ oke ziezi ta usi uwoma na je fiobọhọ kẹ ahwo si kẹle Jihova. Ejọ e tubẹ rrọ iruo odibọgba oke-kpobi na dede.

11. Ẹvẹ inievo buobu a bi ro dhesẹ nọ a you Jihova gbe ibe Ileleikristi rai?

¹¹ Idibo Jihova buobu a bi ru iruo gaga re a sae rẹrote omarai gbe uviuwou rai. O make rrọ ere na, inievo nana a be dawo ẹgba rai kpobi re a ru iruo nọ Ọghẹnẹ ọ gwọlọ nọ a ru evaọ ukoko riẹ. Wọhọ oriruo, ejọ e rẹ dhogbo bru inievo nọ eware okpẹtu e via kẹ, efa i bi ru iruo ebabọ ukoko na, yọ ohwo kpobi ọ rẹ rọ ugho fiobọhọ evaọ ukoko na. A bi ru eware nana kpobi fikinọ a you Ọghẹnẹ gbe erivẹ rai. Ma tẹ be hai kpohọ ewuhrẹ koka koka, be kẹ iyo je ru ẹme u re dhesẹ nọ ma you inievo mai. Oma o tẹ make rrọ omai no, ma rẹ daoma kpohọ ewuhrẹ. Ozọ o tẹ be maki mu omai, ma rẹ kẹ uyo evaọ ewuhrẹ na. Dede nọ ma wo ọvuọ ẹbẹbẹ riẹ, ma rẹ tuduhọ  amọfa awọ taure ewuhrẹ o te ti muhọ, gbe oke nọ ewuhrẹ o kuhọ no. (Hib. 10:24, 25) Inievo mai na a be ginẹ daoma kẹhẹ!

12. Edhere ọfa vẹ Jọn o ro dhesẹ nọ o you inievo riẹ?

¹² Jọn ọ jẹ hai jiri inievo na, onọ u dhesẹ nọ o you rai. Rekọ oye ọvo ho, ọ jẹ hae kẹ ae ohrẹ re. Wọhọ oriruo, Jọn ọ jọ ileta nọ o kere jiri inievo na rọkẹ emamọ eware nọ a bi ru. Ghele na, ọ vẹvẹ e rai unu kpahe uzioraha. (1 Jọn 1:8–2:1, 13, 14) Epọvo na re, ma re jiri inievo mai nọ a te ru emamọ oware. Ghele na, otẹrọnọ ọjọ ọ be jẹ ekpehre owọ, ma rẹ rọ areghẹ kẹe ohrẹ. Ohrẹ utioye na u re dhesẹ nọ ma you oniọvo na. O gwọlọ nọ ohwo o re wo udu re ọ sae kẹ ogbẹnyusu riẹ ohrẹ. Ebaibol ọ ta nọ “epanọ ayọno ọ rẹ thọ ayọno da na,” ere emamọ ogbẹnyusu ọ rẹ kpọ ogbẹnyusu riẹ vi.​—Itẹ 27:17.

13. Eme u fo nọ ma re ru hu?

¹³ Ẹsejọ oghẹrẹ nọ ma re ro dhesẹ nọ ma you inievo mai họ, nọ ma tẹ siọ oware jọ ba eruo. Wọhọ oriruo, ma rẹ daoma re ma siọ eva ba ẹdha nọ oniọvo jọ ọ tẹ ta ẹme jọ nọ ọ were omai hi. Joma ta kpahe oware jọ nọ o via taure Jesu o te ti whu. Ọ ta kẹ ilele riẹ nọ a tẹ gwọlọ wo uzuazọ ebẹdẹ bẹdẹ a rẹ re uwo-oma riẹ jẹ da azẹ riẹ. (Jọn 6:53-57) Ẹme nana ọ dha ilele riẹ buobu eva te epanọ a rọ nyasiọ iẹe ba. Rekọ uvi egbẹnyusu riẹ, te Jọn, a nyasiọ iẹe ba ha. O sae jọnọ ẹme na o gbe rai unu re. Rekọ eva e dha rai hi, inọ ẹme nọ Jesu ọ ta na ọ thọ. A riẹ nọ Jesu o re mu ẹme ta ha, dede nọ a nwane riẹ otọ ẹme na okioke yena ha. (Jọn 6:60, 66-69) Onana u wuhrẹ omai nọ, ogbẹnyusu mai ọ tẹ ta ẹme jọ nọ o kiehọ omai oma ha, joma nwane dha eva ha. Ukpoye, joma gaviezọ kẹe re o ru ẹme na vẹ kẹ omai.​—Itẹ 18:13; Ọtausi. 7:9.

14. Fikieme u gbe ro fo re ma jẹ oniọvo jọ egrẹ hẹ?

¹⁴ Jọn ọ tuduhọ omai awọ re inọ ma mukpahe uvumọ oniọvo evaọ ukoko na ha. Ma te mukpahe oniọvo jọ, Setan ọ vẹ te rọ omai ru ẹgwọlọ riẹ. (1 Jọn 2:11; 3:15) Ere o via kẹ Ileleikristi ọsosuọ jọ. Evaọ oke yena, Setan ọ jẹ gwọlọ rehọ edhere kpobi fi egrẹ họ udevie idibo Ọghẹnẹ re ọ ruẹse hẹriẹ ae. Oke  nọ Jọn o kere ileta riẹ na, yọ ahwo jọ nọ a wo ọkpọ uruemu Setan a lẹlẹ ruọ eva ukoko na no. Wọhọ oriruo, Diọtrẹfis ọ jẹ wha ohẹriẹ ulogbo fihọ ukoko na. (3 Jọn 9, 10) Ọ jẹ kẹ ahwo nọ utu ẹruorote oke yena u vi ze ti rri ukoko na adhẹẹ vievie he. Ọ jẹ tubẹ gwọlọ si ohwo kpobi nọ ọ be nya usu kugbe oniọvo nọ ọ were riẹ hẹ no ukoko. Ọ wharo kẹhẹ! Nẹnẹ, Setan ọ be gwọlọ oghẹrẹ kpobi nọ o re ro fi ohẹriẹ họ udevie idibo Ọghẹnẹ re. Wha joma kuvẹ re egrẹ ọ hẹriẹ omai vievie he.

15. Eme enọ i wuzou uviuwou a rẹ kareghẹhọ?

¹⁵ Obọdẹ edhere jọ nọ ọnọ o wuzou uviuwou o re ro dhesẹ nọ o you ahwo uviuwou riẹ họ, ọ rẹ ko ae, jẹ rẹrote ai ziezi. (1 Tim. 5:8) Ọ rẹ jẹ kareghẹhọ nọ oware nọ o mai wuzou kpobi họ, re o fiobọhọ kẹ ahwo uviuwou riẹ wo usu okpekpe kugbe Jihova. (Mat. 5:3) Muẹrohọ emamọ oriruo nọ Jesu o fihotọ kẹ enọ i wuzou uviuwou. Usi Uwoma Jọn o ta nọ, oke nọ a kare Jesu fihọ ure-oja na yọ o gbe bi roro kpahe ahwo uviuwou riẹ. Jọn o dikihẹ gba Meri oni Jesu evaọ oria nọ a kare Jesu fihọ na. Dede nọ ọ be rova evaọ ure-oja, Jesu ọ ta kẹ Jọn nọ jọ ọ rẹrote oni riẹ. (Jọn 19:26, 27) Jesu o wo inievo, yọ u muẹro nọ a te rẹrote Meri. Rekọ evaọ oke yena, o wọhọ nọ ọvuọvo o ri zihe ruọ olele riẹ hẹ. Oyejabọ nọ Jesu ọ rọ rehọ iruo nana kẹ Jọn keme ọ riẹ nọ ọ te rẹrote oni riẹ je fiobọhọ kẹe si kẹle Jihova ziezi.

16. Iruo vẹ e jọ Jọn abọ?

¹⁶ Iruo e vọ Jọn abọ nọ o je ru. Ukọ ọ jọ, fikiere ọ jẹ ta usi uwoma na avọ ajọwha. Yọ ẹsejọhọ Jọn o wo aye. O tẹ rrọ ere, kiyọ ọ jẹ daoma re ọ rẹrote uviuwou riẹ, je fiobọhọ kẹ ae wo usu okpekpe kugbe Ọghẹnẹ. (1 Kọr. 9:5) Eme ahwo nọ a wuzou uviuwou a rẹ sai wuhrẹ no onana ze?

17. Fikieme enọ i wuzou uviuwou a re ro fiobọhọ kẹ ahwo uviuwou rai gọ Ọghẹnẹ ziezi?

¹⁷ U wo eware buobu nọ oniọvo-ọmọzae nọ o wuzou uviuwou o re ru. Wọhọ oriruo, o re kru obọ ga evaọ okọ riẹ re uruemu riẹ o gbẹ wha ekela se Jihova ha. (Ẹf. 6:5, 6; Tait. 2:9, 10) O sae jọnọ o wo iruo nọ o bi ru evaọ ukoko na.  Wọhọ oriruo, otẹrọnọ ọkpako hayo odibo oruiruo ọ rrọ, ọ rẹ tuduhọ inievo na awọ je wo ajọwha usi uwoma ota re amọfa a sae rọ aro kele iei. Ghele na u wuzou re ọ hai wuhrẹ Ebaibol kugbe aye riẹ gbe emọ riẹ ẹsikpobi. O te bi ru enẹ, eva e te were ahwo uviuwou riẹ gaga inọ ọ be ko ae, o wo oke nọ ọ rẹ rọ jọ kugbe ai, je bi fiobọhọ kẹ ae re a wo usu okpekpe kugbe Ọghẹnẹ.​—Ẹf. 5:28, 29; 6:4.

18. Eme u mu Jọn ẹro ziezi?

¹⁸ Jọn ọ tọ gaga. Yọ o ru eware buobu evaọ egagọ Ọghẹnẹ. Ọ nyaku ebẹbẹ buobu nọ e hae sai whrehe ẹrọwọ riẹ. Ghele na, ẹsikpobi ọ jẹ daoma re o koko ijaje Jesu, te onọ o ta nọ ma you ibe Ileleikristi mai. Fikiere, u mu Jọn ẹro ziezi inọ Jihova avọ Jesu a you rie, gbe inọ a te kẹe ẹgba nọ o re ro thihakọ ebẹbẹ na kpobi. (Jọn 14:15-17; 15:10; 1 Jọn 4:16) Setan avọ akpọ omuomu riẹ a sae whaha Jọn he re ọ siọ uyoyou ba edhesẹ kẹ inievo na.

19. Eme 1 Jọn 4:7 o ta nọ ma ru, kọ fikieme?

¹⁹ Nẹnẹ, omukpahọ o da akpọ na fia wọhọ epanọ o jọ evaọ oke Jọn. O rrọ ere keme Setan nọ o wo uyoyou vievie he na ọye o bi su akpọ na. (1 Jọn 3:1, 10) Dede nọ Setan ọ gwọlọ nọ ma siọ inievo mai ba eyou, oyena o rẹ sae via vievie he ajokpanọ ma kuvẹ riẹ. Jọ mai kpobi ma gbaemu nọ ma re you inievo mai evaọ ukoko na. Joma rehọ ẹme nọ ma be ta gbe eware nọ ma bi ru dhesẹ onana via. Ma te ru ere, eva e te were omai kpobi inọ ma rrọ uviuwou Jihova, yọ uzuazọ nọ ma ti yeri o te were kẹhẹ.​—Se 1 Jọn 4:7.