1-2. (a) Oke vẹ ahwo jọ a mae rọ kareghẹhọ ohwo rai nọ o whu? (b) Eme Jesu ọ to họ evaọ aso urere taure o te ti whu?

O TẸ make rrọ nọ u kri gaga no nọ ohwo jọ nọ ma you gaga o ro whu, ma rẹ gbẹ kareghẹhọ iẹe. Ahwo jọ a rẹ kareghẹhọ ohwo rai nọ o whu gaga, maero nọ ẹdẹ nọ o ro whu na o te te kukpe kukpe.

² Ma you Jesu Kristi gaga. Yọ kukpe kukpe, nọ u te te ẹdẹ nọ o ro whu na, mai Isẹri Jihova gbe amọfa buobu evaọ akpọ na soso ma re kokohọ re ma kareghẹhọ uwhu riẹ na. (1 Pita 1:8) Ma rẹ kareghẹhọ uwhu Jesu keme o siobọno uzuazọ riẹ rọ ta omai no igbo uzioraha gbe uwhu. (Mat. 20:28) Jesu omariẹ dede ọ gwọlọ nọ ilele riẹ a hae kareghẹhọ uwhu riẹ. Aso urere taure o te ti whu, ọ to obọdẹ oware jọ họ, oye họ Emu Owọwọ Olori na. Kẹsena o te jie uzi kẹ ilele riẹ nọ: “Wha hai ru onana rọ kareghẹhọ omẹ.” *​—Luk 22:19.

3. Eme ma te ta kpahe evaọ uzoẹme nana?

³ Umutho ahwo jọ evaọ usu ahwo nọ a be hai kpohọ Ekareghẹhọ uwhu Jesu na a wo ẹruore inọ a ti kpobọ odhiwu, ibuobu kọ ẹruore obọ otọakpọ obonẹ. Ma te jọ uzoẹme nana ta kpahe oware nọ u ro fo re eko ahwo ivẹ nana a hai kpohọ Emu Owọwọ na kukpe kukpe. Ma vẹ te jẹ ta kpahe irere nọ i re te omai nọ ma tẹ nya. Joma kake ta kpahe oware nọ u ro fo re Ileleikristi nọ a rọ ẹzi wholo na a hai kpohọ Emu Owọwọ na.

4. Fikieme Ileleikristi nọ a rọ ẹzi wholo a rẹ rọ re ebrẹdi jẹ da udi na?

⁴ Kukpe kukpe, Ileleikristi nọ a rọ ẹzi wholo a riẹ nọ a ti kpohọ Emu Owọwọ na, a te re ebrẹdi na jẹ da udi na. Fikieme u ro fo nọ a ru ere? Joma ta kpahe oware nọ o via evaọ aso urere taure Jesu o te ti whu, u ti fiobọhọ kẹ omai kẹ uyo onọ na. Nọ Jesu avọ ilele riẹ a ru ehaa Ọnyavrẹ na no, Jesu o te mu Emu Owọwọ Olori na họ. Ọ tẹ rọ ebrẹdi gbe udi kẹ ikọ ikpegbọvo riẹ nọ e talamu ei, ọ tẹ ta kẹ ae nọ jọ a re ebrẹdi na jẹ da udi na. Ọ vuẹ rai kpahe evọ ivẹ jọ evaọ aso ẹdẹ yena, koyehọ ọvọ ọkpokpọ na gbe ọvọ Uvie na. * (Luk 22:19, 20, 28-30) Evọ ivẹ yena i ru nọ ikọ Jesu nana gbe umutho Ileleikristi efa jọ a te rọ jọ ivie gbe izerẹ evaọ obọ odhiwu. (Evia. 5:10; 14:1) Ileleikristi nọ a rọ ẹzi wholo nọ i kiọkọ otọakpọ na ọvo a rẹ re ebrẹdi jẹ da udi na evaọ oke Emu Owọwọ Olori na keme a re evọ ivẹ yena kugbe ae.

5. Eghale vẹ Ileleikristi nọ a rọ ẹzi wholo na a riẹ nọ a ti wo nọ a te kpobọ odhiwu no?

⁵ Oware ofa jọ o riẹ nọ o rẹ lẹliẹ Ileleikristi nọ a rọ ẹzi wholo na kpohọ Emu Owọwọ na. A rẹ rọ uvẹ yena roro didi kpahe ẹruore nọ a wo. Jihova o ru kẹhẹ nọ o ro fiobọhọ kẹ ae wo obọdẹ ẹruore nọ a rẹ ruẹ unu gbiku riẹ hẹ! A ti wo oma ẹzi, oma nọ u re gbo ho, nọ o rẹ gbẹ sai whu vievie he. A ti kpobọ odhiwu je kuomagbe enọ i kiọkọ evaọ usu ahwo idu udhuhrẹ-gbene (144,000) nọ a rọ ẹzi wholo na, a ve ti lele Jesu Kristi su. Yọ maero na, a te ruẹ Jihova Ọghẹnẹ dẹẹ! (1 Kọr. 15:51-53; 1 Jọn 3:2) Ileleikristi nọ a rọ ẹzi wholo na a riẹ nọ a ti wo eghale nana kpobi nọ a te kpobọ odhiwu no. Rekọ re a sai te obei, a re kru ẹrọwọ rai bẹsenọ a re whu. (2 Tim. 4:7, 8) Eva e rẹ were Ileleikristi nọ a rọ ẹzi wholo na gaga nọ a te bi roro kpahe ẹruore nana nọ a wo na. (Tait. 2:13) Kọ otu “igodẹ efa” na? (Jọn 10:16) Eme ọ rẹ lẹliẹ ae kpohọ Emu Owọwọ na?

6. Fikieme inievo nọ e rrọ usu igodẹ efa na a re ro kpohọ Emu Owọwọ na?

⁶ Inievo nọ e rrọ usu igodẹ efa na a rẹ re ebrẹdi jẹ da udi na ha nọ a te kpohọ Emu Owọwọ na. Evaọ 1938, a zizie Ileleikristi nọ i wo ẹruore inọ a te rọ otọakpọ na reuku kpohọ Emu Owọwọ na. Yọ oyena o jọ orọ ọsosuọ nọ a ro zizie ai dẹẹ. Uwou-Eroro Asa 1, 1938 o ta nọ: “Oware ovo o jariẹ thọ họ re inievo [nọ e rrọ usu igodẹ efa] na a kpohọ Emu Owọwọ na jẹ ruẹ oghẹrẹ nọ a re ru ei. . . . Eva e rẹ were ae re nọ a te kpohọ Emu Owọwọ na, yọ ere u gine fo nọ o rẹ jọ.” Nwane wọhọ epanọ eva e rẹ were ahwo nọ a zizie kpohọ ehaa orọo na, ere eva e rẹ were inievo nọ e rrọ usu igodẹ efa na nọ a te kpohọ Emu Owọwọ na dede nọ ae omarai a rẹ re ebrẹdi jẹ da udi na ha.

7. Fikieme ovuẹ Emu Owọwọ na o rẹ rọ were inievo nọ e rrọ igodẹ efa na gaga?

⁷ Emu Owọwọ na nọ inievo nọ e rrọ usu igodẹ efa na a rẹ nya o rẹ lẹliẹ ai roro kpahe ẹruore nọ ae omarai a wo re. Ovuẹ ogbotu nọ a rẹ kẹ evaọ oke Emu Owọwọ na o rẹ were ae gaga. A rẹ jariẹ ta ẹme ziezi kpahe obọdẹ eware nọ Jesu avọ ahwo idu udhuhrẹ-gbene (144,000) na a ti ru kẹ ahwo nọ a yoẹme evaọ oke  Esuo Odu-Ikpe na. Jesu Kristi avọ ahwo idu udhuhrẹ-gbene na a ti fiobọhọ ru otọakpọ na soso zihe ruọ aparadase je ru nọ ahwo nọ a yoẹme a te rọ jọ gbagba. Eva e rẹ were ima ahwo buobu nọ i wo ẹruore obọ otọakpọ obonẹ nọ a te kpohọ Emu Owọwọ na. A rẹ rọ uvẹ yena roro kpahe oke nọ eruẹaruẹ Ebaibol nọ e ta kpahe akpọ ọkpokpọ na i ti ro rugba. Ejọ rai e rrọ obe Aizaya 35:5, 6; 65:21-23; gbe Eviavia 21:3, 4. Nọ a ti roro kpahe eware nọ te ai te imoni rai a ti ru evaọ akpọ ọkpokpọ na, o te lẹliẹ eva were ae, yọ ẹrọwọ rai ọ te ga. U ti je ru nọ a te rọ gbaemu inọ oware ovo u re ru ae siọ Jihova ba ẹgọ họ.​—Mat. 24:13; Gal. 6:9.

8. Oware ofa vẹ o rẹ lẹliẹ inievo nọ e rrọ utu igodẹ efa na kpohọ Emu Owọwọ na?

⁸ Joma ta kpahe oware ofa nọ o rẹ lẹliẹ inievo nọ e rrọ igodẹ efa na kpohọ Emu Owọwọ na. Nọ a tẹ nya, yọ a bi dhesẹ nọ a you inievo nọ a rọ ẹzi wholo na gbe inọ a rrọ emu rai. Ebaibol o dhesẹ nọ Ileleikristi nọ a rọ ẹzi wholo na avọ enọ i wo ẹruore obọ otọakpọ obonẹ na a ti wo okugbe. Evaọ oghẹrẹ vẹ? Joma ta kpahe eria Ebaibol jọ.

9. Eme Zẹkaraya 8:23 o ta, nọ u ru omai riẹ usu nọ igodẹ efa na a wo kugbe enọ a rọ ẹzi wholo na?

⁹ Se Zẹkaraya 8:23. Eruẹaruẹ nọ e rrọ oria Ebaibol yena i dhesẹ oghẹrẹ nọ inievo nọ e rrọ igodẹ efa na a rri Ileleikristi nọ a rọ ẹzi wholo na. Enọ a rọ ẹzi wholo nọ i kiọkọ otọakpọ na eye a jọ oria Ebaibol yena se “ohwo Ju” gbe “owhai” na. (Rom 2:28, 29) Otu igodẹ efa na a jọ etẹe se “ezae ikpe evaọ evẹrẹ erẹwho na kpobi” na. A “zaza abọ mu” hayo talamu Ileleikristi nọ a rọ ẹzi wholo na. Aikpobi a be gọ Jihova kugbe. Nọ o rrọ ere na, otu igodẹ efa na a rẹ siọ Emu Owọwọ na ba ẹnya ha. Ere a re ro dhesẹ nọ a rrọ kugbe enọ a rọ ẹzi wholo na.

10. Ẹvẹ Jihova o bi ro ru eruẹaruẹ nọ e rrọ Izikiẹl 37:15-19, 24, 25 na gba?

¹⁰ Se Izikiẹl 37:15-19, 24, 25. Jihova Ọghẹnẹ o bi ru nọ eruẹaruẹ nọ e rrọ oria Ebaibol nana i bi ro rugba. O ru nọ Ileleikristi nọ a rọ ẹzi wholo na avọ igodẹ efa na a rọ rrọ ọvo je bi ru iruo kugbe. A jọ eruẹaruẹ na fodẹ imire ivẹ. Ikpodhiwu na a wọhọ umure nọ o rrọ “rọkẹ Juda” na (koyehọ, orua nọ ivie Izrẹl e jẹ hai no ze). Otu igodẹ efa na a tẹ wọhọ umure “Ifremu.” * Jihova o ti ku itu ivẹ nana kugbe re a jọ wọhọ “umure ọvo.” Oware nana u dhesẹ nọ eko ahwo ivẹ na a te gọ Jihova kugbe, yọ Jesu Kristi họ Ovie rai. Kukpe kukpe, Ileleikristi nọ a rọ ẹzi wholo na avọ inievo nọ e rrọ utu igodẹ efa na a re kpohọ Emu Owọwọ na kugbe wọhọ “uthuru ọvo, evaọ otọ othuru-igodẹ ọvo.”​—Jọn 10:16.

11. Oghẹrẹ vẹ “igodẹ” nọ a fodẹ evaọ Matiu 25:31-36, 40 na a be mai ro fiobọhọ kẹ inievo Kristi?

¹¹ Se Matiu 25:31-36, 40. “Igodẹ” nọ Jesu ọ fodẹ evaọ oria Ebaibol yena i dikihẹ kẹ ahwo nọ a kiẹrẹe, koyehọ utu igodẹ efa nọ e te jariẹ evaọ edẹ urere na. Ahwo nana a wo ẹruore obọ otọakpọ obonẹ. A bi fiobọhọ kẹ Ileleikristi nọ a rọ ẹzi wholo nọ i kiọkọ otọakpọ na, koyehọ inievo Jesu. Edhere nọ a be mai ro fiobọhọ kẹ ae họ, a bi lele ae ta usi uwoma je wuhrẹ ahwo evaọ akpọ na soso. Iruo nana yọ okolo iruo ho.​—Mat. 24:14; 28:19, 20.

12-13. Eme ọfa igodẹ efa na a bi ru ro fiobọhọ kẹ inievo Jesu?

¹² Kukpe kukpe, ekpoka jọ taure oke na  u te ti te, inievo nọ e rrọ utu igodẹ efa na a re lele enọ a rọ ẹzi wholo na zizie ahwo ziọ Emu Owọwọ na evaọ akpọ na soso. Onana yọ edhere jọ nọ a bi ro fiobọhọ kẹ ae. (Rri ẹkpẹti na “ Kọ Whọ be Ma Omaa Kpahe kẹ Emu Owọwọ na?”) Inievo nọ e rrọ utu igodẹ efa na evaọ akpọ na soso a rẹ jẹ ruẹrẹ eware kpahe kẹ Emu Owọwọ na re a sae jọ ukoko kpobi ru ei. A re ru ere o tẹ make rọnọ ikoko buobu i wo oniọvo ọvuọvo nọ ọ te re ebrẹdi jẹ da udi na ha. Eva e be were ae gaga inọ a be rọ enẹ fiobọhọ kẹ inievo Jesu. A riẹ nọ oware kpobi nọ a bi ru ro fiobọhọ kẹ inievo Jesu, yọ Jesu omariẹ a bi ru ei kẹ na.​—Mat. 25:37-40.

¹³ Eme ọfa o rẹ lẹliẹ omai kpohọ Emu Owọwọ na ghelọ ẹruore nọ ma wo kẹhẹ?

14. Ẹvẹ Jihova avọ Jesu a ro dhesẹ nọ a you omai gaga?

¹⁴ Ma re kpohọ Emu Owọwọ na keme uyoyou ulogbo nọ Jihova avọ Jesu a dhesẹ kẹ omai o da omai ẹro. U wo eware buobu nọ Jihova o ru kẹ omai no nọ u dhesẹ nọ o you omai. Onọ o mae rro họ, Ọmọ ọghaghae riẹ nọ o siobọno ze re ọ te ruẹ uye je whu fiki mai. (Jọn 3:16) Jesu omariẹ o te je dhesẹ nọ o you omai gaga. Ọ rọwo nọ o re whu fiki mai. (Jọn 15:13) U wo oware ovo nọ ma rẹ sai ru kẹ Jihova avọ Jesu hu nọ u re te oware nana nọ a ru kẹ omai na. Rekọ ma sae rọ oghẹrẹ nọ ma bi yeri uzuazọ mai kẹdẹ kẹdẹ dhesẹ nọ oware nọ a ru kẹ omai o da omai ẹro fia. (Kọl. 3:15) Emu Owọwọ na nọ ma rẹ nya yọ edhere ọfa jọ nọ ma re ro dhesẹ nọ ma be kareghẹhọ uyoyou nọ a wo kẹ omai, gbe nọ ma you rai re.

15. Fikieme ẹtanigbo na ọ rọ were enọ a rọ ẹzi wholo gbe igodẹ efa na?

¹⁵Idhe ẹtanigbo na ọ were omai gaga. (Mat. 20:28) Ẹtanigbo na ọ were ikpodhiwu na gaga, keme oye u ru nọ a te sai ro kpobọ odhiwu. Jihova o rri rai nọ a kiẹrẹe, ọ tẹ jẹ rehọ ae wọhọ emọ riẹ fiki ẹrọwọ nọ a fihọ idhe ẹtanigbo na. (Rom 5:1; 8:15-17, 23) Utu igodẹ efa na a bi yere Ọghẹnẹ gaga kẹ ẹtanigbo na re. Fikinọ a fi ẹrọwọ họ idhe ẹtanigbo na, Ọghẹnẹ ọ kuvẹ re a gọe dede nọ a re ru thọ ẹsejọ, u te je ru nọ a te rọ zọ evaọ oke “uye ulogbo na.” (Evia. 7:13-15) Nọ enọ a rọ ẹzi wholo na gbe igodẹ efa na a tẹ be hai kpohọ Emu Owọwọ na kukpe kukpe, yọ a bi dhesẹ re inọ idhe ẹtanigbo na o da rai ẹro fia.

16. Oware ofa vẹ o rẹ lẹliẹ omai kpohọ Emu Owọwọ na?

¹⁶ Oware ofa jọ nọ o rẹ lẹliẹ omai kpohọ Emu Owọwọ na họ, ma rẹ rọ ere dhesẹ nọ ma bi yoẹme kẹ Jesu. O tẹ make rọnọ ma wo ẹruore obọ odhiwu hayo obọ otọakpọ obonẹ, ma gwọlọ ru oware nọ Jesu ọ ta nọ ma ru evaọ aso ẹdẹ nọ o ro ru Emu Owọwọ na. Ọ ta nọ: “Wha hai ru onana rọ kareghẹhọ omẹ.”​—1 Kọr. 11:23, 24.

17. Ẹvẹ Emu Owọwọ na o re ro fiobọhọ kẹ omai si kẹle Jihova ziezi?

¹⁷U re ru omai si kẹle Jihova viere. (Jem. 4:8) Wọhọ epanọ ma wuhrẹ no na, ma rẹ rọ oke Emu Owọwọ na roro kpahe ẹruore nọ ma wo, gbe okpoware nọ Jihova o ru nọ u dhesẹ nọ o you omai gaga. (Jeri. 29:11; 1 Jọn 4:8-10) Ma tẹ be hai roro kpahe eware nọ Ọghẹnẹ o ti ru kẹ omai evaọ obaro, gbe uyoyou nọ o rẹ hiẹ hẹ nọ o wo kẹ omai, o rẹ lẹliẹ omai you rie viere je ru epanọ usu mai kugbei o rẹ rọ kpekpe ziezi.​—Rom 8:38, 39.

18. Eme ma te gwọlọ ru nọ ma tẹ be hai roro kpahe oware nọ Jesu o ru fiki mai?

 ¹⁸Ma te gwọlọ nọ ma rẹ rọ aro kele Jesu. (1 Pita 2:21) Edẹ jọ taure oke Emu Owọwọ na u te ti te, ma be hai se kpahe eware nọ Jesu o ru evaọ oka urere taure o te ti whu, uwhu riẹ, gbe ẹkparomatha riẹ. Yọ ovuẹ ogbotu nọ a rẹ kẹ evaọ Emu Owọwọ na u re fiobọhọ kẹ omai roro kpahe eware nọ Jesu o ru nọ u dhesẹ nọ o you omai gaga. (Ẹf. 5:2; 1 Jọn 3:16) Nọ ma bi se kpahe uye nọ o bẹ Jesu fiki mai je bi roro kpahe iẹe na, ma te gbaemu nọ ma “rẹ ruabọhọ nya wọhọ epanọ [ọyomariẹ] ọ nya.”​—1 Jọn 2:6.

19. Eme ma re ru re Ọghẹnẹ o you omai bẹdẹ bẹdẹ?

¹⁹Ma te gbaemu nọ ma te hai gbe ru oware nọ o rẹ lẹliẹ Jihova you omai. (Jud 20, 21) Ma tẹ be hae daoma yoẹme kẹ Ọghẹnẹ, ru oware nọ o rẹ wha ujiro se odẹ riẹ gbe oware nọ o rẹ lẹliẹ eva mai were iẹe ẹsikpobi, kiyọ eware nọ o re gbe ro you omai ma bi ru na. (Itẹ 27:11; Mat. 6:9; 1 Jọn 5:3) Ma tẹ be hai kpohọ Emu Owọwọ na, o rẹ lẹliẹ omai gbaemu nọ ma re ru eware nọ e rẹ were Jihova kẹdẹ kẹdẹ. O vẹ te wọhọ ẹsenọ ma be ta kẹ Jihova nọ, ‘Mẹ gwọlọ nọ who re you omẹ bẹdẹ bẹdẹ!’

20. Obọdẹ eware vẹ e rẹ lẹliẹ omai kpohọ Ekareghẹhọ uwhu Jesu na?

²⁰ Te ma wo ẹruore nọ ma ti kpobọ odhiwu, hayo ma te rọ otọakpọ na reuku, emamọ eware buobu e riẹ nọ ma rẹ rọ fiki riẹ kpohọ Emu Owọwọ na. Ma tẹ be hae jariẹ evaọ ẹdẹ Emu Owọwọ na, yọ ma be rọ ere kareghẹhọ uwhu Jesu Kristi, ọnọ ma you gaga na. Ma be jẹ rọ ere kareghẹhọ oware ulogbo nọ Jihova o ru ro dhesẹ nọ o you omai gaga, koyehọ Ọmọ riẹ nọ o vi ze ti whu kẹ omai. Yọ oyena o mae rro. Evaọ enukpe nana, a ti ru Emu Owọwọ na evaọ owọwọ Edisoi-Oka, Ane 15, 2022. Ma you Jihova avọ Jesu gaga. Fikiere, u wo oware ofa nọ o te jọ omai oja vi Emu Owọwọ na nọ ma rẹ nya ha.