1. Ẹvẹ ma sae rọ jọ kugbe Jihova?

MA RẸ gwọlọ jọ kugbe ahwo nọ ma you. Ezae-avọ-eyae nọ i you ohwohwo a rẹ gwọlọ ruẹrẹ oke jọ họ nọ aimava ọvo a rẹ rọ jọ kugbe. Izoge na a rẹ gwọlọ jọ kugbe egbẹnyusu rai re a gbe gbiku. Mai kpobi ma rẹ gwọlọ jọ kugbe inievo ukoko na, yọ ẹsikpobi nọ ma tẹ rrọ kugbe ai, eva e rẹ were omai. Rekọ ohwo nọ ma rẹ mae gwọlọ jọ kugbe họ Ọghẹnẹ. Re ma sae jọ kugbei, ma rẹ daoma se Ẹme riẹ, Ebaibol na, je roro didi kpahe oware nọ ọ gwọlọ gbe iruemu ezi riẹ. Ma rẹ rehọ oke nọ ma rẹ rọ jọ kugbe Jihova zaro vievie he.​—Ol. 139:17.

2. Fikieme ma sai ro roro nọ ma wo uvẹ nọ ma re ro ru eware nọ i re si omai kẹle Ọghẹnẹ hẹ?

² O rẹ were omai gaga re ma gine si kẹle Jihova. Rekọ ẹsejọ o rẹ lọhọ tere he. Ma re wo uvẹ tere he fiki eware nọ e vọ omai obọ. Fikiere o sae jọ bẹbẹ re ma wo uvẹ nọ ma rẹ rọ lẹ, se Ebaibol je ru eware efa nọ i re si omai kẹle Jihova ziezi. Okọ mai, epanọ ma rẹ rọ rẹrote uviuwou mai gbe eware efa nọ u fo nọ ma re ru e sae whae ze nọ ma gbe ro wo uvẹ ziezi hi. Ma ve ti roro nọ ma wo uvẹ nọ ma re ro se Ebaibol, lẹ je roro didi kpahe eware nọ ma wuhrẹ hẹ.

3. Oware ofa jọ vẹ u re ru nọ ma gbe ro wo uvẹ tere he?

³ Eware efa jọ e riẹ nọ i re ru nọ ma gbe ro wo uvẹ tere he, rekọ ma rẹ kake riẹ nọ eware na e be rehọ oke mai hi. Eware buobu e riẹ nọ u fo nọ ma re ru. Rekọ ma gbe rri otọ mu hu, e rẹ sae rehọ oke nọ ma re ro ru eware nọ i re fiobọhọ kẹ omai si kẹle Jihova. Wọhọ oriruo, ma rẹ gwọlọ ru eware nọ i re ru oma sasa omai, kpohọ ore, je serihọ. Dede nọ eware nana e thọ họ, e rẹ sai ru nọ ma gbe ro wo uvẹ ru eware nọ i re fiobọhọ kẹ omai si kẹle Jihova ziezi  hi. Joma kuvẹ re oware utionana o via ha.​—Itẹ 25:27; 1 Tim. 4:8.

4. Eme ma te ta kpahe evaọ uzoẹme nana?

⁴ Ma te jọ uzoẹme nana ta kpahe oware nọ o rọ roja re ma riẹ eware nọ u fo nọ ma rẹ rọ karo. Ma te jẹ ta kpahe epanọ ma sai ro ru uvẹ fihọ kẹ eware nọ e rẹ lẹliẹ omai si kẹle Jihova ziezi gbe erere nọ o re noi ze te omai.

5. Ẹvẹ ohrẹ nọ o rrọ Ahwo Ẹfisọs 5:15-17 o sai ro fiobọhọ kẹ uzoge riẹ oware nọ o te mae kẹe erere?

⁵Ru eware nọ e rẹ kẹ owhẹ uvẹ gọ Ọghẹnẹ. Izoge a re roro kpahe epanọ a sai ro wo iruo nọ a rẹ rọ rẹrote omarai ẹdẹfa nọ a te te ohwo no. Iticha rai gbe imoni rai nọ e rrọ ukoko na ha a sae vuẹ ae nọ a kpohọ isukulu ilogbo re a sai wo emamọ iruo nọ a rẹ jọ hwa ae okposa. A te ru ere, o sae whae ze nọ a gbe ti ro wo uvẹ nọ a sae rọ gọ Ọghẹnẹ ziezi hi. Rekọ esẹgbini rai gbe egbẹnyusu rai nọ e rrọ ukoko na a sae vuẹ ae nọ a daoma romakẹ egagọ Jihova ziezi. Ẹvẹ uzoge nọ o you Jihova ọ sae rọ riẹ oware nọ o te wha erere sei evaọ obaro? O te se obe Ahwo Ẹfisọs 5:15-17 jẹ romatotọ roro kpahe iẹe, u ti fiobọhọ kẹe. (Sei.) Jọ o se oria Ebaibol nana re ọ nọ omariẹ nọ: ‘Eme họ “oreva Jihova”? Eme me re ru nọ o te ginẹ were Jihova? Eme me ti ru nọ o te mae wha erere se omẹ ẹdẹfa?’ Kareghẹhọ nọ “edẹ na e rrọ muomu,” yọ Ọghẹnẹ ọ te raha akpọ nana nọ Ẹdhọ o bi su na kẹle na. Uzoge ọ tẹ ta nọ eware nọ e rẹ lẹliẹe si kẹle Jihova ziezi o re ru evaọ akpọ riẹ, je bi ru ai, yọ oware areghẹ o bi ru na.

6. Eme Meri o ru, kọ fikieme ma rọ ta nọ oware nọ o mai woma o ru na?

⁶Rehọ eware nọ e mae roja karo. Ẹsejọ nọ ma te wo eware ivẹ nọ ma gwọlọ ru, dede nọ eware ivẹ na e rrọ ziezi, ma rẹ nyasiọ ọjọ ba ma ve ru ọjọ. Oware nọ o via oke nọ Jesu o kpobọ uwou amọ Meri avọ Mata u dhesẹ nọ ere o rrọ. Eva e were Mata gaga inọ Jesu ọ nyaze te ruẹ e rai. Fikiere ọ tẹ jẹ dhogbo epanọ o re ro there obọdẹ emu jọ rọ ghọ Jesu. Nọ Mata o bi there emu na, yọ Meri ọ keria kẹle Jesu be gaviezọ kẹ ẹme nọ Jesu ọ be ta. Dede nọ emamọ oware Mata o je ru na, “Meri ọ salọ abọ nọ ọ mai woma.” (Luk 10:38-42, oruvẹ.) Ma riẹ nọ u te te oria jọ, emu nọ a re evaọ ẹdẹ yena ọ te thọrọ Meri ẹro no, rekọ ọ te gbẹ kareghẹhọ eware nọ Jesu o wuhrẹ i rie. Umuvẹ yena nọ Jesu ọ rọ jọ kugbe Meri na, Meri ọ rehọ e riẹ zaro vievie he. Fikiere ma rẹ rehọ oke nọ ma re ro si kẹle Jihova zaro vievie he. Eme o re dhesẹ nọ ma rọ oke yena zaro ho?

7. Fikieme u ro fo re ma ru uvẹ fihọ nọ ma rẹ rọ lẹ, se Ebaibol je roro didi kpahe eware nọ ma wuhrẹ?

⁷Kareghẹhọ nọ olẹ, Ebaibol nọ ma re se gbe eware nọ ma se nọ ma re roro kpahe yọ eware jọ nọ ma re ru evaọ egagọ mai. Olẹ ma rẹ rọ ta ẹme kẹ Ọsẹ obọ odhiwu mai nọ o you omai gaga na. (Ol. 5:7) Yọ ma te bi se Ebaibol na, ma re wo “eriariẹ Ọghẹnẹ” nọ ọ mai wo areghẹ na. (Itẹ 2:1-5) Ma te bi je roro didi kpahe eware nọ ma wuhrẹ, u re fiobọhọ kẹ omai riẹ iruemu nọ Ọghẹnẹ o wo. O rẹ jẹ kareghẹhọ omai emamọ eware nọ ọ gwọlọ ru kẹ omai gbe ahwo-akpọ kpobi. Kọ whọ gbẹ ruẹ nọ whọ tẹ be hae lẹ, se Ebaibol na je roro didi kpahe eware nọ who se, yọ eware nọ e mai wuzou whọ be rọ oke ra ru na? Ẹvẹ ma sai ro ru uvẹ fihọ nọ ma re ro ru eware nana?

8. Eme Jesu ọ jọ obọ udhude ru, kọ eme ma wuhrẹ noi ze?

 ⁸O tẹ lọhọ, kpohọ oria nọ edo ọ rrọ họ. Kareghẹhọ nọ Jesu ọ jọ obọ udhude edẹ udhuvẹ taure o te ti mu iruo odibọgba riẹ họ. (Luk 4:1, 2) Nọ orọnọ oria yena o jọ fọfọ na, ma riẹ nọ Jesu ọ te rọ uvẹ yena lẹ se Jihova ziezi jẹ romatotọ roro kpahe oware nọ Ọsẹ riẹ ọ gwọlọ nọ o ru. Oware nana nọ o ru na u ti fiobọhọ kẹe ruẹrẹ oma kpahe kẹ edawọ nọ i ti tei nọ o te mu iruo odibọgba riẹ họ no. Ẹvẹ whọ sae rọ rehọ aro kele Jesu? Otẹrọnọ ahwo buobu a rrọ uwou rai, ẹsejọhọ o te nwane lọhọ kẹ owhẹ tere ẹsikpobi hi re whọ ruẹ oria nọ edo ọ rrọ họ. Whọ sae gwọlọ oria nọ o foma evaọ obọ otafe. Ere oniọvo-ọmọtẹ jọ nọ a re se Julie o re ru nọ ọ tẹ gwọlọ lẹ. Obọ France tei te ọzae riẹ a be rria, yọ oria nọ a rrọ, edo o re noi hi. Oniọvo-ọmọtẹ na ọ ta nọ: “Kẹdẹ kẹdẹ me re kpohọ oria jọ nọ o kẹle omai, nọ edo ọ rẹ jọ họ. Etẹe mẹ rẹ nabe jọ roro ziezi jẹ lẹ se Jihova.”

9. Dede nọ Jesu ọ jẹ hai wo uvẹ hẹ, eme o ru nọ u dhesẹ nọ o rri usu riẹ avọ Jihova ghaghae?

⁹ Jesu ọ jẹ hai wo uvẹ vievie he. Ahwo a jẹ hai su lele iei no oria ruọ oria. Ẹsikpobi a jẹ hae gwọlọ inọ o ru oware jọ kẹ ae, yọ uvẹ o jariẹ hẹ. Oke jọ o tubẹ jariẹ nọ “okpẹwho na soso o . . . kokohọ obọ unuẹthẹ” oria nọ Jesu ọ jọ re a ruẹ e riẹ. O make jọ ere na, Jesu o ru uvẹ fihọ nọ o re ro ru eware nọ usu riẹ avọ Jihova o rẹ rọ jọ kpekpekpe. Ọ rọ irioke frifri kpohọ “oria nọ u siomano,” re ọ ruẹsi wo uvẹ nọ ọye ọvo ọ rẹ rọ jọ oria jẹ lẹ se Ọsẹ riẹ.​—Mak 1:32-35.

10-11. Wọhọ epanọ o rrọ Matiu 26:40, 41, ẹme vẹ Jesu ọ ta kẹ ilele riẹ nọ u wuzou gaga, kọ eme a ru ghele?

¹⁰ Evaọ aso urere taure Jesu o te ti whu, ọ wariẹ kpohọ oria nọ edo ọ jọ họ re ọ ruẹsi roro didi jẹ lẹ se Jihova. Obọ ọgbọ Gẹtsemane o kpohọ. (Mat. 26:36) Jesu ọ rọ uvẹ yena vuẹ ilele riẹ oware jọ nọ u wuzou gaga kpahe olẹ.

¹¹ Oware nọ o via ona. Nọ a te ọgbọ Gẹtsemane, yọ oke u thabọ gaga no. O tubẹ wọhọ nọ oke o vrẹ udevie aso no. Jesu ọ tẹ ta kẹ ikọ riẹ nọ jọ a “ruabọhọ erou.” Kẹsena ọyomariẹ ọ tẹ nyavrẹ kpohọ ofẹ ọfa nyae lẹ. (Mat. 26:37-39) Rekọ nọ Jesu ọ be lẹ na, ikọ riẹ e tẹ wezẹ vrẹ no. Nọ o zihe ze jẹ ruẹ nọ a be wezẹ, ọ tẹ rọwo ae jẹ wariẹ ta kẹ ae nọ jọ a “ruabọhọ erou jẹ hae lẹ ẹsikpobi.” (Se Matiu 26:40, 41.) Jesu o rri rai mu inọ uye o bẹ rai gaga no ẹdẹ yena, yọ oma o rrọ rai no. Ọ ta nọ “uwo na o ga ha.” Jesu o gine wo ohrọ gaga. Jesu ọ nyase ae ba te isiava efa nyae lẹ. Rekọ oke kpobi nọ o zihe ze, owezẹ  o je di ae họ, orọnọ olẹ hẹ.​—Mat. 26:42-45.

12. Otẹrọnọ ma be sae lẹ ziezi hi fiki oma nọ o rẹ rrọ omai no, eme ma rẹ sai ru?

¹²Hae lẹ evaọ oke nọ who rri nọ u fo. Ẹsejọ oma o rẹ sae rrọ omai te epanọ o rẹ rọ jọ bẹbẹ kẹ omai re ma lẹ. Otẹrọnọ oware utiona o via kẹ owhẹ no, riẹ nọ whẹ ọvo o be hae via kẹ hẹ. Rekọ, eme whọ rẹ sai ru nọ o tẹ via ere? U wo ahwo jọ nọ a fi oke olẹ rai họ aso taure a te ti kiẹzẹ. Rekọ a tẹ ruẹ nọ abọ owọwọ nọ owezẹ u ri ti mu ai họ esu hu na o mai woma. Amọfa a ruẹ nọ a tẹ nabi kigwẹ hayo keria kpomavi, u re fiobọhọ kẹ ai fi iroro họ olẹ na ziezi. Kinọ whọ tẹ be ruawa hayo oware ofa jọ o gbẹ be lẹliẹ olẹ ruọ owhẹ oma ha? Vuẹ Jihova epanọ oma o rrọ owhẹ. Jihova Ọsẹ obọ odhiwu mai nọ ọ rẹ re ohrọ gaga na o ti roro kẹ owhẹ.​—Ol. 139:4.

13. Ẹvẹ ifonu gbe eware itieye na efa e sai ro kpokpo omai nọ ma tẹ gwọlọ ru eware nọ i re si omai kẹle Jihova?

¹³Whọ jọ oware ovo u si iroro ra no oware nọ who bi wuhrẹ hẹ. Orọnọ olẹ ọvo họ oware nọ u re ru usu mai avọ Jihova kpekpe he. Ebaibol nọ ma re se gbe iwuhrẹ nọ ma rẹ nya i re fiobọhọ kẹ omai re. Eme who re ru re iroro ra e gbẹ dhẹ kpenẹ avọ enẹ hẹ nọ whọ tẹ rrọ obọ ewuhrẹ hayo nọ who te bi ru uwuhrẹ omobọ ra? Nọ omara nọ, ‘Eware vẹ e be hae whae ze nọ mẹ gbẹ rọ gaviezọ tere he nọ mẹ tẹ rrọ obọ ewuhrẹ hayo nọ me te bi ru uwuhrẹ omobọ mẹ?’ Ẹsejọhọ a re se owhẹ evaọ ifonu ra, hayo vi uwou se owhẹ nọ whọ tẹ rrọ obọ ewuhrẹ hayo nọ who te bi ru uwuhrẹ omobọ ra. Ahwo buobu a wo ifonu gbe eware itieye na efa, yọ orọnikọ u yoma ha. Rekọ ahwo jọ nọ a riẹ kpahe eware nana ziezi a ta nọ ifonu gbe eware itieye na efa e tẹ rrọ akotọ ra ọvo dede, iroro ra e rẹ gbẹ jọ obe nọ who bi se tere he. Ọgba-uwuhrẹ jọ ọ ta nọ: “Whọ rẹ gbẹ sai fi iroro họ oware nọ who bi ru na ziezi hi. Obọfa iroro ra e rẹ jọ.” Ma te kpohọ okokohọ, taure a te ti muhọ, ẹsibuobu a rẹ ta nọ ma ru ifonu mai fihọ oghẹrẹ nọ o gbe ro kpokpo amọfa ha. Kọ u gbe ti woma re ma ru ifonu mai fihọ oghẹrẹ nọ o gbe ro kpokpo omai hi nọ ma tẹ rrọ obọ ewuhrẹ hayo nọ ma tẹ gwọlọ ru uwuhrẹ omobọ mai?

14. Wọhọ epanọ o rrọ Ahwo Filipai 4:6, 7, ẹvẹ Jihova o re ro fiobọhọ kẹ omai nọ iroro mai i te bi kpenẹ avọ enẹ?

 ¹⁴Lẹ nọ Jihova o fiobọhọ kẹ owhẹ re iroro ra i gbe kpohọ obọfa ha. Who te bi ru uwuhrẹ omobọ ra hayo whọ rrọ obọ ewuhrẹ, rekọ whọ tẹ ruẹ nọ iroro ra e be jọ uwuhrẹ na ha, lẹ se Jihova re o fiobọhọ kẹ owhẹ. Uzẹme riẹ họ, oware jọ o tẹ be kẹ owhẹ uye, o te nwane lọhọ tere he re iroro ra e jọ ewuhrẹ na. Whaọ o roja gaga re iroro ra e jọ ewuhrẹ na. Fikiere lẹ se Jihova re o ru udu te owhẹ otọ je ru nọ oware ovo u gbe ro kpokpo “ogaga iroro” ra ha.​—Se Ahwo Filipai 4:6, 7.

15. Erere vẹ o re te omai nọ ma tẹ be hai se Ebaibol, lẹ je roro didi?

¹⁵ Who ti wo irere buobu nọ whọ tẹ be hai ru uvẹ fihọ re who se Ebaibol, lẹ se Jihova, je roro didi kpahe eware nọ who se. Orọ ọsosuọ, iroro nọ whọ te jẹ kpobi e te hae jọ ziezi. Ebaibol ọ vuẹ omai nọ “ọnọ o bi lele iwareghẹ nya usu o re wo areghẹ.” (Itẹ 13:20) Nọ orọnọ Jihova ọ mai wo areghẹ na, whọ tẹ be hae jọ kugbei, who ti wo areghẹ ziezi. Whọ te riẹ epanọ who re ro ru eware nọ e rẹ were iẹe jẹ whaha eware nọ e rẹ dhae eva.

16. Ma tẹ be hai se Ebaibol jẹ lẹ se Jihova, eme o ti noi ze?

¹⁶ Orọ avọ ivẹ, whọ te riẹ epanọ a re wuhrẹ amọfa ziezi. Oware jọ nọ u wuzou gaga nọ ma te bi wuhrẹ Ebaibol kugbe omọfa họ, epanọ ma re ro fiobọhọ kẹe re ọ jọ ogbẹnyusu Jihova. Ma tẹ be hai se Ebaibol na jẹ lẹ se Jihova ẹsikpobi, o te whae ze nọ ma ti ro you rie ziezi. Yọ ma te gine you Jihova gaga, ẹsiẹe ma te sai ro fiobọhọ kẹ ahwo nọ ma bi wuhrẹ re a you rie ziezi re. Nwanọ ere Jesu o ru. Nọ Jesu ọ tẹ be ta ẹme kpahe Jihova, whọ rẹ jọ uvou riẹ gbe eme nọ o bi ro dhesẹ Ọsẹ na ruẹ nọ o gine you rie gaga. Onana u ru nọ ikọ riẹ nọ e jọ kugbei te urere a ro you Jihova gaga re.​—Jọn 17:25, 26.

17. Fikieme ẹrọwọ mai ọ rẹ rọ ga nọ ma tẹ be hae lẹ je wuhrẹ Ebaibol na?

¹⁷ Orọ avọ esa, ẹrọwọ ra ọ te jọ gaga. Ẹsejọ whọ sae lẹ nọ Jihova o fiobọhọ kẹ owhẹ riẹ oware nọ who re ru nọ who te wo ẹbẹbẹ jọ, inọ ọ sasa owhẹ oma hayo ru oware jọ kẹ owhẹ. Yọ oke kpobi nọ Jihova ọ kuyo olẹ ra, ẹrọwọ ra ọ rẹ ga. (1 Jọn 5:15) Eme ọfa o rẹ sae lẹliẹ ẹrọwọ ra ga? Uwuhrẹ omobọ ra. Kọ eme o gbẹ jọ ere he? “Ohwo o re wo ẹrọwọ nọ o te yo kpahe oware no.” (Rom 10:17) Rekọ re ẹrọwọ ohwo ọ sae ga ziezi, orọnikọ o re wo eriariẹ fihọ uzou ọvo ho. Nọ o rrọ ere na, eme ọfa o re ru?

18. Kẹ oriruo jọ nọ u dhesẹ nọ o roja re ma hai roro didi.

 ¹⁸ O roja re ma hai roro didi kpahe eware nọ ma wuhrẹ. Fikieme? Joma ta kpahe oware nọ o via kẹ odibo Ọghẹnẹ nọ o kere Olezi avọ 77 na. O jẹ kẹe uye inọ o wọhọ nọ eva riẹ gbe ahwo Izrẹl nọ i kiọkọ e gbẹ be were Jihova ha. Makọ evaọ aso dede, ọ gbẹ jẹ sae wezẹ hẹ fiki iroro nana. (Owọ avọ 2-8) Kọ eme o ru? Ọ lẹ se Jihova nọ: “Me ti roro didi kpahe iruẹru ra kpobi jẹ romatotọ roro kpahe eware nọ who bi ru.” (Owọ avọ 12) Uzẹme riẹ họ, ọso-ilezi nana ọ riẹ kpahe eware buobu nọ Jihova o ru kẹ ahwo Izrẹl no evaọ oke nọ u kpemu. Rekọ ọ gbẹ jẹ ruawa ghele. Ọ jẹ ta kẹ omariẹ nọ: “Kọ Ọghẹnẹ ọ kpairoro vrẹ aruoriwo riẹ no, hayo kọ ofu riẹ o wha riẹ ze nọ o gbe bi dhesẹ ohrọ-oriọ họ?” (Owọ avọ 9) Rekọ ọso-ilezi na o te ti bruoma kpiroro. O te je roro kpahe oghẹrẹ nọ Jihova ọ rọ re ae ohrọ unuẹse buobu, eware nọ o bi ru gbe enọ o ru kẹ ae no evaọ oke nọ u kpemu. (Owọ avọ 11) Kọ eme o no rie ze? Ọso-ilezi na ọ tẹ te ruẹ nọ Jihova o re fi ahwo riẹ hotọ họ. (Owọ avọ 15) Epọvo na re, ẹrọwọ ra ọ te ga ziezi nọ who te bi roro didi kpahe eware nọ Jihova o ru kẹ idibo riẹ no evaọ oke nọ u kpemu gbe eware nọ o ru kẹ owhẹ omara na no.

19. Erere ọfa vẹ ma re wo nọ ma te bi ru eware nọ i re si omai kẹle Jihova?

¹⁹ Orọ avọ ene, who ti you Jihova vi epaọ anwẹdẹ kpobi, yọ oye o mai wuzou. Who te you Jihova, who ti koko izi riẹ, kpairoro vrẹ eware jọ fiki riẹ je thihakọ edawọ kpobi nọ i te owhẹ. Uyoyou o rẹ mae lẹliẹ ohwo ru eware nana. (Mat. 22:37-39; 1 Kọr. 13:4, 7; 1 Jọn 5:3) A rẹ ruẹ oware nọ u woma tei hi nọ ohwo ọ tẹ rrọ ogbẹnyusu ọkpekpe Jihova.​—Ol. 63:1-8.

20. Eme whọ gba riẹ mu nọ who ti ru re whọ hae lẹ, wuhrẹ Ebaibol je roro didi?

²⁰ Hae kareghẹhọ nọ olẹ, uwuhrẹ omobọ mai gbe eware nọ ma wuhrẹ nọ ma re roro kpahe didi yọ eware jọ nọ ma re ru evaọ egagọ mai. Wọhọ Jesu, hae gwọlọ oria nọ edo ọ rrọ họ re whọ jọ etẹe lẹ se Jihova. Who te kpohọ ewuhrẹ hayo bi ru uwuhrẹ omobọ ra, hae whaha eware nọ i re si iroro ra no uwuhrẹ na. Lẹ se Jihova re iroro ra e gbẹ dhẹ kpenẹ avọ enẹ hẹ. Whọ tẹ be rọ oke ra ruiruo evaọ edhere nọ ọ mai woma, whọ te rria bẹdẹ bẹdẹ evaọ akpọ ọkpokpọ nọ Jihova ọ ya eyaa riẹ na.​—Mak 4:24.