“IKPE 15 mẹ jọ evaọ okenọ mẹ rọ họ-ame, emerae ezeza nọ i lele i rie me te mu iruo ọkobaro obufihọ họ. Nọ ukpe ovo o vrẹ no, me te fi odẹ hotọ rọkẹ iruo ọkobaro oke-kpobi. Nọ me nwrotọ no ekọleji no, mẹ tẹ ta nọ mẹ gwọlọ kwa kpohọ ẹkwotọ nọ a mae jọ gwọlọ iwhowho-uvie. Mẹ jẹ gwọlọ nọ mẹ rẹ kwa no ẹwho nọ a jọ yẹ omẹ na, re mẹ nyasiọ oni mẹ ologbo ba, ọnọ me je lele rria nọ ọ jọ Osẹri Jihova ha. O kẹ omẹ uye gaga nọ ọsẹro okogho mai ọ vuẹ omẹ nọ ẹwho mẹ na ọ tẹ jọ ẹkwotọ usiuwoma ota mẹ. Mẹ daoma gba oma mẹ re ọ gbẹ riẹ epanọ ẹme na ọ jọ omẹ oma ha. Mẹ tẹ nyavrẹ avọ uzou nọ me gbe hotọ bi roro kpahe ẹme nọ ọsẹro okogho na ọ vuẹ omẹ na. Mẹ ta kẹ oniọvo-ọmọtẹ nọ ma gbẹ jọ usiuwoma ota nọ: ‘O wọhọ nọ me bi ru wọhọ Jona. Rekọ ukuhọ riẹ, Jona o kpobọ Ninẹve. Fikiere, mẹ te jọ ẹkwotọ nọ a kẹ omẹ na ta usiuwoma.’

“Mẹ jọ ẹwho na ru iruo ọkobaro na te ikpe ene no enẹna, yọ mẹ ruẹ epanọ u woma te inọ me ru lele ọkpọvio nọ a kẹ omẹ na. Uruemu nọ mẹ kaki dhesẹ o jọ ẹbẹbẹ na. Eva e be were omẹ ziezi enẹna. Evaọ amara ọvo, mẹ be daoma wuhrẹ emọ-uwuhrẹ Ebaibol 24. Me yeri Jihova gaga, me tube mu obe uwuhrẹ Ebaibol họ kugbe oni mẹ ologbo nọ ọ jẹ wọsuọ omẹ vẹre.”

U wo okejọ nọ o rọ gwọlọ nọ ọmọ-uwuhrẹ Ebaibol jọ evaọ obọ Fiji ọ rẹ salọ sọ o re kpohọ okokohọ hayo lele ọzae riẹ kpohọ ehaa ẹdẹ-eyẹ omoni rai jọ. Ọzae riẹ ọ kẹ riẹ uvẹ re o kpohọ okokohọ na. Kẹsena ọ tẹ ta kẹ ọzae riẹ nọ ọ sai kuomagbe ae nọ o te no okokohọ na kpozi no. Rekọ nọ o no okokohọ na te uwou no, ọ tẹ ta kẹ omariẹ nọ o te mai woma re ọ whaha uyero nọ o rẹ sai fi ẹrọwọ riẹ họ odawọ, fikiere o gbe kpohọ ehaa na ha.

Nọ ọzae riẹ ọ ta kẹ imoni riẹ nọ, ọ kẹ aye riẹ uvẹ kpohọ “ewuhrẹ Isẹri” inọ o ti kuomagbe ae ẹsiẹfa nọ o te zihe ze no, a tẹ kpahe kẹe nọ, “Ọ te nyaze he; Isẹri Jihova a re ru ehaa ẹdẹ-eyẹ hẹ!” *

Eva e tẹ were ọzae riẹ gaga inọ aye riẹ o kru orọwọ riẹ ga je ru lele obruoziẹ-iroro riẹ evaọ ẹme nana. Obọdẹ edikihẹ riẹ na u rovie uvẹ nọ aye na ọ rọ ta usiuwoma kẹ ọzae riẹ gbe amọfa. Eme o no rie ze? Ọzae na ọ jẹ uwuhrẹ Ebaibol rehọ je bi kuomagbe aye riẹ kpohọ iwuhrẹ ukoko na.