1. Eme Jihova ọ ta nọ Adamu avọ Ivi a nwane raha uzi no? (Emuhọ 3:15)

 NỌ Adamu avọ Ivi a nwane raha uzi no, Jihova ọ tẹ ta ẹme jọ nọ u dhesẹ nọ emọ rai a ti wo ẹruore. A kere ẹme na fihọ obe Emuhọ 3:15.—Sei.

2. Fikieme eruẹaruẹ nọ e rrọ Emuhọ 3:15 na i ro wuzou gaga?

² Obe ọsosuọ Ebaibol na eruẹaruẹ na e rrọ. Eruẹaruẹ nọ i kiọkọ evaọ Ebaibol na e jẹhọ eruẹaruẹ nana. Wọhọ epanọ a rẹ rọ ifi gba ire kugbe re e jọ ekru ọvo na, ere eruẹaruẹ nọ e rrọ Emuhọ 3:15 na e gba eme nọ e rrọ Ebaibol na kugbe fihọ ẹme ọvo. Ẹme yena họ, Ọghẹnẹ o ti vi ohwo jọ ze nọ ọ te raha Ẹdhọ avọ ahwo kpobi nọ e rrọ abọ riẹ no. * Ahwo kpobi nọ a you Jihova a te ghọghọ nọ a tẹ raha Ẹdhọ avọ ahwo riẹ no.

3. Eme ma te ta kpahe evaọ uzoẹme nana?

³ Ma te jọ uzoẹme nana kẹ iyo enọ esa jọ nọ ma rẹ sae nọ kpahe eruẹaruẹ nọ e rrọ obe Emuhọ 3:15 na. Eye họ: Amono a ta kpahe evaọ eruẹaruẹ na? Oghẹrẹ vẹ eruẹaruẹ na i bi ro rugba? Kọ ẹvẹ eruẹaruẹ na e be rọ kẹ omai erere?

4. Ono họ araomuomu na, kọ ẹvẹ ma rọ riẹ?

⁴ A jọ eruẹaruẹ nọ e rrọ Emuhọ 3:15 na ta kpahe “araomuomu”  na, “ọmọ” araomuomu na, “aye” na, gbe “ọmọ” aye na. Ebaibol na o ru nọ ma rọ riẹ oware nọ aikpobi na a dikihẹ kẹ. * Joma kake ta kpahe “araomuomu na.” Ma riẹ nọ araomuomu gheghe o wo areghẹ nọ ọ sae rọ riẹ ẹme nọ Jihova ọ ta evaọ ọgbọ Idẹn na ha. Fikiere ma riẹ nọ araomuomu gheghe Jihova ọ jẹ ta ẹme kẹ na ha, rekọ ohwo jọ. Ono ọye? Eviavia 12:9 o fiobọhọ kẹ omai riẹ ohwo na. Etẹe ọ ta nọ Setan Ẹdhọ na họ “araomuomu anwae na.” Kọ ono họ ọmọ araomuomu na?

5. Amono họ ọmọ araomuomu na?

⁵ Ẹsejọ nọ a tẹ jọ Ebaibol se ohwo ọmọ ohwo jọ, ẹme nọ a be ta na họ, ohwo na ọ be rọ aro kele ohwo nọ a se ọsẹ riẹ na. Fikiere ọmọ araomuomu na họ ikọ-odhiwu gbe ahwo kpobi nọ a be wọso Jihova Ọghẹnẹ gbe idibo riẹ wọhọ epanọ Setan o bi ru na. Ikọ-odhiwu nọ e nyasiọ iruo rai ba ziọ otọakpọ obonẹ evaọ oke Noa na a rrọ usu rai re. Ahwo omuomu kpobi nọ a be rọ aro kele Ẹdhọ a tẹ jẹ rrọ usu rai.—Emu. 6:1, 2; Jọn 8:44; 1 Jọn 5:19; Jud 6.

6. Ẹvẹ ma rọ riẹ nọ Ivi họ “aye na” ha?

⁶ Obọnana joma ta kpahe “aye na.” Ma riẹ nọ Ivi họ aye na ha. Fikieme ma rọ ta ere? Orọ ọsosuọ, eruẹaruẹ na e ta nọ ọmọ aye na ọ te “whọlọ” uzou araomuomu na no. Yọ wọhọ epanọ ma ta no vẹre na, Setan Ẹdhọ na họ araomuomu na. Whaọ Ẹdhọ yọ omama ẹzi. Ivi ọ sai yẹ ọmọ ọvuọvo nọ o ti wo ogaga nọ ọ sai ro kpe Ẹdhọ no ho. Fikiere orọnọ ọmọ Ivi ọye ọ te raha Ẹdhọ họ.

7. Wọhọ epanọ o rrọ Eviavia 12:1, 2, 5, 10, ono aye nọ a fodẹ evaọ Emuhọ 3:15 na o dikihẹ kẹ?

 ⁷ Ẹme nọ obe Eviavia o ta u fiobọhọ kẹ omai riẹ ohwo nọ aye nọ a ta ẹme kpahe evaọ obe Emuhọ 3:15 na o dikihẹ kẹ. (Se Eviavia 12:1, 2, 5, 10.) Aye nana yọ aye gheghe he. A jọ oria Ebaibol yena ta nọ ọvẹre ọ rrọ otọ awọ riẹ, yọ etu-uvie nọ o wo isi ikpegbivẹ o rrọ uzou riẹ. O yẹ ọmọ jọ nọ o wo ohẹriẹ no emọ efa kpobi. Ọmọ na họ Uvie Ọghẹnẹ. Nọ orọnọ obọ odhiwu Uvie Ọghẹnẹ o rrọ na, koyehọ obei aye na ọ rrọ re. Aye nana o dikihẹ kẹ abọ ukoko Ọghẹnẹ nọ ọ rrọ obọ odhiwu, koyehọ ikọ-odhiwu nọ i bi yoẹme kẹ Ọghẹnẹ.—Gal. 4:26.

8. Ono họ uzedhe ọmọ aye na, kọ oke vẹ o ro zihe ruọ ọmọ aye na? (Emuhọ 22:15-18)

⁸ Ebaibol o te je fiobọhọ kẹ omai riẹ ohwo nọ ọ rrọ uzedhe ọmọ aye na. Ọghẹnẹ ọ ta nọ uyẹ Abraham o ti no ze. (Se Emuhọ 22:15-18.) Yọ uyẹ Abraham Jesu o gine no ze. (Luk 3:23, 34) Rekọ orọnọ ohwo-akpọ ọmọ aye na ọ te jọ rifihọ họ keme a ruẹaro nọ ọ te raha Setan Ẹdhọ no. Fikiere nọ Jesu ọ kpako te oware wọhọ ikpe ọgba no, Ọghẹnẹ ọ tẹ rọ ẹzi ọfuafo riẹ wholo iei. O tẹ whae ze nọ Jesu ọ rọ rrọ uzedhe ọmọ aye na. (Gal. 3:16) Nọ Jesu o whu no, Ọghẹnẹ ọ tẹ kpare iẹe kpobọ odhiwu. Ọ tẹ “rehọ oruaro gbe ọghọ ro tu ei uzou,” jẹ kẹe “udu-esuo kpobi . . . evaọ odhiwu gbe otọakpọ na,” avọ udu nọ ọ rẹ rọ “raha iruo Ẹdhọ” no.—Hib. 2:7; Mat. 28:18; 1 Jọn 3:8.

9-10. (a) Amono ọfa họ emọ aye na, kọ ẹvẹ a re ro zihe ruọ emọ aye na? (b) Eme ọfa ma te ta kpahe?

⁹ U te no Jesu no, amọfa jọ a te jọ emọ aye na re. Pọl ukọ na ọ ta kpahe ae oke nọ ọ vuẹ Ileleikristi ahwo Ju gbe erọ erẹwho efa inọ: “Otẹrọnọ wha rrọ erọ Kristi, whai ginọ emọ Abraham, ereuku fiki eyaa.” (Gal. 3:28, 29) Onana u dhesẹ nọ Jihova ọ tẹ rọ ẹzi riẹ wholo Oleleikristi, Oleleikristi yena o re zihe ruọ ọmọ aye na. Fikiere emọ aye na họ Jesu Kristi gbe ahwo idu udhuhrẹ-gbene (144,000) nọ i ti lele iei su na. (Evia. 14:1) Aikpobi na a be rọ aro kele Ọsẹ rai Jihova Ọghẹnẹ.

¹⁰ Nọ ma riẹ ahwo nọ a jọ obe Emuhọ 3:15 ta kpahe no na, joma ta kpahe epanọ Jihova o bi ro ru eruẹaruẹ nana gba ẹmẹrera gbe epanọ o be rọ kẹ omai erere.

11. Oghẹrẹ vẹ a rọ rowo ọmọ aye na “ethihrowọ”?

¹¹ Eruẹaruẹ nọ e rrọ obe Emuhọ 3:15 na i dhesẹ nọ araomuomu na ọ te rowo ọmọ aye na “ethihrowọ.” Onana u rugba evaọ oke nọ Setan o ru nọ ahwo Ju avọ ahwo Rom a ro kpe Ọmọ Ọghẹnẹ. (Luk 23:13, 20-24) Wọhọ epanọ ohwo ọ rẹ sae nya ha evaọ omoke jọ nọ ọ tẹ nwoma evaọ ethihrowọ na, ere ọvona uwhu Jesu u ru nọ ọ gbẹ jẹ sai ru iruo ho evaọ omoke jọ, ọ jọ evaọ uki edẹ esa.—Mat. 16:21

12. Oke vẹ a te rọ whọlọ uzou araomuomu na, kọ ẹvẹ a ti ro ru ei?

¹² Re eruẹaruẹ nọ e rrọ obe Emuhọ 3:15 na e sai rugba, a rẹ kpare Jesu no uki ze. Fikieme ma rọ ta ere? Keme eruẹaruẹ na e ta nọ ọmọ aye na ọ te whọlọ araomuomu na uzou. Onana u dhesẹ nọ oma nọ Jesu ọ nwa evaọ ethihrowọ na o ti kpo. Yọ o gine kpo! Evaọ ẹdẹ avọ  esa, Ọghẹnẹ ọ kpare riẹ ze, yọ oma ẹzi nọ u re whu hu ọ rọ kpare iẹe ze. Nọ oke nọ Ọghẹnẹ o fihọ o te te, Jesu ọ te raha Setan no. (Hib. 2:14) Enọ i ti lele Jesu su na a ti kuomagbei kpe ewegrẹ Ọghẹnẹ, koyehọ emọ araomuomu na kpobi no otọakpọ na no.—Evia. 17:14; 20:4, 10. *

13. Ẹvẹ eruẹaruẹ na nọ i bi rugba na e be rọ kẹ omai erere?

¹³ Otẹrọnọ whẹ yọ odibo Ọghẹnẹ, irere jọ i bi te owhẹ evaọ eruẹaruẹ nana nọ i bi rugba na. Nọ Jesu ọ ziọ otọakpọ na, a yẹ riẹ wọhọ ohwo-akpọ. O je ru eware kpobi wọhọ epanọ Ọsẹ riẹ o re ru. (Jọn 14:9) Onana u ru nọ ma rọ riẹ Jihova Ọghẹnẹ je you rie. Yọ oghẹrẹ nọ Jesu o bi ro wuhrẹ omai je dhesẹ edhere kẹ omai evaọ ukoko na nẹnẹ, o be kẹ omai erere. O wuhrẹ omai eware nọ u fo nọ ma re ru no re ma sai ru eva were Jihova. U te no ere no, uwhu Jesu nọ o wọhọ omonwa ethihrowọ na o be kẹ omai erere. Evaọ oghẹrẹ vẹ? Nọ Jesu ọ kparoma kpobọ odhiwu no, Jihova ọ tẹ be rehọ fiki azẹ riẹ nọ o ro dheidhe na ro “ru omai fo no uzioraha kpobi.”—1 Jọn 1:7.

14. Ẹvẹ ma rọ riẹ nọ ẹme nọ Ọghẹnẹ ọ ta evaọ ọgbọ Idẹn na o ti rugba okioke yena ha?

¹⁴ Ma te rri eme nọ Jihova ọ ta evaọ ọgbọ Idẹn na, ma rẹ ruẹ nọ u ti lehie omojọ re eruẹaruẹ na i te ti rugba. Wọhọ oriruo, u ti lehie omojọ re aye na o te ti yẹ ọmọ nọ a ruẹaro riẹ na, re Ẹdhọ o te ti wo ahwo nọ a te jọ abọ riẹ, gbe re egrẹ ọ tẹ te jọ udevie itu ahwo ivẹ na. Eruẹaruẹ nana nọ ma riẹ na o be kẹ omai erere keme i ru nọ ma rọ riẹ nọ Setan o ti ru nọ ahwo a ti ro mukpahe idibo Jihova. Jesu ọ vuẹ ilele riẹ onana re. (Mak 13:13; Jọn 17:14) A bi gine mukpahe idibo Ọghẹnẹ wọhọ epanọ a ruẹaro riẹ na, mae ga kọ anwọ ikpe udhusoi (100) nọ i kpemu na. Ẹvẹ a bi ro ru ei?

15. Eme o soriẹ ze nọ ahwo a bi ro mukpahe omai gaga na, kọ fikieme ma gbẹ be dhozọ Setan he?

¹⁵ Nọ a rọ Jesu mu Ovie no evaọ ukpe 1914, u gbe kri hi, a te le Setan no obọ odhiwu ziọ otọakpọ. Obọnana ọ gbẹ sai no otọakpọ na kpohọ oria ofa ha, uwhu riẹ ọvo ọ be hẹrẹ. (Evia. 12:9, 12) Rekọ orọnọ ọ keria be hẹrẹ uwhu riẹ hẹ. Ofu o bi mu ei gaga, yọ ọ be waro ku ahwo Ọghẹnẹ. (Evia. 12:13, 17) Oye o soriẹ ze nọ ahwo a bi ro mukpahe idibo Ọghẹnẹ gaga na. Rekọ ozọ Setan avọ ahwo riẹ u bi mu omai hi. Ẹme nọ Pọl ukọ na o kere u mu omai ẹro. O kere nọ: “Ọghẹnẹ ọ tẹ rrọ abọ mai, ono ọ rẹ sae rọsuọ omai?” (Rom 8:31) Ma fievahọ Jihova keme ma ruẹ nọ eware buobu nọ ọ ta evaọ obe Emuhọ 3:15 na i rugba no.

16-18. Ẹvẹ eruẹaruẹ nọ e rrọ Emuhọ 3:15 nọ Curtis, Ursula, gbe Jessica a wuhrẹ u ro fiobọhọ kẹ ae?

¹⁶ Eyaa nọ Jihova ọ ya evaọ obe Emuhọ 3:15 na o sai fiobọhọ kẹ omai thihakọ ebẹbẹ kpobi nọ i te omai. Oniọvo jọ nọ a re se Curtis nọ ọ rrọ imishọnare evaọ obọ Guam ọ ta nọ: “Ebẹbẹ buobu i te omẹ no anwẹnọ mẹ be rọ gọ Jihova na. Rekọ eruẹaruẹ nọ e rrọ obe Emuhọ 3:15 na nọ me roro didi kpahe u fiobọhọ kẹ omẹ fievahọ Ọsẹ obọ odhiwu  mẹ.” Oniọvo nana o bi rẹro oke nọ Jihova o ti ro ku ebẹbẹ mai kpobi họ.

¹⁷ Oniọvo-ọmọtẹ jọ nọ a re se Ursula evaọ obọ Bavaria ọ ta nọ eruẹaruẹ obe Emuhọ 3:15 na nọ ọ riẹ na i fiobọhọ kẹe ruẹ vevẹ nọ, Ebaibol na, ginọ ẹzi Ọghẹnẹ a ro kere iei. Eware efa kpobi nọ e rrọ Ebaibol na e jẹhọ eruẹaruẹ nọ e rrọ obe Emuhọ 3:15 na. Yọ onana o were riẹ gaga. Ọ ta nọ: “Eva e were omẹ gaga inọ Jihova o ru oware jọ vẹrẹ vẹrẹ re ahwo-akpọ a sai wo ẹruore.”

¹⁸ Jessica nọ ọ rrọ obọ Micronesia ọ ta nọ: “Mẹ gbẹ be kareghẹhọ epanọ eva e were omẹ te oke nọ a mu omẹ Ebaibol họ ewuhrẹ obọ. Mẹ ruẹ nọ eruẹaruẹ nọ e rrọ obe Emuhọ 3:15 na i bi rugba. Yọ o lẹliẹ omẹ be hae kareghẹhọ nọ orọnikọ uzuazọ nọ ma bi yeri nẹnẹ na họ uvi uzuazọ na ha. Eruẹaruẹ na e tẹ jẹ lẹliẹ omẹ ruẹ nọ mẹ tẹ gwọlọ yeri emamọ uzuazọ enẹna, je wo emamọ uzuazọ evaọ obaro, Jihova mẹ rẹ gọ.”

19. Ẹvẹ u ro mu omai ẹro nọ abọ nọ o kiọkọ evaọ eruẹaruẹ na o ti rugba?

¹⁹ Ma jọ uzoẹme nana wuhrẹ no inọ ẹme nọ ọ rrọ obe Emuhọ 3:15 na o bi rugba nẹnẹ. Ma riẹ ohwo nọ ọmọ aye na gbe ọmọ araomuomu na a dikihẹ kẹ no. Jesu họ uzedhe ọmọ aye na, yọ oma nọ ọ nwa evaọ ethihrowọ na o kpo no. Obọnana o zihe ruọ Ovie ologbo nọ o re whu hu no. Amọfa nọ avọ iẹe a gbẹ rrọ emọ aye na họ Ileleikristi nọ i ti kpobọ odhiwu na, yọ a joma salọ ae gba no. Nọ orọnọ abọ ọsosuọ eruẹaruẹ na o rugba no na, ma riẹ nọ abọ nọ o kiọkọ evaọ eruẹaruẹ na o te seba erugba ha, onọ o ta nọ a te whọlọ araomuomu na uzou na. Nọ a tẹ raha Setan no, idibo Ọghẹnẹ kpobi a te ghọghọ. Re oke yena o te ti te, joma gbe thihakọ. Joma fievahọ Ọghẹnẹ inọ o ti ru eyaa riẹ kpobi gba. Ọ te rehọ ọmọ aye na kẹ “erẹwho otọakpọ na kpobi” eghale buobu.—Emu. 22:18.